ʻE Lava Ke Ke Fakaʻatā Ho ʻApí?
1 ʻI he ʻuluaki senitulí, naʻe fakafaingamālieʻi ai ʻe he kau Kalisitiane tokolahi honau ngaahi ʻapí ke ngāueʻaki ki he ngaahi fakataha ʻa e fakatahaʻangá. (1 Kol. 16:19; Kol. 4:15; Filim. 1, 2) ʻI he ngaahi fakatahaʻanga ʻe niʻihi ʻi he ʻahó ni, ʻoku ʻikai ke ʻi ai ha ngaahi feituʻu feʻunga ki he ngaahi kulupu Ako Tohi ʻa e fakatahaʻangá mo e ngaahi fakataha ki he malaʻe ngāué. ʻE iku nai eni ki he kau ʻi he ngaahi kulupu ako tohi ʻe niʻihi ʻa e toko 30 pe lahi ange, ʻo fakalaka ia ʻi he tokolahi ʻoku fiemaʻú ko e toko 15 nai.
2 Ko ha Monū Lelei: Kuó ke fakakaukau ke fakaʻatā ho ʻapí ki ha Ako Tohi ʻa e fakatahaʻangá? Ko ha loki lahi feʻunga ʻa ia ʻoku maʻa, maama lelei, pea ʻoku ʻea leleí ʻoku lelei ʻaupito ia ki he taumuʻa ko ení. Koeʻuhi ko e ako tohí ko ha fakataha fakaefakatahaʻanga pea ko e konga ia ʻo e fokotuʻutuʻu ʻa Sihova ke fakahinohinoʻi ʻa hono kakaí, ko hono fai ha ako tohi ʻi ho ʻapí ko ha monū lelei ia. ʻOku līpooti ʻe he tokolahi kuo nau maʻu ʻaonga fakalaumālie ʻi hono fakaʻatā honau ʻapí ʻi he founga ko ení.
3 Kapau ʻokú ke fakakaukau ʻoku feʻunga ho ʻapí, kātaki ʻo fakahā ia ki he kau mātuʻá. ʻOku nau kumi nai ki ha ngaahi feituʻu lahi ange. Kapau ʻoku ʻikai malava ke fai ha ako tohi ʻi ho ʻapí, ʻe lava ke fai ai ʻa e ngaahi fakataha ki he malaʻe ngāué? Neongo kapau ʻoku ʻikai ha fiemaʻu ʻi he taimí ni, ʻe houngaʻia ʻa e kau mātuʻá ʻi hono ʻiloʻi ʻoku faingamālie ho ʻapí. Te ke fiefia nai ʻi he monū ko iá ʻi he kahaʻú.
4 Fakahāhā ʻa e ʻUlungaanga Lelei: ʻI he fakatahataha ʻi ha ʻapi tāutahá, ko e faʻahinga kotoa ʻoku kau ki aí ʻoku fiemaʻu ke nau tokaʻi ʻa e koloa ʻa e tokotaha talitalí. ʻOku totonu ke fakapapauʻi ʻe he ngaahi mātuʻá ʻoku nofo maʻu ʻenau fānaú ʻi he feituʻu kuo vaheʻi ki he akó, ʻo ʻikai ʻalu ki he ngaahi feituʻu ʻi he ʻapí ʻoku ʻikai fakaʻatā ki aí. ʻOku totonu foki ke toe fakahāhā ʻa e fakaʻatuʻi ki he ngaahi kaungāʻapí, ʻo tokanga ke fakaʻehiʻehi mei hono fakahohaʻasi tōtuʻa kinautolú.—2 Kol. 6:3, 4; 1 Pita 2:12.
5 ʻOku fakalototoʻaʻi mai kitautolu ʻi he Hepelu 13:16 ke ʻoua ʻe ngalo “ʻa e fai ʻofa mo e fai tokoni: he ko e alā feilaulau pehe ʻoku hohóʻia ai ʻa e ʻOtua.” Ko hono fakaʻatā ho ʻapí ki ha fakataha ʻa e fakatahaʻangá ko ha founga lelei ia ke vahevahe atu ai ʻa e ngaahi meʻa leleí ki he niʻihi kehé pea ke ‘fakaabaaba ai kia Jihova aki hoo koloá.’—Pal. 3:9, PM.