Te Ke Lava ke Fiefia ʻi ha Ngaahi Meʻa Lelei Naʻe Hokosia!

ʻOku hā ʻoku faʻa maʻu ʻe he kau malanga ʻe niʻihi ha meʻa naʻa nau hoksoia ʻoku fakamānako mo fakalototoʻa ʻo lava ai ke nau lave ki ha toe foki lelei pe ha toe ʻaʻahi ʻa ia naʻa nau maʻu ai ha fiefia lahi. ʻOku ʻikai ke faʻa hoko noa mai pē ʻa e ngaahi meʻa lelei ʻoku hokosiá. ʻOku hoko lahí ʻi he tōtōivi mo e feinga mālohi. ʻOku ʻikai ke fakangatangata pē ʻa e ngaahi meʻa ʻoku fiemaʻú ki he kau malanga ʻoku nau poto ʻi he leá pe alafuá.

Ko e niʻihi ʻeni ʻo e ngaahi meʻa ne ʻilo ʻiate kinautolu ʻoku nau lavameʻa lahi tahá: (1) ʻOku nau kau maʻu pē ki he ngāue fakamalangá, ʻo ngāue ʻi ha ngaahi taimi ʻi he uike taki taha, he ʻoku fakapapauʻi kiate kinautolu ʻe lahi ai ʻa e ngaahi faingamālie ke feʻiloaki ai mo e faʻahinga mahuʻingaʻiá; (2) ʻoku nau tauhi maʻu ha fakakaukau pau kiate kinautolu he ngaahi ʻapí, ʻo ʻikai te nau fakaʻosiʻaki ʻo pehē ʻe ʻikai te nau tali; (3) ʻoku nau anga-fakakaumeʻa, ʻo nau fakahāhā loto-māfana ha mahuʻingaʻia moʻoni kiate kinautolu ʻoku fie fanongó; (4) ʻoku nau tōtōivi mo kīvoi ʻi he toe foki ki he ngaahi toe ʻaʻahí pea pehē ki he faʻahinga naʻe ʻikai ʻi ʻapí; pea (5) ʻoku nau ʻai ia ko ha kolo ke kamata ha ngaahi ako Tohitapu.

ʻI he hili hano sivisiviʻi hoʻo ngāué, mahalo ʻe lava ke ke sio ai ki he founga te ke malava ai ke ke hokosia ha ngaahi meʻa lahi ange fakatupu fiefia ʻa ia ʻi hoʻo fai peheé ʻoku hoko ia ke ne ʻai ʻa e ngāue fakamalangá ke fua lahi mo fakafiemālie.