“ʻOku ʻIkai Ke U Mahuʻingaʻia”
1 Ko ha tali anga-maheni ia ki heʻetau pōpoakí ʻi he ngaahi feituʻu ʻe niʻihi. Ko e hā te ne tokoniʻi kitautolu ke tau loto-toʻa ʻi he fehangahangai mo e ʻikai ha mahuʻingaʻia ʻi he feituʻu ngāué? Te tau malava fēfē ʻo fakatupulekina ʻa e mahuʻingaʻia ʻi he ongoongo leleí?
2 Tauhi Maʻu ʻa e Fiefiá: Ko hono manatuʻi ʻa e ʻuhinga ʻoku ʻikai mahuʻingaʻia ai ʻa e tokolahi, ʻe tokoni ia ke tauhi maʻu ai ʻa ʻetau fiefiá. Ko e kakai naʻe akoʻi ki ai ʻa e fakakaukau fakamahalo ʻo e ʻevalūsioó pe naʻe tauhi hake kinautolu ʻi ha sōsaieti fakaʻikaiʻi-ʻOtuá ʻe ʻikai nai ke nau fakakaukau ki he mahuʻinga ʻo e Tohi Tapú. ʻOku fakalotomamahiʻi nai ʻa e niʻihi ʻe he mālualoi kuo nau fakatokangaʻi ʻi he lotú. Ki he niʻihi, ko e ʻikai ke nau mahuʻingaʻiá ʻoku tapua atu nai ia ʻi heʻenau ongoʻi feifeitamaki mo e ʻikai ha ʻamanaki. (Ef. 2:12) Ko e niʻihi ʻoku ʻikai te nau “ʻaloʻiloa” koeʻuhi ko e lōmekina kinautolu ʻe he ngaahi loto-moʻua ʻi he moʻuí.—Mt. 24:37-39.
3 Tatau ai pē ʻi he ʻikai lelei ʻa e tali ʻa e niʻihi, ʻoku lava ke tau maʻu ʻa e fiefia ʻi he ngāue fakafaifekaú, ʻi he ʻiloʻi ko ʻetau ngaahi feingá ʻoku fakalāngilangiʻi ai ʻa Sihova. (1 Pita 4:11) Tānaki atu ki ai, ko e talanoa fekauʻaki mo e moʻoní ʻo aʻu ki he faʻahinga ʻoku ʻikai ke nau houngaʻia aí, ʻoku fakaivimālohiʻi ai ʻetau tuí tonu. Tau feinga ke vakai ki he kakai ʻi he feituʻu ngāué ʻo hangē ko e vakai kia kinautolu ʻa Sihová. Naʻá ne fakaʻofaʻia ʻi he kakai ʻo Ninivé koeʻuhi he naʻe ʻikai te nau “ʻilo honau nima toʻomataʻu mo e toʻohema.” (Siona 4:11) ʻOku fiemaʻu ʻa e ongoongo leleí ʻe he faʻahinga ʻoku nofo ʻi hotau feituʻu ngāué! Ko ia ai, ʻoku totonu ke ʻoua te tau foʻi ka tau kumi ha ngaahi founga ke fakatupulekina ai ʻenau mahuʻingaʻia ʻi he pōpoaki ʻa e Tohi Tapú.
4 Lāulea ki he Hohaʻa ʻa e Feituʻú: ʻI hoʻo ʻuluaki lea kamatá ʻe lava ke ke lave nai ai ki ha hohaʻa ʻa e feituʻú pea kole ki he tokotaha-ʻapí ke ne fakahaaʻi mai muʻa ʻene fakakaukaú. Fanongo ki heʻene leá, pea fakahā ange leva kiate ia ʻa e pōpoaki fakanonga mei he Tohi Tapú ko e tali ia ki he meʻa ʻokú ne hohaʻa ki aí. ʻI he hili ha meʻa fakamamahi naʻe hoko ʻi he feituʻú, naʻe fakahaaʻi ai ʻi he ʻapi taki taha ʻe ha Fakamoʻoni, ʻa ʻene loto-mamahi moʻoni ʻi he meʻa ko iá. “Fakafokifā pē, naʻe kamata ke talanoa ʻa e kakaí,” ko ʻene leá ia. “Naʻá ku fai ha fetalanoaʻaki lelei ʻi he ʻaho ko iá koeʻuhí ko ʻeku fakahāhā ʻa e mahuʻingaʻia ʻi heʻenau moʻuí.”
5 ʻE solova ʻe he Puleʻanga ʻo e ʻOtuá ʻa e palopalema taki taha ʻoku fehangahangai mo e faʻahinga ʻo e tangatá. Feinga ke ʻiloʻi ʻa e palopalema ʻoku hohaʻa lahi taha ki ai ʻa e tokotaha-ʻapí. Te ne fakaʻatā nai ai koe ke ke fakamatalaʻi ʻa e pōpoaki Fakatohitapu ʻo e ʻamanakí. Kapau ʻe ʻikai, te ne fie fanongo nai ai ʻi ha toe “taimi ange.”—Ng. 17:32.