Kumbi Bayibolu Likambanji Pankhani Yakubaya Ŵana Asukulu ndi Futi?

Pa 24 May 2022, mutawuni yimana ya Uvalde ku Texas, U.S.A munguchitika vinthu vakofya ukongwa. Nyuzipepala ya The New York Times, yingukamba kuti “munthu yo wenga ndi futi wakubaya ŵana a sukulu akukwana 19 kweniso asambizi ŵaŵi . . . kusukulu ya Robb Elementary.”

Vakupaska chitima ukongwa kuti venivi vichitika kaŵikaŵi. Nyuzipepala ya USA Today, yingukamba kuti ku United States pe, “chaka chamala ŵanthu akukwana 249 anguluta ku masukulu ngakupambanapambana kuti akabayi anyawu ndipu chiŵerengeru ichi chijumpha viŵerengeru va vyaka vosi kwambiya mu chaka cha 1970.”

Ntchifukwa wuli vinthu vakofya venivi vichitika? Kumbi tingamalana navu wuli? Kumbi pe chilindizga chechosi chakuti vinthu vakofya venivi vazamumala? Bayibolu limuka mafumbu ngenanga mwakuvwika umampha.

Ntchifukwa wuli pacharu pachitika ukongwa viwawa?

•  Bayibolu likonkhoska kuti te munyengu ya “mazuŵa ngakumaliya” yo ŵanthu anandi azamukuwa “ambula chanju chakuwa nachu” ndipuso “akofya,” vo ving’anamuwa kuti angachita vinthu vankhaza kweniso vachiwawa. Ŵanthu wenaŵa “azamuhenekeheneke.” (2 Timote 3:1-5, 13) Kuti muziŵi vinandi ŵerengani nkhani yakuti “Kumbi Bayibolu Lingukambiya Limu Vakukwaskana ndi Maŵanaŵanu Kweniso Vakuchita va Ŵanthu Mazuŵa Nganu?”

Ŵanthu anandi atijifumba kuti, ‘Ntchifukwa wuli Chiuta waleka kutondekesa vinthu vakofya vo vichitika, nge kubaya ŵanthu ndi futi ko kuchitika kusukulu?’ Kuti musaniyi kwamuka kutuliya mu Bayibolu, ŵerengani nkhani yakuti “Nchifukwa Wuli Vinthu Viheni Vichitikiya Ŵanthu Amampha?”

Kumbi vinthu vakofya venivi tingamalana navu wuli?

•  ‘Vinthu vo vikulembeka kali, vikulembeke kuti vitisambizi, ndi chilatu chakuti tipembuzgika ndi Malemba.’—Aroma 15:4.

Fundu za mu Bayibolu zingakuwovyani kuti mumalani ndi vinthu vachiwawa vo vichitika pacharu. Kuti muziŵi vinandi ŵerengani magazini ya Jani Masu! ya Chichewa ya mutu wakuti “Kodi Anthu Adzasiya Kuchitirana Zachiwawa?”

Kuti musaniyi fundu zinyaki zo zingawovya apapi kovya ŵana ŵawu kuti aleki kuchita mantha ndi vinthu vakofya vo awona pamwenga kuvwa, ŵerengani nkhani yakuti “Kodi Mwana Wanu Amaopa Akamva za Zimene Zachitika.”

Kumbi vinthu vachiwawa vazamumala?

•  “Wazakuŵataska ku ŵanthu ankhaza kweniso achiwawa.”—Salimo 72:14.

•  “Yiwu azamusula malipanga ngawu kuti ngaje mayembi nga pulawu ndipuso azamusula mikondu yawu kuti yije vidya vakuphatiya vimiti. Mtundu wazamunyamuwa lipanga cha kuti uyukiyi mtundu unyaki, ndipu ŵanthu azamusambira so nkhondu cha.”—Mika 4:3.

Chiuta wazamuchita vo wanthu angafiska cha kuchita. Ufumu waki wo ndi boma lakuchanya lazamunangiya limu vidya vosi kweniso kumalisa vinthu vosi vachiwawa. Kuti muziŵi vinandi vakukwaskana ndi mo Ufumu waku Chiuta wazamufiskiya venivi, ŵerengani nkhani yakuti “Mu Ufumu Waku Chiuta ‘Mwazamuja Chimangu Chikulu.’”