MOʻUI KO HA KALISITIANE
Fakataha-Lahi Fakataʻú—Faingamālie ke Fakahāhā ʻa e ʻOfá
Ko e hā ʻoku tau fiefia lahi ai ʻi heʻetau ngaahi fakataha-lahi fakataʻú? Hangē ko ia ʻi ʻIsileli ʻo e kuonga muʻá, ko e ngaahi fakataha-lahí ʻoku ʻomai ai ʻa e faingamālie ke lotu kia Sihova, fakataha mo e ngaahi kaungātui ʻe laui ngeau naʻa mo e laui afe. ʻOku tau saiʻia ʻi he kotoa ʻo e ngaahi fakamatala ʻoku tau maʻú he ʻoku tokoni ia ke tau nofo ofi ai kia Sihova. ʻOku tau toe fakamahuʻingaʻi ʻa e taimi ʻoku tau feohi ai mo e ngaahi kaungāmeʻá mo e fāmilí. Ko ʻetau houngaʻiá ʻokú ne ueʻi kitautolu ke tau maʻu ʻa e fakataha-lahi ʻaho ʻe tolú.
ʻI heʻetau fakatahataha fakatahá ʻoku ʻikai totonu ke tau fakakaukau pē ki he meʻa ʻe lava ke tau maʻu fakafoʻituituí kae fakakaukau foki ki he founga ke tau fakahāhā ʻa e ʻofá ki he niʻihi kehé. (Kal. 6:10; Hep. 10:24, 25) ʻI heʻetau fakaʻatā ʻa e niʻihi kehé ke nau ʻuluaki hū ki muʻa ʻia kitá pe taʻofi ʻa e ngaahi nofoʻanga pē ʻoku tau fiemaʻú, ʻoku tau fakahaaʻi ai ʻoku tau kumi ki he lelei ʻa e niʻihi kehé. (Fil. 2:3, 4) ʻOku ʻomai ʻe he ngaahi fakataha-lahí ʻa e faingamālie makehe ke faʻu ha ngaahi kaungāmeʻa foʻou. Ki muʻa pe hili ʻa e polokalamá pea lolotonga ʻa e mālōlō hoʻataá, ʻe lava ke tau ʻai ko ʻetau taumuʻa iá ke hoko ʻo maheni mo ha taha ʻoku ʻikai ke tau feʻilongaki. (2 Kol. 6:13) Te tau maʻu ai ha kaungāmeʻa ʻe tuʻuloa! Ko e meʻa mahuʻinga tahá, ʻi he sio mai ʻa e niʻihi kehé ʻoku tau fakahāhā ʻa e ʻofa moʻoní te nau loto nai ke kau mo kitautolu ʻi he tauhi kia Sihová.—Sione 13:35.
SIO ʻI HE VITIŌ KO ʻOFA HEʻIKAI KAʻANGA! FAKATAHA-LAHI FAKAVAHAʻAPULEʻANGA, PEA TALI LEVA ʻA E NGAAHI FEHUʻI KO ENÍ:
Naʻe anga-fēfē hono fakahāhā ʻa e ʻofá ki he kau ʻaʻahi ʻi he fakataha-lahi fakavahaʻapuleʻanga 2019?
Ko e hā ʻoku makehe ai ʻa e fāʻūtaha mo e ʻofa ʻi he haʻohaʻonga ʻo e kakai ʻa Sihová?
Ko e hā ʻa e ngaahi tafaʻaki ʻo e ʻofa faka-Kalisitiané naʻe fakamamafa ki ai ʻa e Kulupu Pulé?
ʻE lava fēfē ke ke tokoni ki hono fakahāhā ʻo e ʻofá ʻi heʻetau ngaahi fakataha-lahí?
Naʻe anga-fēfē hono fakafāʻūtahaʻi ʻe he ʻofa faka-Kalisitiané ʻa hotau fanga tokoua ʻi Siamané mo Kōlea Tongá?
Ko e hā ʻoku tau fakapapauʻi ke faí?