Sīpinga Tuʻuaki
Ke Kamata ha Ako Tohi Tapu ʻi he ʻUluaki Tokonakí ʻi Maʻasi
“ʻOku ou tui pē te ke loto-tatau ʻoku fiemaʻu ki he tokotaha kotoa pē ha ngaahi kaumeʻa. Ko e hā ʻa e faʻahinga ʻulungaanga ʻoku maongo lahi taha kiate koe ʻi hao kaumeʻa? [Tuku ke ne tali.] Fakatokangaʻi ange ʻa e meʻa ʻoku leaʻaki ʻe he makasini ko ʻení ʻo fekauʻaki mo e ʻuhinga ʻoku totonu ke tau filifili fakalelei ai hotau ngaahi kaumeʻá.” ʻOange ki he tokotaha-ʻapí ha tatau ʻo e ʻīsiu Taua Leʻo ʻo Sanuali-Maʻasi, pea lau mo lāulea fakataha ki he fakamatala ʻi lalo ʻi he ʻuluaki kaveinga tokoni ʻi he peesi 24. Lau ha konga Tohi Tapu ʻe taha pe lahi ange ʻi he ngaahi konga Tohi Tapu ʻoku hā aí. Tuʻuaki ʻa e makasiní, pea fokotuʻutuʻu ke fai ha toe ʻaʻahi ʻo lāulea ki he tali ki he foʻi fehuʻi hono hokó.
Ko e Taua Leʻo Sanuali-Maʻasi
“Kuo faifai ange peá ke fifili ki he ʻuhinga ʻoku lahi fau ai ki muí ni mai ʻa e ngaahi fakatamaki fakanatulá? [Tuku ke ne tali.] Ko e meʻa ʻoku fakatupu tokangá, naʻe tomuʻa tala ʻe he Tohi Tapú ha taimi ʻe fakaʻilongaʻiʻaki ʻa e ngaahi fakatamakí. [Lau ʻa e Mātiu 24:7, 8.] Ko e makasini ko ʻení ʻokú ne tali ʻa e ngaahi fehuʻi ko ʻení: Ko e hā ʻoku tau sio ai ki he ngaahi fakatamaki fakanatula lahi fau ʻi he ʻaho ní? Ko ha tautea nai kinautolu mei he ʻOtuá? Ko e hā ʻa e ngaahi ʻuhinga ʻoku fai ai ʻa e tui ʻe vavé ni hono fakangata ʻe he ʻOtuá ʻa e kotoa ʻo e ngaahi fakatamaki fakanatulá?”
ʻĀ Hake! Sanuali-Maʻasi
“ʻOku mau ʻaʻahi mai he ʻaho ní ke tokoni ki he ngaahi fāmilí. Ko e hā te ke pehē ko e pole lahi taha ia ʻoku fehangahangai mo e ngaahi mātuʻá ʻi he ʻahó ni ʻi hono ʻohake ʻa e fānaú? [Tuku ke ne tali.] Ko e ngaahi mātuʻa tokolahi ʻoku nau falala ki he faleʻi ʻa e Tohi Tapú. Ko e fakatātaá, ko e ngaahi lea fakapotopoto ko ʻení ʻoku tokoni ia ki hono akonekina ʻa e fānaú. [Lau ʻa e ʻEfesō 4:31.] ʻOku fakahaaʻi ʻe he makasini ko ʻení ʻa e founga ʻoku lava ai ʻe he faleʻi ʻa e Tohi Tapú ke ne tokoniʻi ʻa e ongo mātuʻá ʻi he tuʻunga taki taha ʻo e tupu hake ʻa ʻena kiʻi tamá, mei he kei valevalé ʻo aʻu ki heʻenau hoko ko e kau talavoú.”