Polokalama ʻAho ʻAsemipilī Makehe Foʻou
Ko e kaveinga ʻo e polokalama ʻaho ʻasemipilī makehe ki he taʻu fakangāue 2009 ko e “Hanganaki Tokanga ki he Ngāue Fakafaifekaú . . . Ke Ke Fakahoko Ia,” makatuʻunga ʻi he Kolose 4:17 (NW). ʻI he tuʻunga ko e kau Kalisitiané, ʻoku tau tokanga fakamātoato ki he ekinaki ko iá. Ko ʻetau taumuʻá ke fakahoko faitōnunga ʻetau ngāue fakafaifekaú, ʻo hangē ko ia naʻe fai ʻe Sīsuú. (Sione 17:4) Ko e ʻapositolo foki ko Paulá naʻá ne fokotuʻu ha faʻifaʻitakiʻanga fisifisimuʻa kiate kitautolu ʻi he meʻá ni. Naʻá ne fakapapauʻi ke fakaʻosi ʻa ʻene ngāue fakafaifekaú.—Ng. 20:24.
Ko e konga ʻa e ʻovasia sēketí ʻe fakahaaʻi ai ʻa e founga hono ikuʻi ʻe he kau malanga kehekehe ʻa e ngaahi pole ʻi heʻenau ngāue fakafaifekaú. Pea ko e malanga “Fakatupulekina ʻa e Meʻa Kuó Ke Toó” ʻe fakamamafaʻi ai ʻa e founga ʻe lava ke tau tokoniʻi moʻoni ai ʻa e faʻahinga ʻoku nau “hehema totonu ki he moʻui taʻengatá.” (Ng. 13:48, NW) Ko e tokotaha malanga ʻaʻahí ʻe ʻuluaki lāulea fakafoʻiveesi ki he 2 Kolinito 6:1-10 (PM), ʻi he malanga “Founga ʻo ʻEtau Fakaongoongoleleiʻi Kitautolu ʻi he Tuʻunga ko e Kau Faifekaú.” ʻI he efiafí, te ne malanga ai ki he kau fanongó ʻi he kaveinga ko e “Fakamahuʻingaʻi ʻa Hoʻo Ngāue Fakafaifekaú.” ʻOku ʻikai ha veiveiua te ke maʻu ʻa e fakalototoʻa mei he ongo konga ko e “Fiefia ʻa e Iiki mo e Lalahi ʻi he Ngāue Fakafaifekaú” mo e “Toʻutupu ʻOku Nau Fakahoko ʻa e Ngāue Fakafaifekaú.” Ko e faʻahinga ʻoku nau fakaʻamu ke fakahāhā ʻenau fakatapuí ʻaki ʻa e papitaiso ʻi he vaí ʻi he taha ʻo e ngaahi ʻasemipilī ka hoko maí ʻoku totonu ke nau fakahaaʻi ia ki he ʻovasia tauhí ʻi he vave taha ʻe ala lavá. Ko ha konga mahuʻinga ʻo e kotoa ʻo ʻetau ngaahi ʻasemipilií mo e fakataha-lahí ko e lāulea ki he Taua Leʻo. ʻOmai hoʻomou tatau ki he ako ʻi he uike ʻo e ʻaho ʻasemipilī makehé.
ʻI he tokanga ke fakahoko ʻetau ngāue fakafaifekaú, ʻoku tau feinga ai ke fakapapauʻi ʻoku ʻikai ke kāsia ʻe he ngaahi meʻa kehé mo e ngaahi ngāue kehé ʻa e meʻa kuo tuku mai ʻe Sihova kiate kitautolú. Ko e fakalototoʻa Fakatohitapu kuo tokonaki mai fakafou ʻi he polokalama ʻo e ʻaho ʻasemipilī makehe ko ení ʻoku totonu ke tokoni ia kiate kitautolu kotoa ke tau mahinoʻi ʻa e meʻa ʻoku fiemaʻu ke tau fai ke tauhi maʻu ai ʻa e tokangataha totonú pea ke fakakaukauloto ki heʻetau ngāue fakafaifekaú koeʻuhi ke fakahoko kakato ia.