Nchitu Yakugaŵiya Uthenga wa Ufumu Na. 38 mu November!
1. Kumbi ndi vinthu wuli vo ŵanthu anandi aziŵa cha pa nkhani ya ŵanthu akufwa, nanga nchitu yo tigwirengi mu November yiŵawovyengi wuli?
1 Nyifwa ndi murwani wa munthu weyosi, mwambula kuphwere kanthu kuti wagomezganji. (1 Ŵakor. 15:26) Anandi aziŵa cha ko kwe ŵanthu akufwa ndipuso akayika kuti angaziŵawona so. Mwaviyo, mipingu pacharu chosi yigwirengi nchitu yakugaŵiya Uthenga wa Ufumu Na. 38, wa mutu wakuti “Kumbi Akufwa Angaja so ndi Umoyu?” yo yichitikengi kwa mwezi wamphumphu. Nchitu iyi yiyambengi pa November 1. Pavuli pa nchitu yeniyi, kapepala yaka kayambengi kugwiriskikiya nchitu mu uteŵeti wakumunda.
2. Kumbi kapepala ka Uthenga wa Ufumu Na. 38 kakupangika wuli?
2 Mo Kakupangikiya: Kapepala ka Uthenga wa Ufumu Na. 38 kakupangika kuti tikapetekengi mwambula kusuzga kuti peji lakwamba lo pe mutu wamampha ukongwa ndipuso fumbu lakuti “Kumbi mungakamba kuti . . . hinya? awa? panyaki?” liwonekengi umampha. Asani munthu wajula kapepala ka Uthenga wa Ufumu, wawonengi vo Bayibolo limuka pa fumbu lo ndi mutu wa kapepala ko, ndipuso mo malayizgu nga m’Bayibolo ngangamuwovye. Wawonengi so vifukwa vo wangagomezge Bayibolo. Peji lakumaliya la kapepala yaka le ndi fumbu lo lingamuwovya kuŵanaŵana ndipuso kuti waje ndi mtima wakukhumba kuziŵa vinandi.
3. Kumbi tazamugaŵiya wuli kapepala ka Uthenga wa Ufumu Na. 38?
3 Kumbi Tazamugaŵiya Wuli?: Nchitu iyi yazamuchitika nge mo tichitiya pakugaŵiya timapepala takudaniya ŵanthu ku Chikumbusku ndipuso ku unganu wachigaŵa. Ŵara azakutikonkhoske mo tazamuchitiya kuti tifiski kugaŵiya m’chigaŵa chidu chosi mwakukoliyana ndi kalata ya April 1, 2013. Mipingu yo ye ndi vigaŵa vimanavimana, yingajipereka kuti yiwovyi mipingu yo ye ndi vigaŵa vikuluvikulu. Asani muto timapepala ta Uthenga wa Ufumu Na. 38, kumbukani kuti mukhumbika kuto timapepala to mungafiska kugaŵiya pa sabata yimoza. Pa nyengu yo tigwiriyengi nchitu iyi, tingagaŵiya so timapepala iti m’malu ngo musanirika ŵanthu anandi, pavuli pakuti tamaliza kugaŵiya nyumba ndi nyumba. Asani tamaliza kugaŵiya timapepala iti mwezi wechendamali, tingalutirizga kugaŵiya mabuku ngakugaŵiya mu November. Pa Chisulu chakwamba cha mwezi wa November, tazamugwira dankha nchitu yapade iyi, yakugaŵiya timapepala iti m’malu mwakwambisa masambiru nga Bayibolo. Tikhoza kuzigaŵiya so magazini asani tigaŵiya timapepala iti pa Chisulu ndi pa Sabata. Kumbi muyesesengi kuti muzigwireku nchitu yapade iyi?