“Tuli Ai Pe ki he Meʻa ʻOku Lelei”
1 ʻOku kau ki he founga moʻui faka-Kalisitiané ʻa e ‘tuli ai pe ki he meʻa ʻoku lelei maʻá e kakai kotoa pe.’ (1 Tes. 5:15) ʻI hono maʻu ʻetau ngaahi fakataha-lahi fakavahé, ʻoku tau maʻu ai ʻa e ngaahi faingamālie lahi ke fai ai ha meʻa lelei maʻá e niʻihi kehé. ʻI he ngaahi tuʻunga ko iá, ʻoku fakatokangaʻi ai kitautolu ʻe he kakaí, pea ko e faʻahinga kotoa ʻoku tau fakafeʻiloakí ʻoku nau ʻomai ha ngaahi fakakaukau fekauʻaki mo kitautolu ʻo makatuʻunga ʻi he founga ʻo ʻetau fakafeangai kiate kinautolú. Ke tauhi maʻu ha ongoongo lelei ʻi he tuʻunga ko e Kau Fakamoʻoni ʻa Sihová, ʻoku fiemaʻu ke tau fakahaaʻi ʻi heʻetau ngaahi ngāué ʻoku tau “fakaʻapaʻapa ki he tangata taki taha.” (1 Pita 2:17) ʻOku kau ki ai ʻa e ‘ʻoua naʻa taki taha tokanga ki he meʻa ʻatautolú pe, ka ki he meʻa ʻa e kakai kehé foki.’ (Fili. 2:4) Lāulea ki he founga ʻe ngāueʻaki ai ʻeni ki he ngaahi fokotuʻutuʻu nofoʻanga ki he fakataha-lahí.
2 Kuó ke ʻosi fai hoʻo ngaahi taʻofi mōtelé? (1) Koeʻuhi ʻoku fiemaʻu ʻe he mōtelé ke fakafonu kotoa ʻa e ngaahi loki ʻoku ala maʻú, ʻoua ʻe taʻofi ha ngaahi loki lahi ange ia ʻi he meʻa ʻokú ke palani ke ngāueʻakí. (2) ʻOua te ke ʻamanekina ʻe taʻofi ʻe he mōtelé hao loki kae ʻoua kuó ke fai ha totongi tipōsiti feʻunga ki muʻa ke aʻu ki aí. (3) ʻI he taimi ʻokú ke lēsisita ai ke nofo ʻi he mōtelé, fakahāhā ʻa e kātaki mo e fakaʻapaʻapa ki he kau ngāue mōtelé ʻi heʻenau feinga ke tokoni kiate koé. (4) Kapau ʻoku kau ai ha kai pongipongi taʻetotongi, ʻoua ʻe ngāuetaʻetotonuʻaki ʻa e tokonaki ko ʻení, ʻa ia ʻoku ʻai pē maʻá e kau ʻaʻahi ʻi he mōtelé. (5) Talangofua ki he ngaahi tuʻutuʻuni kotoa ʻa e mōtelé fekauʻaki mo hono ngāueʻaki ʻa hono ngaahi falé.
3 Akoʻi ʻa e Fānaú ki he Founga ke Failelei Aí: ʻI ha taimi, kuo fakatupunga ʻi he ngaahi mōtelé ʻe he fānau kuo liʻaki ʻo ʻikai ha fakahinohino totonu ʻe he kakai lalahí ha ngaahi palopalema. (Pal. 29:15) ʻI he ngaahi tuʻunga ʻe niʻihi, naʻe kau ai ʻa e ngaahi mātuʻá ki ha ngaahi ngāue kehe kae tuku taʻetokangaʻi ʻenau fānaú ʻi he lokí, ʻi he vai kaukaú, pe ʻi ha feituʻu kehe ʻi he mōtelé. Kuo hoko ʻa e fānau ʻe niʻihi ʻo fuʻu pauʻu longoaʻa ʻo ʻilo ai ʻe he faʻahinga ʻoku nau pule ki he mōtelé ʻoku fiemaʻu ke fakangatangata kinautolu mei hono ngāueʻaki ha ngaahi feituʻu pau pe pau ke tāpuni fakaʻaufuli ʻa e vai kaukaú pe ko e ngaahi feituʻu faiʻanga fakafiefia kehé. ʻE fakahohaʻasi mo fakafaingataʻaʻiaʻi ai ʻa e kau nofo kehe ʻi he mōtelé, fakatouʻosi ʻa e Kau Fakamoʻoní mo e ʻikai ha Fakamoʻoní.
4 Ngaahi mātuʻa, ki muʻa ʻi he fakataha-lahí, ʻe ʻaonga kapau te mou fakamoleki ha taimi ʻi hono fakamanatu mo hoʻomou fānaú ʻa e faʻahinga ʻulungaanga faka-Kalisitiane ʻoku ʻamanekina meiate kinautolú ʻi he taimi kotoa pē pea ʻi he feituʻu kotoa pē. (Ef. 6:4) Ko e fakatātaá, tala ange kiate kinautolu ko e ʻofa faka-Kalisitiane moʻoní “ʻoku ʻikai te ne fai taʻetāu, ʻoku ʻikai te ne kumi ʻene lelei aʻana, ʻoku ʻikai te ne fakaʻita.” (1 Kol. 13:5) ʻE lava ke fakaivimālohiʻi ʻe he kakai lalahí ʻa e ngaahi leá ni ʻaki hono fokotuʻu ha faʻifaʻitakiʻanga totonu ki he tokotaha kotoa ke nau sio ki ai. Fānau, ʻe lava ke mou tuli ki he meʻa ʻoku leleí ʻaki ʻa e talangofua ki hoʻomou ngaahi mātuʻá, fakahaaʻi ʻa e tokaʻi ʻo e koloa ʻa e mōtelé, pea fakaʻatuʻi ʻa e faʻahinga takatakai ʻiate kimoutolú. (Kol. 3:20) ʻI heʻetau feinga fāʻūtaha ke fai ʻa e meʻa ʻoku lelei ki he tokotaha kotoa pē, ʻoku tau “fakaogolelei ae akonaki oe Otua, ko ho tau Fakamoui, i he mea kotoabe.”—Tai. 2:10, PM.
5 ʻE ʻi ai ha ola lelei ʻo ʻetau ʻulungaanga leleí ʻo ʻikai ki he kau mamatá fakalūkufua pē kae toe pehē foki ki he faʻahinga kuo nau fakaangaʻi kitautolu ʻi ha ngaahi ʻuhinga kehekehe. ʻI he meʻa kotoa pē ʻoku tau fai ʻi he fakataha-lahí pea ʻi he kotoa ʻo e kolo faiʻanga fakataha-lahí—pe ko e luelue ʻi he halá, kai ʻi ha falekai, mālōlō ʻi he mōtelé, pe ko hano ngāue ʻaonga ʻaki ha ngaahi faingamālie ke faifakamoʻoni ʻi he founga ʻikai anga-mahení—ʻoku totonu ke fakamoʻoniʻi ʻe heʻetau leá mo e ngaahi ngāue faka-Kalisitiané ʻoku tau loto ke tuli ki he meʻa ʻoku leleí.
[Puha ʻi he peesi 4]
Kātaki ʻo Manatuʻi:
■ Anga-kātaki pea fakaʻapaʻapa ki he kau ngāue mōtelé.
■ Talangofua ki he ngaahi tuʻutuʻuni ʻa e mōtelé, ke ʻaonga ki he kau ʻaʻahi kotoa pē.
■ ʻOua ʻe ngāuetaʻetotonuʻaki ʻa e ngaahi tokonaki kai pongipongi taʻetotongí.
■ Tokangaʻi lelei ʻa e ngaahi tōʻonga ʻo hoʻomou fānaú.