Hoko ʻo Māʻoniʻoni ʻi Ho ʻUlungāanga Kotoa Pē
1. Ko e hā ʻoku mahuʻinga ai ke hoko ʻo māʻoniʻoni ʻi hotau ʻulungāanga kotoa pē?
1 ʻI he tuʻunga ko e kau sevāniti ʻa e ʻOtua māʻoniʻoni ko Sihová, ʻoku tau feinga ke hoko ʻo māʻoniʻoni ʻi hotau ʻulungāanga kotoa pē. (1 Pita 1:15, 16) ʻOku ʻuhinga ʻení ke tau feinga ke poupouʻi ʻa e ngaahi tuʻunga ʻa Sihová ʻi he tafaʻaki kotoa pē ʻo ʻetau moʻuí. Ko e fakataha-lahi fakavahe ʻo e taʻu ní ʻe tokonaki mai ai maʻatautolu ha faingamālie makehe ke fakahāhā ʻa e ʻulungāanga māʻoniʻoní.
2. ʻE lava fēfē ke tau fakahāhā ʻa e ʻulungāanga leleí ʻi he ngaahi hōtelé?
2 ʻI he Ngaahi Hōtelé: Naʻe pehē ʻe ha pule ngāue ʻo ha hōtele naʻe ngāueʻaki ʻe he kau maʻu fakataha-lahi ʻo e taʻu kuo ʻosí: “Ko e Kau Fakamoʻoni ʻa Sihová ko e kakai lelei ia ke nau nofo hení. . . . Ko kimoutolu ʻa e faʻahinga kakai ʻoku mau fiemaʻú.” Ko e talangofua ki he ngaahi fakamanatu hoko maí ʻe tokoni ia kiate kitautolu ke tauhi maʻu hotau ongoongo leleí: (1) ʻOua ʻe taʻofi ha ngaahi loki lahi ange ʻi he meʻa te ke fiemaʻu moʻoní, pea ʻoua ʻe nofo mo ha kakai tokolahi ange ʻi he lokí ʻo ʻikai fakaʻatā. (2) Kapau te ke kaniseli hoʻo taʻofi lokí, fakahā leva ia ki he hōtelé. (3) ʻAve ʻa e saliote uta kató ʻi he taimi pē ʻokú ke mateuteu ai ke ngāueʻaki iá. (4) ʻOua ʻe feimeʻakai ʻi he ngaahi loki ʻoku ʻikai fakaʻatā ke feimeʻakai aí. (5) ʻOua ʻe ngāuehalaʻaki ha faʻahinga kai pongipongi, kofi mo e ʻaisi taʻetotongi ʻoku tokonaki ke ngāueʻaki ʻe he kau nofó he lolotonga ʻenau ʻi he hōtelé. (6) Fakahāhā ʻa e fua ʻo e laumālié ʻi he feangainga mo e kau ngāue hōtelé, tautautefito ʻi he lolotonga ʻo e ngaahi taimi femoʻuekina ʻo e kiu ke hū ki lotó mo e kiu ke mavahé.—Kal. 5:22, 23.
3. ʻOku anga-fēfē ʻa e maongo nai ki he niʻihi kehé ʻa e ʻulungāanga ʻo e Kau Fakamoʻoni kei siʻi angé?
3 Ko hotau ngaahi ʻulungāanga leleí ʻe lava ke ʻoatu ai ha fakamoʻoni mālohi. ʻI he taʻu kuo ʻosí naʻe kole ai ʻe ha Fakamoʻoni kei siʻi ki ha kalake ʻi ha kānita hōtele ha peni mo ha pepa peá ne fakamālō ange kiate ia. Naʻe maongo ʻeni ki he kalaké, pea naʻá ne pehē: “Heʻikai ʻaupito pē te ke sio ʻi ha toʻutupu ʻoku nau ʻulungāanga fakaʻapaʻapa pehē.” Kae kehe, ʻi ha ngaahi tuʻunga ʻe niʻihi, kuo fakatokangaʻi ha fānau ʻoku tuku taʻetokangaʻi ʻo nau kaukau, vaʻinga ʻi he ngaahi lifí, talanoa leʻo-lahi mo lele holo ʻi he ngaahi hala vahaʻa lokí. ʻOku totonu ki he ngaahi mātuʻá ke ʻoua ʻe fakaʻatā ʻenau fānaú ke tukuange noa ka ʻoku totonu ke tokangaʻi kinautolu ke fakapapauʻi ko honau ʻulungāangá ʻoku ʻomai ai ʻa e fakahīkihiki kia Sihova.—Pal. 29:15.
4. ʻE lava fēfē ke tau fakahaaʻi ʻa e fakaʻatuʻi ki he niʻihi kehé ʻi he kai he ngaahi falekaí?
4 ʻI he Ngaahi Falekaí: Naʻe fakamatala ʻe ha tangata tali-tēpile ʻi ha falekai ofi ki he taha ʻo e fakataha-lahí: “ʻOku kehe ʻa e Kau Fakamoʻoní. ʻOku nau fakahaaʻi ʻa e fakaʻapaʻapa ki he niʻihi kehé.” Ko e ʻulungāanga leleí ʻoku kau ki ai ʻa e fakaʻehiʻehi mei he talanoa mo e kata leʻo-lahí ʻa ia ʻe fakahohaʻasi nai ai ʻa e niʻihi kehe ʻoku nau kaí. Naʻa mo e taimi kaí mo e inú, ʻoku tau kumi ke fai ʻa e ngaahi meʻa kotoa ke lāngilangiʻia ai ʻa e ʻOtuá.—1 Kol. 10:31.
5. Ko e hā ʻoku fakakau ki he ʻulungāanga lelei ʻi he faiʻanga fakataha-lahí?
5 ʻI he Fakataha-Lahí: ʻOku totonu ke tautefito ʻa hono fakamoʻoniʻi hotau ʻulungāanga leleí ʻi he faiʻanga fakataha-lahí. Kātaki ʻo fengāueʻaki fakataha mo e fakahinohino ʻa e kau fakanofonofó, fakatouʻosi ʻi he tauʻanga meʻalelé pea ʻi he holó. (Hep. 13:17) ʻOku totonu ke tangutu fakataha ʻa e ngaahi fāmilí kae ʻikai ko hono fakaʻatā ʻa e fānaú, kau ai ʻa e kau taʻu hongofulu tupú, ke tangutu fakataha mo ha kulupu ʻo ha toʻutupu kehe. ʻOku ʻikai totonu ke fakahoko ha faʻahinga meʻa hiki pē ki he sisitemi fakaʻuhilá pe meʻa fakaleʻolahí, pea ʻe ngāueʻaki pē nai ʻi ha founga ʻe ʻikai ke fakahohaʻasi ai ʻa e niʻihi kehé. Kapau ʻokú ke fakataumuʻa ke fai ha faitā, ʻoku ʻikai totonu ke ngāueʻaki ʻa e meʻa faitā tapá he lolotonga ʻo e ngaahi kongá. ʻOku totonu ke seti ʻa e ngaahi pipá mo e ngaahi telefoni selulaá ke ʻoua naʻa fakatupunga ai ha fakahohaʻa.
6. ʻOku anga-fēfē ʻa e fakalāngilangiʻi ʻa e ʻOtuá ʻe hotau ʻulungāanga ʻi he ngaahi fakataha-lahí?
6 Ko hotau ʻulungāangá ʻoku fakamavaheʻi ai kitautolu mei he niʻihi kehé pea fakalāngilangiʻi ai hotau ʻOtuá. (1 Pita 2:12) ʻI he fakataha-lahí, ʻe mātā ai ʻa e ngaahi ngāue ʻa e Kau Fakamoʻoni ʻa Sihová. Ko ia ai, fakapapauʻi ke hoko ʻo māʻoniʻoni ʻi ho ʻulungāanga kotoa pē.
[Puha ʻi he peesi 5]
Fakahāhā ʻa e ʻUlungāanga Māʻoniʻoni
◼ Tauhi ʻa e ngaahi lao kotoa pē ʻa e hōtelé
◼ Tokangaʻi lelei ʻa e fānaú
◼ Fakaʻatuʻi ʻa e niʻihi kehé