Gwiriskiyani Nchitu Nthowa yo Yingawovya
1. Kumbi tingachita wuli kuti tiyanani ndi Akhristu a munyengu ya akutumika pakupharazga?
1 Akhristu a munyengu ya akutumika apharazganga uthenga wamampha ku ŵanthu a midawuku ndi visopa vakupambanapambana. (Ŵakol. 1:23) Chinanga kuti wosi apharazganga uthenga wa Ufumu waku Chiuta, kweni asinthanga nthowa zakupharazgiya mwakuyanana ndi ŵanthu wo akambiskananga nawu. Mwakuyeruzgiyapu, pakupharazga kwa Ayuda wo atumbikanga ukongwa Malemba, Petro wangwamba ndi kugwiriskiya nchitu mazu nga mchimi Yoeli. (Mac. 2:14-17) Wonani so nthowa yo Paulo wangugwiriskiya nchitu pakukambiskana ndi Agiriki pa lemba la Machitidu 17:22-31. Mazuŵa nganu ŵanthu wo titiŵapharazgiya awona kuti Malemba ngakuzirwa ndipu tikhoza kukambiskana nawu mwakugwiriskiya nchitu Bayibolo. Kweni tikhumbika kuchita mwazeru pakukambiskana ndi ŵanthu wo aleka kwanja Bayibolo, wo alivi chisopa pamwenga wo mbakhristu cha.
2. Kumbi tingagwiriskiya wuli nchitu mabuku kuti tiwovyi ŵanthu wo atanja Bayibolo kweniso wo aleka kuliyanja?
2 Mugaŵiyengi Mabuku Mwakwenere: Mabuku ngakugaŵiya chaka chinu cha uteŵeti ngasinthikengi myezi yiŵi yeyosi ndipu tigwiriskiyengi nchitu ukongwa magazini, timapepala ndi timabuku. Asani ŵanthu a m’chigaŵa chidu atanja Bayibolo cha, titenere kwesesa kukambiskana nawu nkhani zo angayanja. Chinanga kuti tileki kuŵerenga Bayibolo pa ulendu wakwamba, asani munthu walongo kuti ngwakunweka, titenere kuweriyaku kuti tikamuwovyi kuti wagomezgengi Mlengi ndi Mazu ngaki. Kweni asani tipharazgiya ŵanthu wo atanja Bayibolo, tikhoza kugwiriskiya nchitu mabuku ndi kukambiskana nawu munthowa yakuti tikawe so. Nyengu yeyosi tikhoza kugaŵiya buku la Bayibolo Lisambizanji pamwenga timabuku takuti Vwiyani Chiuta kweniso Vwiyani Chiuta Kuti Muje ndi Umoyu Wamuyaya, chinanga kuti mabuku ngakugaŵiya mwezi wo nganyaki. Chilatu chidu nchakuti tikambiskanengi ndi ŵanthu mu nthowa yo yingaŵawovya kuti ayambi kwanja Yehova.
3. Kumbi mitima ya ŵanthu a m’chigaŵa chidu yiyanana uli ndi dongu?
3 Tipuwani Dongu: Mtima wa munthu uyanana ŵaka ndi dongu. (Luka 8:15) Dongu linyaki likhumbika kulitipuwa umampha kuti mbewu za uneneska zibuki misisi ndi kume. Apharazgi akwambiriya angupanda mbewu zauneneska mu dongu la mitundu yakupambanapambana ndipu ivi vinguŵachitiska kuti akhorwi ndi kukondwa. (Mac. 13:48, 52) Nasiso tikhoza kukondwa asani tipharazga mu nthowa yakwenere.