Polokalama ʻAho ʻAsemipilī Makehe Foʻou
1 Lolotonga ʻoku fakalāngilangiʻi ʻe he mītiá mo e kau faiako fakamāmaní ʻa e koloa fakamatelié, ʻoku uki kitautolu ʻe he Folofola ʻa e ʻOtuá ke “Koloaʻia ʻi he Ngāue Lelei.” (1 Tim. 6:18) Ko e kaveinga ia ʻo e polokalama ʻaho ʻasemipilī makehé ʻe kamata ʻi Sepitema 2002. Ko e hā ʻa e fakalototoʻa te tau maʻu ʻi he ʻasemipilī ko ení?
2 ʻE lāulea ʻa e ʻovasia sēketí ki he ʻuhinga ʻo e “Koloaʻia ʻi he Vakai Mai ʻa e ʻOtuá,” pea te ne fakaʻekeʻeke ʻa e niʻihi ʻoku nau ngāue mālohi ke maʻu ʻa e ngaahi koloa fakalaumālié. ʻI heʻene ʻuluaki malanga ʻo e ʻahó, ʻe fakahaaʻi ai ʻe he tokotaha malanga ʻaʻahí ʻa e founga ʻo hono fakahoko ʻe he kakai ʻa e ʻOtuá ʻa e “Ngaahi Ngāue Lelei ʻi he Taimi ko Eni ʻo e Utu-Taʻú.” ʻE fakalototoʻaʻi kitautolu taki taha ke fakakaukau ki he founga te tau kau nai ai ke toe kakato ange ʻi he ngāue utu-taʻu kuo hilifaki mai ʻe he ʻOtuá ʻa ia ʻoku fakahoko he ʻaho ní.
3 He fiefia ē ko kitautolu ʻi heʻetau sio ki he toʻutupu Kalisitiané ʻoku nau tuli ki he ngaahi koloa fakalaumālié! ʻOku fakalāngilangiʻi ʻe he meʻá ni ʻa Sihova pea tokoniʻi ʻa e toʻutupú ke nau fakatoka ha makatuʻunga lelei ki he ngaahi monū ʻo e ngāué ʻi he kahaʻú. Ko e konga “Fakaongoongoleleiʻi ʻa e Toʻutupú ki he Ngaahi Ngāue Lelei ʻi Hono Fakahīkihikiʻi ʻa Sihová” te ne fakamamafaʻi ʻa e ngaahi ngāue lelei kuo fakahoko ʻe he toʻutupu Kalisitiane fakalotofonuá.
4 Ko e hā ʻa e ngaahi ola ʻo e tuli ki he ngaahi ngāue leleí? ʻE lāulea ʻa e tokotaha malanga ʻaʻahí ki he meʻá ni ʻi heʻene malanga fakaʻosí, “Hokohoko Atu ʻi he Ngaahi Ngāue Leleí pea Utu ʻa e Ngaahi Tāpuaki ʻa Sihová.” Te ne lāulea ai ki he ngaahi tafaʻaki ʻe fā ʻa ia ʻoku tau utu ai ʻa e ngaahi tāpuaki lahi: (1) ʻi he tuʻunga tāutahá, (2) tuʻunga ko e ngaahi fāmilí, (3) tuʻunga ko ha fakatahaʻangá, mo e (4) tuʻunga ko ha kautaha ʻi māmani lahi.
5 Ko e faʻahinga kuo nau fai ha fakatapui kia Sihová te nau maʻu ʻa e faingamālie ke papitaiso ai. Kapau ʻokú ke mateuteu ke fou ʻi he sitepu ko ení, ʻai ke ʻiloʻi leva ia ʻe he ʻovasia tauhí.
6 ʻI he taimi ʻoku fanongonongo ai ʻa e ʻaho ʻasemipilī ki ho feituʻú, fakavave ke fai ha ngaahi palani pau ke kau ki ai. Feinga ke aʻu tōmuʻa ki ai koeʻuhi ke kau ʻi he hivá mo e lotu kamatá. Ko e ʻi ai mo kau ʻi he polokalama kotoa ʻo e ʻaho ʻasemipilī makehé ʻe fakaivimālohiʻi ai kitautolu ke hokohoko atu ʻa e tuli ki ha ʻalunga te ne ʻai kitautolu ke tau koloaʻia moʻoni ai ʻi he vakai mai ʻa hotau ʻOtua ko Sihová.