Ngaahi Fakataha-Lahi Fakavahaʻapuleʻanga ʻi he 2003
ʻI HE Tokonaki, ʻo ʻOkatopa 6, 2001, naʻe fai ai ʻa e fakataha fakataʻu ʻa e kau mēmipa ʻo e Watch Tower Bible and Tract Society of Pennsylvania ʻi Jersey City, New Jersey, U.S.A. ʻI he hili ʻa e fakataha ko iá, naʻe fiefia ai ʻa e kau mēmipá mo ʻenau kau fakaafé ʻi ha polokalama makehe. ʻI he ʻaho hono hokó, ʻi he ngaahi fakataha fakalahi ki ai ʻi he ngaahi kolo lalahi ʻe fā ʻi Kānata pea mo e ʻIunaite Seteté, naʻe fai ai ʻe he kau mēmipa ʻo e Kulupu Pule ʻo e Kau Fakamoʻoni ʻa Sihová ʻa e fanongonongo ko ʻení ʻi he hili ʻenau malanga fakaʻosí:
“ʻI heʻemau vakai atu ki he kahaʻú, ʻoku mātuʻaki mahuʻinga ki he kotoa ʻo e kakai ʻa e ʻOtuá ke ʻoua te nau liʻaki ʻenau fakatahataha fakatahá. Naʻe enginaki ʻa e ʻapositolo ko Paulá ʻo pehē ko e meʻá ni, fakataha mo e fefakalototoʻaʻakí, ke fai ia ʻo toe lahi ange ʻi heʻetau vakai atu ki he ofi mai ʻa e ʻaho lahi mo fakamanavahē ʻo Sihová. (Hepelu 10:24, 25) ʻI he fehoanaki mo e fekau Fakatohitapu ko ʻení, ʻoku tau ʻamanaki ke maʻu ha ngaahi fakataha-lahi fakavahe ʻi he ngaahi tapa kotoa ʻo e māmaní ʻi he taʻu kahaʻú [2002]. Pea ʻi he taʻu 2003, kapau ko e finangalo ia ʻo Sihová, ʻe malava nai ke fai ha ngaahi fakataha-lahi fakavahaʻapuleʻanga ʻi he ngaahi feituʻu ʻe niʻihi ʻo e māmaní. Ko e taimi leva ʻeni ke hanganaki ʻā mo hanganaki leʻo, ʻo ʻiloʻilo ki he anga ʻo e lalaka ʻa e ngaahi meʻa ʻoku hoko ʻi he māmaní.”
Neongo ʻa e lahi fau ʻa e veiveiua mo e ngaahi hohaʻa tuʻú ʻi he fakaofi atu ʻa e fokotuʻutuʻu lolotonga ní ki hono ngataʻangá, ko e ngāue ʻa e kakai ʻa e ʻOtuá kuo pau ke laka atu ia ki muʻa. Ko e ongoongo lelei ʻo e Puleʻangá, ʻo kau ai ʻa e pōpoaki fakatokanga ʻa e Tohitapú, kuo pau ke talaki ia ki he puleʻanga, matakali, lea, mo e kakai kotoa pē, ʻo ui kiate kinautolu ke nau ‘manavahē ki he ʻOtuá pea tuku kolōlia kiate ia koeʻuhi ko e taimi ʻo ʻene fakamāú ʻoku toe ofi ange.’ (Fakahā 14:6, 7) Ko ia ai, fakatatau ki he finangalo mo e loto-lelei ʻa ʻetau Tamai fakahēvaní, ʻoku lolotonga palani ai ʻa e ngaahi fakataha-lahi fakavahaʻapuleʻanga ki he ngaahi feituʻu kehekehe ʻo e māmaní ki he taʻu 2003.
Ke kamata ʻaki, ʻoku fakataimitēpileʻi fakaangaanga ha ngaahi fakatahataha pehē ki ha ngaahi kolo lalahi ʻe niʻihi ʻi ʻAmelika Tokelau pea ʻi he hili ha taimi siʻi mei ai ʻi ʻIulope. Taha siʻi atu ki he konga ki mui ʻo e 2003, ko e ngaahi fokotuʻutuʻu ki aí ko ha ngaahi kulupu ʻo e kau fakafofonga ke fononga ki ha ngaahi kolo lalahi ʻe niʻihi ʻi ʻĒsia; pea ʻi he ofi ki he ngataʻanga ʻo e taʻú, ki ha toe ngaahi kulupu te nau ʻalu ki ʻAfilika, ʻAmelika Tonga, mo e feituʻu Pasifikí. ʻE kole ki he ngaahi vaʻa ʻe niʻihi ke nau ʻoatu ha tokolahi fakangatangata ʻo ha kau fakafofonga ki ha ngaahi feituʻu fakataha-lahi pau, ko ia ai, ʻe ʻikai malava ke ʻoatu ki he tokotaha kotoa ha fakaafe tauʻatāina ke kau ki ai. Ka neongo ia, ʻe hoko ko e fakalototoʻa ʻa hono maʻu ha tokolahi fakangatangata ʻo e kau fakafofonga ke nau fakafofongaʻi ʻa e ngaahi fonua kehekehe ʻi he feituʻu taki taha.
ʻE vavé ni ke maʻu ʻe he ngaahi fakatahaʻanga ʻo e Kau Fakamoʻoni ʻa Sihová ʻa e fakamatala fekauʻaki mo e ngaahi fakatahatahá ni. Ko e fakamatala fekauʻaki mo e ngaahi ʻaho tonu matematē pea mo e ngaahi kolo lalahi pau ʻa ia ʻe malava ke ʻalu ki ai ʻa e kau fakafofongá ʻe tokonaki atu ia ʻe honau ngaahi vaʻa tefito taki taha. Ko ia ai, ʻoku kole atu ke ʻoua te mou faitohi pe fai ha ngaahi fakaʻekeʻeke fekauʻaki mo e meʻá ni ʻi he taimí ni.
Ko e faʻahinga ko ia ʻe faai atu ʻo fili ko e kau fakafofongá ʻe fakangatangata ia ki he Kau Fakamoʻoni ʻosi fakatapui mo papitaiso ʻa ia te nau hoko ko ha ngaahi faʻifaʻitakiʻanga lelei pea mo fakahāhā ʻa e ʻofa fakatokouá ki he fanga tokoua ʻi he feituʻú. ʻA ia, ko e faʻahinga eni te nau maʻu ʻa e ngaahi faingamālie lelei ke fakaaʻu atu ki he kau ʻaʻahí ha talitali lelei anga-ʻofa mo ha anga-talitali kakai moʻoni. (Hepelu 13:1, 2) ʻE hoko leva ʻeni “ko ha fefakalototoʻaʻaki.” (Loma 1:11, 12, NW) Ko e toe ngaahi fakaikiiki fekauʻaki mo e ngaahi fokotuʻutuʻu ko ʻení ʻe ʻoatu ia ʻe he ngaahi vaʻa ko ia ʻoku fakaafeʻi ke nau ʻoatu ha kau fakafofonga ki ha fonua pe ngaahi fonua paú.
Ko e ngaahi fakataha-lahi fakavahe ʻaho-tolu ki he taʻu 2003 ʻe fokotuʻutuʻu ia ki he lahi taha ʻo e ngaahi fonuá ʻo hangē ko ia ʻoku anga-maheni ʻakí. ʻI he fakatahataha fakatahá, ʻe maʻu ai ʻe he faʻahinga kotoa ʻa e faingamālie ke ‘fanongo, ako, pea mo fakalototoʻaʻi.’ (Teutalonome 31:12; 1 Kolinito 14:31) ʻE maʻu heni ʻe he kotoa ʻo e kakai ʻa e ʻOtuá ha faingamālie ke nau “ʻahiʻahiʻi ʻo ʻiloʻi ʻoku lelei ʻa Sihova.” (Sāme 34:8, NW) ʻI he ngaahi fakataha-lahi fakavahaʻapuleʻangá kotoa, pea pehē ʻi he konga lahi ʻo e ngaahi fakataha-lahi fakavahé, ʻe ʻi ai ha kau misinale, ko e niʻihi ai te nau fakahoko ha konga ʻi he polokalamá.
ʻI he lolotonga ʻa e taʻu 2002 ni, te tau fiefia ai ʻi he Ngaahi Fakataha-Lahi Fakavahe “Kau Fanongonongo Faivelenga ʻo e Puleʻangá,” ʻa ia ʻe ueʻi ai kitautolu ke fai ha fakamoʻoni lahi ange. ʻI heʻetau fai ʻení, ko e moʻoni ʻe tupu ai ʻetau fakatuʻamelie atu ki he meʻa kuo tuku tauhi mai ʻe Sihova ki he taʻu ka hoko maí. ʻE tokoniʻi ʻe he meʻá ni kitautolu ke tau ‘hanganaki leʻo, hanganaki ʻā, pea fakamoʻoniʻi kitautolu ʻoku tau mateuteu’ ʻi he vakai atu ki he ngaahi taimi tauhaʻa mo mafatukituki ko ʻení.—Mātiu 24:42-44, NW.