Puha Fehuʻi

◼ Ko e hā ʻoku totonu ke ke faí kapau ʻe tala atu ke tuku hoʻo malangá?

ʻI he tuʻunga ʻe niʻihi, kuo fakaofiofi ai ʻa e kau polisí ki he kau malanga ʻa ia naʻa nau kau ʻi ha faʻahinga founga ʻo e ngāue fakafaifekaú, ʻo fakahaaʻi kia kinautolu ʻoku nau maumauʻi ʻa e laó, pea tala ke tuku ʻenau malangá. ʻOku totonu ke ke mavahe fakavavevave mo anga-fakaʻapaʻapa mei he feituʻú kapau ʻe tala atu ke ke fai pehē. (Mt. 5:41; Fili. 4:5) ʻOua ʻe feinga ke fakaleleiʻi ʻa e ngaahi meʻá ʻiate koe pē ʻaki hoʻo kau ʻi ha fetalanoaʻaki fekauʻaki mo ʻetau ngaahi totonu fakalaó. Kapau ʻe ala lava, feinga fakapotopoto ke maʻu ʻa e fika fakaʻilonga ʻo e ʻōfisa polisí mo e ʻapi polisi ʻoku ngāue aí. Hili iá, fakahaaʻi leva ki he kau mātuʻá, ʻa ia te nau toki fetuʻutaki ki he ʻōfisi vaʻá ʻo fekauʻaki mo e meʻa naʻe hokó. ʻI he founga meimei tatau, kapau ʻe kole atu ʻe he pule falé pe ko ha fakafofonga kehe pē ʻo e ʻapaatimení ke ke mavahe mei ha ʻapaatimeni pe nofoʻanga, ʻoku totonu leva ke ke fai ki ai pea fakahaaʻi ki he kau mātuʻá. Ko ha tōʻonga anga-malū mo anga-fakatōkilalo ʻo e fekuki mo e faʻahinga maʻu mafaí ʻe lava ke ne fai ʻa e meʻa lahi ke taʻofi ai ʻa e ngaahi faingataʻa naʻe ʻikai mei hoko.—Pal. 15:1; Loma 12:18.