Hoko ko ha Faʻifaʻitakiʻanga ʻi he Ngaahi Ngāue Leleí
1. Ko e hā ʻoku fiemaʻu ai ke tau lāuʻilo tautefito ki hotau ʻulungāngá ʻi he fakataha-lahi fakavahé?
1 ʻI he taimi ʻoku tau fakatahataha tokolahi ai ʻi he ngaahi fakataha-lahi fakavahé, ko e anga ʻo ʻetau tōʻongá mo e anga ʻo ʻetau tōʻongafai ki he niʻihi kehé ʻoku hoko ia ʻo ala fakatokangaʻi tautefito ʻe he faʻahinga ʻoku mamatá. Ko ia ai, ko kitautolu taki taha, ʻoku fiemaʻu ke tau fai ha tokanga makehe ki he ekinaki ʻa e Tohitapú: “Angafakamaʻumaʻu. Pea ʻi he meʻa kotoa pe ke ke ha koe ko e [faʻifaʻitakiʻanga] ngaue lelei.” (Tai. 2:6, 7) ʻE fiemaʻu nai ʻa e feinga lahi ke “ʻoua naʻa taki taha tokanga ki heʻene meʻa aʻana pe, ka ki he meʻa ʻa e kakai kehe foki.” (Fili. 2:4) Tau lāulea angé ki ha ngaahi tafaʻaki ʻa ia ʻe lava ke tau ngāueʻaki ai ʻa e fakalototoʻa ko ení ʻi heʻetau Fakataha-Lahi Fakavahe “ʻAve ki he ʻOtuá ʻa e Lāngilangí” ʻoku teu ke hoko maí.
2. Ko e hā ʻoku totonu ke tau manatuʻi ʻi he fekauʻaki mo e ngaahi fokotuʻutuʻu ki he nofoʻangá?
2 Ngaahi Fokotuʻutuʻu ki he Nofoʻangá: Ko ha faingamālie lelei ʻaupito kia kitautolu ke fakahāhā ai ʻa e ngaahi ngāue leleí, ko e taimi ʻo hono fai ʻa e ngaahi fokotuʻutuʻu ki he nofoʻangá. Kātaki ʻo taʻofi pē ʻa e loki mōtele ʻokú ke palani ke ngāueʻakí. Fakapapauʻi ke fai ha tipōsiti feʻungamālie ki muʻa. Lolotonga ʻa e taimi femoʻuekina he kiu ke hū ki lotó mo e kiu ke mavahé, ʻoku fakaongoongoleleiʻi atu tautefito kapau ʻoku tau fakahāhā ʻa e fua ʻo e laumālie ʻo e ʻOtuá. (Kal. 5:22, 23) Ko e fakatātaá, ʻe ʻikai nai malava ki he tokotaha kotoa ke ne maʻu ha loki ʻoku ʻikai ngofua ai ʻa e ifí, neongo ai pē kapau te ke kole eni ʻi he taimi ʻo hoʻo taʻofi lokí.
3. ʻE lava fēfē ke tau “ngaue ʻaonga ki he kakai kotoa pe” ʻi he mōtelé?
3 Ko ʻetau mahuʻingaʻia fakafoʻituitui ʻi he niʻihi kehé ʻoku totonu ke hā ia ʻi heʻetau ngāueʻaki ha ngaahi fokotuʻutuʻu kai pongipongi taʻetotongi pē. ʻOku ʻikai feʻungamālie ke ʻave ki he faiʻanga fakataha-lahí ʻa e meʻakai kuo tokonaki mai maʻá e kau fakaafe ʻi he mōtelé. ʻOku fakahoungaʻi ʻa e taimi ʻoku tau tauhi totonu ai ki he ngaahi tuʻutuʻuni ʻa e mōtelé pea fakahaaʻi ʻa e fakaʻatuʻi ki he kau ngāué. ʻI he ngaahi foungá ni ʻoku tau “ngaue ʻaonga [ai] ki he kakai kotoa pe” pea fai ai ha fakamoʻoni lelei ki he niʻihi kehé.—Kal. 6:10.
4, 5. ʻE lava fēfē ke ʻoatu ʻe he fānaú ʻa e fakahīkihiki kia Sihová, pea ko e hā ʻa e fatongia ʻoku maʻu ʻe he ngaahi mātuʻá?
4 Ngaahi Mātuʻá mo e Fānaú: ʻI ha māmani ʻa ia ʻoku tokolahi ai ʻa e toʻutupu ʻoku ʻulungaanga koví, ʻoku hā makehe ai ʻetau fānaú, pea ʻoku ʻoatu heni ʻa e fakahīkihiki kia Sihova mo ʻene kautahá. Kae kehe, ʻi he taimi ʻe niʻihi, kuo hoko ai ʻa e ngaahi palopalema ʻi he taimi ʻoku ʻikai tokangaʻi lelei ai ʻa e fānaú. (Pal. 29:15) ʻOku ʻikai totonu ke tuku taʻetokangaʻi ʻe he ngaahi mātuʻá ʻenau fānaú ʻi he mōtelé, kau ai ʻa e vai kaukaú, pe ʻi he faiʻanga fakataha-lahí.
5 Ki muʻa ʻi he fakataha-lahí kuo ʻiloʻi ʻe he ngaahi mātuʻa ʻe niʻihi ʻoku ʻaonga ke fakamanatu mo ʻenau fānaú ʻa e faʻahinga ʻulungaanga ʻoku ʻamanekina meia kinautolú. (Ef. 6:4) ʻOku nau tokoniʻi ʻa e fānaú ke nau mahinoʻi ko e ʻofa faka-Kalisitiane moʻoní “ʻoku ʻikai te ne fai taʻetāu” pe “kumi ʻene lelei aʻana.” (1 Kol. 13:5) Ko e fakataha-lahi fakavahé ko ha taimi ia ʻoku fakamavaheʻi ke akoʻi ai ʻe Sihova, pea ko e fānaú pea pehē ki he kakai lalahí ʻe lava ke nau fakahaaʻi ʻa e fakaʻapaʻapa ki he fokotuʻutuʻu ko ení ʻaki honau ʻulungāngá fakatouʻosi ʻi he faiʻanga fakataha-lahí mo ha feituʻu kehe pē.—Ai. 54:13.
6. Ko e hā ʻa e ola ʻe lava ke fai ʻe hotau ʻulungaanga leleí ki he niʻihi kehé?
6 Ko hotau ʻulungaanga leleí ʻe lava ke ne fai ʻa e meʻa lahi ke fakafepakiʻi ʻa e ngaahi maʻuhalá pea tohoakiʻi mai ai ʻa e kakaí ki he lotu moʻoní. (Mt. 5:16; 1 Pita 2:12) ʻOfa ke maʻu ʻe he faʻahinga kotoa ʻa ia te tau fetuʻutaki ki ai ʻi heʻetau fakataha-lahi fakavahé ha fakamoʻoni lelei ʻi he anga ʻo ʻetau tōʻongá mo e anga ʻo ʻetau tōʻongafai kia kinautolú. ʻI he foungá ni te tau ‘ha ai ko e [faʻifaʻitakiʻanga] ngaue lelei’ pea fakalāngilangiʻi ai ʻa Sihova.—Tai. 2:7.
[Puha ʻi he peesi 4]
Fakaʻatuʻi ʻa e Niʻihi Kehé
▪ Taʻofi pē ʻa e loki ʻokú ke palani ke ngāueʻakí
▪ Anga-kātaki ʻi he lolotonga ʻa e kiu ki lotó mo e kiu ke mavahé
▪ ʻOua ʻe ngāuehalaʻaki ʻa e ngaahi fokotuʻutuʻu kai pongipongí
▪ Tokangaʻi lelei hoʻo fānaú