“Leaʻaki ʻa e Folofola ʻa e ʻOtua ʻo Taʻemanavahe”
1 ʻOkú ke toumoua he taimi ʻe niʻihi ke lea ʻo fekauʻaki mo hoʻo tuí ʻi he taimi ʻokú ke maʻu ai ha faingamālie ʻi he ʻapiakó pe ʻi he ngāueʻangá? Ko ha pole ia kiate koe ke ke faifakamoʻoni ʻi he founga ʻikai anga-mahení ki he ngaahi kāingá mo e kaungāʻapí pe mahalo ki he kakai ʻoku ʻikai te ke ʻiló? Ko e hā te ne tokoniʻi kotoa kitautolu ke tau ngāueʻaongaʻaki ʻa e ngaahi taimi feʻungamālié ke “leaʻaki [ai] ʻa e Folofola ʻa e ʻOtua ʻo taʻemanavahe”?—Fili. 1:14.
2 ʻOua ʻe Toumoua: Te ke toumoua ʻi hono taukapoʻi ha kaungāmeʻa ofi pe ko ha kāinga naʻe tukuakiʻi hala? Ko Sihova, ʻa hotau Kaumeʻa ofi tahá, kuo fakafofongahalaʻi lahi ia ʻi he faai mai ʻa e ngaahi senitulí. ʻOku tau maʻu ʻa e monū makehe ko hono fai ha fakamoʻoni maʻa hotau ʻOtua lahí! (Ai. 43:10-12) Ko e ʻofa lahi kia Sihová ʻe lava ke tokoniʻi ai kitautolu ke tau fekuki mo e ongoʻi loto-hohaʻa tōtuʻá pe manavaheé pea ʻe lava ke ueʻi ai kitautolu ke tau lea, ʻo ʻikai toumoua ʻi hono fai ha fakamoʻoni loto-toʻa ki he moʻoní.—Ng. 4:26, 29, 31.
3 Manatuʻi ko ʻetau pōpoakí ko e ongoongo lelei ia. ʻE ʻomi ai ʻa e ngaahi ʻaonga tuʻuloa ki he faʻahinga ʻoku nau tokanga ki aí. Ko e tokangataha ki he mahuʻinga ʻo e ngāue fakamalangá kae ʻikai kia kitautolu pe ko hotau kau fakafepakí, ʻe tokoniʻi ai kitautolu ke tau malanga loto-toʻa.
4 Faʻifaʻitakiʻanga ʻa e Niʻihi Kehé: ʻE lava ke tau maʻu ʻa e mālohi mei he ʻalunga faitōnunga ʻa e niʻihi kehe kuo nau leaʻaki taʻemanavahē ʻa e folofola ʻa e ʻOtuá. Ko e fakatātaá, naʻe talaki loto-toʻa ʻe ʻĪnoke ʻa e fakamaau ʻa Sihová ki he kau fakaʻotuamaté. (Siu. 14, 15) Naʻe malanga faitōnunga ʻa Noa ki he kakai naʻe taʻemahuʻingaʻiá. (Mt. 24:37-39) Ko e kau Kalisitiane he ʻuluaki senitulí ʻa ia naʻe ‘taʻe kolisi pea taʻe maʻu tuʻungá,’ ne nau hokohoko atu ke malanga neongo ʻa e fakafepaki kakahá. (Ng. 4:13, 18-20) ʻOku faʻa ʻasi ʻi he Taua Leʻo mo e ʻĀ Hake! ʻa e ngaahi talanoa ʻi onopooni ki he moʻui ʻa e faʻahinga ne nau ikuʻi ʻa e manavahē ki he tangatá fakafou ʻi heʻenau ngāueʻi ʻa e tui kia Sihova pea nau hoko ko e kau ʻevangeliō faivelenga.
5 ʻE lava ke tau loto-toʻa ʻi he fakakaukau ki he ʻalunga moʻui ʻa e kau sevāniti faitōnunga ʻi he kuohilí naʻa nau fehangahangai mo e ngaahi tuʻunga faingataʻa. (1 Tuʻi 19:2, 3; Mk. 14:66-71) “Ko e meʻa ʻi [honau] ʻOtua naʻa [nau] fai malohi” pe loto-toʻa pea nau lea taʻemanavahē. ʻE lava ke pehē pē mo kitautolu!—1 Tes. 2:2.