Tauhi Maʻu ʻa e ʻUlungaanga Lelei ʻOkú Ne Fakalāngilangiʻi ʻa e ʻOtuá
1 Ko fē pē ha feituʻu ʻoku tau ʻi ai, ʻoku faifakamoʻoni ʻa hotau ʻulungāngá, valá, mo e teuteú ʻo fekauʻaki mo kitautolu pea mo e ʻOtua ʻoku tau lotu ki aí. ʻOku tautefito ʻa e hoko ʻo fakatokangaʻi ení ʻi he ngaahi fakatahataha lalahi ʻo e kakai ʻa e ʻOtuá, ʻa ia ʻoku siofi ai kitautolu ʻe he kakai tokolahi. ʻI he taimi ʻoku tau hoko ai ʻo faʻifaʻitakiʻanga leleí, ʻoku fakalāngilangiʻi ai ʻa e huafa ʻo Sihová. (1 Pita 2:12) Ka neongo ia, ko e anga-māʻulalo pe ngaahi ngāue taʻetokanga ʻi he tafaʻaki ʻa ha tokosiʻi pē ʻoku malava ke ne ʻomai ʻa e lauʻikovi ki he huafa ʻo e ʻOtuá pea mo ʻene kakaí. (Koh. 9:18e) ʻI hono tauhi ʻi heʻetau fakakaukaú ko hotau ʻulungāngá ʻe fakamāuʻi mei ai ʻe he faʻahinga mei tuʻá ʻa ʻetau kautahá pea mo e ʻOtua ʻoku tau lotu ki aí ʻoku totonu ke ne ʻai kitautolu ke tau loto-tōnunga fekauʻaki mo hono ‘fai ʻa e meʻa kotoa ke ongoongolelei ai ʻa e ʻOtuá.’—1 Kol. 10:31.
2 ʻUlungaanga Faʻifaʻitakiʻanga Lelei ʻi he Ngaahi Hōtelé: ʻI he ngaahi tuʻunga lahi tahá, ʻoku mātuʻaki maongo ki he kau ngāue ʻo e hōtelé ʻa e maau, anga lelei, mo e maʻa ʻa e Kau Fakamoʻoni ʻa Sihová. Ko e pule ngāue ʻe taha, ʻi heʻene lea fekauʻaki mo e ngaahi fāmili Fakamoʻoni naʻa nau nofo ʻi hono hōtelé naʻá ne pehē: “Ko e fānau ʻa e Kau Fakamoʻoni ʻa Sihová ʻa e fānau lelei taha kuó u mātaá! ʻOku nau teuteu ʻo ngali fefine mo ngali tangata; ʻoku nau anga-fakaʻapaʻapa, fakaʻatuʻi, mo anga-taau; pea ʻoku teʻeki ke nau fakatupunga ha faʻahinga palopalema pē. ʻOku totonu moʻoni ke fakaongoongoleleiʻi kimoutolu ʻi hoʻomou kau talavoú. Naʻa mau fiefia ʻi he ʻi heni ʻa hoʻomou fānaú.” Ko e ngaahi fakaongoongolelei hangē ko ʻení ʻoku hoko ngofua mai ia koeʻuhí ʻoku lava ke sio ʻa e faʻahinga ʻoku nau feangai mo kitautolú ki he ʻofa mo e tokaʻi ʻoku ʻi ai ʻi he lotolotonga ʻo e kakai ʻa Sihová.
3 ʻI he tafaʻaki ʻe tahá, ʻoku hā mei he ngaahi fakamatala ʻa e kau ngāue ʻo e hōtele ʻe taha ʻoku kei ʻi ai pē ʻa e palopalema ʻi he faʻahinga ʻoku nau taʻetokanga ʻi honau ʻulungāngá pe ʻoku nau ngāuekoviʻaki ʻa e ngaahi naunau ʻa e hōtelé. ʻOku fakatupunga ʻe he meʻá ni ʻa e ngaahi palopalema pea fakatupunga mo ha fakaanga ʻoku ʻikai totonu ke hoko. ʻOku lāunga ʻa e kau pule ʻe niʻihi ʻoku fakahohaʻa mo taʻemapuleʻi ʻa e fānaú mo e kau talavoú, ʻi hono taʻetokangaʻi ʻe heʻenau ngaahi mātuʻá lolotonga ʻenau ngāueʻaki ʻa e vai kaukaú pe ko e ngaahi naunau kehe ki he fakafiefiá.
4 Ko e lahi taha ʻo e ngaahi hōtelé ʻoku ʻi ai ʻenau ngaahi tuʻutuʻuni ʻoku ʻamanekina ʻa e kau ʻaʻahí ke nau muimui ki ai. Kuo maumauʻi ʻe he fanga tokoua ʻe niʻihi ʻa e ngaahi tuʻutuʻuni ko ʻení ʻi he fekauʻaki mo e ngaahi tuʻunga ʻo e longoaʻá pe feimeʻatokoni ʻi honau ngaahi lokí. ʻOku fakahā mai ʻe he kau pule ʻo e ngaahi hōtelé ko e feimeʻatokoni, ʻi he feituʻu ʻoku ʻikai fakaʻatā aí, ko ha ngāuekovi ia ʻoku fai anga-maheni ki heʻenau koloá. Kuo ʻikai ngata pē ʻi hono maumauʻi ʻa e ngaahi naunau ʻo e ngaahi lokí ka kuo toe ʻai ia ʻe he ngaahi nanamu ʻoku tau maʻú ʻo taʻemalava ai ke tuku atu ʻa e ngaahi lokí ki ha nofo totongi ʻi he hili mei ai ha ngaahi ʻaho mo ha ngaahi uike. Kuo pau ke ʻoua ʻe fai ia, tuku kehe kapau ʻoku fakaʻatā fakahangatonu ʻa e feimeʻatokoní ʻi he lokí.
5 ʻOku totonu ke fai ha feinga moʻoni ke fengāueʻaki kakato pea mo hono fakalelé. Ko e moʻoni, ʻoku ʻikai te tau loto ke tuku ha fakakaukau tamaki ki he kakai ʻa Sihová. ʻI he tuʻunga ko e kau Kalisitiané, ʻoku totonu ke tau faitotonu ʻi he taimi kotoa pē. ʻOku ʻikai totonu ke tau toʻo mei he ngaahi hōtelé ʻa e tupenú pe “ngaahi suvenia” kehé, he ko e kaihaʻa ia; pea ʻoku ʻikai totonu ke tau taʻefaitotonu ʻi hono līpooti ʻa e tokolahi ʻo e kakai ʻoku tau palani ke ʻi ha lokí ʻi hono taʻofi ʻo e ngaahi nofoʻangá pe ko e līpooti ki aí.
6 Teuteu Taau ʻi he Fakataha-Lahí: Neongo pe ko e hā ʻa e faʻahinga fale ʻoku ngāueʻakí, ʻoku fai ʻa e vakai ki ai ʻi he tuʻunga ko ha Fale Fakatahaʻanga lahi lolotonga ʻa e fakataha-lahí. Ko e vala mo e teuteu leleí ʻoku totonu ke hā mahino tatau pē ia mo e taimi ʻoku tau maʻu ai ʻa e ngaahi fakataha ʻa ʻetau fakatahaʻanga fakalotofonuá. ʻOku totonu ke fakaʻehiʻehi ʻa e fanga tokouá mo e fanga tuofāfiné mei hono tui ʻa e ngaahi teunga taʻefeʻunga pe ʻaiʻainoaʻiá, fakatouʻosi ʻi he lolotonga pea mo e hili ʻa e ngaahi konga ʻi he fakataha-lahí, ʻa ia ʻoku tapua mai ai ʻa e laumālie ʻo e māmaní pea ʻai ai ke faingataʻa hono ʻiloʻi kitautolu ʻoku kehe ʻa e taau hotau angá. Ko e ngaahi tuofāfiné ʻoku totonu ke nau tokanga ki he sīpinga mo e lōloa ʻo honau ngaahi pivá mo e kofú ke fakanānā feʻunga. (1 Tim. 2:9, 10) Tatau ai pē pe ko e maʻu ʻa e fakataha-lahí, nofo ʻi ha hōtele, kai ʻi ha falekai, pe fakatau ʻi ha falekoloa, ʻoku totonu ke tau tapua atu ʻi hotau angá ʻi he taimi kotoa ko e kau faifekau kitautolu ʻa e ʻOtuá, ʻo ʻoua ʻe fakatupunga ha tūkiaʻanga.—2 Kol. 6:3.
7 ʻE fai ʻa e papitaisó ʻi he pongipongi Tokonaki ʻo e fakataha-lahí. Ko e Watchtower ʻo ʻEpeleli 1, 1995, peesi 30, ʻokú ne fakamatalaʻi ʻa e fakakaukau ʻoku totonu ke tau fakahāhā ʻi he taimi ko iá. ʻOku fakahaaʻi ai ʻoku “totonu ke tau fai ki he papitaisó ʻaki ʻa e fakakaukau fakamātoato feʻungamālie. ʻOku ʻikai ko e taimi ki he fakahāhaaʻi ʻa e ongo ʻo e lotó, ki he paati, pe ki ha fakafiefia. Pea ʻoku ʻikai ko e taimi fakaumiuminoa pe loto-mamahi ia.” ʻE fuʻu taʻefeʻunga ki he faʻahinga ʻoku teu papitaisó ke tui ha teunga kaukau ʻoku fuʻu taʻetaau pe aata, tatau pē pe ko e kau tangata pe ko e kau fefine. Ko ia ai, ʻoku totonu ki he tokotaha kotoa ke ne fakakaukauloto fakatouʻosi ki he tuʻunga mafatukituki pea mo fakafiefia ʻo e papitaiso faka-Kalisitiané.
8 ʻOku fakamanatu mai ʻe Pita kiate kitautolu ʻa e ‘faʻahinga anga ʻoku totonu ke tau angaʻakí ʻi he ngaahi tōʻonga māʻoniʻoni ʻo e ʻulungāngá mo e ngaahi ngāue ʻo e anga-līʻoa faka-ʻOtuá.’ (2 Pita 3:11, NW) ʻOfa ke hoko ʻetau ngaahi lea mo e ngaahi tōʻonga ʻi he Fakataha-Lahi Fakavahe “Kau Fai ki he Folofola ʻa e ʻOtuá” ʻo tokoni ki he kau fanongo loto-totonú ke nau ʻiloʻi pea lotu ki hotau ʻOtua lahí, ʻa ia ʻoku taau mo e fakaʻapaʻapa pea mo e fakalāngilangi kotoa pē.—1 Kol. 14:24, 25.