Vo Vachitikapu M’vyaru Vinyaki

◼ Australia: Munthu munyaki wakusambira ukongwa yo wadanika kuti John, weche mwanamana walutanga ku tchalitchi kweni pavuli paki wangwamba “kukaniya limu kuti kwe Chiuta.” Mpayiniya munyaki wangumupaska kabuka ka Was Life Created? ndipu pa ulendu wakuweriyaku wangumupaska kabuku ka Origin of Life. Mpayiniya uyu wamupaskanga John magazini yeyosi yo yatuwa ya nkhani za chilengedu ndipuso mauchimi nga m’Bayibolo ndi chilatu chakuti wayambi so kugomezga kuti kwe Chiuta. Wati wawona kuti John wayamba kusintha maŵanaŵanu wangumupaska buku la Baibulo—Kodi Ndilo Mawu a Mulungu Kapena a Munthu? John wati waŵerenga buku ili, wangukonkhoska kuti “nyengu zinyaki ndiwaŵanaŵana kuti mphakusuzga kuziŵa kuti Chiuta waliku pamwenga kulivi.” Pavuli paki, mpayiniya uyu wangumupaska buku la Bayibolo Lisambizanji, ndipu wangwamba kusambira nayu ndimi 8 peji 20 ndipuso ndimi 13 mpaka 16 peji 23 mpaka 24. John wangukondwa ukongwa ndi malemba ngo ngenga m’nkhani yo ndipu wangukamba kuti, “Panyaki ndiyambi so kuŵerenga Bayibolo.”

◼ Mexico: Munthu munyaki wangukambiya mpharazgi kuti iyu wagomezga cha kuti Bayibolo ndi buku la ku Chiuta. Mpharazgi yo wangumupempha kuti wamulongo ukaboni wakuti Bayibolo ndi buku lakutuliya nadi kwaku Chiuta. Pavuli pakukambiskana nkhani iyi, munthu yo wangukwaskika ukongwa m’mtima ndi vo wangusambira kutuliya m’Bayibolo. Iyu wangukondwa ukongwa ndi marangu ngaku Chiuta ngo wangusambira. Wangukambiya mpharazgi kuti: “Pakwamba ndawonanga nge kuti vo taŵerengiyanga limoza m’Bayibolo vilingana ŵaka ndi ulongozgi wo tingaŵerenga m’buku linyaki lelosi ndipu vandifikanga pa mtima cha. Kweni sonu ndikwaskika ukongwa asani tiŵerenga kutuliya m’Bayibolo, ukongwa fundu zakukwaskana ndi mijalidu yamampha.”

◼ United States: Panyengu yo apharazganga m’malu ngo musanirika ŵanthu anandi, banja linyaki lingukumana ndi muthukazi waku Taiwan yo wagomezga kuti kwe Chiuta kweni wawona kuti Bayibolo ndi buku la azungu. Iyu wangupetukiya pa kathebulu ka mabuku chifukwa chakuti wawonanga kuti wasoŵa chinthu chinyaki pa umoyu waki chinanga kuti wenga wakukhupuka. Iyu waŵanaŵananga kuti panyaki Bayibolo lingamuwovya kuti wasaniyi umoyu walikondwa. Banja lo lingwamba kusambira nayu Bayibolo mwakugwiriskiya nchitu buku la Bayibolo Lisambizanji ndipuso kabuku ka Lasting Peace and Happiness—How to Find Them. M’malu mwakusambira nayu mutu 2 m’buku la Bayibolo Lisambizanji, angukambiskana nayu mutu wa m’kabuku ka Lasting Peace wo ukonkhoska kuti Bayibolo ndi buku lo lingawovya munthu kuti wazilonde vitumbiku. Ŵati akambiskana nayu ndimi zakukwana 6 pa mutu wenuwu, munthukazi yo wangukamba mazu ngakulongo kuzizwa kuti Bayibolo ndi buku lapade ukongwa asani tingaliyeruzgiya ndi nkhani zinyaki zo ŵanthu a visopa alemba. Ŵati amaliza kukambiskana nayu mauchimi ngo ngakufiskika, iyu wangukamba kuti, “Palivi buku lo ndiwona kuti likamba vinthu vauneneska kuluska Bayibolo!”

◼ Japan: Chinanga kuti mweneku wa nyumba wangukambiya mupharazgi kuti wagomezga cha kuti kwe Chiuta, mupharazgi yo wangulutirizga kumupharazgiya mwakudumuwa ndipu wakambiskananga nayu nkhani za m’magazini nga Galamukani! za mutu wakuti Kodi Zinangochitika Zokha? Pavuli paki, munthu yo wangusintha maŵanaŵanu ngaki ndipu wangwamba kukamba kuti Mulengi watenere kuti waliku nadi. Sonu wakwamba kugomezga kuti Chiuta waliku ndipu mupharazgi yo wasambira nayu kabuku ka Uthenga Wamampha Wakutuliya Kwaku Chiuta.

◼ Canada: Muzichi munyaki wangumugaŵiya magazini ngasonu munthukazi yo watuwanga munyumba mwaki kuluta po wangumika galimotu. Muzichi yo wangumupaska magazini wati waweriyaku, munthukazi yo wangukamba kuti wangakhumba cha magazini ndipuso wagomezga cha kuti kwe Chiuta. Muzichi uyu wangugongowa cha ndipu wanguŵanaŵana kuchimupaska kabuku ka Moyo Wokhutiritsa Mmene Mungaupezere. Muzichi uyu wati wasaniya munthukazi uyu kunyumba kwaki wangumukambiya kuti chinanga kuti waziŵanga kuti wagomezganga cha kuti kwe Chiuta kweni wamuŵanaŵaniyanga mbwenu chifukwa wanguziŵa kuti ndi munthu yo walera yija ŵana. Wangumulongo ndimi 6 yo ye papeji 4 m’kabuku yaka, yo yikonkhoska ko tingasaniya ulongozgi wakovya. Pavuli paki, wangumuchiska kuti waŵerengi masachizgu ngo nge pamutu 2 ngakukwaskana ndi kulera ŵana. Munthukazi uyu wangukondwa ukongwa kulonde kabuku yaka.