Ko e Ako Fakafaifekau Fakateokalati ki he 2004
1 ʻOku teuʻi ʻe Sihova ʻa e kakai lāuvalé ke nau fakahoko ʻa e ngāue ʻoku mahuʻinga ʻi māmani lahi. Ko e founga ʻe taha ʻokú ne fai ai ení ʻoku fakafou ia ʻi he ako ʻoku tokonaki mai he uike taki taha ʻi he Ako Fakafaifekau Fakateokalatí. ʻOkú ke kau ki ai ʻi he kakato taha ʻoku fakaʻatā ʻi ho ngaahi tuʻungá? ʻE fakahoko ʻi Sanuali ha fanga kiʻi feʻunuʻaki fakataha mo ha vakai ke tokoniʻi ʻa e kau akó ke nau maʻu ʻa e meʻa lahi tahá mei he ngaahi fokotuʻutuʻú.
2 Vilo ʻa e Faiako Tokoní: Ko e fanga tokoua ʻoku nau fai ʻa e ngaahi malanga fakahinohinó mo e ngaahi meʻa mahuʻinga mei he Tohitapú ʻoku nau houngaʻia ʻi he ngaahi fakamatala ʻoku fai ʻe he faiako tokoní. ʻI he feituʻu ʻoku maʻu ai ʻa e kau mātuʻa taau feʻungá, ʻe vilo fakataʻu nai ai ʻa e konga ʻa e faiako tokoní. ʻI he foungá ni, ʻe lava ke vahevahe ai ʻa e mamafa ʻo e ngāué; ka ko e meʻa ʻoku mahuʻinga angé, ko e kau mātuʻa mo e kau sevāniti fakafaifekau tāú te nau maʻu ʻaonga mei he tānekina ʻo e taukei ʻa ha kau malanga mo e kau faiako lavameʻa kehekehe.
3 Fakataimitēpileʻi ʻo e Fakamanatu Tala Ngutú: Kapau ko hoʻo fakatahaʻangá ʻoku ʻi ai haʻane ʻasemipilī fakasēketi ʻi ha uike fakamanatu tala ngutu, ko e fakamanatú leva (mo e toenga ʻo e taimi-tēpile fakauiké) ʻoku totonu ke toloi uike taha ia pea ko e taimi-tēpile ʻo e uike hoko aí ʻoku totonu ke ngāueʻaki tōmuʻa ia ʻi ha uike ʻe taha. Kae kehe, ʻoku ʻikai fiemaʻu ke fetongi ha taimi-tēpile fakauike kakato ʻe ua ʻi he taimi ʻoku fenāpasi ai ʻa e fakamanatu tala ngutú mo ha ʻaʻahi ʻa e ʻovasia sēketí. ʻI hono kehé, ko e hivá, ko e malanga ʻi he tuʻunga leá, mo e ngaahi meʻa mahuʻinga mei he Tohitapú ʻoku totonu ke fakahoko ia ʻo fakatatau ki he taimi-tēpilé. Ko e malanga fakahinohino (ʻoku fai hili ʻa e malanga he tuʻunga leá) ʻoku totonu ke toʻo ia mei he taimi-tēpile ʻi he uike hoko maí. ʻE hoko atu ʻi he ngaahi meʻa mahuʻinga mei he Tohitapú ha Fakataha Ngāue haafe houa, ʻa ia ʻe lava ke feʻunuʻaki ia koeʻuhi ke ʻi ai ha konga ʻe tolu miniti ʻe 10 pe konga ʻe ua miniti ʻe 15. (ʻOku totonu ke toʻo ʻa e fanongonongo kamatá.) ʻE hoko atu ʻi he Fakataha Ngāué ha hiva mo ha polokalama haafe houa ʻe fai ʻe he ʻovasia sēketí. Ko e Ako Fakafaifekau Fakateokalati ki he uike hoko maí ʻe hoko atu ʻaki ia ʻa e malanga he tuʻunga leá mo e ngaahi meʻa mahuʻinga mei he Tohitapú ʻo hangē ko ia ʻoku fakataimitēpileʻí, ʻo hoko atu ai ʻa e fakamanatu tala ngutú.
4 Ngāueʻaongaʻaki ʻa e faingamālie taki taha ki he tupu fakalaumālié. ʻI hoʻo maʻu ʻaonga mei hoʻo Ako Fakafaifekau Fakateokalatí, ʻokú ke fakalototoʻaʻi ai ʻa hoʻo fakatahaʻangá, fakahoko ha konga ʻi hono fakahoko ʻa e kikite faka-Tohitapú, pea ʻave ʻa e fakahīkihikí ki he Tokotaha-Faʻu ʻo e pōpoaki fakaofo ʻa ia kuo pau ke tau fanongonongó.—Ai. 32:3, 4; Fkh. 9:19.