Polokalama Foʻou ki he Fakataha ʻAho Makehé
1 Ko ʻetau ako ʻo e tohi ko e The Greatest Man Who Ever Lived kuó ne fakalahi ange ʻetau loto-hounga kia Sīsū Kalaisí. Ko ia ʻoku feʻungamālie ʻa e polokalama ki he fakataha ʻaho makehe ʻe kamata ʻi Sepitemá ko hono kaveingá ko e “Muimui Ofi ki Hotau Tokotaha Faʻifaʻitakiʻanga Lelei Taha,” pea ʻe tokoniʻi ai kitautolu ke maʻu ʻa e mahino kakato ange ki he ʻuhinga ʻo e muimui kiate iá.
2 Tatau ai pē pe ko e hā hono lahi ʻo e taʻumotuʻa pe ngaahi taʻu kuo kau ai ki he moʻoní, ko kinautolu kotoa te nau maʻu ʻa e fakatahá ʻe fakalototoʻaʻi ke lahi ange ai ke nau hoko ʻo hangē ko Kalaisí. Ko e konga ʻe taha ʻo e polokalamá ʻe fokotuʻu ai ʻa e akonaki tautefito ki he kau talavoú. ʻE tokoniʻi ai kinautolu ke fekuki mo e ngaahi pole fekauʻaki mo e akó, meʻa fakafiefiá, mo e ʻofa ki he ngaahi meʻa fakamatelié. ʻE ʻi ai ʻa e ngaahi malanga, ngaahi meʻa naʻe hokosia, mo e ngaahi fakahāhā ʻe fakahā ai ʻa e founga ke talitekeʻi ʻaki ʻa e tākiekina fakamāmaní pea mo ʻai kita ke hoko ʻo hangē ko Kalaisí.—1 Pita 2:21.
3 Ko kinautolu kuo toki fakatapuí te nau maʻu ʻa e faingamālie ke fakahāhā ʻenau fakatapuí ʻi he papitaiso ko e kau muimui kinautolu ʻo Kalaisi. ʻE fai ha malanga fakaueʻi-loto mei he Tohitapú ʻo kau ki he kaveinga ko iá ki muʻa pea toki fai ʻa e papitaisó. Ko kinautolu ʻoku nau fie papitaiso ʻi he fakataha ʻaho makehé ʻoku totonu ke fakahā ʻenau fakakaukaú ki he ʻovasia pulé ʻi ha taimi feʻunga kiate ia ke ne fokotuʻutuʻu ha kau mātuʻa ke nau vakai ki he ngaahi fehuʻi kuo vaheʻi kiate kinautolu ʻoku teu papitaisó.
4 ʻE fai ʻe ha tokotaha malanga ʻoku ʻaʻahi mai ʻa e malanga fakahāhā ko hono kaveingá “Ko e Muimui ki Hotau Faʻifaʻitakiʻanga Lelei Tahá—ʻE Tataki Ai ki he Hā?” Fakapapauʻi ke fakaafeʻi ʻa kinautolu kotoa ʻoku mahuʻingaʻiá ki he polokalama fakalototoʻa mo langaʻi hake ʻo e tui ko ení. ʻOku ʻikai ke toe ʻi ai ha ʻalunga lelei ange pe fakakoloa ange ka ko e muimui ki he Tokotaha Faʻifaʻitakiʻanga Lelei Taha, ko Sīsū Kalaisi.—Mt. 19:27-29.