SAMBIRU 4

Kuzumbuwa Malemba Mwakwenere

Mateyu 22:41-45

FUNDU YAKUDUMUWA: Mwechendaŵerengi lemba, kambani mazu ngo ngangawovya akuvwisiya kuti aje ndi chithuzi cha vo muŵerengengi.

Ŵanaŵaniyani chifukwa cho muŵerenge lemba lo. Asani mukhumba kuŵerenga lemba, kambani mazu ngo ngangawovya akuvwisiya kuziŵa fundu yikulu yo ye pa lemba lo.

Mukhumbika kuyiziŵa umampha nkhani yaki. Mwakuyeruzgiyapu, asani mukhumba kuzumbuwa munthu yo wakambika pa lemba lo pamwenga zina la munthu yo wangulemba buku la m’Bayibolu lo mukhumba kuŵerenga, mutenere kuwonesesa kuti vauneneska nadi.
Vo mukamba vituliyengi m’Bayibolu. Asani mukambiskana ndi ŵanthu wo agomezga kuti kwe Chiuta, vo mukamba vituliyengi m’Bayibolu, pakuti ndi Mazu Ngaku Chiuta. Venivi vingalongo kuti m’Bayibolu ndimu mwe zeru zakovya ukongwa kuphara kunyaki kwekosi.
Chitiskani kuti akuvwisiya aje ndi mtima wakukhumba kuvwa vo ve pa lemba lo. Fumbani fumbu lo kwamuka kwaki kwe pa lemba lo muŵerengengi, zumbuwani suzgu lo lingamala asani munthu wangagwiriskiya ntchitu lemba lo pamwenga kambani fundu yo yikonkhoskekengi umampha pa lemba lo muŵerengengi.

Ŵanaŵaniyani vo akuvwisiya aziŵa kali pa nkhani yo mukamba ndipuso pa lemba lo. Konkhoskani mwalusu nkhani yo ŵanthu atiyiziŵa kali, ndipu wovyani akuvwisiya kuti ayivwisi munthowa yinyaki.