Hoko ko e Kau Fai ki Ai—ʻIkai ko e Kau Fanongo Pē
1 ʻOku tali fakamātoato ʻe he kau Kalisitiane moʻoni ʻi he ʻaho ní ʻa e akonaki ʻa e Tohitapú ke hoko ko e kau fai ki he folofolá, ʻo ʻikai ko e kau fanongo pē. (Sēm. 1:22) ʻOku nau faikehekehe lahi ai heni mo kinautolu ʻa ia ʻoku nau tauhi pē ki he ʻOtuá ʻaki honau loungutú, neongo ʻoku nau lau ko e Kalisitiane kinautolu. (ʻAi. 29:13) Naʻe fakahā mahino ʻe Sīsū ko kinautolu pē ʻoku nau fai ʻa e finangalo ʻo e ʻOtuá ʻe fakahaofí.—Mt. 7:21.
2 Ko e founga lotu ʻoku ʻikai ke ʻi ai ha ngaahi ngāue fakaeʻotuá ʻoku taʻeʻaonga ia. (Sēm. 2:26) Ko ia, ʻoku totonu ke tau ʻeke kiate kitautolu, ‘ʻOku anga-fēfē ʻa hono fakamoʻoniʻi ʻe heʻeku ngaahi ngāué ʻoku moʻoni ʻa ʻeku tuí? Ko e hā ʻokú ne fakahā ʻoku ou moʻui moʻoni ʻo fetāiaki mo e meʻa ʻoku ou tui ki aí? ʻOku lava fēfē ke u faʻifaʻitaki kakato ange kia Sīsū?’ Ko e ngaahi tali totonu ki he ngaahi fehuʻi ko ʻení ʻe tokoni ia kiate kitautolu ke tau sio pe ko e hā ʻa e fakalaka kuo tau faí, pe ʻoku kei fiemaʻu ke fai ia ʻi hono fai ʻa e finangalo ʻo e ʻOtuá.
3 ʻI he tuʻunga ko e kau muimui ʻo Sīsuú, kuo pau ke tau maʻu ʻa e taumuʻa tefito tatau ʻi he moʻuí ʻo hangē ko ia naʻe fakahā ʻe he tokotaha-tohi-sāmé: “Ko Elohimi kuo mau polepole ai ʻi he ʻaho kotoa, pea ko ho huafa te mau fakafetaʻi ki ai ʻo taʻengata.” (Sāme 44:8) Ko e lotu faka-Kalisitiané ko ha founga moʻui ia ʻoku fakaeʻa ʻi he ʻaho kotoa pē ʻi he meʻa kotoa pē ʻoku tau faí. Ko ha fiemālie lahi ē ʻoku tau maʻu ʻi heʻetau fakahāhā ʻi heʻetau ngaahi ngāue kotoa pē ʻa ʻetau holi mei he lotó ke fakahīkihikiʻi ʻa Sihová!—Fili. 1:11.
4 Ko Hono Fai ʻa e Fakahīkihikiʻi ʻo Sihová ʻOku Kau ki Ai ʻa e Meʻa Lahi Ange Ia ʻi he ʻIkai ko e Moʻui Faitotonú Pē: Kapau ko e tōʻonga leleí ko e meʻa pē ia naʻe fiemaʻu ʻe he ʻOtuá, te tau nōfoʻi pē ʻi hono fakaleleiʻi ʻa hotau ʻulungaangá. Kae kehe, ko ʻetau lotú ʻoku kau foki ki ai mo hono fanongonongo atu ʻa e ngeia ʻo Sihová mo fanongonongo fakahāhā ʻa hono huafá!—Hep. 13:15; 1 Pita 2:9.
5 Ko e malangaʻi ʻa e ongoongo leleí ki he kakaí ko e taha ia ʻo e ngaahi ngāue mahuʻinga lahi taha ʻoku tau faí. Naʻe līʻoa ʻa Sīsū ki he ngāue ko ʻení koeʻuhi he naʻá ne ʻilo ʻe maʻu ai ʻa e moʻui taʻengatá ʻe kinautolu te nau fanongo ki aí. (Sione 17:3) ʻI he ʻahó ni ko e “tufa ʻo e folofola” ʻoku ʻikai ke siʻi ange ʻa hono mahuʻingá; ko e founga pē ia ʻe taha ʻa ia ʻe lava ke hao ai ʻa e kakaí. (Ng. 6:4; Loma 10:13) ʻI hono mahinoʻi ʻa e ngaahi ʻaonga ʻoku mafola atu ki he mamaʻó, ʻoku lava ke tau houngaʻia ai ʻi he ʻuhinga naʻe enginakiʻi ai kitautolu ʻe Paula ke “malangaʻaki ʻa e folofola,” pea ke “fai fakavavevave.”—2 Tīm. 4:2, NW.
6 Ko e hā ʻa hono lahi ʻoku totonu ke nofoʻia ai ʻi heʻetau moʻuí ʻa hono fakahīkihikiʻi ʻa Sihová? ʻOku pehē ʻe he tokotaha-tohi-sāmé naʻe ʻi heʻene fakakaukaú he ʻahó kotoa ʻa e meʻa ko iá. ʻIkai ʻoku tau ongoʻi pehē? ʻIo, pea te tau lau ʻa e feʻiloaki kotoa pē mo ha tokotaha kehé ko ha faingamālie ia ke lea ai ʻo fekauʻaki mo e huafa ʻo Sihová. Te tau vakai ki he ngaahi faingamālie ke fakahanga ʻa ʻetau fetalanoaʻakí ki he ngaahi meʻa fakalaumālié. Te tau toe feinga ke kau maʻu pē ʻi he ngaahi ngāue fakamalanga kuo fokotuʻutuʻu maau ʻe he fakatahaʻangá. Ko kinautolu ʻoku fakaʻatā ʻe honau ngaahi tuʻungá ʻoku lava ke nau fakakaukau fakamātoato ki he ngāue tāimuʻá, he ʻoku tokoni ʻeni kiate kitautolu ke fakamuʻomuʻa ʻa e ngāue fakamalangá ʻi heʻetau moʻui fakaʻahó. ʻOku fakapapauʻi mai kiate kitautolu ʻe he Folofola ʻa e ʻOtuá ʻo pehē, ʻi heʻetau kīvoi ʻi hono fai ʻa e finangalo ʻo e ʻOtuá, te tau fiefia.—Sēm. 1:25.