Polokalama ʻAsemipilī Fakasēketi Foʻou
ʻOku malava fēfē ke tuʻu mālohi ki he faʻahinga ʻoku nau fakafepaki mālohi ki he lotu moʻoní? ʻE lava fēfē ke tau ikunaʻi ʻa e ngaahi kongakau ʻoku nau feinga maʻu pē ke fakatafokiʻi kitautolu ki he māmani fakaʻotuamaté? Ko e polokalama ʻasemipilī fakasēketi ki he taʻu fakangāue 2009 ʻe tali ai ʻa e ongo fehuʻi mahuʻinga ko ení. Ko e kaveingá ko e “Ikuna ʻa e Kovi ʻAki ʻa e Lelei.” (Loma 12:21) Fakakaukau angé ki he meʻa ʻoku ʻi he polokalamá.
Ko e ʻovasia fakavahé te ne fakahoko ʻa e ngaahi malanga ko e “Fakaivimālohiʻi ke Ikunaʻi ʻa e Koví ʻAki ʻa e Leleí,” “Tokanga Fekauʻaki mo e Falala Tōtuʻá!,” “Kuo Vavé Ni ke Ngata ʻa e Kovi Kotoa Pē!” mo e “Fakaivimālohiʻi ʻEtau Tuí ke Ikunaʻi ʻa e Māmaní.” ʻE malanga mai kiate kitautolu ʻa e ʻovasia sēketí ʻi he ngaahi kaveinga “Ko e Kuonga Eni ke Hanganaki ʻĀ Ai!,” makatuʻunga ʻi he Loma 13:11-13 mo e “ʻOua Te Ke Vaivai ʻi he ʻAho ʻo e Faingataʻá,” makatuʻunga ʻi he Palovepi 24:10. ʻOku tau toe fakatuʻotuʻa atu foki ki he konga ʻa e ʻovasia sēketí “Ko Hono Fai ʻa e Tokanga ki he Ngaahi Fiemaʻu ʻa e Sēketí.” Ko ha toe tafaʻaki fakaueʻiloto ʻe taha ko e konga “ʻE Lava Ke Ke ‘Nofo Pe ʻi he Ngāue Fakafaifekau ko Ení’—ʻAki Haʻo Tāimuʻa?” Ko e konga ʻuluaki ʻi he ongo malanga fakakongokongá ʻoku fakakaveinga ia ko e “Tuʻu ki he Ngaahi Ngāue Kākā ʻa e Tēvoló.” ʻE tokoniʻi ai kitautolu ke tau ʻiloʻi pea talitekeʻi ʻa e ngaahi ngāue olopoto ʻa e Tēvoló ʻi he ngaahi malaʻe ʻo e tekinolosiá, fakafiefiá mo e akó. Ko e malanga fakakongokonga “Maʻu ʻa e Mālohi ke Talituʻu ʻi he ʻAho Koví Ni” ʻe fakahaaʻi mai ai kiate kitautolu ʻa e founga ke ngāueʻaki kakato ange ai ʻa e akonaki fakamānavaʻi ʻoku maʻu ʻi he Efeso 6:10-18.
ʻOku ʻi ai ha felāveʻi hangatonu ʻi he vahaʻa ʻo hono ikunaʻi ʻa e tupuʻanga ʻo e koví mo hono malangaʻi ʻa e pōpoaki ʻo e Puleʻangá. (Fkh. 12:17) ʻOku ʻikai ha ofo ʻi hono ʻohofi taʻetuku ʻe Sētane ʻa e Kau Fakamoʻoni ʻa Sihová! (Ai. 43:10, 12) Ka ʻe taʻelavameʻa ʻaupito ʻa e Tēvoló koeʻuhi ʻoku tau fakapapauʻi ke “ikuna ʻa e kovi ʻaki ʻa e lelei.” Fai ʻa e ngaahi fokotuʻutuʻu pau ke maʻu ʻaonga kakato ai mei he konga kotoa ʻe fā ʻo e ʻasemipilī fakasēketi ko ení.