Vakukhumbika Kukumbuka pa Unganu Wachigaŵa wa 2015

Nyengu ya Unganu: Unganu wamukwamba 8:20 mulenji mazuŵa ngosi ngatatu. Pa nyengu iyi, tosi titenere kuchija pasi kuti unganu ukayambi mwaulemu. Pa Chinkhondi ndi pa Chisulu, unganu wamumala 3:55 musana. Pa Sabata wamumala 2:45 musana.

Kwakumika Magalimotu ndi Njinga: Kumalu ngosi ngakuchitiyaku unganu kwazamuja malu ngakukwana ngakumikaku magalimotu ndi njinga. Titikuchiskani mosi kuzichita vinthu mwakukoliyana ndi wo azamulonderiyanga alendu. Weyosi watenere kuzikiya galimotu pamwenga njinga yaki wechendasaniyi malu ngakuja.

Kusungiyana Malu: Asani mwafika pamalu nga unganu, mungachitchimbiyanga cha kuti mukasaniyi malu ngo mukhumba nge kuti muchita maphara ndi Akhristu anyinu. Tiziŵika kuti te Akhristu auneneska chifukwa chakuchita vinthu mwakuŵanaŵaniya anyidu ndipu venivi vichitiska kuti ŵanthu atumbikengi Chiuta. (Yoh. 13:34, 35; 1 Ŵakor. 13:5; 1 Pet. 2:12) Ŵanthu wo mwazamulutiya nawu limoza, wo muja nawu nyumba yimoza kweniso wo musambira nawu Bayibolo ndiwu ŵija mungaziŵasungiya malu. Mungaziŵikanga cha vinthu pamalu ngo mwaleka kusungiya ŵanthu chifukwa anyinu azamuwona nge kuti malu ngo mwasungiya ŵanthu anyaki. Malu nganyaki ngamusungikiya ŵanthu akukota ndipuso wo atama. Kanandi malu yanga ngaja ngamana. Mwaviyo, munthu wakukota pamwenga yo watama wangakhumbika waka munthu yumoza pamwenga ŵaŵi kuti amuwovyengi.

Chakurya Chamusana: Chondi muzipingiyengi limu chakurya chamusana m’malu mwakuchigula kunyaki pa nyengu yakupumuliya. Mungazipinga tchipisi, mpunga, mboholi, vigawu ndi vakumwa vakuzizirisa kukhosi. Moŵa uzomerezgeka cha pamalu nga unganu

Vakupereka: Pa nyengu ya unganu wachigaŵa, tingalongo kuti tiwonga mwakupereka ndalama kuti ziwovyi pa nchitu ya pacharu chosi. Asani tikhumba kupereka cheki titenere kuchilemba kuti, “Association of Jehovah’s Witnesses of Malawi.”

Munkhwala: Asani mutama ndipu mutumwa munkhwala wapade, wonesesani kuti mwapingiya limu chifukwa kumalu nga unganu kwamuŵavi. Wo ŵe ndi nthenda ya shuga ndipu agwiriskiya nchitu matholora, aziwonesesi kuti atingataya bwekabweka cha.

Ngozi: Tikhumbika kuchiphwere kuti tikaleki kupwetekeka chifukwa chakutelemuka pamwenga kuguŵa. Chaka chechosi ŵanthu apwetekeka chifukwa cha sapatu zo avwala, ukongwa za mahilu ngatali. Tingachita umampha kuvwala sapatu zamampha zo zititiyana kuti tikayendengi umampha m’malu ngakujitika ndipuso malu nganyaki.

Wo Atondeka Kuvwa: Unganu wachigaŵa wazamufwatulikiya m’Chineneru cha Manja ku Blantyre, Kasungu, Lilongwe, Luchenza, Magawa, Mkanda, Mangochi, Mzuzu, Mnadzi, Nchalo, Nkhata Bay, Songani ndi malu nganyaki. Chipharazgu chakukwaskana ndi nkhani iyi chazamuperekeka pa chigaŵa chakwamba, zuŵa lakwamba la unganu.

Tinjinga Takunyamuliyamu Ŵana ndi Mipandu Yitali: Vinthu venivi vikhumbika cha kuvipingiya ku unganu. M’malu mwaki, ŵana atenere kuja pamoza ndi apapi ŵawu.

Perefyumu: Tingalongo kuti titanja anyidu mwakuleka kupaka mafuta pamwenga perefyumu wakununkhira ukongwa yo wangachitiska kuti ŵanthu anyaki akasuzgiki pa unganu.—1 Ŵakor. 10:24.

Mafomu nga Kaonaneni ndi Wachidwi Uyu (S-43): Mafomu yanga mwamulembapu vakukwaskana ndi munthu wakunweka yo mwakumupharazgiya mwamwaŵi pa nyengu ya unganu. Mafomu ngo mwamulemba, mukangapereki ku Dipatimenti ya Mabuku pamwenga kwa mlembi wa mpingu winu asani mwawere kunyumba.

Mafoni nga M’manja: Mukathyengi mafoni nginu kuti ngakaleki kutimbanyizga anyinu unganu we mukati.

Kujambula Mazu: Vipangizu vinu vakujambuliya mazu kuchivilumikiza cha ku magesi pamwenga ku vipangizu vakukweze mazu. Mutenere kuchivigwiriskiya nchitu mwakuphwere kuti vizileki kutimbanyizga anyinu

Kujambula Vithuzi: Asani mwamujambula vithuzi unganu we mukati, mungachigwiriskiyanga nchitu fulashi cha.

Uteŵeti Wakujipereka: Munthu weyosi yo wakhumba kuchigwiraku nchitu pa unganu wachigaŵa, watenere kuchikumana ndi abali wo ŵe mu Dipatimenti ya Uteŵeti Wakujipereka. Ŵana wo ŵechendafiki vyaka 16 nawu angachigwiraku nchitu yeniyi mwakulongozgeka ndi apapi ŵawu pamwenga munthu munyaki yo wazomerezgeka ndi apapi ŵawu.