Ako Fakafoʻituituí mo e Ako Fakafāmilí ʻOku Mātuʻaki Mahuʻinga!
1. Ko e hā ʻa e tokanga makehe ʻoku fai ʻe he Kulupu Pulé kia kitautolu he taimi ní, pea ko e hā hono ʻuhingá?
1 Hangē pē ko ia ʻi he ʻuluaki senitulí, ʻoku tokanga lahi mai ʻa e Kulupu Pulé ki he tuʻunga lelei maʻá e kakai ʻa Sihová. (Ng. 15:6, 28) ʻI he fakaʻaʻau ke ofi ange ʻa e mamahi lahí, ʻoku mātuʻaki mahuʻinga ke maʻu ʻe he tokotaha malanga kotoa pē ʻo e Puleʻangá ha vahaʻangatae mālohi mo Sihova. ʻE anga-fēfē haʻo ngāueʻaki ʻa e taimi naʻe fakamoleki ki muʻa ki he Ako Tohi ʻa e Fakatahaʻangá? ʻOku fakalototoʻaʻi atu ʻa e tokotaha kotoa ke nau ngāueʻaki ʻa e taimi ko ení ki he ako fakafāmilí. Ko hono ngāuefakapotopotoʻaki ʻa e taimi ko ení ʻe fakaʻatā ai kitautolu ke tau keli ke loloto ange ki he Folofola fakamānavaʻi ʻa e ʻOtuá pea ke maʻu ʻaonga mei hono ngaahi vai foaki moʻuí.—Sāme 1:1-3; Loma 11:33, 34.
2. ʻE fēfē nai hano fokotuʻutuʻu ʻa ʻetau efiafi lotu fakafāmili fakafoʻituituí?
2 Efiafi Lotu Fakafāmili: ʻOku fakalototoʻaʻi ʻa e ngaahi ʻuluʻi fāmilí ke nau fua honau fatongia ʻi he ʻao ʻo Sihová ke fakapapauʻi ʻoku fakahoko ha polokalama tuʻumaʻu mo mohu ʻuhinga ʻo e ako Tohi Tapu fakafāmilí. (Teu. 6:6, 7) Ko e fanga tokoua mo e fanga tuofāfine teʻeki mali ʻoku ʻikai hanau ngaahi fatongia fakafāmilí te nau malava ke ngāueʻaki ʻa e taimi ko ení ki he ako Tohi Tapu fakafoʻituitui mo e fekumi. ʻOku mātuʻaki mahuʻinga kiate kitautolu kotoa ke tau “fakatau mai ʻa e taimi faingamālié” ke ako ai mo fakalaulauloto koeʻuhí ke tauhi maʻu ʻa e mālohi fakalaumālie ʻoku fiemaʻu ʻi he fehangahangai mo e ngaahi ‘ʻaho koví.’—Ef. 5:15, 16, NW.
3, 4. Ko e hā ʻa e ngaahi fokotuʻu ʻoku fai ʻo kau ki he fakamatala ʻe lava nai ke tau ngāueʻakí, pea ko e hā ʻa e taumuʻa ke fakakaukau ki aí?
3 Meʻa ke Lāulea ki Aí: Ko e Watch Tower Publications Index pe Watchtower Library ʻi he CD-ROM ʻe lava ke ne tokoniʻi koe ke ke maʻu ʻa e ngaahi fakamatala ʻe ʻai ai hoʻomou ngaahi taimi ako Tohi Tapú ke fakafiefia. ʻE lāulea nai ʻa e ngaahi fāmilí ki he ngaahi kupu mei he Taua Leʻo, hangē ko e ngaahi kupu tuʻumaʻu ko e “Kī ki he Fiefia ʻa e Fāmilí,” “Akoʻi Hoʻo Fānaú,” mo e “Maʻá e Toʻutupú.” ʻOku toe ʻi he ʻĀ Hake! foki ʻa e ngaahi kupu hokohoko “ʻOku ʻEke ʻe he Toʻutupú” pea mo e ngaahi kupu fakatoʻoaloto ʻo kau ki he fakaofo ʻo e fakatupú.
4 Ko e lau Tohi Tapu ʻo ʻikai ke fakavaveʻí ʻe lava ke ne ʻai ke maongo ʻa e ngaahi tefitoʻi moʻoni mo e ngaahi lēsoni fakaʻotuá ʻi he ʻatamai mo e loto ʻo e tokotaha kotoa ʻi he fāmilí. (Hep. 4:12) ʻI he ngaahi taimi kehé, te mou sio nai ai mo fetalanoaʻaki ʻi he taha ʻo e ngaahi vitiō kuo faʻu ʻe he kautahá. ʻE maʻu ai ha faingamālie lahi ke ke hoko ʻo pōtoʻi ʻi hono fili ʻa e meʻa ke akó mo e founga ke ako ai iá. Fēfē ke ke ʻeke ki he mēmipa ʻo ho fāmilí ʻa e meʻa te nau saiʻia ke fai ki ai ha lāuleá!
5. Ko e hā ʻoku mātuʻaki mahuʻinga ai he taimí ni ʻa e ako Tohi Tapu fakafoʻituitui mo fakafāmilí ʻi heʻetau moʻuí?
5 ʻUhinga ʻOku Mahuʻinga Ai he Taimi Ní: Ko hono fakaivimālohiʻi hotau tuʻunga fakalaumālié ʻe teuteuʻi ai kitautolu ke tau “tuʻu pe ʻo mamata ki he fakamoʻui ʻa Sihova.” (Eki. 14:13) ʻOku fiemaʻu ki he ngaahi mātuʻá ʻa e tataki fakaʻotua ki hono ʻohake ʻa e fānaú “ʻi he lotolotonga ʻo e toʻutangata angapikopiko mo heke.” (Fili. 2:15) ʻOku fiemaʻu ki he fānaú ʻa e tokoni ke nau fekuki ai mo e tuʻunga ololalo fakaeʻulungāanga ʻi he ngaahi ʻapiakó he ʻahó ni. (Pal. 22:3, 6) ʻOku totonu ki he ngaahi hoa malí ke nau ʻai ke mālohi ʻa e “afo tuʻo tolu” ʻoku kau ki ai ʻa Sihová. (Koh. 4:12) Ko ia tau ngāuefakapotopotoʻaki leva ʻa e taimi ʻoku toé ke langa hake ʻaki kitautolu ʻi heʻetau “tui fugani maonioni”!—Siu. 20, PM.