Polokalama ʻAsemipilī Fakasēketi Foʻou
ʻOku tuha mo Sihova ke fakalāngilangiʻi. ʻE anga-fēfē ʻetau fakalāngilangiʻi ʻa Sihová? Ko e hā ʻa e ngaahi pole ʻoku fehangahangai mo e niʻihi ʻi he fekauʻaki mo e meʻá ni? Ko e hā ʻa e ngaahi tāpuaki ʻoku maʻu ʻe he faʻahinga ʻoku nau fakalāngilangiʻi ʻa e ʻOtuá he taimi ní? Ko e polokalama ʻasemipilī fakasēketi ki he taʻu fakangāue 2008 te ne ʻomai ʻa e tali fakafiemālie ki he ngaahi fehuʻí ni. Ko hono kaveingá ko e “Fai ʻa e Meʻa Kotoa Pē ke Lāngilangi Ai ʻa e ʻOtuá.” (1 Kol. 10:31, NW) Fakakaukau atu ki he meʻa ʻoku tuku tauhi mai maʻatautolu he lolotonga ʻo e ongo ʻaho ʻe ua ka hoko mai ʻo e fakahinohino fakalaumālie lahi fau.
ʻE lāulea ʻa e ʻovasia fakavahé ki he ngaahi tuʻunga-lea “Ko e Hā ke ʻAve Ai ʻa e Lāngilangí ki he ʻOtuá?” mo e “Alafaʻifaʻitakiʻanga ʻi Hono Aʻusia ʻa e Ngaahi Fiemaʻu ʻa e ʻOtuá.” Te ne fai ʻa e malanga maʻá e kakaí, “Ko Hai ʻa e Kakai ʻOku Nau Fakalāngilangiʻi ʻa e ʻOtuá?,” pea mo e malanga fakaʻosí, “Fakalāngilangiʻi Fāʻūtaha ʻa e ʻOtuá ʻi Māmani Lahi.” Te ne toe fai foki mo e Ako Fakafaifekau Fakateokalatí. ʻE lāulea ʻa e ʻovasia sēketí ia ki he ngaahi kaveinga “Fiefia ʻi Hono Tapua Atu ʻa e Lāngilangi ʻo e ʻOtuá,” “Ko Hono Fai ʻa e Tokanga ki he Ngaahi Fiemaʻu ʻa e Sēketí,” pea mo e “Hanganaki ‘Tuu Mau i he Mooni,’” ʻa ia ʻoku makatuʻunga ʻi he 2 Pita 1:12 (PM). ʻIkai ngata aí, te tau ako ʻa e founga ko ia “Ko e Ngāue Tāimuʻá ʻOku Fakalāngilangiʻi Ai ʻa e ʻOtuá.” “Ko Hono Fakalāngilangiʻi ʻa e ʻOtuá ʻi he Tafaʻaki Kotoa ʻo ʻEtau Moʻuí,” ʻa e ʻuluaki ʻi he ongo malanga fakakongokonga fakatupu fakakaukau ʻe ua, ʻe sivisiviʻi ai ʻa e lahi ʻo e ʻuhinga ʻi he ngaahi lea fakamānavaʻi ʻoku hā ʻi he 1 Kolinito 10:31. Ko e malanga fakakongokonga “Ko Hono Fai ʻo e Ngāue Toputapu ke Fakahīkihiki Ai ʻa Sihová” ʻe fekauʻaki ia mo e ngaahi tafaʻaki kehekehe ʻo ʻetau lotú. Te tau maʻu ʻa e fakamatala fakanounou ʻo e Taua Leʻo pea mo e lāulea ki he konga tohi fakaʻaho ʻi he Sāpaté. ʻE ʻi ai foki mo ha faingamālie ki he papitaiso.
ʻOku fakafisi ʻa e tokolahi taha ʻo e faʻahinga ʻo e tangatá ke ʻiloʻi ʻa e ʻOtuá. ʻOku mātuʻaki fakaleluʻi ʻa e tokolahi ʻe he ngaahi filioʻi ʻa e tangatá ke ʻoua ʻe fakakaukau ki he ngeia ʻo Sihová. (Sione 5:44) Ka ʻoku tau tuipau ki he mahuʻinga ʻo hono fakamoleki ʻa e taimi ke fakakaukau ai ki he founga ke “Fai ʻa e Meʻa Kotoa Pē Ke Lāngilangi Ai ʻa e ʻOtuá.” Fokotuʻutuʻu ke ke ʻi ai pea ke maʻu ʻaonga kakato mei he ngaahi kongá kotoa ʻe fā.