MYEELWE
1 Lino mubuzuba bwakusaanguna bwamwezi wabili, mumwaka wabili kuzwa ciindi nobakazwa mucisi ca Egepita,+ Jehova wakaambila Musa munkanda ya Sinai,+ mutente lyakuswaanganina+ kuti: 2 “Amubale mweelwe+ wambungano yoonse yabana Israyeli kweelana amikwasyi yabo, ziinga zyabo zyabamausyi, mulembe bamaalumi boonse umwi aumwi kweelana amazina aabo. 3 Yebo a Aroni mweelede kubalemba kweelana ankamu zyabo, boonse aabo ibali amyaka iili 20 kuya kumbele,+ boonse ibakonzya kuya kunkondo.
4 “Amusale mwaalumi omwe kuzwa kumusyobo umwi aumwi; umwi aumwi wabo weelede kuti kali silutwe muciinga cabamausyi.+ 5 Aaya ngamazina aabaalumi ibeelede kumugwasya: Elizuri+ mwana wa Sedeuri, kuzwa kumusyobo wa Rubeni; 6 Selumiyeli+ mwana wa Zurisadai, kuzwa kumusyobo wa Simeoni; 7 Nasoni+ mwana wa Aminadabu, kuzwa kumusyobo wa Juda; 8 Netaneli+ mwana wa Zuwara, kuzwa kumusyobo wa Isakara; 9 Eliabu+ mwana wa Heloni, kuzwa kumusyobo wa Zebuloni; 10 kuzwa kubana ba Josefa: Elisama mwana wa Amihudi, kuzwa kumusyobo wa Efraimu;+ Gamaliyeli mwana wa Pedazuri, kuzwa kumusyobo wa Manase; 11 Abidana+ mwana wa Gideoni, kuzwa kumusyobo wa Benjamini; 12 Ahiezeri+ mwana wa Amisadai, kuzwa kumusyobo wa Dani; 13 Pagiyeli+ mwana wa Okirani, kuzwa kumusyobo wa Aseri; 14 Eliyasafe+ mwana wa Deyueli, kuzwa kumusyobo wa Gadi; 15 Ahira+ mwana wa Enani, kuzwa kumusyobo wa Nafutali. 16 Aaba mbambabo ibakasalwa kuzwa kumbungano. Mbaasilutwe+ bamisyobo yabamausyi, basilutwe bazyuulu zyabana Israyeli.”+
17 Aboobo Musa a Aroni bakabweza baalumi aaba ibakalembedwe mazina. 18 Bakabunganya mbungano yoonse mubuzuba bwakusaanguna bwamwezi wabili, kutegwa balembwe mazina aabo kweelana amikwasyi yabo akweelana aziinga zyabamausyi, umwi aumwi iwakali amyaka iili 20 kuya kumbele,+ 19 mbubonya Jehova mbwaakalailila Musa. Aboobo wakabalemba nibakali munkanda ya Sinai.+
20 Bana ba Rubeni, iluzubo lwamwana mutaanzi+ wa Israyeli, bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa umwi aumwi, 21 eelyo ibakalembwa kuzwa kumusyobo wa Rubeni bakali 46,500.
22 Bana ba Simeoni+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa umwi aumwi, 23 eelyo ibakalembwa kuzwa kumusyobo wa Simeoni bakali 59,300.
24 Bana ba Gadi+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa, 25 eelyo ibakalembwa kuzwa kumusyobo wa Gadi bakali 46,650.
26 Bana ba Juda+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa, 27 eelyo ibakalembwa kuzwa kumusyobo wa Juda bakali 74,600.
28 Bana ba Isakara+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa, 29 eelyo ibakalembwa kuzwa kumusyobo wa Isakara bakali 54,400.
30 Bana ba Zebuloni+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa, 31 eelyo ibakalembwa kuzwa kumusyobo wa Zebuloni bakali 57,400.
32 Bana ba Josefa kwiinda muli Efraimu+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa, 33 eelyo ibakalembwa kuzwa kumusyobo wa Efraimu bakali 40,500.
34 Bana ba Manase+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa, 35 eelyo ibakalembwa kuzwa kumusyobo wa Manase bakali 32,200.
36 Bana ba Benjamini+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa, 37 eelyo ibakalembwa kuzwa kumusyobo wa Benjamini bakali 35,400.
38 Bana ba Dani+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa, 39 eelyo ibakalembwa kuzwa kumusyobo wa Dani bakali 62,700.
40 Bana ba Aseri+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa, 41 eelyo ibakalembwa kuzwa kumusyobo wa Aseri bakali 41,500.
42 Bana ba Nafutali+ bakalembwa kweelana amazina, mikwasyi aziinga zyabo zyabamausyi. Baalumi boonse ibakajisi myaka iili 20 kuya kumbele ibakali kukonzya kuya kunkondo bakabalwa, 43 eelyo ibakalembwa kuzwa kumusyobo wa Nafutali bakali 53,400.
44 Aaba bakabalwa a Musa antoomwe a Aroni alimwi abasilutwe babana Israyeli bali 12, umwi aumwi wakali kwiiminina ciinga cabamausyi. 45 Bana Israyeli boonse ibakajisi myaka iili 20 kuya kumbele alimwi ibakali kukonzya kuya kunkondo bakalembwa kweelana aziinga zyabo zyabamausyi, 46 eelyo boonse ibakalembwa antoomwe bakali 603,550.+
47 Pele ba Levi+ tiibakalembwa kweelana amusyobo wabamausyi.+ 48 Aboobo Jehova wakaambila Musa kuti: 49 “Musyobo wa Levi ulikke toyelede kuulemba pe, alimwi mweelwe wabo utaubikkilizyi kumweelwe wabana Israyeli bambi.+ 50 Weelede kubikka ba Levi kutegwa kabalanganya tente lyakukombela lya Bumboni,+ azibelesyo zyalyo zyoonse azintu zyoonse izili mumo.+ Banoonyamuna tente lyakukombela azibelesyo zyalyo zyoonse,+ akubeleka mulindilyo,+ alimwi beelede kuyaka zilawo zyabo kuzinguluka tente lyakukombela.+ 51 Kufwumbwa casika ciindi cakulonzya tente lyakukombela, ba Levi mbabeelede kulimwaya;+ alimwi casika ciindi cakuliimika tente lyakukombela, mbabeelede kuliimika; kufwumbwa uutazumizyidwe* iwaswena afwaafwi weelede kujaigwa.+
52 “Muna Israyeli umwi aumwi weelede kuyaka cilawo cakwe munkambi mwabikkidwe, umwi aumwi kweelana ankamu yakwe yamisyobo yotatwe.+ 53 Ba Levi beelede kuyaka zilawo zyabo kuzinguluka tente lyakukombela lya Bumboni, kutegwa bukali butasikili mbungano yabana Israyeli;+ alimwi ba Levi mbabajisi mukuli wakubeleka milimo* yaatente lyakukombela lya Bumboni.”+
54 Bana Israyeli bakacita zyoonse Jehova nzyaakalailila Musa. Bakacita mbubonya oobo.
2 Lino Jehova wakaambila Musa a Aroni kuti: 2 “Bana Israyeli beelede kuyaka zilawo ooko nkamu zyabo zyamisyobo yotatwe+ nkozizulilwa, umwi aumwi afwaafwi andembela iitondezya* ciinga cakwe cabamausyi. Beelede kuyaka zilawo zyabo kuzinguluka tente lyakuswaanganina, kazilangide kutente.
3 “Aabo ibayooyaka kulubazu lwakujwe, nkolizwida zuba, mbankamu ya Juda yamisyobo yotatwe munkamu zyabo; eelyo silutwe wabana ba Juda ngu Nasoni+ imwana wa Aminadabu. 4 Aabo balembedwe mumpi yakwe yabasikalumamba bali 74,600.+ 5 Bamusyobo wa Isakara bayooyaka munsi lyakwe; eelyo silutwe wabana ba Isakara ngu Netaneli+ imwana wa Zuwara. 6 Aabo balembedwe mumpi yakwe yabasikalumamba bali 54,400.+ 7 Bamusyobo wa Zebuloni bayootobela; eelyo silutwe wabana ba Zebuloni ngu Eliabu+ imwana wa Heloni. 8 Aabo balembedwe mumpi yakwe yabasikalumamba bali 57,400.+
9 “Boonse balembedwe munkamu ya Juda bali 186,400 munkamu zyabo. Aaba mbabeelede kusaanguna kunyamuka.+
10 “Nkamu ya Rubeni+ yamisyobo yotatwe iyooyaka kulubazu lwakumusanza munkamu zyabo; eelyo silutwe wabana ba Rubeni ngu Elizuri+ imwana wa Sedeuri. 11 Aabo balembedwe mumpi yakwe yabasikalumamba bali 46,500.+ 12 Bamusyobo wa Simeoni bayooyaka munsi lyakwe; eelyo silutwe wabana ba Simeoni ngu Selumiyeli+ imwana wa Zurisadai. 13 Aabo balembedwe mumpi yakwe yabasikalumamba bali 59,300.+ 14 Bamusyobo wa Gadi bayootobela; eelyo silutwe wabana ba Gadi ngu Eliyasafe+ imwana wa Reueli. 15 Aabo balembedwe mumpi yakwe yabasikalumamba bali 45,650.+
16 “Boonse balembedwe munkamu ya Rubeni bali 151,450 munkamu zyabo, mbabeelede kuba babili kunyamuka.+
17 “Nolilonzyegwa tente lyakuswaanganina,+ nkamu yaba Levi iyooyendela akati.
“Beelede kutobelana nobanyamuka mbubonya mbobeelede kuyaka zilawo,+ umwi aumwi abusena bwakwe kweelana ankamu yamisyobo yotatwe mwazulilwa.
18 “Nkamu ya Efraimu yamisyobo yotatwe iyooyaka kulubazu lwakumbo munkamu zyabo; eelyo silutwe wabana ba Efraimu ngu Elisama+ imwana wa Amihudi. 19 Aabo balembedwe mumpi yakwe yabasikalumamba bali 40,500.+ 20 Bamusyobo wa Manase+ bayooyaka munsi lyakwe; eelyo silutwe wabana ba Manase ngu Gamaliyeli+ imwana wa Pedazuri. 21 Aabo balembedwe mumpi yakwe yabasikalumamba bali 32,200.+ 22 Bamusyobo wa Benjamini bayootobela; eelyo silutwe wabana ba Benjamini ngu Abidana+ imwana wa Gideoni. 23 Aabo balembedwe mumpi yakwe yabasikalumamba bali 35,400.+
24 “Boonse balembedwe munkamu ya Efraimu bali 108,100 munkamu zyabo, mbabeelede kuba batatu kunyamuka.+
25 “Nkamu ya Dani yamisyobo yotatwe iyooyaka kulubazu lwakunyika munkamu zyabo; eelyo silutwe wabana ba Dani ngu Ahiezeri+ imwana wa Amisadai. 26 Aabo balembedwe mumpi yakwe yabasikalumamba bali 62,700.+ 27 Bamusyobo wa Aseri bayooyaka munsi lyakwe; eelyo silutwe wabana ba Aseri ngu Pagiyeli+ imwana wa Okirani. 28 Aabo balembedwe mumpi yakwe yabasikalumamba bali 41,500.+ 29 Bamusyobo wa Nafutali bayootobela; eelyo silutwe wabana ba Nafutali ngu Ahira+ imwana wa Enani. 30 Aabo balembedwe mumpi yakwe yabasikalumamba bali 53,400.+
31 “Boonse balembedwe munkamu ya Dani bali 157,600. Mbabeelede kuba bamamanino kunyamuka+ kweelana ankamu zyabo zyamisyobo yotatwe.”
32 Aaba mbabana Israyeli bakalembwa kweelana aziinga zyabo zyabamausyi; boonse ibakalembwa mumpi zyabo zyabasikalumamba bakali 603,550.+ 33 Pele ba Levi tiibakalembwa+ antoomwe abana Israyeli bambi+ mbubonya Jehova mbwaakalailila Musa. 34 Bana Israyeli bakacita zyoonse Jehova nzyaakalailila Musa. Oobu mbombubo mbobakali kuyaka zilawo ambobakali kunyamuka+ munkamu zyabo zyamisyobo yotatwe,+ umwi aumwi kweelana amukwasyi wakwe alimwi akweelana aziinga zyabo zyabamausyi.
3 Lino njeeyi mikwasyi* ya Aroni a Musa ciindi Jehova naakaambaula a Musa a Cilundu ca Sinai.+ 2 Aaya ngaakali mazina aabana ba Aroni: Nadabu imutaanzi, Abihu,+ Eleazara+ a Itamara.+ 3 Aaya ngaakali mazina aabana ba Aroni, ibapaizi bakananikidwe, aabo bakabikkidwe kuba bapaizi.+ 4 Nokuba boobo, Nadabu a Abihu bakafwa kubusyu bwa Jehova+ eelyo nobakaleta mulilo uutazumizyidwe kumbele lya Jehova munkanda ya Sinai, alimwi tiibakazyala bana pe. Pele Eleazara+ a Itamara+ bakazumanana kubeleka mulimo wabupaizi antoomwe a Aroni, bausyi.
5 Mpoonya Jehova wakaambila Musa kuti: 6 “Leta musyobo wa Levi+ akubaimika kumbele lya Aroni mupaizi, eelyo beelede kumubelekela.+ 7 Beelede kuzuzikizya mikuli yabo kulinguwe akumbungano yoonse kumbele lyatente lyakuswaanganina kwiinda mukubeleka milimo yabo yaatente lyakukombela. 8 Beelede kulanganya zibelesyo zyoonse+ zyatente lyakuswaanganina alimwi akuzuzikizya milimo yabo kubana Israyeli kwiinda mukubeleka milimo iicitwa atente lyakukombela.+ 9 Weelede kupa ba Levi kuli Aroni abana bakwe. Mbantu baabidwe, ibapedwe kulinguwe kuzwa akati kabana Israyeli.+ 10 Weelede kubikka Aroni abana bakwe, aboobo beelede kubeleka milimo yabo yabupaizi,+ alimwi kufwumbwa muntu uutazumizyidwe* uuswena afwaafwi weelede kujaigwa.”+
11 Alimwi Jehova wakaambila Musa kuti: 12 “Bona! Ndabweza ba Levi kuzwa akati kabana Israyeli mubusena bwabana bataanzi boonse babana Israyeli,+ ba Levi beelede kuba bangu. 13 Nkaambo kufwumbwa mwana mutaanzi nguwangu.+ Mubuzuba oobo nindakajaya bana bataanzi boonse mucisi ca Egepita,+ ndakalisalazizya bana bataanzi boonse, babantu ababanyama.+ Beelede kuba bangu. Ndime Jehova.”
14 Jehova wakazumanana kwaambila Musa munkanda ya Sinai+ kuti: 15 “Lemba mazina aabana ba Levi kweelana aziinga zyabo zyabamausyi alimwi akweelana amikwasyi yabo. Weelede kulemba kufwumbwa mwana musankwa uulaamwezi omwe kuya kumbele.”+ 16 Eelyo Musa wakabalemba naakalaililwa a Jehova, wakacita mbubonya mbwaakalaililwa. 17 Aaya ngaakali mazina aabana ba Levi: Gerisoni, Kohati a Merari.+
18 Lino aaya ngaakali mazina aabana ba Gerisoni ikwakazwa mikwasyi yabo: Libini a Simeyi.+
19 Bana ba Kohati ikwakazwa mikwasyi yabo mbaaba: Amuramu, Izara, Hebroni a Uzieli.+
20 Bana ba Merari ikwakazwa mikwasyi yabo mbaaba: Mali+ a Musi.+
Eeyi njiyakali mikwasyi yaba Levi kweelana aziinga zyabo zyabamausyi.
21 Kuli Gerisoni kwakazwa mukwasyi wabana Libini+ amukwasyi wabana Simeyi. Eeyi njiyakali mikwasyi yabana Gerisoni. 22 Mweelwe wabasankwa boonse balaamwezi omwe kuya kumbele ibakalembwa bakali 7,500.+ 23 Mikwasyi yabana Gerisoni yakayakide zilawo zyabo kusyule kwatente lyakukombela+ kulubazu lwakumbo. 24 Silutwe waciinga cabamausyi babana Gerisoni wakali Eliyasafe imwana wa Layeli. 25 Mukuli wabana Gerisoni+ mutente lyakuswaanganina wakali wakulanganya tente lyakukombela+ kuligama azyakuvwumba atala,+ mulembo+ waamulyango watente lyakuswaanganina, 26 milembo yakusitilizya lubuwa,+ mulembo+ waamulyango walubuwa luzinguluka tente lyakukombela acipaililo alimwi antambo zyalyo amilimo yoonse iijatikizya zintu eezyi.
27 Kuli Kohati kwakazwa mukwasyi wabana Amuramu, mukwasyi wabana Izara, mukwasyi wabana Hebroni alimwi amukwasyi wabana Uzieli. Eeyi njiyakali mikwasyi yabana Kohati.+ 28 Mweelwe wabasankwa boonse balaamwezi wakuzyalwa omwe kuya kumbele bakali 8,600 ; mukuli wabo wakali wakubelekela mubusena busalala.+ 29 Mikwasyi yabana Kohati yakayakide zilawo zyabo kumusanza kwatente lyakukombela.+ 30 Silutwe waciinga cabamausyi camikwasyi yabana Kohati wakali Elizafana imwana wa Uzieli.+ 31 Mukuli wabo wakali kubikkilizya akulanganya Bbokesi,+ tebulu,+ cibikkilo camalambe,+ zipaililo,+ zibelesyo+ nzyobakali kubelesya mubusena busalala alimwi acisitilizyo+ amilimo yoonse iijatikizya zintu eezyi.+
32 Silutwe mupati waba Levi wakali Eleazara+ imwana wa Aroni mupaizi, ooyo iwakali kulanganya baabo ibakali kubeleka mulimo mu Busena Busalala.
33 Kuli Merari kwakazwa mukwasyi wabana Mali amukwasyi wabana Musi. Eeyi njiyakali mikwasyi yabana Merari.+ 34 Mweelwe wabasankwa boonse balaamwezi omwe kuya kumbele ibakalembwa bakali 6,200.+ 35 Silutwe waciinga cabamausyi camikwasyi ya Merari wakali Zuriyeli imwana wa Abihaili. Bakayakide zilawo zyabo kulubazu lwakunyika kwatente lyakukombela.+ 36 Bana ba Merari bakajisi mukuli wakulanganya minsende+ yatente lyakukombela, minkulwa+ yalyo, misemu+ yalyo, ziimikizizyo zyalyo, zibelesyo+ zyalyo zyoonse amilimo yoonse iijatikizya zintu eezyi,+ 37 kubikkilizya amisemu iizinguluka lubuwa aziimikizizyo+ zyayo, nembe zyayo antambo zyayo.
38 Musa alimwi a Aroni abana bakwe mbabakayaka zilawo kumbele lyatente lyakukombela kulubazu lwakujwe, kumbele lyatente lyakuswaanganina kulubazu nkolizwida zuba. Aaba mbabakajisi mukuli wakulanganya tente lyakukombela, ikubelekela bana Israyeli. Kufwumbwa muntu uutazumizyidwe* uuswena afwaafwi wakali kujaigwa.+
39 Basankwa boonse ba Levi balaamwezi omwe kuya kumbele, aabo Musa a Aroni mbobakalemba kweelana amikwasyi yabo mbubonya Jehova mbwaakalailila, bakali 22,000.
40 Mpoonya Jehova wakaambila Musa kuti: “Lemba bana bataanzi boonse basankwa babana Israyeli balaamwezi omwe kuya kumbele,+ ubabale akulemba mulongo wamazina aabo. 41 Kondibwezela ba Levi mubusena bwabana bataanzi boonse babana Israyeli,+ abanyama bavwubwa baba Levi mubusena bwabanyama bavwubwa bataanzi babana Israyeli.+ Ndime Jehova.” 42 Mpoonya Musa wakalemba bana bataanzi boonse akati kabana Israyeli mbubonya Jehova mbwaakamulailila. 43 Mweelwe wabana basankwa bataanzi boonse ibakalembwa mazina ibalaamwezi omwe kuya kumbele bakali 22,273.
44 Jehova wakazumanana kwaambila Musa kuti: 45 “Bweza ba Levi mubusena bwabana bataanzi boonse akati kabana Israyeli, alimwi abanyama bavwubwa baba Levi mubusena bwabanyama babo bavwubwa; eelyo ba Levi bayooba bangu. Ndime Jehova. 46 Kujatikizya muulo wacinunuzyo+ cabana bataanzi babana Israyeli ibali 273, aabo ibaindilila amweelwe waba Levi,+ 47 weelede kubweza masyekeli* aali musanu kuzwa kuli umwi aumwi,+ kweelana acipimyo casyekeli lyamubusena busalala. Syekeli lyomwe lileelene amagera*+ aali 20. 48 Mali weelede kwaapa Aroni abana bakwe kaali muulo wacinunuzyo cabaabo baindilila amweelwe wabo.” 49 Aboobo Musa wakabweza mali aamuulo wacinunuzyo kuzwa kuli baabo bakaindilila amuulo wacinunuzyo caba Levi. 50 Kuzwa kubana bataanzi babana Israyeli wakabweza mali, masyekeli aali 1,365, kweelana acipimyo casyekeli lyamubusena busalala. 51 Mpoonya Musa wakapa Aroni abana bakwe mali aamuulo wacinunuzyo kweelana amalailile aa Jehova, mbubonya Jehova mbwaakalailila Musa.
4 Lino Jehova wakaambila Musa a Aroni kuti: 2 “Amubale mweelwe wabana ba Kohati+ akati kaba Levi, kweelana amikwasyi yabo alimwi aziinga zyabo zyabamausyi, 3 aabo boonse bali amyaka iili 30+ kusikila kumyaka iili 50,+ boonse ibali munkamu iibeleka mulimo mutente lyakuswaanganina.+
4 “Njeeyi milimo bana Kohati njobeelede kubeleka mutente lyakuswaanganina.+ Eeyi milimo iisalalisya: 5 Ciindi cakulonga Aroni abana bakwe beelede kuboola mutente lyakuswaanganina alimwi beelede kugusya cisitilizyo+ akuvwumba bbokesi+ lya Bumboni ancico. 6 Mpoonya beelede kulivwumba bbokesi lya Cizuminano azikutu ziteteete alimwi atala lyazyeezyo bayale mulembo wamusyobo wajulu akunjizya minkulwa+ yalyo yakunyamuzya.
7 “Alimwi bayooyala mulembo wamusyobo wajulu atebulu lyazinkwa zyacitondezyo,+ akubikka mitiba, nkapu, nongo amitiba yanindi yakubelesya kutila zituuzyo zinyugwa;+ azinkwa zyacituuzyo+ calyoonse zyeelede kuba alindilyo lyoonse. 8 Beelede kuvwumba mulembo wamusyobo wacisombo alinzizyo akuvwumba civwumbyo cazikutu ziteteete atala alimwi akunjizya minkulwa+ yalyo yakunyamuzya. 9 Mpoonya beelede kubweza mulembo wamusyobo wajulu akuuvwumba acibikkilo+ camalambe aakumunisya antoomwe amalambe+ aaco, lumano atwakunyamwida mulilo twaco+ azibikkilo zyaco zyoonse zyamafwuta ngobabelesya kutegwa malambe azumanane kuyaka. 10 Bayoocivwungaila antoomwe azibelesyo zyaco zyoonse mucivwumbyo cazikutu ziteteete akucibikka acisamu cakucinyamuzya. 11 Alimwi bayoovwumba mulembo wamusyobo wajulu acipaililo cangolida+ akucivwumba acivwumbyo cazikutu ziteteete akunjizya minkulwa+ yaco yakucinyamuzya. 12 Mpoonya bayoobweza zibelesyo+ zyoonse nzyobabelesya lyoonse mumulimo wamubusena busalala akuzibikka mumulembo wamusyobo wajulu akuzivwumba acivwumbyo cazikutu ziteteete, mpoonya bayoozibikka acisamu cakunyamuzya.
13 “Beelede kugwisya mulota* acipaililo+ akuyala mulembo waboya bwambelele bwamusyobo wacisombo alincico. 14 Atala bayoobikka zibelesyo zyoonse nzyobabelesya ciindi nobabeleka acipaililo: twakunyamwida mulilo, mfwoloko, mafosyolo, mitiba yanindi azibelesyo zyoonse zyaacipaililo,+ alimwi beelede kuvwumba civwumbyo cazikutu ziteteete atala akunjizya minkulwa+ mulincico yakucinyamuzya.
15 “Aroni abana bakwe beelede kumanizya kuvwumba busena busalala azibelesyo zyoonse zyamubusena busalala+ ciindi cakulonga. Kumane bana ba Kohati bayooboola akuzibweza,+ pele tabeelede kuguma busena busalala nkaambo bayoofwa.+ Eeyi njemilimo* njobeelede kubeleka bana ba Kohati mutente lyakuswaanganina.
16 “Eleazara+ imwana wa Aroni mupaizi unoolanganya mafwuta aakumunisya,+ tununkilizyo,+ cituuzyo camaila cituulwa lyoonse amafwuta aakunanika.+ Nguujisi mukuli wakulanganya tente lyakukombela lyoonse azintu zyoonse zili mumo, kubikkilizya abusena busalala azibelesyo zyambubo.”
17 Jehova wakaambila Musa a Aroni kuti: 18 “Mutalekeli musyobo wamikwasyi yabana Kohati+ kuti unyonyoonwe akati kaba Levi. 19 Pele amubacitile boobu kutegwa bazumanane kupona akuti batafwi akaambo kakuswena munsi aazintu zisalalisya.+ Aroni abana bakwe bayoonjila akubapa umwi aumwi mulimo wakwe akubatondezya zintu nzyobeelede kunyamuna. 20 Tabeelede kunjila kuti babone zintu zisalala naaba aniini pe, buyo-buyo bayoofwa.”+
21 Mpoonya Jehova wakaambila Musa kuti: 22 “Amubale mweelwe wabana ba Gerisoni+ kweelana aziinga zyabo zyabamausyi alimwi akweelana amikwasyi yabo. 23 Weelede kubalemba boonse aabo bali amyaka iili 30 kusikila kumyaka iili 50, boonse ibali munkamu iibeleka mulimo mutente lyakuswaanganina. 24 Njeeyi mikuli mikwasyi yabana Gerisoni njobapedwe kulanganya azintu nzyobeelede kunyamuna:+ 25 Bayoonyamuna milembo yatente yaatente lyakukombela,+ itente lyakuswaanganina, civwumbyo calyo alimwi acivwumbyo cazikutu ziteteete icili atala aancico,+ amulembo waamulyango watente lyakuswaanganina,+ 26 milembo yakusitilizya lubuwa,+ mulembo waamulyango walubuwa+ luzinguluka tente lyakukombela acipaililo, ntambo zyatente azibelesyo zyoonse alimwi azintu zyoonse zibelesyegwa mumulimo. Ooyu ngomulimo ngobapedwe. 27 Milimo yoonse yabana Gerisoni+ azintu nzyobeelede kunyamuna zyeelede kulanganizyigwa a Aroni abana bakwe; muyoobapa zyakunyamuna zyoonse eezyi kauli mukuli wabo. 28 Ooyu ngomulimo mikwasyi yabana Gerisoni ngoyeelede kubeleka mutente lyakuswaanganina,+ alimwi milimo yabo inooyendelezyegwa a Itamara+ imwana wa Aroni mupaizi.
29 “Pele bana ba Merari+ uyoobalemba kweelana amikwasyi yabo alimwi akweelana aziinga zyabo zyabamausyi. 30 Aabo boonse bali amyaka iili 30 kusikila kumyaka iili 50 uyoobalemba, boonse ibali munkamu iibeleka mulimo mutente lyakuswaanganina. 31 Eezyi nzyezintu nzyobeelede kunyamuna+ kweelana amilimo yabo yamutente lyakuswaanganina: minsende+ yatente lyakukombela, minkulwa,+ misemu+ aziimikizizyo;+ 32 misemu+ iizinguluka lubuwa lwatente, ziimikizizyo+ zyayo, nembe+ zyayo antambo zyayo antoomwe azibelesyo zyayo amilimo yoonse iijatikizya zintu eezyi. Uyoobapa zibelesyo nzyobeelede kunyamuna kweelana amazina aabo. 33 Oobu mbombubo mikwasyi yabana ba Merari+ mboyeelede kubeleka mutente lyakuswaanganina, ansi aabweendelezi bwa Itamara imwana wa Aroni mupaizi.”+
34 Aboobo Musa a Aroni alimwi abasilutwe+ bambungano bakalemba bana Kohati+ kweelana amikwasyi yabo alimwi akweelana aciinga cabo cabamausyi, 35 boonse bali amyaka iili 30 kusikila kumyaka iili 50 ibali munkamu iibeleka mulimo mutente lyakuswaanganina.+ 36 Aabo bakalembwa mumikwasyi yabo bakali 2,750.+ 37 Aaba mbabakalembwa mumikwasyi yabana Kohati, boonse aabo ibakali kubelekela atente lyakuswaanganina. Musa a Aroni bakabalemba kweelana ambobakalaililwa a Jehova kwiinda muli Musa.+
38 Bana ba Gerisoni+ bakalembwa kweelana amikwasyi yabo alimwi akweelana aciinga cabo cabamausyi, 39 boonse bali amyaka iili 30 kusikila kumyaka iili 50 ibali munkamu iibeleka mulimo atente lyakuswaanganina. 40 Aabo bakalembwa mumikwasyi yabo alimwi akweelana aciinga cabo cabamausyi bakali 2,630.+ 41 Aaba mbabakalembwa mumikwasyi yabana ba Gerisoni, boonse aabo ibakali kubelekela atente lyakuswaanganina. Musa a Aroni bakabalemba kweelana ambobakalaililwa a Jehova.+
42 Bana ba Merari bakalembwa kweelana amikwasyi yabo alimwi akweelana aciinga cabo cabamausyi, 43 boonse bali amyaka iili 30 kusikila kumyaka iili 50 ibali munkamu iibeleka mulimo atente lyakuswaanganina.+ 44 Aabo bakalembwa mumikwasyi yabo bakali 3,200.+ 45 Aaba mbabakalembwa mumikwasyi yabana ba Merari, aabo Musa a Aroni mbobakalemba kweelana ambobakalaililwa a Jehova kwiinda muli Musa.+
46 Musa a Aroni alimwi abasilutwe babana Israyeli bakabalemba ba Levi boonse kweelana amikwasyi yabo alimwi akweelana aziinga zyabo zyabamausyi; 47 bakalaamyaka iili 30 kusikila kumyaka iili 50, alimwi boonse bakabikkidwe kubeleka milimo akunyamuna mikuli iijatikizya tente lyakuswaanganina.+ 48 Boonse ibakalembwa bakali 8,580.+ 49 Bakalembwa kweelana ambwaakalailila Jehova kwiinda muli Musa, umwi aumwi kweelana amulimo wakwe alimwi amukuli ngwaakali kunyamuna; bakalembwa mbubonya Jehova mbwaakalailila Musa.
5 Alimwi Jehova wakaambila Musa kuti: 2 “Kobalailila bana Israyeli kuti bagwisye muntu uuli woonse uujisi cinsenda+ alimwi amuntu uuli woonse uusensa kubwaalumi naa kubukaintu,+ alimwi amuntu uuli woonse uusofweede akaambo kakuguma mutunta.+ 3 Mweelede kumugwisya, kufwumbwa naa mwaalumi naa mukaintu. Mubagwisye baunke anze aankambi kutegwa batasofwaazyi+ bantu bangu bali munkambi, nkaambo ndili akati kabo.”+ 4 Aboobo bana Israyeli bakacita mbubonya oobo, bakabatandila anze aankambi. Bakacita mbubonya Jehova mbwaakaambila Musa.
5 Jehova wakazumanana kwaambila Musa kuti: 6 “Kobaambila bana Israyeli kuti, ‘Ikuti mwaalumi naa mukaintu wacita cimwi cazibi nzyobacita bantu akubisizya Jehova, muntu ooyo ulaamulandu.+ 7 Weelede kulyaambilila+ cibi ncaakacita, akuubbadela mulandu wakwe woonse, alimwi akuyungizya cipaanzi casanu;+ weelede kubbadela kuli yooyo ngwaakabisizya. 8 Pele ikuti naa sikubisyilwa wafwa alimwi katajisi wamukowa waafwaafwi uukonzya kubbadelwa, nkokuti iciyoobbadelwa ciyoopegwa kuli Jehova, eelyo ciyooba camupaizi kuyungizya aamugutu wacipaizyo cakumanya milandu yayooyo wakabisya.+
9 “‘Kufwumbwa zyakusanga zisalala+ zyabana Israyeli nzyobapa kumupaizi, zyeelede kuba zyakwe.+ 10 Zintu zisalala zyamuntu umwi aumwi ziyoozumanana kuba zyakwe. Kufwumbwa cintu muntu ncaapa kumupaizi, ciyooba camupaizi.’”
11 Jehova wakazumanana kwaambila Musa kuti: 12 “Kobaambila bana Israyeli kuti, ‘Nceeci ceelede kucitwa ikuti naa mukaintu wamwaalumi umwi waleya akutasyomeka kulinguwe, 13 akuti mwaalumi umbi woonana anguwe,+ pele mulumaakwe katazyi alimwi makani aaya kaasisidwe kumulumaakwe, walisofwaazya pele kunyina kamboni alimwi tanaajatwa: 14 Kufwumbwa naa mulumi waba abuzuba akutalika kuyeeyela mukaintu wakwe kuti wacita cibi, alimwi kakuli wacicita ncobeni, naa ikuti mulumi waba abuzuba akutalika kuyeeyela mukaintu wakwe kuti wacita cibi, pele kakuli tanaacicita ncobeni, 15 mwaalumi ooyo weelede kuleta mukaintu wakwe kumupaizi, antoomwe acituuzyo camukaintu ooyo, cipaanzi cakkumi caefa* cafulaulu yabbaale. Tayelede kutila mafwuta naa kubikka tununkilizyo alincico, nkaambo ncituuzyo camaila cabuzuba, icituuzyo camaila cakwiibalusya mulandu.
16 “‘Mupaizi weelede kumuleta mukaintu kumbele akumwiimika kubusyu bwa Jehova.+ 17 Mpoonya mupaizi weelede kubweza maanzi aasalala mucibiya, akubweza mavwu ansi mutente lyakukombela akwaabikka mumaanzi. 18 Kuzwa waawo mupaizi weelede kwiimika mukaintu ooyo kubusyu bwa Jehova akutebezya masusu aakwe akubikka cituuzyo camaila caciibalusyo mumaanza aakwe, nkokuti cituuzyo camaila cabuzuba,+ eelyo mupaizi mujanza lyakwe unoojisi maanzi aalula aapa kusinganizyigwa.+
19 “‘Mpoonya mupaizi uyakwaambila mukaintu ooyo kuti akonke akumwaambila kuti: “Ikuti kunyina mwaalumi uumbi wakoona anduwe koli kumulumaako+ alimwi tonookaleya akusofwaala, koanguluka kuzintu zyoonse zikonzya kucitika akaambo kamaanzi aalula aaya aapa kusinganizyigwa. 20 Pele ikuti naa wakaleya nookacili kumulumaako kwiinda mukulisofwaazya, alimwi wakoonana amwaalumi uumbi+ kunze lyamulumaako–” 21 Mpoonya mupaizi uyakwaambila mukaintu ooyo kukonka cikonke cakusinganya akumwaambila kuti: “Jehova aakupe kuti ube cikozyanyo mukusinganya amukukonka akati kabantu bako alimwi Jehova aape kuti cibelo* cako cinyane* alimwi akupa kuti da lyako lizimbe. 22 Maanzi aaya aapa kusinganizyigwa ayoonjila mwida lyako akupa kuti da lyako lizimbe akupa kuti cibelo* cako cinyane.”* Mpoonya mukaintu ooyo weelede kwaamba kuti: “Ameni! Ameni!”*
23 “‘Mpoonya mupaizi weelede kukulemba kusinganya ooku mubbuku akukusanzya mumaanzi aalula. 24 Alimwi weelede kunywisya mukaintu ooyo maanzi aalula aapa kusinganizyigwa, eelyo maanzi aapa kusinganizyigwa alanjila mwida lyakwe akumululila. 25 Mupaizi weelede kubweza cituuzyo camaila cabuzuba+ kuzwa mujanza lyamukaintu akuciyumba kumbele amusyule kubusyu bwa Jehova akucileta afwaafwi acipaililo. 26 Mupaizi uyoobweza cituuzyo camaila cikkwana mujanza kacili cituuzyo caciibalusyo akucuumpa kutegwa cisuke busi acipaililo,+ kuzwa waawo uyoonywisya mukaintu maanzi. 27 Amana kumunywisya maanzi, ikuti naa wakalisofwaazya mukuti tanaakasyomeka kumulumaakwe, maanzi aapa kusinganizyigwa ayoonjila mwida lyakwe akumululila eelyo da lyakwe liyoozimba alimwi cibelo* cakwe ciyoonyana,* alimwi mukaintu ooyo uyooba cikozyanyo cakusinganizyigwa akati kabantu bakwe. 28 Nokuba boobo, ikuti naa mukaintu ooyo tanaakalisofwaazya alimwi ulasalala, nkokuti uyakwaanguluka kucisubulo cili boobu, alimwi uyookonzya kumita akuzyala bana.
29 “‘Ooyu ngomulawo wabuzuba,+ ikuti naa mukaintu waleya akulisofwaazya nacili amulumaakwe, 30 naa kuti mwaalumi waba abuzuba akuyeeyela mukaintu wakwe kuti tanaasyomeka; weelede kumwiimika kubusyu bwa Jehova, eelyo mupaizi weelede kumucitila kweelana azili mumulawo ooyu woonse. 31 Mwaalumi uyakwaanguluka kumulandu, pele mukaintu wakwe uyoolyaambilila akaambo kamulandu wakwe.’”
6 Lino Jehova wakaambila Musa kuti: 2 “Kobaambila bana Israyeli kuti, ‘Ikuti mwaalumi naa mukaintu wapanga cikonke caalubazu cakuba mu Naziri*+ wa Jehova, 3 tayelede kunywa waini naa zyakunywa zimbi zikola. Tayelede kunywa musinza uupangwa awaini naa zyakunywa zimbi zikola.+ Tayelede kunywa musinza wamisaansa nokuba kulya misaansa mitete naa yakayuma. 4 Mumazuba aakwe oonse aabu Naziri tayelede kulya cintu cili coonse cipangwa kumisaansa, ibe misaansa iitanabizwa naa zikanda.
5 “‘Mumazuba aakwe oonse aacikonke cabu Naziri takweelede kwiinda mbeli mumutwe wakwe.+ Weelede kuzumanana kusalala kwiinda mukulekela masusu aakwe kuti alampe kusikila akazuzikizyigwe mazuba ngaakalyaaba kuli Jehova. 6 Mumazuba oonse ngalyaabide kuli Jehova teelede kuswena afwaafwi amutunta. 7 Nokuba kuti wafwidwa bausyi naa banyina naa mwanookwabo musankwa naa musimbi, tayelede kulisofwaazya pe,+ nkaambo citondezyo cabu Naziri bwakwe kuli Leza mpocili amutwe wakwe.
8 “‘Ulasalala kuli Jehova mazuba oonse aabu Naziri bwakwe. 9 Pele ikuti naa muntu wafwa cakutayeeyelwa afwaafwi anguwe+ cakuti wasofwaazya masusu aatondezya kulyaaba kwakwe kuli Leza,* weelede kugela masusu aakwe+ mubuzuba bwakusalazyigwa kwakwe. Weelede kwaagela mubuzuba bwaciloba. 10 Mubuzuba bwalusele, weelede kuleta nziba zyobilo naa twana twankwilimba tobilo kumupaizi kumulyango watente lyakuswaanganina. 11 Mupaizi weelede kutuula kamwi kuti kabe cituuzyo cazibi eelyo kamwi kuti kabe cituuzyo cuumpwa kuti amanye milandu yakwe+ kujatikizya mutunta. Mpoonya weelede kusalazya mutwe wakwe mubuzuba oobo. 12 Weelede kulyaaba alimwi kuli Jehova mazuba aambi aabu Naziri bwakwe, alimwi uyooleta mugutu wamwaka omwe kuti abe cituuzyo camilandu. Nokuba boobo, mazuba aakusaanguna aabu Naziri bwakwe taakooyoobalwa nkaambo wakasofwaazya bu Naziri bwakwe.
13 “‘Lino ngooyu mulawo uujatikizya mu Naziri: Aakuzuzikizyigwa mazuba aabu Naziri+ bwakwe, uyooletwa kumulyango watente lyakuswaanganina. 14 Ooko weelede kutola cituuzyo cakwe kuli Jehova: mugutu wamwaka omwe uutakwe kampenda abe cituuzyo cuumpwa,+ mbelele mpwizi yamwaka omwe iitakwe kampenda ibe cituuzyo cazibi,+ mugutu uutakwe kampenda abe cipaizyo calumvwano,+ 15 mutaanga* wazinkwa zibunge zyafulaulu zitajisi bumena zijisi kapulo akati alimwi zinanikidwe mafwuta, tunkwa tupapalete tunanikidwe mafwuta acituuzyo cazyo camaila+ alimwi azituuzyo zyazyo zinyugwa.+ 16 Mupaizi uyoozileta kubusyu bwa Jehova akutuula cituuzyo cakwe cazibi acituuzyo cakwe cuumpwa. 17 Uyootuula mugutu wacipaizyo calumvwano kuli Jehova antoomwe amutaanga wazinkwa zitajisi bumena, mupaizi uyootuula cituuzyo canguwo camaila+ acituuzyo canguwo cinyugwa.
18 “‘Mpoonya mu Naziri weelede kugela masusu aakwe*+ malamfwu kumulyango watente lyakuswaanganina akubweza masusu aakumutwe wakwe aakamena ciindi cabu Naziri bwakwe akwaabikka mumulilo uuli kunsi aacipaizyo calumvwano. 19 Mpoonya mupaizi weelede kubweza kuulu kwamugutu kwakumbele kujikidwe,+ cinkwa cibunge citajisi bumena cijisi kapulo akati, akankwa kapapalete katajisi bumena kuzwa mumutaanga akuzibikka mumaanza aamu Naziri amana kugela citondezyo cabu Naziri bwakwe. 20 Eelyo mupaizi weelede kuziyumba ooku akooku mbuli cituuzyo cakuyumba kubusyu bwa Jehova.+ Eezyi nzintu zisalala kumupaizi antoomwe akaango kacituuzyo cakuyumba alimwi akuulu ikwasangwa.+ Kuzwa waawo, ooyo iwakali mu Naziri ulakonzya kunywa waini.
21 “‘Ngooyu mulawo uujatikizya mu Naziri+ wapanga cikonke: Ikuti mu Naziri wakonka alimwi kakonzya kutuula cituuzyo kuli Jehova iciindilila atala azyeelelo zyabu Naziri bwakwe, nkokuti weelede kuzuzikizya cikonke cakwe akaambo kamulawo wabu Naziri bwakwe.’”
22 Kumane Jehova wakaambila Musa kuti: 23 “Koambila Aroni abana bakwe kuti, ‘Oobu mbomweelede kulongezya+ bana Israyeli. Kamubaambila kuti:
24 “Jehova amulongezye+ akumubamba.
25 Jehova amunisye busyu bwakwe alindinywe+ akumufwida lubomba.
26 Jehova amufwide luzyalo akumupa luumuno.”’+
27 Alimwi beelede kubelesya zina lyangu nobalongezya bana Israyeli,+ kutegwa ndibalongezye.”+
7 Mubuzuba Musa naakamana kwiimika tente lyakukombela,+ wakalinanika+ akulisalazya antoomwe azibelesyo+ zyalyo zyoonse, cipaililo alimwi azibelesyo zyaco zyoonse. Naakamana kuzinanika akuzisalazya zintu eezyi,+ 2 basilutwe babana Israyeli,+ basilutwe baziinga zyabamausyi, bakaleta zipego. Basilutwe aaba bamisyobo ibakali kweendelezya baabo bakalembwa, 3 bakaleta zipego zyabo kubusyu bwa Jehova, ŋola zivwumbidwe zili cisambomwe abasune bali 12, basilutwe bobilo bakapa ŋola yomwe eelyo silutwe umwi aumwi wakapa musune omwe; bakazileta kumbele lyatente lyakukombela. 4 Aboobo Jehova wakaambila Musa kuti: 5 “Kozitambula zintu eezyi kuzwa kulimbabo, nkaambo ziyoobelesyegwa mumulimo watente lyakuswaanganina alimwi weelede kuzipa ba Levi, umwi aumwi kweelana amulimo wakwe.”
6 Aboobo Musa wakazitambula ŋola alimwi aŋombe akuzipa ba Levi. 7 Bana Gerisoni wakabapa ŋola zyobilo abasune bone kweelana amilimo yabo;+ 8 alimwi bana Merari wakabapa ŋola zyone abasune bali lusele kweelana amilimo yabo, kabeendelezyegwa a Itamara imwana wa Aroni mupaizi.+ 9 Pele bana Kohati kunyina ncaakabapa, nkaambo milimo yabo yakali yamubusena busalala,+ alimwi zintu zisalala bakali kuzinyamwida amagwezyo aabo.+
10 Lino basilutwe bakaleta zipego zyabo nicakali kwaabwa+ cipaililo mubuzuba nocakananikwa. Eelyo basilutwe nobakaleta zipego zyabo kumbele lyacipaililo, 11 Jehova wakaambila Musa kuti: “Mubuzuba bumwi abumwi silutwe omwe weelede kuleta cipego cakwe kukwaabwa kwacipaililo.”
12 Iwakaleta cipego cakwe mubuzuba bwakusaanguna wakali Nasoni,+ imwana wa Aminadabu, kuzwa kumusyobo wa Juda. 13 Wakapa mutiba wansiliva omwe uulema masyekeli* aali 130, amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila+ uuvwelene amafwuta; 14 nkapu yomwe yangolida iilema masyekeli aali kkumi, kiizwide tununkilizyo; 15 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 16 kana kampongo komwe kacituuzyo cazibi;+ 17 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, izyacipaizyo calumvwano.+ Eeci ncecakali cipego ca Nasoni imwana wa Aminadabu.+
18 Mubuzuba bwabili, Netaneli+ imwana wa Zuwara, silutwe wa Isakara wakaleta cipego cakwe. 19 Wakapa mutiba wansiliva mwe uulema masyekeli aali 130 amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila+ uuvwelene amafwuta; 20 nkapu yomwe yangolida iilema masyekeli aali kkumi, kiizwide tununkilizyo; 21 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 22 kana kampongo komwe kacituuzyo cazibi;+ 23 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Netaneli imwana wa Zuwara.
24 Mubuzuba bwatatu, Eliabu+ imwana wa Heloni, silutwe wabana ba Zebuloni, 25 wakaleta cipego cakwe, mutiba wansiliva omwe uulema masyekeli aali 130 amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila+ uuvwelene amafwuta; 26 nkapu yomwe yangolida iilema masyekeli aali 10, kiizwide tununkilizyo; 27 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 28 kana kampongo komwe kacituuzyo cazibi;+ 29 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Eliabu+ imwana wa Heloni.
30 Mubuzuba bwane, Elizuri+ imwana wa Sedeuri, silutwe wabana ba Rubeni, 31 wakaleta cipego cakwe, mutiba wansiliva omwe uulema masyekeli aali 130 amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila+ uuvwelene amafwuta; 32 nkapu yomwe yangolida iilema masyekeli aali 10, kiizwide tununkilizyo; 33 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 34 kana kampongo komwe kacituuzyo cazibi;+ 35 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Elizuri+ imwana wa Sedeuri.
36 Mubuzuba bwasanu, Selumiyeli+ imwana wa Zurisadai, silutwe wabana ba Simeoni, 37 wakaleta cipego cakwe, mutiba wansiliva omwe uulema masyekeli aali 130 amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila uuvwelene amafwuta;+ 38 nkapu yomwe yangolida iilema masyekeli aali 10, kiizwide tununkilizyo; 39 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 40 kana kampongo komwe kacituuzyo cazibi;+ 41 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Selumiyeli+ imwana wa Zurisadai.
42 Mubuzuba bwacisambomwe, Eliyasafe+ imwana wa Deyueli, silutwe wabana ba Gadi, 43 wakaleta cipego cakwe, mutiba wansiliva omwe uulema masyekeli aali 130, amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila+ uuvwelene amafwuta; 44 nkapu yomwe yangolida iilema masyekeli aali 10, kiizwide tununkilizyo; 45 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 46 kana kampongo komwe kacituuzyo cazibi;+ 47 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Eliyasafe+ imwana wa Deyueli.
48 Mubuzuba bwaciloba, Elisama+ imwana wa Amihudi, silutwe wabana ba Efraimu, 49 wakaleta cipego cakwe, mutiba wansiliva omwe uulema masyekeli aali 130, amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila uuvwelene amafwuta;+ 50 nkapu yomwe yangolida iilema masyekeli aali 10, kiizwide tununkilizyo; 51 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 52 kana kampongo komwe kacituuzyo cazibi;+ 53 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Elisama+ imwana wa Amihudi.
54 Mubuzuba bwalusele, Gamaliyeli+ imwana wa Pedazuri, silutwe wabana ba Manase, 55 wakaleta cipego cakwe, mutiba wansiliva omwe uulema masyekeli aali 130, amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila+ uuvwelene amafwuta; 56 nkapu yomwe yangolida iilema masyekeli aali 10, kiizwide tununkilizyo; 57 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 58 kana kampongo komwe kacituuzyo cazibi;+ 59 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Gamaliyeli+ imwana wa Pedazuri.
60 Mubuzuba bwafwuka, Abidana+ imwana wa Gideoni, silutwe+ wabana ba Benjamini, 61 wakaleta cipego cakwe, mutiba wansiliva omwe uulema masyekeli aali 130, amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila uuvwelene amafwuta;+ 62 nkapu yomwe yangolida iilema masyekeli aali 10, kiizwide tununkilizyo; 63 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 64 kana kampongo komwe kacituuzyo cazibi;+ 65 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Abidana+ imwana wa Gideoni.
66 Mubuzuba bwa 10, Ahiezeri+ imwana wa Amisadai, silutwe wabana ba Dani, 67 wakaleta cipego cakwe, mutiba wansiliva omwe uulema masyekeli aali 130, amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila+ uuvwelene amafwuta; 68 nkapu yomwe yangolida iilema masyekeli aali 10, kiizwide tununkilizyo; 69 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 70 kana kampongo komwe kacituuzyo cazibi;+ 71 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Ahiezeri+ imwana wa Amisadai.
72 Mubuzuba bwa 11, Pagiyeli+ imwana wa Okirani, silutwe wabana ba Aseri, 73 wakaleta cipego cakwe, mutiba wansiliva omwe uulema masyekeli aali 130, amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila uuvwelene amafwuta;+ 74 nkapu yomwe yangolida iilema masyekeli aali 10, kiizwide tununkilizyo; 75 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 76 kana kampongo komwe kacituuzyo cazibi;+ 77 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Pagiyeli+ imwana wa Okirani.
78 Mubuzuba bwa 12, Ahira+ imwana wa Enani, silutwe wabana ba Nafutali, 79 wakaleta cipego cakwe, mutiba wansiliva omwe uulema masyekeli aali 130, amutiba wanindi wansiliva omwe uulema masyekeli aali 70 kweelana acipimyo casyekeli lyamubusena busalala,+ yoonse yobilo kiizwide fulaulu wacituuzyo camaila uuvwelene amafwuta;+ 80 nkapu yomwe yangolida iilema masyekeli aali 10, kiizwide tununkilizyo; 81 mupoho omwe uucili mwana, mugutu omwe, amugutu wamwaka omwe, izyacituuzyo cuumpwa;+ 82 kana kampongo komwe kacituuzyo cazibi;+ 83 aŋombe zyobilo, bagutu bosanwe, bajembwe bosanwe abagutu bamwaka omwe bosanwe, zyacipaizyo calumvwano.+ Eeci ncecakali cipego ca Ahira+ imwana wa Enani.
84 Eezyi nzyezipego nzyobakapa basilutwe babana Israyeli izyakwaabwa+ kwacipaililo ciindi nocakananikwa: mitiba yansiliva iili 12, mitiba yanindi yansiliva iili 12, nkapu zyangolida zili 12;+ 85 mutiba wansiliva umwi aumwi uulema masyekeli aali 130, amutiba wanindi umwi aumwi uulema masyekeli aali 70, aboobo nsiliva yamitiba yoonse yakali kulema masyekeli aali 2,400 kweelana acipimyo casyekeli lyamubusena busalala;+ 86 nkapu zyangolida zili 12 izyakazwide tununkilizyo, imwi aimwi iilema masyekeli aali 10 kweelana acipimyo casyekeli lyamubusena busalala, aboobo ngolida yankapu zyoonse yakali kulema masyekeli aali 120. 87 Banyama boonse bacituuzyo cuumpwa bakali bapoho bali 12, bagutu bali 12, bagutu bamwaka omwe bali 12 antoomwe azituuzyo zyabo zyamaila, alimwi atwana twampongo tuli 12 twacituuzyo cazibi; 88 eelyo banyama bacipaizyo calumvwano bakali bapoho bali 24, bagutu bali 60, bajembwe bali 60 abagutu bamwaka omwe bali 60. Eezyi nzyezipego zyakwaabwa+ kwacipaililo nicakamana kunanikwa.+
89 Kufwumbwa ciindi Musa naakali kunjila mutente lyakuswaanganina kuti aambaule a Leza,+ wakali kumvwa jwi lyaambaula anguwe atala aacivwunisyo+ cabbokesi lya Bumboni, wakali kwaambaula anguwe kuzwa akati kabakerubi+ bobilo.
8 Jehova wakaambila Musa kuti: 2 “Komwaambila Aroni kuti, ‘Ciindi wayasya malambe aali ciloba, ayelede kumunikila busena buli kumbele lyacibikkilo camalambe.’”+ 3 Aboobo Aroni wakacita mbubonya oobo: Wakayasya malambe kuti amunikile busena buli kumbele lyacibikkilo camalambe,+ mbubonya Jehova mbwaakalailila Musa. 4 Mboobu cibikkilo camalambe mbocakapangidwe: Cakali cangolida iifwulidwe ansando; kuzwa kutako lyaco kusikila kumaluba-luba, cakafwulidwe angolida.+ Cibikkilo camalambe cakapangidwe mbubonya mbuli cilengaano+ Jehova ncaakamutondezya Musa.
5 Alimwi Jehova wakaambila Musa kuti: 6 “Bweza ba Levi kuzwa akati kabana Israyeli akubasalazya.+ 7 Mboobu mboyelede kubasalazya: Weelede kubasansaila maanzi aakubasalazya kuzibi, alimwi beelede kunyoola mibili yabo yoonse ambeli akuwasya zisani zyabo akulisalazya.+ 8 Mpoonya beelede kubweza mupoho uucili mwana+ acituuzyo cakwe camaila+ cafulaulu uuvwelene amafwuta, eelyo yebo ubweze aumbi mupoho uucili mwana wacituuzyo cazibi.+ 9 Mpoonya ulete ba Levi kumbele lyatente lyakuswaanganina akubunganya mbungano yoonse yabana Israyeli.+ 10 Wabaimika ba Levi kumbele lya Jehova, bana Israyeli beelede kubikka maanza aabo alimbabo.+ 11 Aroni weelede kupa* ba Levi kuli Jehova mbuli cituuzyo cakuyumba+ kuzwa kubana Israyeli, eelyo bayoobeleka milimo ya Jehova.+
12 “Mpoonya ba Levi bayoobikka maanza aabo amitwe yabapoho+ akutuula mupoho omwe kuti abe cituuzyo cazibi eelyo umwi abe cituuzyo cuumpwa kuli Jehova kumanya milandu+ yaba Levi. 13 Alimwi weelede kuyakwiimika ba Levi kumbele lya Aroni abana bakwe akubapa* kuli Jehova mbuli cituuzyo cakuyumba. 14 Weelede kuzandula ba Levi akati kabana Israyeli, eelyo ba Levi bayooba bangu.+ 15 Kuzwa waawo, ba Levi bayoonjila akubelekela atente lyakuswaanganina. Oobu mboyelede kubasalazya akubapa* mbuli cituuzyo cakuyumba. 16 Bapegwa kulindime kuzwa akati kabana Israyeli. Ndilababweza kuti babe bangu mubusena bwabana bataanzi boonse babana Israyeli.+ 17 Nkaambo bataanzi boonse babana Israyeli mbibangu, babe babantu naa babanyama.+ Ndakabasalazya kuti babe bangu mubuzuba oobo nindakajaya bana bataanzi boonse mucisi ca Egepita.+ 18 Ndilabweza ba Levi boonse mubusena bwabana bataanzi boonse babana Israyeli. 19 Ndilapa ba Levi kuli Aroni abana bakwe akati kabana Israyeli, kuti babelekele bana Israyeli atente lyakuswaanganina+ akumanya milandu yabana Israyeli, kutegwa bana Israyeli+ batasikilwi zipenzyo akaambo kakuswena afwaafwi abusena busalala.”
20 Musa a Aroni ambungano yoonse yabana Israyeli bakacitila ba Levi mbubonya oobo. Bakabacitila mbubonya Jehova mbwaakalailila Musa kujatikizya ba Levi. 21 Aboobo ba Levi bakalisalazya akuwasya zisani zyabo,+ mpoonya Aroni wakabapa* kuli Jehova+ mbuli cituuzyo cakuyumba. Kumane Aroni wakamanya milandu yabo kuti basalale.+ 22 Kuzwa waawo, ba Levi bakanjila mutente lyakuswaanganina kuti babeleke milimo yabo kubusyu bwa Aroni abana bakwe. Bakabacitila mbubonya Jehova mbwaakalailila Musa kujatikizya ba Levi.
23 Lino Jehova wakaambila Musa kuti: 24 “Mboobu bubambe bujatikizya ba Levi: Kufwumbwa wakkwanya myaka iili 25 kuya kumbele, mwaalumi ooyo uyoosangana abaabo babeleka milimo yaatente lyakuswaanganina. 25 Pele ainda amyaka iili 50, uyakwiileka milimo eeyi akutaibeleka limbi. 26 Ulakonzya kugwasyilizya banabokwabo ibabeleka milimo atente lyakuswaanganina, nokuba boobo walo teelede kubeleka pe. Oobu mboyelede kucitila ba Levi mumilimo yabo.”+
9 Mumwezi wakusaanguna+ mumwaka wabili kuzwa ciindi nobakazwa mucisi ca Egepita, Jehova wakaambila Musa munkanda ya Sinai kuti: 2 “Bana Israyeli beelede kulibambila cipaizyo ca Pobwe Lyakwiindilila+ aciindi caco cibikkidwe.+ 3 Mweelede kucibamba aciindi caco cibikkidwe mubuzuba bwa 14 bwamwezi ooyu kumangolezya. Mweelede kucibamba kweelana amilawo yaco yoonse alimwi abubambe boonse bubikkidwe.”+
4 Aboobo Musa wakaambila bana Israyeli kulibambila cipaizyo ca Pobwe Lyakwiindilila. 5 Eelyo bakalibambila cipaizyo ca Pobwe Lyakwiindilila mumwezi wakusaanguna, mubuzuba bwa 14 bwamwezi ooyo kumangolezya munkanda ya Sinai. Bana Israyeli bakacita mbubonya Jehova mbwaakalailila Musa.
6 Lino kwakali baalumi bamwi ibakasofweede akaambo kakuguma mutunta+ wamuntu cakuti tiibakali kukonzya kulibambila cipaizyo ca Pobwe Lyakwiindilila mubuzuba oobo. Aboobo baalumi aabo bakaunka kuli Musa a Aroni mubuzuba oobo+ 7 akwaamba kuti: “Tulisofweede akaambo kakuguma mutunta wamuntu. Sena tweelede kukasyigwa kupa cituuzyo kuli Jehova aciindi caco cibikkidwe antoomwe abana Israyeli?”+ 8 Aboobo Musa wakati kulimbabo: “Amulindile, ndimvwe malailile Jehova ngaatiipe kujatikizya ndinywe.”+
9 Mpoonya Jehova wakati kuli Musa: 10 “Kobaambila bana Israyeli kuti, ‘Nokuba kuti umwi muntu akati kanu naa mumazyalani aanu aaciboola wasofwaala akaambo kakuguma mutunta+ wamuntu kuti kali mulweendo lulamfwu, uleelede kulibambila cipaizyo ca Pobwe Lyakwiindilila lya Jehova. 11 Beelede kucibamba mubuzuba bwa 14 bwamwezi wabili+ kumangolezya. Beelede kucilya antoomwe azinkwa zitajisi bumena azisyu zilula.+ 12 Tabeelede kusiya cimwi caco kusikila mafwumofwumo,+ alimwi tabeelede kupwaya cifwuwa caco cili coonse.+ Beelede kucibamba kweelana amilawo ya Pobwe Lyakwiindilila yoonse. 13 Nokuba boobo ikuti muntu kasalala naa katali mulweendo pele taakwe naalibambila cipaizyo ca Pobwe Lyakwiindilila, muntu ooyo weelede kujaigwa+ nkaambo taakwe naatuula cipaizyo ca Jehova aciindi caco cibikkidwe. Muntu ooyo weelede kulyaambilila cibi cakwe.
14 “‘Ikuti naa kakuli mweenzu uukkede akati kanu, awalo weelede kubamba cipaizyo ca Pobwe Lyakwiindilila ca Jehova.+ Weelede kucibamba kweelana amulawo wa Pobwe Lyakwiindilila alimwi abubambe bubikkidwe.+ Kweelede kuba mulawo omwe buyo kulindinywe akumweenzu uukkala akati kanu.’”+
15 Lino mubuzuba nilyakaimikwa+ tente lyakukombela, ikkumbi lyakavwumba tente lyakukombela, nkokuti tente lya Bumboni, pele kumangolezya icakali kulibonya mbuli mulilo cakazumanana kwiima atala aatente lyakukombela kusikila mafwumofwumo.+ 16 Oobo mbucakali kucitika lyoonse: Ikkumbi lyakali kulivwumbilila masyikati, pele masiku lyakali kuboneka mbuli mulilo.+ 17 Kufwumbwa kkumbi nolyakali kunyamuka kuzwa atente lyakukombela, mpoonya aawo bana Israyeli abalo bakali kunyamuka akweenda,+ eelyo aawo mpolyaima kkumbi mpampawo bana Israyeli mpobakali kuyaka zilawo.+ 18 Jehova abalailila bana Israyeli kuti banyamuke, bakali kunyamuka akweenda, eelyo Jehova abalailila kuti bayake zilawo, bakali kuyaka.+ Kufwumbwa kuti kkumbi kaliimvwi atala aatente lyakukombela, abalo bakali kukkala. 19 Ikuti kkumbi lyazumanana kwiima atala aatente lyakukombela mazuba manji, bana Israyeli bakali kumumvwida Jehova aboobo tiibakali kunyamuka.+ 20 Zimwi ziindi ikkumbi lyakali kwiima buyo mazuba masyoonto atala aatente lyakukombela. Jehova abalailila kuti kabakkede, bakali kuzumanana muzilawo zyabo, alimwi Jehova abalailila kuti banyamuke, bakali kunyamuka akweenda. 21 Zimwi ziindi ikkumbi lyakali kwiima buyo kuzwa kumangolezya kusikila mafwumofwumo, alimwi kkumbi lyanyamuka mafwumofwumo, bakali kunyamuka akweenda. Kufwumbwa naa lyanyamuka syikati naa masiku, abalo bakali kunyamuka akweenda.+ 22 Kufwumbwa naa lyaima mazuba obilo, mwezi naa mazuba manji, lilikke kuti kkumbi lyakali atala aatente lyakukombela, bana Israyeli abalo bakalikkede muzilawo zyabo. Pele lyanyamuka, abalo bakali kunyamuka akweenda. 23 Jehova abalailila kuyaka zilawo bakali kuyaka zilawo, eelyo Jehova abalailila kunyamuka bakali kunyamuka akweenda. Bakali kutobela malailile aa Jehova mbubonya Jehova mbwaakalailila Musa.
10 Mpoonya Jehova wakaambila Musa kuti: 2 “Kolipangila myeembo+ yansiliva yobilo; wiipange ansiliva iifwulidwe ansando, alimwi weelede kwiibelesya kwiita mbungano akwaambila mbungano kuti inyamuke. 3 Yalizyigwa yoonse yobilo, mbungano yoonse yeelede kuboola kulinduwe kumulyango watente lyakuswaanganina.+ 4 Ikuti naa kwalizyigwa buyo omwe, balikke basilutwe bazyuulu zyabana Israyeli mbabeelede kuboola kulinduwe.+
5 “Mwalizya mweembo munzila iicinca-cinca, nkamu iiyakide zilawo kulubazu lwakujwe+ yeelede kunyamuka akweenda. 6 Mwaulizya lwabili mweembo munzila iicinca-cinca, nkamu iiyakide zilawo kulubazu lwakumusanza+ yeelede kunyamuka akweenda. Beelede kulizya mweembo munzila eeyi ciindi nkamu imwi aimwi niinyamuka akweenda.
7 “Nomwiita mbungano kuti ibungane, mweelede kulizya myeembo,+ pele ikutali munzila iicinca-cinca. 8 Bana ba Aroni, ibapaizi, mbabeelede kulizya myeembo+ alimwi kulizya myeembo ooku weelede kuba mulawo walyoonse mumazyalani aanu.
9 “Ikuti naa mwaunka kuyoolwana basikumupenzya munyika yanu, mweelede kulizya myeembo+ yankondo, eelyo Jehova Leza wanu uyoomuyeeya akumuvwuna kuli basinkondonyoko.
10 “Alimwi mazuba nomusekelela,+ nkokuti ciindi camapobwe+ aanu alimwi akumatalikilo aamyezi yanu, mweelede kulizya myeembo kumbele lyazituuzyo zyanu zyuumpwa+ azipaizyo zyanu zyalumvwano;+ ikulizya myeembo ooku kuyoopa kuti Leza wanu amuyeeye. Ndime Jehova Leza wanu.”+
11 Lino mubuzuba bwa 20 bwamwezi+ wabili mumwaka wabili, ikkumbi lyakanyamuka atala aatente lyakukombela+ lya Bumboni. 12 Aboobo bana Israyeli bakatalika kunyamuka akweenda kuzwa munkanda ya Sinai kweelana abubambe bwakunyamuka+ bwakabikkidwe, eelyo kkumbi lyakaakwiima munkanda ya Parani.+ 13 Eeci cakali ciindi cakusaanguna kunyamuka akweenda kweelana amalailile Jehova ngaakapa kwiinda muli Musa.+
14 Aboobo bankamu ya Juda yamisyobo yotatwe bakasaanguna kunyamuka akweenda munkamu zyabo, Nasoni+ imwana wa Aminadabu ngowakali kweendelezya nkamu eeyo. 15 Nkamu yamusyobo wa Isakara yakali kweendelezyegwa a Netaneli+ imwana wa Zuwara. 16 Eelyo nkamu yamusyobo wa Zebuloni yakali kweendelezyegwa a Eliabu+ imwana wa Heloni.
17 Tente lyakukombela nolyakamwaigwa,+ bana ba Gerisoni+ abana ba Merari+ ibakanyamuna tente lyakukombela bakanyamuka akweenda.
18 Mpoonya bankamu ya Rubeni yamisyobo yotatwe bakanyamuka akweenda munkamu zyabo, Elizuri+ imwana wa Sedeuri ngowakali kweendelezya nkamu eeyo. 19 Nkamu yamusyobo wa Simeoni yakali kweendelezyegwa a Selumiyeli+ imwana wa Zurisadai. 20 Eelyo nkamu yamusyobo wa Gadi yakali kweendelezyegwa a Eliyasafe+ imwana wa Deyueli.
21 Mpoonya bana Kohati, ibakanyamwide zibelesyo+ zyamubusena busalala bakanyamuka. Tente lyakukombela lyakeelede kuti kaliimikidwe kale kabatanasika.
22 Kumane ibankamu ya Efraimu yamisyobo yotatwe bakanyamuka akweenda munkamu zyabo, Elisama+ imwana wa Amihudi ngowakali kweendelezya nkamu eeyo. 23 Nkamu yamusyobo wa Manase yakali kweendelezyegwa a Gamaliyeli+ imwana wa Pedazuri. 24 Eelyo nkamu yamusyobo wa Benjamini yakali kweendelezyegwa a Abidana+ imwana wa Gideoni.
25 Kumane ibankamu ya Dani yamisyobo yotatwe bakanyamuka akweenda munkamu zyabo kabali kumamanino kucingilila nkamu zyoonse, Ahiezeri+ imwana wa Amisadai ngowakali kweendelezya nkamu eeyo. 26 Nkamu yamusyobo wa Aseri yakali kweendelezyegwa a Pagiyeli+ imwana wa Okirani. 27 Eelyo nkamu yamusyobo wa Nafutali yakali kweendelezyegwa a Ahira+ imwana wa Enani. 28 Oobu mbobwakali bubambe bwakunyamuka akweenda oobo bana Israyeli ankamu zyabo mbobakali kutobela ciindi nobakali kulonga.+
29 Mpoonya Musa wakaambila Hobabu imwana wa Reueli*+ muna Midiyani, usyizyala Musa, kuti: “Tuunka kubusena oobo Jehova mbwaakaamba kuti, ‘Ndiyoomupa mbubo.’+ Atuunke anduwe+ alimwi tuyookucitila zibotu, nkaambo Jehova wasyomezya Israyeli zintu zibotu.”+ 30 Pele walo wakati: “Peepe, mebo tandikokuunka andinywe. Ndilapiluka kucisi cangu akumukowa wangu.” 31 Mpoonya Musa wakati: “Akaka utatusiyi pe, nkaambo ulizyi nkotweelede kuyooyakila munkanda, alimwi yebo ulakonzya kuba sikutusololela.* 32 Alimwi ikuti uunke andiswe,+ kufwumbwa bubotu Jehova mbwaayootucitila, andiswe tuyookucitila mbubonya oobo.”
33 Aboobo bakatalika kweenda kuzwa kucilundu ca Jehova+ lweendo lwamazuba otatwe, ibbokesi+ lyacizuminano ca Jehova lyakali kumbele lyabo mulweendo oolu lwamazuba otatwe kutegwa bayandaule busena bwakulyookezyela.+ 34 Ikkumbi lya Jehova+ lyakali kubasololela ciindi casyikati nobakali kweenda kuzwa kuzilawo zyabo.
35 Kufwumbwa Bbokesi lyanyamunwa, Musa wakali kwaamba kuti: “Nyamuka, O Jehova,+ akubamwaisya basinkondonyoko, alimwi abaabo bakusulide abatije kumbele lyako.” 36 Eelyo lyatulwa ansi, wakali kwaamba kuti: “O Jehova kopiluka kuzyuulu zitabaliki zyabana Israyeli.”+
11 Lino bantu bakatalika kutongooka kapati kubusyu bwa Jehova. Eelyo Jehova naakamvwa boobo, wakanyema kapati, aboobo mulilo uuzwa kuli Jehova wakatalika kubaumpa akujaya bamwi bakali kumagolelo aankambi. 2 Bantu nibakatalika kulilila Musa, wakakombelezya Jehova+ eelyo mulilo wakazima. 3 Aboobo busena oobo bwakaulikwa kuti Tabera,* nkaambo mulilo kuzwa kuli Jehova wakabaumpa.+
4 Nkamu yabamasi*+ iyakali akati kabo yakatondezya kulombozya kubyaabi,+ eelyo abalo bana Israyeli bakatalika kulila alimwi akwaamba kuti: “Ino nguni uutiitupe nyama kuti tulye?+ 5 Eelo kaka twaziyeeya nswi nzyotwakali kulya kakunyina kuula mu Egepita, alimwi amakowa, banamunywa, mahanyisi amagaliki!+ 6 Pele lino twawizuka. Twiile kulya buyo mana alikke.”+
7 Lino mana+ akali kulibonya mbuli tunseke tuniini-niini tutuba,+ alimwi akali kuboneka mbuli bulimbo. 8 Bantu bakali kumwaikizyanya kuyaabubwezelela mana akwaaziya naa kwaatwa. Mpoonya bakali kwaajika muzilongo naa kwaapanga zinkwa zibunge,+ alimwi akali kulweela mbuli tunkwa tuvwelene amafwuta. 9 Lino nokwakali kuba mume munkambi ciindi camasiku, aalo mana akali kuloka.+
10 Musa wakamvwa bantu kabalila mumikwasyi yabo, muntu umwi aumwi amulyango watente lyakwe. Eelyo Jehova wakakalala kapati,+ alimwi awalo Musa wakausa kapati. 11 Mpoonya Musa wakati kuli Jehova: “Ino nkaambo nzi ncowandipenzya boobu ndemubelesi wako? Nkaambo nzi ncootandifwida luzyalo, mukuti wabikka mukuli wabantu boonse aaba alindime?+ 12 Sena ndime ndakamita bantu aaba boonse? Sena ndime ndakabazyala nondaambila kuti, ‘Kobanyamuna acamba cako mbubonya mbuli sikulela* mbwanyamuna mwana uunyonka,’ kubatola kunyika njookakonkezya kuli bamausyi?+ 13 Ino ndilaijana kuli nyama yakupa bantu boonse aaba? Nkaambo baluujisi kundililila balaamba, ‘Kotupa nyama tulye!’ 14 Mebo tandikonzyi kunyamuna mukuli wabantu boonse aaba ndelikke; nkaambo wandilemena.+ 15 Ikuti naa mbocibede oobo, anu kondijaya buyo ndilyonya lino.+ Ikuti naa wandifwida luzyalo, utandipi limbi kubona mapenzi.”
16 Jehova wakaingula Musa kuti: “Kondisalila baalumi bali 70 akati kabaalu bamu Israyeli, baalumi mbozyi kuti mbaalu abasilutwe babantu,+ akubatola kutente lyakuswaanganina alimwi beelede kwiima ooko anduwe. 17 Mpoonya ndiyooseluka+ ooko akwaambaula anduwe,+ alimwi ndiyoobweza muuya+ umwi uuli alinduwe akuubikka alimbabo, eelyo bayookugwasya kunyamuna mukuli wabantu kutegwa utaunyamuni buyo olikke.+ 18 Weelede kwaambila bantu kuti, ‘Amulisalazye, nkaambo juunza+ muyoolya nyama, nkaambo mwali kulilila Jehova+ kamuti: “Ino nguni uutiitupe nyama kuti tulye? Zintu zyakali kutweendela kabotu ku Egepita.”+ Jehova masimpe uyoomupa nyama, alimwi muyoolya.+ 19 Tamukailyi buyo buzuba bomwe naa obilo naa osanwe naa mazuba aali 10 naa mazuba aali 20 pe, 20 pele muyakwiilya mwezi woonse, kusikila ikazwe mumpemo zyanu akumusesemya,+ nkaambo mwakamukaka Jehova uuli akati kanu alimwi mwali kulila kubusyu bwakwe kamuti: “Ino twakazwida nzi mu Egepita?”’”+
21 Mpoonya Musa wakati: “Bantu mbondili limwi bali 600,000, bamaalumi+ ibeenda amaulu, pele yebo waamba kuti, ‘Ndiyoobapa nyama, alimwi bayoolya mwezi woonse’! 22 Ikuti naa mbelele zyoonse, mpongo zyoonse aŋombe zyoonse zyajaigwa, sena inga bakkwana? Naa ikuti inswi zyoonse zyamulwizi zyazubwa, sena inga bakkwana?”
23 Mpoonya Jehova wakaambila Musa kuti: “Sena janza lya Jehova ndifwaafwi?+ Lino uyoobona naa nzyondaamba ziyoocitika ncobeni naa pe.”
24 Aboobo Musa wakaunka akuyakwaambila bantu majwi aa Jehova. Alimwi wakasala baalumi bali 70 akati kabaalu babantu akubaimika kuzinguluka tente.+ 25 Mpoonya Jehova wakaseluka mukkumbi+ akwaambaula anguwe+ alimwi wakabweza muuya umwi+ iwakali alinguwe akuubikka ali umwi aumwi wabaalu bali 70. Eelyo mbwaakababikkila buyo muuya, bakatalika kucita mbuli basinsimi,+ pele kunyina nobakacita oobo alimwi.
26 Lino kwakali baalumi bobilo ibakacili munkambi. Umwi wakali Elidadi eelyo umbi wakali Medadi. Muuya wakatalika kuboola alimbabo, mbwaanga bakali akati kabaabo ibakalembedwe, pele tiibakaunkide kutente. Aboobo bakatalika kucita mbuli basinsimi munkambi. 27 Mpoonya mulombwana umwi wakazuzaana kuyakwaambila Musa kuti: “Elidadi a Medadi bacita mbuli basinsimi munkambi!” 28 Kumane Joshua+ imwana wa Nuni, sikugwasyilizya Musa kuzwa kubukubusi bwakwe, wakati: “Simalelaangu Musa, kobakasya!”+ 29 Pele Musa wakati kulinguwe: “Sena ulibilikila ndime? Mebo ndilombozya kuti bantu ba Jehova boonse nobali basinsimi, alimwi akuti Jehova naabapa muuya wakwe!” 30 Kuzwa waawo Musa abaalu bamu Israyeli bakapiluka kunkambi.
31 Mpoonya muwo uuzwa kuli Jehova wakabbubbula akuletelezya bakancele kuzwa kulwizi akuzoobalosezya munkambi+ yoonse akukkwanya busena bwamusinzo wabuzuba bomwe mumabazu oonse akuba mulwi uusika kutukokola* tobilo kuzwa ansi. 32 Aboobo buzuba oobo boonse abusiku alimwi abuzuba boonse bwakatobela, bantu bakaluujisi kujata bakancele. Iwakajata bakancele basyoonto wakazuzya mahomeri* aali 10, eelyo bakali kubayanika munkambi yoonse. 33 Pele kabatana kwiimana nyama yoonse njobakapegwa, bukali bwa Jehova bwakababukila, eelyo Jehova wakabajaya banji.+
34 Aboobo busena oobo bakabuulika kuti Kibiroti-hatava,*+ nkaambo kubusena ooko bakazikka bantu bakatondezya kulombozya kubyaabi.+ 35 Kuzwa ku Kibiroti-hatava, bantu bakalongela ku Hazeroti akuyookkala ooko.+
12 Lino Miriamu a Aroni bakatalika kumutongooka Musa akaambo kamukaintu ngwaakakwete, nkaambo wakali mu Kusi.+ 2 Bakali kwaamba kuti: “Sena Jehova waambaula buyo kwiinda muli Musa alikke? Sena taambauli kwiinda amulindiswe?”+ Jehova wakali kuswiilila.+ 3 Lino Musa wakali mubombe kapati kwiinda bantu boonse+ ibakali anyika.
4 Mpoonya aawo Jehova wakaambila Musa, Aroni alimwi a Miriamu kuti: “Kamuya kutente lyakuswaanganina nywebo nyotatwe.” Aboobo boonse botatwe bakaunka. 5 Kumane Jehova wakaseluka mumusumpuululu wakkumbi+ akwiima kumulyango watente lyakuswaanganina akwiita Aroni a Miriamu. Boonse bobilo bakaunka. 6 Mpoonya wakati: “Amuswiilile majwi aangu. Ikuti nikwali musinsimi wa Jehova akati kanu, nindali kulibonya kulinguwe kwiinda muzilengaano+ akwaambaula anguwe muziloto.+ 7 Pele tacili boobo kumubelesi wangu Musa! Upedwe mukuli wakulanganya ŋanda yangu yoonse.+ 8 Ndilaambaula anguwe+ camulomo mpande ikutali kwiinda mutulabi; alimwi ulamubona mbwalibonya Jehova. Ino nkaambo nzi tiimwayoowa kumutongooka mubelesi wangu Musa?”
9 Aboobo Jehova wakabakalalila kapati, eelyo wakazwa kulimbabo. 10 Kumane ikkumbi lyakazwa atala aatente, alimwi Miriamu wakaba acinsenda cituba buu mbuli caanda.+ Mpoonya Aroni naakalanga Miriamu, wakabona kuti waba acinsenda.+ 11 Mpoonya aawo Aroni wakati kuli Musa: “Ndakomba osimalelaangu! Akaka utatupi mulandu akaambo kacibi eeci! Ncitwacita ncabufwubafwuba! 12 Akaka, utalekeli kuti azumanane kuba mbuli mwana wazyalwa kafwide, iwajanika kuti cisela camubili wakwe cilibolede aciindi nazyalwa!” 13 Mpoonya Musa wakatalika kulilila Jehova kati: “Akaka, O Leza! Komuponya!”+
14 Jehova wakaingula Musa kuti: “Kuti usyi wamuswida mate kubusyu bwakwe, sena inga tanaafwa nsoni mazuba aali ciloba? Amumuzandule mazuba aali ciloba, akkale kunze aankambi,+ kuzwa waawo uyooletwa alimwi munkambi.” 15 Aboobo Miriamu wakazandulwa kuzwa munkambi mazuba aali ciloba,+ alimwi bantu tiibakalonga kusikila Miriamu naakaletwa alimwi munkambi. 16 Kumane bantu bakalonga kuzwa ku Hazeroti+ akuyookkala munkanda ya Parani.+
13 Lino Jehova wakaambila Musa kuti: 2 “Kotuma baalumi kuti bakatwele nyika ya Kanana, eeyo njindapa bana Israyeli. Utume mwaalumi omwe kuzwa kumusyobo wabamausyi umwi aumwi, nkokuti silutwe+ wamusyobo umwi aumwi.”+
3 Aboobo Musa wakabatuma kuzwa munkanda ya Parani+ mbubonya Jehova mbwaakalailila. Baalumi boonse aabo bakali basilutwe babana Israyeli. 4 Aaya ngamazina aabo: Samua mwana wa Zakuri, iwamusyobo wa Rubeni; 5 Safati mwana wa Hori, iwamusyobo wa Simeoni; 6 Kalebe+ mwana wa Jefune, iwamusyobo wa Juda; 7 Igali mwana wa Josefa, iwamusyobo wa Isakara; 8 Hosea+ mwana wa Nuni, iwamusyobo wa Efraimu; 9 Paliti mwana wa Rafu, iwamusyobo wa Benjamini; 10 Gadiyeli mwana wa Sodi, iwamusyobo wa Zebuloni; 11 Gadi mwana wa Susi, iwamusyobo wa Josefa+ kwiiminina musyobo wa Manase;+ 12 Amiyeli mwana wa Gemali, iwamusyobo wa Dani; 13 Seturi mwana wa Mikayeli, iwamusyobo wa Aseri; 14 Nabi mwana wa Vopisi, iwamusyobo wa Nafutali; 15 a Geyueli mwana wa Maki, iwamusyobo wa Gadi. 16 Aaya ngamazina aabaalumi Musa mbaakatuma kuyootwela nyika. Alimwi Musa wakaulika Hosea, imwana wa Nuni kuti Joshua.*+
17 Musa naakabatuma kuyootwela nyika ya Kanana, wakabaambila kuti: “Kamuya ku Negebi, mpoonya mukatante munyika yamalundu.+ 18 Mweelede kuyoobona nyika mbwiibede+ abantu bakkala mulinjiyo, mukabone naa balaanguzu naa pe, naa mbasyoonto naa mbanji, 19 ambwiibede nyika njobakkala, naa nimbotu naa nimbi, ambwiibede minzi mobakkala, naa ilaantangalala naa ilikwabilidwe. 20 Alimwi ambwiibede nyika, naa ilaambolezi* naa ilisampukide,*+ naa ilijisi masamu naa pe. Mweelede kuba basicamba+ akubweza micelo imwi yamunyika eeyo.” Lino eeco cakali ciindi misaansa mitaanzi noibizwa.+
21 Aboobo bakaunka kuyootwela nyika kuzwa munkanda ya Zini+ kusikila ku Rehobu,+ kumunyinza wa Lebo-hamati.*+ 22 Nobakaunka ku Negebi, bakaakusika kumunzi wa Hebroni+ ooko Ahimani, Sesai a Talimai,+ aabo bakazyalwa kuli Anaki+ nkobakali kukkala. Hebroni wakayakwa myaka iili ciloba Zoani waku Egepita kautanayakwa. 23 Nobakasika ku Kkuti* lya Esikoli,+ bakagonka mutabi iwakajisi cikama camisaansa, eeco baalumi bobilo ncobakatemba acisamu, alimwi bakabwezelezya amapomegranite ankuyu.+ 24 Busena oobo bakabuulika kuti Kkuti* lya Esikoli,*+ akaambo kacikama camisaansa bana Israyeli ncobakagonka ooko.
25 Lino nokwakainda mazuba aali 40,+ bakapiluka kuzwa kukutwela nyika. 26 Aboobo bakapiluka kuli Musa a Aroni akumbungano yoonse yabana Israyeli munkanda ya Parani, ku Kadesi.+ Bakaleta mulumbe kumbungano yoonse alimwi akubatondezya micelo yamunyika eeyo. 27 Mboobu mbobakamulwiida Musa: “Twakanjila munyika iilya mookatutuma, ncobeni ninyika iikunka buci amukupa,+ alimwi njeeyi micelo yayo.+ 28 Nokuba boobo, bantu bakkala munyika eeyo balaanguzu alimwi minzi yabo iikwabilidwe mipati kapati. Alimwi ooko twakababona aba Anaki.+ 29 Bana Amaleki+ bakkede munyika ya Negebi,+ bana Heti, bana Jebusi+ abana Amori+ bakkede mumalundu alimwi bana Kanana+ bakkede mumbali aalwizi+ amumbali aa Jordano.”
30 Mpoonya Kalebe wakasola kubaumuzya bantu nobakaimvwi kumbele lya Musa kwiinda mukwaamba kuti: “Atweende lino, tuyakwiivwuba nyika iilya nkaambo masimpe tulakonzya kwiizunda.”+ 31 Pele baalumi mbaakaunkide limwi bakati: “Tatukonzyi kuyoobalwana bantu aaba pe, nkaambo balaanguzu kwiinda ndiswe.”+ 32 Alimwi bakazumanana kuleta mulumbe mubi+ kubana Israyeli kujatikizya nyika njobakatwela kabati: “Inyika eeyo njotwakatwela ninyika iilya bantu bayo, alimwi bantu boonse mbotwakabona mulinjiyo majompojompo.+ 33 Alimwi nkukonya ooko twakabona a Babbabbani, ibana ba Anaki,+ ibakazwa ku Babbabbani, alimwi nitwakalyeelanya ambabo twakalibona kuba mbuli nsozi, abalo mbobakatubona oobo.”
14 Mpoonya mbungano yoonse yakatalika kuyoba, alimwi bantu bakazumanana kulila masiku oonse.+ 2 Bana Israyeli boonse bakatalika kutongookela Musa a Aroni,+ alimwi mbungano yoonse yakabatongookela kaiti: “Anu nitwakafwida buyo mucisi ca Egepita naa kufwida buyo mumonya omuno munkanda! 3 Ino Jehova watuletela nzi kunyika eeyi kuti tuzoojazyigwe panga?+ Bamakaintu besu abana besu bayooba zisaalo.+ Sena inga tiicainda kubota kuti twapiluka buyo ku Egepita?”+ 4 Mane bakasika nkobaambilana kuti: “Atusale musololi, tupiluke ku Egepita!”+
5 Aboobo Musa a Aroni bakavwuntama ansi kumbele lyambungano yoonse yabana Israyeli. 6 Eelyo Joshua+ imwana wa Nuni a Kalebe+ mwana wa Jefune, ibakali akati kabaabo bakaunkide kuyootwela nyika, bakazapula zisani zyabo, 7 mpoonya bakaambila mbungano yabana Israyeli yoonse kuti: “Inyika eeyo njitwakaakutwela ninyika mbotu kapati.+ 8 Ikuti naa Jehova watukkomanina, masimpe uyootunjizya munyika eeyi akutupa njiyo, inyika iikunka buci amukupa.+ 9 Pele mutamuzangili Jehova alimwi tamweelede kubayoowa bantu bamunyika eeyo,+ nkaambo tuyoobanyonyoona.* Bukwabilizi bwabo bwagwisyigwa kulimbabo, swebo Jehova ulaandiswe.+ Mutabayoowi pe.”
10 Nokuba boobo, mbungano yoonse yakatiibapwaye mabwe.+ Pele bulemu bwa Jehova bwakalibonya atala aatente lyakuswaanganina kubana Israyeli boonse.+
11 Mpoonya Jehova wakaambila Musa kuti: “Ino bantu aaba bayooleka lili kundisampaula,+ alimwi ino bayooleka lili kutandisyoma nokuba kuti ndakacita zitondezyo zyoonse eezyi akati kabo?+ 12 Leka ndibaletele cilwazi akubanyonyoona, eelyo yebo ndilakucita kuba musyobo mupati alimwi uulaanguzu kwiinda mbabo.”+
13 Pele Musa wakati kuli Jehova: “Naa wacita oobo, bana Egepita bayoomvwa, ooko yebo munguzu zyako nkookagwisya bantu aaba,+ 14 alimwi bayakwaambila bantu bamunyika eeyi makani aaya. Abalo aaba bakamvwa kuti yebo, O Jehova, ulaakati kabantu aaba+ alimwi wakalibonya caantangalala kulimbabo.+ Nduwe Jehova alimwi kkumbi lyako liliimvwi atala lyabo, ulabasololela mumusumpuululu wakkumbi syikati amumusumpuululu wamulilo masiku.+ 15 Ikuti naa ubajaye bantu boonse aaba aciindi comwe,* mpoonya bamasi ibakamvwa mpuwo yako bayakwaamba kuti: 16 ‘Jehova wakaalilwa kunjizya bantu aaba munyika eeyo njaakakonkezya kuti uyoobapa, aboobo wakabajaya munkanda.’+ 17 Lino akaka, O Jehova, inguzu zyako azikomene mbubonya mbookasyomezya kuti: 18 ‘Jehova, uutafwambi kukalala alimwi uuzwide luyando lutamani,+ uulekelela milandu azibi, nokuba boobo aabo babisya tabaleki buyo katabasubuli, uuleta cisubulo kubana, bazyukulu abazyukululwa akaambo kacibi cabamausyi.’+ 19 Akaka kobalekelela cibi cabo bantu aaba kweelana aluyando lwako lupati lutamani, mbubonya mbowakabalekelela bantu aaba kuzwa ku Egepita kusikila lino.”+
20 Mpoonya Jehova wakaamba kuti: “Ndabalekelela kweelana ambowaamba.+ 21 Nokuba boobo, mbubonya mbondili muumi, nyika yoonse iyoozula bulemu bwa Jehova.+ 22 Pele kunyina muntu naba omwe iwabona bulemu bwangu alimwi azitondezyo zyangu+ nzyondakacita mu Egepita amunkanda pele iwazumanana kundisunka+ ziindi eezyi zili kkumi, alimwi iwataswiilila jwi lyangu,+ 23 uuyoobona nyika njondakakonkezya kuli bamausyi. Kunyina naba omwe uutandilemeki uuyakwiibona.+ 24 Pele akaambo kakuti mubelesi wangu Kalebe+ ulaamuuya wiindene alimwi wazumanana kunditobela camoyo woonse, ndiyoomunjizya munyika mwaakanjide kutwela, alimwi bana bakwe bayakwiikona.+ 25 Mbwaanga bana Amaleki abana Kanana+ bakkala mukkuti,* nywebo juunza munyone akugama kunkanda kunzila yaku Lwizi Lusalala.”+
26 Mpoonya Jehova wakaambila Musa a Aroni kuti: 27 “Ino nkamu eeyi mbyaabi ilaleka lili kunditongookela?+ Ndakumvwa kutongooka bana Israyeli nkobanditongookela.+ 28 Kobaambila kuti, ‘“Jehova waamba kuti, masimpe mbubonya mbondili muumi, ndilamucitila kweelana anzyondamvwa kamwaamba!+ 29 Mitunta yanu iyoosyaala munkanda,+ inzya, boonse akati kanu ibalembedwe, nkokuti ibalaamyaka iili 20 kuya kumbele, nyoonse nomwanditongooka.+ 30 Kunyina naba omwe wanu uuyoonjila munyika eeyo njindakakonkezya* kuti muyookkala mulinjiyo,+ pele buyo Kalebe imwana wa Jefune a Joshua imwana wa Nuni.+
31 “‘“Bana banu aabo mbumwakaamba kuti bayoosaalwa,+ aaba ndiyoobanjizya munyika eeyo, alimwi bayakwiizyiba nyika njimwakaka.+ 32 Pele mitunta yanu iyoosyaala oomuno munkanda. 33 Lino bana banu bayooba beembezi munkanda myaka iili 40,+ alimwi bayoopenga akaambo kakutasyomeka* kwanu, kusikila wamamanino akati kanu akafwe munkanda.+ 34 Mbubonya mbuli mweelwe wamazuba ngomwakatwela nyika, nkokuti mazuba aali 40,+ buzuba bomwe bulaba mwaka omwe, buzuba bomwe mwaka omwe, muyoosubulwa myaka iili 40+ akaambo kamilandu yanu, eelyo muyoozyiba ncocaamba kukazyanya andime.*
35 “‘“Mebo nde Jehova ndaamba. Oobu mbondiyoocita kunkamu eeyi mbyaabi, kulibaabo bandizangila: Bayoomana kufwa munkanda oomu.+ 36 Baalumi aabo mbaakatuma Musa kuti bakatwele nyika alimwi ibakapa kuti mbungano yoonse italike kumutongookela kwiinda mukuleta mulumbe mubi kujatikizya nyika,+ 37 inzya, baalumi aabo ibakaleta mulumbe mubi kujatikizya nyika bayoojaigwa kubusyu bwa Jehova.+ 38 Pele buyo Joshua mwana wa Nuni a Kalebe mwana wa Jefune, akati kabaalumi ibakali mukutwela nyika mbabayoozumanana kupona.”’”+
39 Musa naakabaambila makani aaya bana Israyeli boonse, bakatalika kulila kapati. 40 Alimwi nobwakaca bakafwuma kuti baunke atala aacilundu, kabaamba kuti: “Atweende kubusena oobo Jehova mbwaakaamba, nkaambo twabisya.”+ 41 Pele Musa wakati: “Ino nkaambo nzi ncomusotoka malailile aa Jehova? Eeco ncomuyanda kucita tacikonzyi kuzwidilila pe. 42 Mutaunki pe, nkaambo Jehova tali akati kanu; bayoomuzunda basinkondonyoko.+ 43 Nkaambo bana Amaleki abana Kanana nkobali kumbele lyanu,+ alimwi muyoojazyigwa panga. Nkaambo Jehova takooyooba andinywe akaambo kakuti mwakaleka kumutobela Jehova.”+
44 Nokuba boobo, bakaunka cankazi kutozya acilundu mpocili atala,+ pele bbokesi lyacizuminano ca Jehova tiilyakazwa munkambi alimwi awalo Musa tanaakazwa munkambi pe.+ 45 Mpoonya bana Amaleki abana Kanana ibakali kukkala mucilundu eeco bakaselemuka akutalika kubajaya alimwi bakabamwaisya mane kusikila ku Horima.+
15 Lino Jehova wakaambila Musa kuti: 2 “Kobaambila bana Israyeli kuti, ‘Mwaakusika kunyika eeyo njendamupa kuti mukakkale,+ 3 alimwi mwaakutuula cituuzyo cuumpwa kuli Jehova kuzwa akati kaŋombe, mbelele naa mpongo–kufwumbwa naa ncituuzyo cuumpwa+ naa ncipaizyo cacikonke caalubazu naa ncituuzyo cakuliyandila+ naa nzituuzyo zyamuziindi zyamapobwe+ aanu, kuti mupangile Jehova bweema bununkilila+– 4 ooyo uuleta cituuzyo cakwe weelede kuletela Jehova acituuzyo camaila,+ cipaanzi cakkumi caefa* yafulaulu uuvwelene acipaanzi cane cansazi* yamafwuta. 5 Alimwi mweelede kupa waini wacituuzyo cinyugwa, cipaanzi cane cansazi yawaini, antoomwe acituuzyo cuumpwa+ naa cacipaizyo camugutu uuli woonse. 6 Naba mugutu mweelede kumutuula antoomwe acituuzyo camaila cazipaanzi zyobilo zyakkumi zyaefa yafulaulu uuvwelene acipaanzi catatu cansazi yamafwuta. 7 Alimwi mweelede kupa cipaanzi catatu cansazi yawaini, kauli cituuzyo cinyugwa cijisi bweema bununkilila kuli Jehova.
8 “‘Pele ikuti naa muyanda kutuula mupoho kacili cituuzyo cuumpwa+ naa cipaizyo cacikonke caalubazu+ naa cipaizyo calumvwano kuli Jehova,+ 9 mweelede kutuula mupoho ooyo antoomwe acipaizyo camaila+ cazipaanzi zyotatwe zyakkumi zyaefa zyafulaulu uuvwelene acisela cansazi yamafwuta. 10 Alimwi mweelede kupa cisela cansazi yawaini ube cituuzyo cinyugwa,+ kauli cituuzyo cuumpwa, cijisi bweema bununkilila kuli Jehova. 11 Oobo mbomweelede kucita kumupoho uuli woonse naa mugutu uuli woonse naa mugutu uuli woonse uucili mwana naa mpongo iili yoonse. 12 Kufwumbwa naa bali bongaye banyama mbomwatuula, oobu mbomweelede kucita kuli umwi aumwi kweelana amweelwe wabo. 13 Oobu mbombubo sicisi uuli woonse muna Israyeli mbwayelede kutuula cituuzyo cuumpwa kacili bweema bununkilila kuli Jehova.
14 “‘Ikuti mweenzu uukkala andinywe naa muntu wali kukkala andinywe mumazyalani aanu manji uyanda kutuula cituuzyo cuumpwa kacili bweema bununkilila kuli Jehova, weelede kucita mbubonya mbomucita nywebo.+ 15 Nywebo nobasimbungano amweenzu ngomukkala limwi munoojisi mulawo omwe. Ooyu uyoomubeda mulawo walyoonse mumazyalani aanu oonse. Mweenzu weelede kuba mbubonya mbuli ndinywe kubusyu bwa Jehova.+ 16 Kweelede kuba mulawo omwe buyo ambeta kulindinywe alimwi akumweenzu uukkala andinywe.’”
17 Jehova wakazumanana kwaambila Musa kuti: 18 “Kobaambila bana Israyeli kuti, ‘Mwaakusika kunyika eeyo nkondimutola, 19 alimwi mwaakulya cakulya cili coonse camunyika eeyo,+ mweelede kupa cakusanga kuli Jehova. 20 Mweelede kupa cakusanga cazinkwa zibunge zijisi kapulo akati zyabusu butasetede bwamaila aabutebuzi butaanzi.+ Mweelede kupa cakusanga eeco mbubonya mbomupa cakusanga cizwa kucuumino camaila. 21 Mweelede kunoosanga busu bumwi butasetede kuzwa kumicelo yanu mitaanzi kuli Jehova mumazyalani aanu oonse.
22 “‘Lino ikuti naa mwalubizya akwaalilwa kutobela milawo yoonse eeyi Jehova njaamba kuli Musa, 23 zyoonse Jehova nzyaakamulailila kwiinda muli Musa kuzwa kubuzuba oobo Jehova mbwaakamulailila nzizyo kumazyalani aanu, 24 ikuti naa kwakaba kulubizya eelyo mbungano tiiyakazyiba, nkokuti mbungano yoonse yeelede kupa mupoho uucili mwana kuti abe cituuzyo cuumpwa kacili bweema bununkilila kuli Jehova, acituuzyo caco camaila alimwi acituuzyo caco cinyugwa kweelana ambocicitwa lyoonse,+ alimwi akana kampongo kacituuzyo cazibi.+ 25 Mpoonya mupaizi uyoomanya milandu yambungano yoonse yabana Israyeli, eelyo bayoolekelelwa,+ nkaambo kwakali kulubizya buyo, alimwi bakaleta cipaizyo cabo cacituuzyo cuumpwa kuli Jehova alimwi acituuzyo cabo cazibi kubusyu bwa Jehova cakulubizya kwabo. 26 Eelyo mbungano yoonse yabana Israyeli, amweenzu uukkede akati kabo bayoolekelelwa, nkaambo kwakali kulubizya kwabantu boonse.
27 “‘Ikuti naa muntu wabisya cakutazyiba, weelede kuleta mpongo mpwizi yamwaka omwe yacituuzyo cazibi.+ 28 Eelyo mupaizi uyoomanya milandu yamuntu ooyo iwakacita cibi cakutazyiba kubusyu bwa Jehova, kutegwa amanye cibi eeco, eelyo uyoolekelelwa.+ 29 Kweelede kuba mulawo omwe buyo kumuna Israyeli akumweenzu uukkala akati kabo mumakani aakubisya cakutazyiba.+
30 “‘Pele muntu uubisya acaali,+ kufwumbwa naa ngusicisi naa mweenzu, muntu ooyo usampaula Jehova alimwi weelede kujaigwa kutegwa azwe akati kabantu bakwe. 31 Nkaambo wanyansya jwi lya Jehova akutyola mulawo wakwe, muntu ooyo weelede kujaigwa.+ Mulandu wakwe mwini uli alinguwe.’”+
32 Bana Israyeli nobakacili munkanda, bakajana muntu katebba nkuni mubuzuba bwa Sabata.+ 33 Aabo ibakamujana katebba nkuni bakamuleta kuli Musa a Aroni akumbungano yoonse. 34 Bakamubikka mucitolokesi,+ nkaambo tiibakalinazyiba ncobakeelede kumucita.
35 Mpoonya Jehova wakaambila Musa kuti: “Muntu ooyo weelede kujaigwa,+ mbungano yoonse imupwaye mabwe anze aankambi.”+ 36 Aboobo mbungano yoonse yakamuleta anze aankambi akumupwaya mabwe mane wafwa, mbubonya Jehova mbwaakalailila Musa.
37 Alimwi Jehova wakaambila Musa kuti: 38 “Kobaambila bana Israyeli kuti beelede kulipangila maaya mumyoombe yazisani zyabo mumazyalani aabo oonse, alimwi beelede kubikka katambo kamusyobo wajulu atala aamoombe wacisani uujisi maaya.+ 39 ‘Mweelede kuba amyoombe eeyi yamaaya kutegwa mwaibona kaimwiibalusya milawo yoonse ya Jehova akwiicita.+ Tamweelede kutobela myoyo yanu naa meso aanu zyalo izimusololela kukuvwuula kwakumuuya.+ 40 Eeci ciyoomugwasya kwiibaluka akutobela milawo yangu yoonse kuti mube bantu basalala kuli Leza wanu.+ 41 Ndime Jehova Leza wanu, iwakamugwisya mucisi ca Egepita kutegwa ndibe Leza wanu.+ Ndime Jehova Leza wanu.’”+
16 Lino Kora+ imwana wa Izara,+ imwana wa Kohati+ mwana wa Levi+ antoomwe a Datani alimwi a Abiramu ibana ba Eliabu,+ a Oni imwana wa Peleti, bana ba Rubeni,+ bakalibunga-bunga. 2 Bakabukila Musa, balo antoomwe abaalumi bana Israyeli bali 250, basilutwe bambungano, baalumi basalidwe, basimpuwo. 3 Bakalibunga-bunga kukazya+ Musa a Aroni akubaambila kuti: “Mwaciindizya! Bantu boonse mumbungano balasalala+ alimwi Jehova mpali akati kabo.+ Aboobo, ino nkaambo nzi ncomulisumpula kwiinda mbungano ya Jehova?”
4 Musa naakaamvwa makani aaya, mpoonya aawo wakavwuntama ansi. 5 Mpoonya wakaambila Kora abasikumutobela boonse kuti: “Mafwumofwumo Jehova uyootondezya uuli kulubazu lwakwe,+ uusalala alimwi iweelede kusika kulinguwe,+ eelyo kufwumbwa ngwayoosala+ uyoosika kulinguwe. 6 Lino kocita boobu: Kobweza twakunyamwida mulilo,+ yebo Kora antoomwe abasikukutobela boonse,+ 7 ukabikke mulilo alimwi atununkilizyo alintuto kumbele lya Jehova juunza, eelyo ooyo Jehova ngwayoosala,+ ngonguwe uusalala. Nywebo nobana ba Levi+ mwaciindizya!”
8 Mpoonya Musa wakaambila Kora kuti: “Amuswiilile kaka nywebo nobana ba Levi. 9 Sena ncintu ciniini ncaakamucitila Leza wa Israyeli mukuti wakamuzandula nywebo kuzwa kumbungano yabana Israyeli+ akumuzumizya kuti kamusika kulinguwe kutegwa mubeleke milimo yamutente lyakukombela lya Jehova, akwiima kumbele lyambungano akubabelekela milimo,+ 10 akuti wakamuleta afwaafwi anguwe, nywebo antoomwe abanabokwanu boonse ibana ba Levi? Sena muyanda kububweza abwalo bupaizi?+ 11 Akaambo kaceeci yebo abasikukutobela nomwalibunga-bunga mukazya Jehova. Ino walo Aroni nguni, nomumutongookela?”+
12 Kuzwa waawo Musa wakatuma muntu kuyakwiita Datani a Abiramu,+ ibana ba Eliabu, pele balo bakati: “Tatukooboola pe! 13 Sena nkaambo kaniini kuti wakatugwisya munyika iikunka buci amukupa, kuti uzootujaye omuno munkanda?+ Lino sena alimwi uyanda kulipa kami-kami alindiswe? 14 Ambuli sunu tonatunjizya munyika iili yoonse iikunka buci amukupa+ naa kutupa lukono lwanyika amyuunda yamisaansa. Sena uyanda kubadonkola meso bantu aabo?* Tatukooboola pe!”
15 Aboobo Musa wakanyema kapati akwaambila Jehova kuti: “Utacilangi pe cituuzyo cabo camaila. Kunyina mbongolo noiba yomwe njindakabweza kuzwa kulimbabo, alimwi kunyina ngondakabisizya pe.”+
16 Kumane Musa wakaambila Kora kuti: “Juunza, yebo abasikukutobela boonse alimwi a Aroni mukaboole kumbele lya Jehova. 17 Umwi aumwi weelede kubweza kakunyamwida mulilo akubikka tununkilizyo alinkako, alimwi umwi aumwi uyooleta kakunyamwida mulilo kakwe kumbele lya Jehova, twakunyamwida mulilo ituli 250, mpoonya yebo a Aroni mweelede kuleta umwi aumwi kakunyamwida mulilo kakwe.” 18 Aboobo umwi aumwi wabo wakabweza kakunyamwida mulilo akubikka mulilo atununkilizyo alinkako, eelyo bakaima kumulyango watente lyakuswaanganina antoomwe a Musa a Aroni. 19 Lino Kora naakayobolola basikumutobela+ boonse kuti bakazye Musa a Aroni kumulyango watente lyakuswaanganina, bulemu bwa Jehova bwakalibonya kumbungano yoonse.+
20 Lino Jehova wakaambila Musa a Aroni kuti: 21 “Amulyaandaanye kuzwa kunkamu eeyi, kutegwa ndibanyonyoone ndilyonya lino.”+ 22 Nobakamvwa boobo bakavwuntama ansi akwaamba kuti: “O Leza, yebo O Leza oopa muuya kubantu boonse,+ naa muntu omwe wabisya, sena ulakalalila mbungano yoonse?”+
23 Mpoonya Jehova wakaambila Musa kuti: 24 “Koambila mbungano kuti, ‘Amuzwe kumatente aa Kora, Datani a Abiramu!’”+
25 Mpoonya Musa wakanyamuka akuunka kuli Datani a Abiramu, abaalu+ babana Israyeli bakaunka anguwe. 26 Wakaambila mbungano kuti: “Amuzwe kumatente aabasizibi aaba alimwi mutagumi cintu cabo cili coonse, kutegwa mutanyonyoonwi akaambo kazibi zyabo.” 27 Mpoonya aawo bakazwa kumatente aa Kora, Datani a Abiramu, eelyo Datani a Abiramu bakazwa akwiima amilyango yamatente aabo antoomwe abamakaintu babo abana babo.
28 Kumane Musa wakati: “Mboobu mbomuyoozyiba kuti Jehova ngowakandituma kucita zintu eezyi zyoonse, akuti takuli kuyanda kwamoyo wangu pe:* 29 Ikuti naa bantu aaba bafwe lufwu ndobafwa bantu boonse akuti naa cisubulo cabo cili mbuli cabantu boonse, nkokuti tali Jehova wakandituma.+ 30 Pele ikuti naa Jehova acite cintu ceenzu kulimbabo, akuti nyika yaasame akubamena antoomwe azintu zyabo zyoonse alimwi akuti banjile bulanga mu Cuumbwe,* masimpe mulazyiba kuti bantu aaba bamusampaula Jehova.”
31 Eelyo mbwaakamanina buyo kwaamba majwi aaya oonse, nyika mpobakabede yakaanduka.+ 32 Mpoonya nyika yakaasama akubamena antoomwe amikwasyi yabo alimwi abantu ba Kora+ boonse azintu zyabo zyoonse. 33 Aboobo balo abantu boonse mbobakali ambabo bakamenwa bulanga mu Cuumbwe,* eelyo nyika yakabavwumba, bakanyonyoonwa kuzwa akati kambungano.+ 34 Bana Israyeli boonse ibakabazingulukide bakatija nobakamvwa kulila kwabo nkaambo bakati: “Twayoowa kuti nyika ilatumena andiswe!” 35 Kumane kwakazwa mulilo kuli Jehova+ eelyo wakabaumpa cakumaninina baalumi aabo ibali 250 ibakali kuumpa tununkilizyo.+
36 Lino Jehova wakaambila Musa kuti: 37 “Koambila Eleazara imwana wa Aroni mupaizi kuti agwisye twakunyamwida mulilo+ kuzwa mumulilo nkaambo tulasalala. Alimwi umwaambile kuti ausowe mulilo kulaale. 38 Twakunyamwida mulilo twabaalumi aaba ibakalijazya akaambo kazibi zyabo tweelede kufwulwa kuti tupapalale akuba twakuvwumbya cipaililo,+ nkaambo bakatuleta kubusyu bwa Jehova, aboobo twakasalala. Tweelede kuba citondezyo kubana Israyeli.”+ 39 Aboobo Eleazara mupaizi wakabweza twakunyamwida mulilo twamukuba, ooto aabo ibakapya mulilo ntobakaletede, eelyo bakatufwula akutuzilulula kucipaililo, 40 mbubonya Jehova mbwaakamulailila kwiinda muli Musa. Cakaba ciibalusyo kubana Israyeli cakuti kunyina muntu uutazumizyidwe* uutali walunyungu lwa Aroni iweelede kuunka kuyakuumpa tununkilizyo kubusyu bwa Jehova+ akuti kutabi naba omwe uuba mbuli Kora abasikumutobela.+
41 Lino buzuba bwakatobela, mbungano yoonse yabana Israyeli yakatalika kutongookela Musa a Aroni+ kabati: “Nywebo nyobilo mwajaya bantu ba Jehova.” 42 Bantu bamumbungano nobakalibunga-bunga akutalika kutongookela Musa a Aroni, bakaceba akulanga kutente lyakuswaanganina, eelyo bakabona kuti kkumbi lyavwumba tente mpoonya bulemu bwa Jehova bwakatalika kulibonya.+
43 Musa a Aroni bakaunka kumbele lyatente lyakuswaanganina,+ 44 mpoonya Jehova wakaambila Musa kuti: 45 “Nobaalumi nywebo, amuzwe akati kambungano eeyi kutegwa ndibanyonyoone ndilyonya lino.”+ Bamvwe boobo bakavwuntama ansi.+ 46 Kumane Musa wakati kuli Aroni: “Bweza kakunyamwida mulilo akubikka mulilo alinkako kuzwa kucipaililo+ alimwi ubikke atununkilizyo wamana ufwambaane uunke kumbungano ukamanye milandu yabo,+ nkaambo bukali bwa Jehova bwabuka. Lunyonyooko lwatalika!” 47 Mpoonya aawo Aroni wakabweza kakunyamwida mulilo mbubonya mbwaakaamba Musa, eelyo wakazuza kuya akati kambungano, lino lunyonyooko lwakalitalikide kale akati kabantu. Aboobo wakabikka tununkilizyo akutalika kumanya milandu yabantu. 48 Wakazumanana kaimvwi akati kabafwu abaumi. Mpoonya lunyonyooko lwakalesyegwa. 49 Ibantu bakajaigwa alunyonyooko oolu bakali 14,700, kutabalilizya abaabo bakafwa akaambo ka Kora. 50 Eelyo Aroni naakapiluka kuli Musa kumulyango watente lyakuswaanganina, lunyonyooko lwakalilesyedwe kale.
17 Lino Jehova wakaambila Musa kuti: 2 “Kobaambila bana Israyeli akubweza musako omwe kuli silutwe umwi aumwi waciinga cabamausyi,+ nkokuti misako iili 12 yoonse antoomwe. Ulembe zina lyaumwi aumwi amusako wakwe. 3 Weelede kulemba zina lya Aroni amusako wa Levi, nkaambo kuli musako omwe wasilutwe waciinga cabamausyi cimwi acimwi. 4 Wiibikke misako mutente lyakuswaanganina kumbele lya Bumboni,+ aawo mpondilibonya lyoonse kulindinywe.+ 5 Lino musako wamuntu ooyo ngondiyoosala+ uyoosyuuka, eelyo ndiyookumanizya kutongooka bana Israyeli nkobanditongookela,+ alimwi akutongookela ndinywe.”+
6 Aboobo Musa wakabaambila bana Israyeli, eelyo basilutwe babo boonse bakamupa umwi aumwi musako wakwe—musako omwe kuzwa kuli silutwe umwi aumwi muciinga cabamausyi, nkokuti misako iili 12—amusako wa Aroni wakali akati kamisako yabo. 7 Mpoonya Musa wakabikka misako kumbele lya Jehova mutente lya Bumboni.
8 Lino buzuba bwakatobela, Musa naakanjila mutente lya Bumboni, wakajana kuti musako wa Aroni wamuciinga ca Levi waba ampumpu, wasyuuka akufwulula maluba alimwi wakazyala maalumondi aabizidwe. 9 Mpoonya Musa wakagwisya misako yoonse kumbele lya Jehova akwiileta kubana Israyeli boonse. Bakailanga alimwi mwaalumi umwi aumwi wakabweza musako wakwe.
10 Kumane Jehova wakati kuli Musa: “Pilusya musako wa Aroni+ kumbele lya Bumboni kuti uyobolwe akuba citondezyo+ kuli basikuzanga,+ kutegwa baleke kunditongookela akuti batafwi.” 11 Mpoonya aawo Musa wakacita mbubonya Jehova mbwaakamulailila. Wakacita mbubonya oobo.
12 Mpoonya bana Israyeli bakatalika kwaambila Musa kuti: “Lino tulafwa, tulaloba, toonse buyo tulafwa! 13 Kufwumbwa uuswena afwaafwi atente lyakukombela lya Jehova ulafwa!+ Sena mbotweelede kufwa oobo toonse?”+
18 Lino Jehova wakaambila Aroni kuti: “Yebo abana bako alimwi abaciinga cabauso muyooba amulandu ikuti umwi akabisizye tente lyakukombela,+ alimwi yebo abana bako muyooba amulandu ikuti umwi akabisizye bupaizi bwanu.+ 2 Alimwi ulete banabokwanu bamusyobo wa Levi afwaafwi, ibamusyobo wabauso, kutegwa bakusangane akukubelekela yebo+ abana bako, kumbele lyatente lya Bumboni.+ 3 Beelede kuzuzikizya milimo yabo kulinduwe akutente lyakukombela lyoonse.+ Pele tabeelede kuswena afwaafwi azibelesyo zyamubusena busalala akucipaililo kutegwa batafwi, balo naa yebo.+ 4 Balakusangana akubeleka milimo yabo yoonse yamutente lyakuswaanganina, alimwi kunyina muntu uutazumizyidwe* iweelede kuswena afwaafwi andinywe pe.+ 5 Mweelede kuzuzikizya milimo yanu yamu Busena Busalala+ ayacipaililo,+ kutegwa bukali butababukili+ alimwi bana Israyeli. 6 Ndabweza banabokwanu iba Levi kuzwa akati kabana Israyeli akubapa kulindinywe kabali cipego.+ Balaabidwe kuli Jehova kuti babeleke milimo yamutente lyakuswaanganina.+ 7 Yebo abana bako mujisi mukuli wakubeleka milimo yanu yabupaizi iijatikizya cipaililo azintu zili mukati kacisitilizyo,+ mweelede kubeleka milimo eeyi.+ Ndamupa mulimo wabupaizi kauli cipego kulindinywe, alimwi kufwumbwa muntu uutazumizyidwe* uusika kuti abeleke milimo yabupaizi weelede kujaigwa.”+
8 Alimwi Jehova wakaambila Aroni kuti: “Mebo lwangu ndamubikka kulanganya zyakusanga zipegwa kulindime.+ Zyoonse zintu zisalala zizwa kubana Israyeli ndamupa abana banu kuti cibe caabilo canu, ncakuvwola canu calyoonse.+ 9 Eezyi ziyooba zyanu kuzwa kuzituuzyo zyuumpwa zisalalisya: zituuzyo zyabo zyoonse nzyobatuula kubikkilizya azituuzyo zyabo zyamaila+ zyoonse azituuzyo zyabo zyacibi+ alimwi azituuzyo zyabo zyamilandu+ nzyobaleta kulindime. Nzintu zisalalisya kulindinywe akubana banu. 10 Mweelede kuzilida mubusena busalalisya.+ Mwaalumi umwi aumwi ulakonzya kuzilya. Ziyooba cintu cisalala kulindinywe.+ 11 Azyalo eezyi nzizyanu: zipego nzyobasanga+ antoomwe azituuzyo zyakuyumba+ zyoonse zyabana Israyeli. Ndazipa kulinduwe abana bako basankwa abasimbi kuti zibe caabilo canu calyoonse.+ Kufwumbwa uusalala muŋanda yako ulakonzya kuzilya.+
12 “Mafwuta oonse mabotu awaini mupya mubotu alimwi amaila, imicelo yabo mitaanzi,+ zyoonse nzyobayoopa kuli Jehova, ndazipa kulindinywe.+ 13 Micelo mitaanzi kubizwa yamunyika yabo njobayooleta kuli Jehova iyooba yanu.+ Kufwumbwa uusalala muŋanda yanu ulakonzya kuzilya.
14 “Kufwumbwa cintu caabidwe kumulimo uusetekene mu Israyeli ceelede kuba canu.+
15 “Mwana mutaanzi uuli woonse wacintu cuumi cili coonse+ ngobayoopa kuli Jehova, abe muntu naa munyama, weelede kuba wanu. Nokuba boobo, mweelede kunununa mwana mutaanzi wamuntu,+ alimwi amwana mutaanzi wamunyama uusofweede mweelede kumunununa.+ 16 Weelede kumunununa amuulo wacinunuzyo akkwanya mwezi omwe kuya kumbele, kweelana amuulo uubikkidwe wamasyekeli*+ aansiliva osanwe kweelana acipimyo casyekeli lyamubusena busalala. Nkokuti magera* aali 20. 17 Pele mupoho mutaanzi naa mugutu mutaanzi naa mwanaampongo mutaanzi toyelede kumunununa.+ Nzintu zisalala. Bulowa bwazyo weelede kubusansaila acipaililo,+ eelyo mafwuta aazyo weelede kwaaumpa mbuli cituuzyo cuumpwa kacili bweema bununkilila kuli Jehova.+ 18 Nyama yazyo yeelede kuba yanu. Yeelede kuba yanu mbubonya mbuli kaango kacituuzyo cakuyumba amweendo wamunsi wakululyo.+ 19 Zyakusanga zyoonse zisetekene, bana Israyeli nzyobayoopa kuli Jehova,+ ndazipa kulinduwe abana bako basankwa abasimbi mboli abo, cibe cakuvwola cako calyoonse.+ Ncizuminano camunyo* kubusyu bwa Jehova akati kanduwe andime alimwi abana bako mboli aambabo.”
20 Mpoonya Jehova wakaambila Aroni kuti: “Munyika yabo tokabi alukono, alimwi kunyina caabilo canyika ciyooba cako akati kabo.+ Mebo ndendime caabilo cako alukono lwako akati kabana Israyeli.+
21 “Lino bona, ba Levi ndabapa cipaanzi cakkumi+ cili coonse mu Israyeli kuti cibe lukono lwabo akaambo kamilimo yabo njobabeleka mutente lyakuswaanganina. 22 Bana Israyeli tabaceelede kuswena afwaafwi kutente lyakuswaanganina, buyo-buyo inga babisya akufwa. 23 Ba Levi kubagama mbabeelede kubeleka mulimo wamutente lyakuswaanganina, alimwi mbabeelede kuba amulandu kukulubizya kwabantu mubusena busalala.+ Mulawo walyoonse mumazyalani aanu oonse kuti tabeelede kuba alukono akati kabana Israyeli.+ 24 Nkaambo ndapa ba Levi cipaanzi cakkumi cazyakusanga zyabana Israyeli nzyobayoopa kuli Jehova kuti cibe lukono lwabo. Nkakaambo kaako ncondabaambila kuti, ‘Tabeelede kuba alukono akati kabana Israyeli.’”+
25 Mpoonya Jehova wakaambila Musa kuti: 26 “Weelede kwaambila ba Levi kuti, ‘Muyootambula cipaanzi cakkumi ncondamupa kuzwa kubana Israyeli kuti cibe lukono lwanu,+ alimwi kuzwa kulukono oolo mweelede kusanga cipaanzi cakkumi cacipaanzi cakkumi kuli Jehova.+ 27 Eelyo ciyakwaambwa kuti ncakusanga canu, mbubonya mbuli maila aazwa kucuumino camaila+ alimwi ambuli waini munji mucisinino cawaini naa mafwuta manji mucisinino camafwuta. 28 Munzila eeyi andinywe muyoopa cakusanga kuli Jehova kuzwa kuzipaanzi zyakkumi nzyomuyootambula kuzwa kubana Israyeli, alimwi kuzwa kulinzizyo mweelede kupa cakusanga ca Jehova kuli Aroni mupaizi. 29 Muyoopa zyakusanga ziindene-indene kuli Jehova kuzwa kuzipego zyoonse iziinda kubota nzyomuyoopegwa,+ kazili cintu cisalala.’
30 “Alimwi weelede kubaambila kuti, ‘Naa mwapa zintu ziinda kubota akati kazipego zyanu nzyomwapegwa, nkokuti kuba Levi ziyoobonwa mbuli kuti maila aakucuumino cabo camaila alimwi awaini munji mucisinino cabo cawaini naa mafwuta manji mucisinino cabo camafwuta. 31 Nywebo amikwasyi yanu mulakonzya kuzilya mubusena buli boonse, nkaambo ncakuvwola canu akaambo kamilimo njomubeleka atente lyakuswaanganina.+ 32 Tamukooyoba amulandu mumakani aaya kufwumbwa buyo kuti mwapa zintu ziinda kubota akati kazipego nzyomuyoopegwa, tamweelede kusofwaazya zintu zisalala zyabana Israyeli, buyo-buyo muyoofwa.’”+
19 Jehova alimwi wakaambila Musa a Aroni kuti: 2 “Ngooyu mulawo Jehova ngwaalailila, ‘Kobaambila bana Israyeli kuti bamupe ŋombe mpwizi yamubala uusalala iitajisi kampenda+ alimwi iitanapopedwe. 3 Mweelede kwiipa kuli Eleazara mupaizi, eelyo uyakwiitola anze aankambi, kumane ikajaigwe kubusyu bwakwe. 4 Mpoonya Eleazara mupaizi uyootompa munwe wakwe mubulowa bwayo akubusansaila ziindi zili ciloba kulubazu lwakumulyango watente lyakuswaanganina.+ 5 Eelyo ŋombe eeyo iyakuumpwa kalangilila. Cikutu cayo, nyama yayo, bulowa bwayo antoomwe abufwusi bwayo ziyakuumpwa.+ 6 Lino mupaizi uyoobweza cisamu cakkedari, hisopo+ akatambo kasalala pyu akuzisowela mumulilo oomo moyumpilwa ŋombe eeyo. 7 Mpoonya mupaizi uyoowasya zisani zyakwe akusamba amubili, kuzwa waawo ulakonzya kuboola munkambi; pele ulasofwaala kusikila kumangolezya.
8 “‘Ooyo wayuumpa weelede kuwasya zisani zyakwe akusamba amubili, eelyo uyoosofwaala kusikila kumangolezya.
9 “‘Imwaalumi uusalala uyooyola mulota waŋombe+ eeyo akuubikka mubusena busalala anze aankambi, alimwi weelede kuyobolwa kutegwa mbungano yabana Israyeli kayuubelesya kubikka mumaanzi aakusalazya.+ Ncituuzyo cazibi. 10 Ooyo uuyola mulota waŋombe eeyo uyoosanzya zisani zyakwe alimwi uyoosofwaala kusikila kumangolezya.
“‘Ooyu uyooba mulawo walyoonse+ kubana Israyeli akumweenzu uukkala akati kabo. 11 Kufwumbwa muntu uuguma mutunta wamuntu uyoosofwaala mazuba aali ciloba.+ 12 Muntu ooyo weelede kulisalazya amaanzi aakusalazya mubuzuba bwatatu, eelyo mubuzuba bwaciloba uyoosalala. Pele ikuti tanaalisalazya mubuzuba bwatatu, takooyoosalala mubuzuba bwaciloba. 13 Kufwumbwa muntu uuguma mutunta wamuntu uuli woonse, mpoonya katalisalazyi, wasofwaazya tente lyakukombela lya Jehova,+ alimwi muntu ooyo weelede kujaigwa akati kabana Israyeli.+ Akaambo kakuti tanaasansailwa maanzi aakusalazya,+ unoosofweede. Busofwaazi bwakwe bucili alinguwe.
14 “‘Ngooyu mulawo uujatikizya muntu wafwida mutente: Kufwumbwa muntu wanjila mutente oomo amuntu uuli woonse wajanika mumo, uyoosofwaala mazuba aali ciloba. 15 Kufwumbwa cibikkilo citavwunikidwe kabotu cilasofwaala.+ 16 Muntu uuli woonse uuli musyokwe uuguma muntu wakajaigwa apanga naa mutunta naa cifwuwa camuntu naa cuumbwe, ulasofwaala mazuba aali ciloba.+ 17 Muntu ooyo uusofweede beelede kumubwezela mulota wacituuzyo cazibi cakaumpwa akuutila maanzi mabotu mucilongo. 18 Mpoonya muntu uusalala+ uyoobweza hisopo+ akuunyika mumaanzi aayo mpoonya akusansaila tente eelyo, zibikkilo zyoonse zili mumo abantu ibajanika mumo alimwi ayooyo iwaguma cifwuwa camuntu naa waguma muntu wajaigwa naa mutunta naa cuumbwe. 19 Muntu uusalala uyoomusansaila maanzi muntu ooyo uusofweede mubuzuba bwatatu alimwi amubuzuba bwaciloba akumusalazya zibi zyakwe mubuzuba bwaciloba;+ mpoonya ooyo uusalazyigwa uyoowasya zisani zyakwe akusamba amubili, eelyo kumangolezya uyoosalala.
20 “‘Pele muntu uusofweede uutalisalazyi weelede kujaigwa akati kambungano,+ nkaambo wasofwaazya tente lyakukombela lya Jehova. Ulisofweede nkaambo tanaasansailwa maanzi aakusalazya.
21 “‘Ooyu uyooba mulawo walyoonse kulimbabo: Ooyo uusansaila maanzi aakusalazya+ weelede kuwasya zisani zyakwe, alimwi ayooyo uuguma maanzi aakusalazya. Uyoosofwaala kusikila kumangolezya. 22 Kufwumbwa cintu muntu uusofweede ncaaguma ciyoosofwaala, amuntu ooyo uuciguma uyoosofwaala kusikila kumangolezya.’”+
20 Mbungano yoonse yabana Israyeli yakaboola munkanda ya Zini mumwezi wakusaanguna, mpoonya bakakkala ku Kadesi.+ Ooko nkonkuko Miriamu+ nkwaakafwida akuzikkwa.
2 Lino mbungano+ yakabula maanzi aboobo bakalibunga-bunga akutalika kutoongokela Musa a Aroni. 3 Bantu bakazwangana a Musa+ akwaamba kuti: “Nicakabota nitwakafwa ciindi bakwesu nibakafwa kumbele lya Jehova! 4 Nkaambo nzi ncomwaleta mbungano ya Jehova munkanda omuno kuti tufwe abanyama besu?+ 5 Nkaambo nzi ncomwakatugwisya mu Egepita akutuleta mubusena oobu bubi kapati?+ Kunyina maila, nkuyu, misaansa amapomegranite, taakwe amaanzi aakunywa.”+ 6 Mpoonya Musa a Aroni bakazwa ooko ikwakali mbungano akuboola kumulyango watente lyakuswaanganina eelyo bakavwuntama ansi mpoonya bulemu bwa Jehova bwakatalika kulibonya kulimbabo.+
7 Kumane Jehova wakaambila Musa kuti: 8 “Kobweza musako akwiita mbungano antoomwe, yebo a Aroni munyoko, mpoonya waambile ndomba kabalangilila kutegwa lipe maanzi aalyo, weelede kubagwisizya maanzi mundomba akubapa kuti banywe antoomwe abanyama babo.”+
9 Aboobo Musa wakabweza musako kuzwa kubusyu bwa Jehova,+ mbubonya mbwaakamulailila. 10 Kumane Musa a Aroni bakaita mbungano kumbele lyandomba, eelyo Musa wakati kulimbabo: “Amuswiilile lino, nywebo nobazangi! Sena muyanda kuti tumugwisizye maanzi mundomba oomu?”+ 11 Amane Musa wakanyamuna janza lyakwe akuuma ndomba amusako ziindi zyobilo, mpoonya maanzi akatalika kupoomoka, eelyo bantu abanyama babo bakatalika kunywa.+
12 Mpoonya Jehova wakaambila Musa a Aroni kuti: “Akaambo kakuti tiimwatondezya lusyomo mulindime akundilemeka kubusyu bwabana Israyeli, tamukainjizyi mbungano eeyi munyika eeyo njondiyoobapa.”+ 13 Aaya ngamaanzi aaku Meriba,*+ ooko bana Israyeli nkobakakazyanya a Jehova, alimwi wakalemekwa akati kabo.
14 Mpoonya Musa wakatuma batumwa kuzwa ku Kadesi kuyakwaambila mwami wa Edomu+ kuti: “Mboobu mbwaamba munyoko Israyeli,+ ‘Yebo ulaazyi kabotu mapenzi oonse aakatucitikila. 15 Bamatata bakaunka ku Egepita+ alimwi twakakkala mu Egepita myaka minji,*+ eelyo bana Egepita bakatupenzya swebo abamatata.+ 16 Mpoonya twakamulilila Jehova+ eelyo wakatumvwa akutuma mungelo,+ kumane wakatugwisya mu Egepita, lino mpaawa tuli momuno mu Kadesi, imunzi uuli kumunyinza wacilawo cako. 17 Tulomba kuti twiinde mucisi cako. Tatukokwiinda mumuunda uuli woonse naa mumyuunda yamisaansa pe, alimwi tatukoonywa maanzi aamumugoti uuli woonse. Tulainda buyo mu Mugwagwa wa Mwami kakunyina kuleya kululyo naa kulumwensyi mane twiinde mucilawo cako.’”+
18 Nokuba boobo Edomu wakamwaambila kuti: “Utaindi pe mucisi cesu. Ikuti wiinde, ndilaboola kukucinga apanga.” 19 Mpoonya bana Israyeli bakamwaambila kuti: “Tulainda buyo mumugwagwa, ikuti naa swebo abanyama besu tunywe maanzi aako, tulaabbadelela.+ Tuyanda buyo kwiinda, taakwe cimbi ncotuyanda pe.”+ 20 Pele alimwi wakati: “Mutaindi pe.”+ Kuzwa waawo Edomu wakaboola abantu banji alimwi ampi ilaanguzu* kuzooswaangana ambabo. 21 Edomu wakakaka kuzumizya bana Israyeli kuti bainde mucilawo cakwe, aboobo bana Israyeli bakainda kumbi.+
22 Mbungano yoonse yabana Israyeli yakanyamuka kuzwa ku Kadesi akuboola ku Cilundu ca Hori.+ 23 Mpoonya Jehova wakaambila Musa a Aroni mu Cilundu ca Hori kumunyinza wacisi ca Edomu kuti: 24 “Aroni ulafwa akuzikkwa mbubonya mbuli basikale bakwe.+ Takooyoonjila munyika eeyo njendiyoopa bana Israyeli, nkaambo nywebo nyobilo tiimwakatobela malailile aangu kujatikizya maanzi aaku Meriba.+ 25 Bweza Aroni a Eleazara mwanaakwe akubaleta mu Cilundu ca Hori. 26 Aroni umusamunune zisani+ zyakwe zyabupaizi akuzisamika mwanaakwe Eleazara,+ alimwi Aroni ulafwa nkukonya ooko.”
27 Aboobo Musa wakacita mbubonya Jehova mbwaakalailila, eelyo bakatanta mu Cilundu ca Hori mbungano yoonse kailangilila. 28 Mpoonya Musa wakasamununa Aroni zisani zyakwe zyabupaizi akuzisamika Eleazara mwanaakwe. Kuzwa waawo, Aroni wakafwa mpoonya aawo atala aacilundu.+ Kumane Musa a Eleazara bakaseluka kuzwa aacilundu. 29 Mbungano yoonse noyakabona kuti Aroni wafwa, bana Israyeli boonse bakamulila mazuba aali 30.+
21 Lino mwami wabana Kanana waku Aradi,+ iwakali kukkala ku Negebi naakamvwa kuti bana Israyeli baboola kubelesya nzila yaku Atalimu, wakabalwana akutola bamwi mubuzike. 2 Mpoonya bana Israyeli bakakonka kuli Jehova balaamba: “Ikuti wabaaba bantu aaba mumaanza eesu, masimpe tulainyonyoona minzi yabo.” 3 Aboobo Jehova wakamvwa ncibakaamba bana Israyeli eelyo wakabaaba bana Kanana kulimbabo, kumane bakabajaya akunyonyoona minzi yabo. Aboobo busena oobo bakabuulika zina lyakuti Horima.*+
4 Nobakazumanana lweendo lwabo kuzwa ku Cilundu ca Hori+ kunzila iinda ku Lwizi Lusalala kuti bazinguluke cisi ca Edomu,+ bantu bakakatala akutyompwa akaambo kamusinzo. 5 Alimwi bantu bakazumanana kutongookela Leza a Musa+ kabati: “Ino nkaambo nzi ncomwakatuleta kuzwa mucisi ca Egepita kuti tufwe munkanda? Taakwe cakulya amaanzi,+ alimwi cakulya eeci cisesemya catucima.”+ 6 Aboobo Jehova wakatuma nzoka zikali kapati akati kabana Israyeli, eelyo zyakabaluma cakuti banji bakafwa.+
7 Mpoonya bantu bakaboola kuli Musa akwaamba kuti: “Twabisya akaambo kakutongookela Jehova anduwe.+ Kotukombela kuli Jehova kutegwa agwisye nzoka akati kesu.” Eelyo Musa wakabakombela bantu.+ 8 Kumane Jehova wakati kuli Musa: “Kopanga cikozyanyo canzoka nkali akwiibikka acisamu. Ikuti naa umwi walumwa, weelede kwiilanga eelyo uyoozumanana kupona.” 9 Mpoonya aawo Musa wakapanga nzoka yamukuba+ akwiibikka acisamu,+ alimwi kufwumbwa naa nzoka yaluma muntu eelyo muntu ooyo walanga kunzoka yamukuba, wakali kupona.+
10 Kuzwa waawo bana Israyeli bakalongela ku Oboti.+ 11 Mpoonya bakazwa ku Oboti akulongela ku Iye-barimu,+ munkanda iilangene acisi ca Moabu, kulubazu lwakujwe. 12 Nobakazwa kooko bakalongela afwaafwi a Kkuti* lya Zeredi.+ 13 Kuzwa kooko bakalonga akuyookkala mucilawo ca Arinoni+ icili munkanda iitalikila kumunyinza wabana Amori, nkaambo Arinoni ngomunyinza wacisi cabana Moabu, akati ka Moabu abana Amori. 14 Nkakaambo kaako bbuku lya Nkondo zya Jehova lyaamba kuti: “Behibi mu Sufa alimwi amakkuti aa Arinoni, 15 amungenyu* wamakkuti, ooyo uusika kucilawo ca Ari alimwi uubambene amunyinza wa Moabu.”
16 Kuzwa kooko bakaunka ku Beeri. Eeci ncecikala Jehova ncaakali kwaamba ciindi naakaambila Musa kuti: “Bunganya bantu kutegwa ndibape maanzi.”
17 Aciindi eeco, bana Israyeli bakaimba lwiimbo oolu lwakuti:
“Tuntumuka, ocikala!–Amuciimbile nobantu!
18 Cikala icakasyigwa abami. Cakafwumbwa abantu balemekwa,
Bakacifwumba amusako wabwami alimwi amisako yabo.”
Kuzwa munkanda bakaya ku Matana, 19 eelyo kuzwa ku Matana bakaya ku Nahaliyeli, alimwi kuzwa ku Nahaliyeli bakaya ku Bamoti.+ 20 Nobakazwa ku Bamoti bakaya kukkuti ilili mucilawo ca Moabu,+ atala aa Pisiga,+ uulangene a Jesimoni.*+
21 Lino bana Israyeli bakatuma batumwa kuli Sihoni imwami wabana Amori kuyoomwaambila kuti:+ 22 “Tulomba kuti twiinde mucisi cako. Tatukokwiinda mumyuunda naa myuunda yamisaansa pe. Tatukoonywa maanzi mumugoti uuli woonse. Tulainda buyo mu Mugwagwa wa Mwami mane twiinde mucilawo cako.”+ 23 Pele Sihoni tanaakabazumizya bana Israyeli kwiinda mucilawo cakwe pe. Muciindi caboobo, wakabunganya bantu bakwe boonse akuunka kuyooswaangana abana Israyeli munkanda, eelyo bakasika ku Jahazi akutalika kulwana bana Israyeli.+ 24 Pele bana Israyeli bakazunda bana Amori apanga+ akubweza cisi cabo+ kuzwa ku Arinoni+ kusikila ku Jaboki,+ kufwaafwi abana Amoni, nkaambo Jazeri+ ngomunyinza wabana Amoni.+
25 Aboobo bana Israyeli bakaibweza minzi yoonse eeyi, mpoonya bakatalika kukkala muminzi yoonse yabana Amori,+ mu Hesiboni aminzi misyoonto* yanguwo yoonse. 26 Nkaambo Hesiboni wakali munzi mupati wa Sihoni, mwami wabana Amori, iwakalwanide amwami wa Moabu akubweza nyika yakwe yoonse kusikila ku Arinoni. 27 Eeci ncicakapa kuti kube kaambyo kakufwubaazya kakuti:
“Amuboole ku Hesiboni.
Auyakwe munzi mupati wa Sihoni alimwi uyume.
28 Nkaambo mu Hesiboni mwazwa mulilo, imulilo uuzwa kumunzi wa Sihoni.
Wamuumpa cakumaninina Ari waku Moabu, bamukamwini malundu aaku Arinoni.
29 Maawe kulindinywe nobana Moabu! Muyoonyonyoonwa, nobantu ba Kemosi!+
Upa bana bakwe basankwa kuti babe basimutuntuli akunjizya bana bakwe basimbi mubuzike kuli Sihoni, mwami wabana Amori.
30 Atubalwane;
Hesiboni uyoonyonyoonwa kusikila ku Diboni;+
Atumunyonyoone kusikila ku Nofa;
Mulilo uyoosika aku Medeba.”+
31 Aboobo bana Israyeli bakatalika kukkala mucisi cabana Amori. 32 Mpoonya Musa wakatuma baalumi kuyootwela Jazeri.+ Bakasaala minzi misyoonto* yanguwo akutanda bana Amori ibakali kukkala mumo. 33 Kuzwa waawo bakanyona akutozya nzila yaku Basani. Kumane Ogi+ imwami waku Basani wakaboola abantu bakwe boonse kuzoobalwana ku Edrei.+ 34 Lino Jehova wakati kuli Musa: “Utamuyoowi pe,+ nkaambo ndilamwaaba mumaanza aako abantu bakwe boonse anyika yakwe,+ alimwi uyoomucita mbubonya mbookacita Sihoni, mwami wabana Amori, iwakali kukkala ku Hesiboni.”+ 35 Aboobo bakazumanana kumulwana walo abana bakwe alimwi abantu bakwe boonse kusikila boonse bafwa,+ kumane bakaibweza nyika yakwe.+
22 Kuzwa waawo bana Israyeli bakalongela kuzibanda zya Moabu kutala aamulonga wa Jordano nkoulangene a Jeriko.+ 2 Lino Balaki+ mwana wa Zipori wakabona zyoonse bana Israyeli nzyobakacita kubana Amori, 3 alimwi bana Moabu bakayoowa kapati akaambo kabana Israyeli,+ nkaambo bakali banji; ncobeni bana Moabu bakakankama. 4 Aboobo bana Moabu bakaambila baalu baku Midiyani+ kuti: “Eeyi mbungano ilatumanina busena butuzingulukide mbubonya mbuli ŋombe mboimanizya bwizu bwamusyokwe.”
Balaki mwana wa Zipori ngowakali mwami wa Moabu aciindi eeco. 5 Wakatuma batumwa kuli Balamu mwana wa Beori ku Petori,+ uuli afwaafwi a Mulonga* mucisi cakwe. Wakamwiita akumwaambila kuti: “Bona! Kuli bantu baboola kuzwa ku Egepita. Bazula nyika yoonse+ alimwi bakkede kumbele lyangu. 6 Lino koboola kaka uzoondisinganizyile bantu aaba,+ nkaambo bali anguzu kwiinda ndime. Ambweni inga ndacikonzya kubazunda akubatanda munyika, nkaambo ndilizyi kabotu kuti ooyo ngoolongezya ulilongezyedwe alimwi ooyo ngoosinganya ulisinganizyidwe.”
7 Lino baalu baku Moabu abaalu baku Midiyani bakaunka kuli Balamu+ kabajisi amali aakusondya eelyo bakamwaambila majwi aa Balaki. 8 Balamu naakamvwa majwi aabo wakati: “Amoone ookuno, ndilamwaambila Jehova ncatiindaambile.” Aboobo basilutwe ba Moabu bakakkala a Balamu.
9 Mpoonya Leza wakaboola kuli Balamu akumubuzya kuti:+ “Ino aaba baalumi mboli abo mbaani?” 10 Mpoonya Balamu wakati kuli Leza mwini-mwini: “Balaki mwana wa Zipori, imwami waku Moabu nguwabatuma kulindime akwaamba kuti, 11 ‘Bona! Ibantu baboola kuzwa ku Egepita bazula nyika yoonse. Lino koboola uzoondisinganizyile bantu aaba.+ Ambweni inga ndacikonzya kubazunda akubatanda kuzwa munyika.’” 12 Pele Leza wakaambila Balamu kuti: “Utaunki ambabo. Toyelede kubasinganya bantu aaba, nkaambo balilongezyedwe.”+
13 Lino nobwakaca Balamu wakabuka mafwumofwumo akwaambila basilutwe ba Balaki kuti: “Kamuya kucisi canu, nkaambo Jehova wandikasya kuunka andinywe.” 14 Aboobo basilutwe ba Moabu bakanyamuka akuya kuli Balaki akumwaambila kuti: “Balamu wakaka kuboola andiswe.”
15 Nokuba boobo, Balaki alimwi wakatuma basilutwe bambi banji alimwi balemekwa kapati kwiinda bataanzi. 16 Lino bakasika kuli Balamu akumwaambila kuti: “Mboobu mbwaamba Balaki mwana wa Zipori, ‘Akaka utazumizyi cintu cili coonse kuti cikulesye kuboola kulindime, 17 nkaambo ndilakupa bulemu bupati alimwi kufwumbwa ncokonzya kundaambila ndilacicita. Aboobo ndakomba kaka, koboola undisinganizyile bantu aaba.’” 18 Pele Balamu wakaingula akwaambila babelesi ba Balaki kuti: “Nokuba kuti Balaki wandipa ŋanda yakwe iimugeme iizwide nsiliva angolida, tandikonzyi kusotoka malailile aa Jehova Leza wangu, mucintu cisyoonto naa cipati.+ 19 Lino andinywe amoone ookuno kutegwa ndimvwe mbwatiindaambile Jehova lweendo oluno.”+
20 Mpoonya Leza wakaboola kuli Balamu masiku akumwaambila kuti: “Ikuti baalumi aaba baboolela kukwiita, koya ambabo. Pele weelede buyo kuyakwaamba majwi ngondinookwaambila.”+ 21 Aboobo nobwakaca Balamu wakanyamuka mafwumofwumo akutanta ambongolo* yakwe akuunka abasilutwe baku Moabu.+
22 Pele Leza wakanyema kapati akaambo kakuti Balamu wakaunka, eelyo mungelo wa Jehova wakaima munzila kutegwa amukasye. Lino Balamu wakatantide ambongolo yakwe, alimwi bobilo akati kababelesi bakwe bakali anguwe. 23 Lino mbongolo noyakabona mungelo wa Jehova kaimvwi munzila apanga lyakwe mujanza, yakasola kuleya kuzwa munzila kutegwa yuunke musyokwe. Pele Balamu wakatalika kuyuuma kutegwa ijokele munzila. 24 Mpoonya mungelo wa Jehova wakaima mukazila kamanikide akati kamyuunda yamisaansa ikakajisi bwaanda bwamabwe ooku akooku. 25 Mbongolo eeyo noyakabona mungelo wa Jehova yakatalika kulisyaanikizya kubwaanda alimwi yakasyaanikizya akuulu kwa Balamu kubwaanda, mpoonya wakatalika kuyuuma alimwi.
26 Eelyo mungelo wa Jehova wakaunka kumbele akwiima abusena bumanikide, aawo muntu mpatakonzyi kwiinda kululyo naa kulumwensyi. 27 Lino mbongolo niyakabona mungelo wa Jehova yakalala ansi; eelyo Balamu wakanyema kapati, aboobo wakazumanana kuyuuma mbongolo amusako wakwe. 28 Kumane Jehova wakapa kuti mbongolo yaambaule,+ eelyo yakati kuli Balamu: “Ino ndakutyani ncoonduumina ziindi eezyi zyotatwe?”+ 29 Balamu wakaingula mbongolo kuti: “Nkaambo wandifwubaazya. Nindalijisi panga mujanza lyangu, nindakujaya!” 30 Mpoonya mbongolo yakaambila Balamu kuti: “Sena tandili mbongolo yako njooli kutanta mubuumi bwako boonse kusikila sunu? Sena kuli buzuba mbondakakucitide boobu?” Wakati: “Peepe!” 31 Kumane Jehova wakajula meso aa Balamu,+ eelyo wakabona mungelo wa Jehova uliimvwi munzila apanga mujanza lyakwe. Mpoonya aawo wakakotama akuvwuntama ansi.
32 Lino mungelo wa Jehova wakamwaambila kuti: “Ino nkaambo nzi ncooyuumina mbongolo yako ziindi eezyi zyotatwe? Bona! Ndaboolela kuti ndikukasye kuunka nkaambo lweendo lwako lwaindana amakanze aangu.+ 33 Mbongolo yandibona akusoleka kundileya ziindi eezyi zyotatwe.+ Lino niyatandileya, ecino ciindi nindalikujayide kale, pele yalo nondaileka kuti ipone.” 34 Eelyo Balamu wakati kumungelo wa Jehova: “Ndabisya, nkaambo tiindalizyi kuti nduwe wiimvwi munzila kuti undiswaanganye. Aboobo, ikuti naa tiicabota mumeso aako, ndilapiluka.” 35 Pele mungelo wa Jehova wakaambila Balamu kuti: “Koya abaalumi aaba, pele weelede buyo kwaamba majwi ngondakwaambila.” Aboobo Balamu wakazumanana kuunka abasilutwe ba Balaki.
36 Lino Balaki naakamvwa kuti Balamu wasika, mpoonya aawo wakaunka kuyoomucinga kumunzi wa Moabu uuli kunkomwe ya Arinoni, kumunyinza wacilawo. 37 Mpoonya Balaki wakati kuli Balamu: “Sena tiindakatuma basikukwiita? Ino nkaambo nzi ncootakaboolela? Sena uyeeya kuti tandikonzyi kukupa bulemu bupati?”+ 38 Balamu wakaingula Balaki kuti: “Mpaawa lino ndasika kulinduwe. Ino ncinzi nconditiiambe? Ndilaamba buyo majwi aayo Leza ngatiindaambile.”+
39 Mpoonya Balamu wakaunka a Balaki, eelyo bakasika ku Kiriyati-huzoti. 40 Kumane Balaki wakatuula ŋombe ambelele akutuma zimwi kuli Balamu abasilutwe mbaakali limwi. 41 Mpoonya nobwakaca mafwumofwumo Balaki wakatola Balamu ku Bamoti-baala; ooko wakali kukonzya kubabona bantu boonse.+
23 Mpoonya Balamu wakati kuli Balaki: “Kondiyakila zipaililo zili ciloba+ abusena aano, akundibambila bapoho bali ciloba abagutu bali ciloba.” 2 Mpoonya aawo Balaki wakacita mbubonya mbwaakaamba Balamu. Kumane Balaki a Balamu bakatuula mupoho amugutu acipaililo cimwi acimwi.+ 3 Mpoonya Balamu wakati kuli Balaki: “Kosyaala aano afwaafwi acituuzyo cako cuumpwa, mebo nduunke. Ambweni Jehova ulaswaangana andime akwaambaula andime. Kufwumbwa ncatiindaambile, ndilakwaambila.” Eelyo wakaunka atala aakalundu.
4 Kumane Leza wakaswaangana a Balamu,+ eelyo Balamu wakaamba kuti: “Ndayaka zipaililo zili ciloba mumilongo alimwi ndatuula mupoho amugutu acipaililo cimwi acimwi.” 5 Mpoonya Jehova wakaambila Balamu+ majwi ngaakeelede kuyakwaamba akumwaambila kuti: “Piluka kuli Balaki, alimwi mboobu mboyakwaamba.” 6 Aboobo wakapiluka akujana Balaki abasilutwe babana Moabu baliimvwi afwaafwi acituuzyo cakwe cuumpwa. 7 Mpoonya wakaamba kasimpi aaka kakuti:+
“Balaki mwami wa Moabu wandileta kuzwa ku Aramu,+
Kuzwa kumalundu aakujwe, wakati:
‘Boola undisinganizyile Jakobo.
Inzya, boola usampaule Israyeli.’+
8 Ino inga ndabasinganya buti aabo Leza mbaatasinganya?
Alimwi ino inga ndabasampaula buti aabo Jehova mbaatasampaula?+
9 Ndilibabwene kuzwa atala aamabwe,
Alimwi ndilibabwene kuzwa aatulundu.
10 Nguni uukonzya kubala lunyungu lwa Jakobo,+ ibantu banji mbuli lusuko,
Nokuba kubala buyo cipaanzi cane ca Israyeli?
Andifwe lufwu lwabalulami,
Amamanino angu aabe mbuli mamanino aabo.”
11 Amvwe boobo Balaki wakati kuli Balamu: “Ncinzi ncoocita kulindime? Ndakakuletela kuti ubasinganye basinkondoma, pele yebo wabalongezya buya.”+ 12 Mpoonya walo wakati: “Sena tandeelede kwaamba majwi oonse Jehova ngaandaambila kuti ndaambe?”+
13 Kumane Balaki wakati kulinguwe: “Atweende anduwe kubusena bumbi ooko nkokonzya kubabona. Uyoobona buyo bamwi babo; tokababoni boonse pe. Ukandisinganizyile mbabo nkukonya ooko.”+ 14 Aboobo wakamutola kucisaka caku Zofimu, atala aa Pisiga,+ kumane wakayaka zipaililo zili ciloba akutuula mupoho amugutu acipaililo cimwi acimwi.+ 15 Aboobo Balamu wakati kuli Balaki: “Kosyaala aano afwaafwi acituuzyo cako cuumpwa, mebo nendiciya kuyooswaangana a Leza ookuya.” 16 Mpoonya Jehova wakaswaangana a Balamu, wamwaambila majwi ngaakeelede kuyakwaamba akumwaambila kuti:+ “Piluka kuli Balaki, alimwi mboobu mboyakwaamba.” 17 Wakapiluka kulinguwe, eelyo wakajana uliimvwi abasilutwe babana Moabu afwaafwi acituuzyo cakwe cuumpwa. Mpoonya Balaki wakamubuzya kuti: “Ino ncinzi ncaamba Jehova?” 18 Mpoonya wakaamba kasimpi aaka kakuti:+
“Swiilila, Balaki.
Cenjeka kutwi kwako kulindime, O mwana wa Zipori.
Ikuti naa waamba cintu, sena takonzyi kucicita?
Alimwi naa waamba, sena takonzyi kucizuzikizya?+
21 Talekeli nguzu zyamasalamuzi zili zyoonse kulwana Jakobo,
Alimwi tazumizyi mapenzi aali woonse kusikila Israyeli.
Jehova Leza wakwe ulaambabo,+
Alimwi ulatembaulwa cakoongolola mbuli mwami akati kabo.
22 Leza wabagwisya mu Egepita.+
Uli mbuli meja aamunyati kulimbabo.+
Lino bantu balakonzya kwaamba Jakobo a Israyeli kuti:
‘Bona ncaacita Leza!’
24 Mbaaba bantu bayoonyamuka mbuli syuumbwa,
Bayoobuka mbuli syuumbwa.+
Tabakoolala kusikila balye munyama
Akunywa bulowa bwabaabo bajaidwe.”
25 Mpoonya Balaki wakati kuli Balamu: “Ikuti naa tokonzyi kubasinganya naaceya, nkokuti toyelede nokuba kubalongezya.” 26 Eelyo Balamu wakaambila Balaki kuti: “Sena tiindakakwaambila kuti, ‘Zyoonse Jehova nzyayakwaamba, mebo nzyendiyoocita’?”+
27 Mpoonya Balaki wakati kuli Balamu: “Akaka, koboola ndikutole kubusena bumbi. Ambweni ooko Leza mwini-mwini uyoozumizya kuti undisinganizyile mbabo.”+ 28 Aboobo Balaki wakatola Balamu atala aacilundu ca Peori icilangide ku Jesimoni.*+ 29 Kumane Balamu wakaambila Balaki kuti: “Kondiyakila zipaililo zili ciloba abusena aano akundibambila bapoho bali ciloba abagutu bali ciloba.”+ 30 Mpoonya aawo Balaki wakacita mbubonya mbwaakaamba Balamu alimwi wakatuula mupoho amugutu acipaililo cimwi acimwi.
24 Balamu naakabona kuti Jehova ulayanda kulongezya bana Israyeli, kunyina naakaunka alimwi kuyoobalangawida malweza mbuli mbwaakacitide musyule,+ pele wakalanga kunkanda. 2 Mpoonya naakatambya meso aakwe akubona bana Israyeli kabakkede munkamu zyamisyobo yabo,+ muuya wa Leza wakamusikila.+ 3 Mpoonya wakaamba kasimpi aaka kakuti:+
“Mboobu mbwaamba Balamu imwana wa Beori,
Ambwaamba mwaalumi uuli ameso aajalukide,
4 Mbwaamba ooyo uumvwide majwi aa Leza,
Iwakabona cilengaano ca Singuzuzyoonse,
Iwakakotama, meso aakwe kaajalukide:+
5 Ma! Eelo kaka matente aako aleebeka, O Jakobo,
Imasena mokkala O Israyeli!+
6 Alindandeme kusikila kule mbuli tulonga twamukkuti,+
Mbuli myuunda iili kumbali aamulonga,
Mbuli masamu aa aloye Jehova ngaakasyanga,
Mbuli masamu aakkedari aali kumbali amaanzi.
7 Maanzi alakunka kuzwa muzilongo zyakwe zyobilo,
8 Leza wamugwisya mu Egepita;
Uli mbuli meja aamunyati kulimbabo.
Uyoobanyonyoona bamasi, basikumupenzya,+
Alimwi mafwuwa aabo uyakwaatyolaula alimwi uyoobavwinyauna amivwi yakwe.
9 Walandabala akulala ansi mbuli syuumbwa,
Alimwi mbwaanga uli mbuli syuumbwa, nguni uunga wasola kumubusya?
Aabo bakulongezya balilongezyedwe,
Alimwi aabo bakusinganya balisinganizyidwe.”+
10 Mpoonya Balaki wakakalalila Balamu. Balaki wakakamba maanza aakwe cakusampaula akumwaambila kuti: “Ndakakuletela kuti ubasinganye basinkondoma,+ pele yebo wabalongezya buya ziindi eezyi zyotatwe. 11 Anu kopiluka kwanu ino-ino. Ndakali kuyanda kukupa bulemu bupati,+ pele lino bona! Jehova wakukasya kuti upegwe bulemu.”
12 Mpoonya Balamu wakaingula Balaki kuti: “Sena batumwa bako mbookatumide tiindakabaambila kuti, 13 ‘Nokuba kuti Balaki wandipa ŋanda yakwe iimugeme iizwide nsiliva angolida, tandikonzyi* kusotoka malailile aa Jehova, mucintu cisyoonto naa cipati. Ndiyakwaamba buyo eeco Jehova ncayoondaambila’?+ 14 Lino ndaunka kwesu. Boola ndikwaambile ncobayoocita bantu aaba kubantu bako kumbele aamazuba.” 15 Mpoonya wakaamba kasimpi aaka kakuti:+
“Mboobu mbwaamba Balamu imwana wa Beori,
Ambwaamba mwaalumi uuli ameso aajalukide,+
16 Mbwaamba ooyo uumvwide majwi aa Leza,
Uujisi luzyibo kuzwa ku Mupatikampatila,
Iwakabona cilengaano ca Singuzuzyoonse
Ciindi naakali kukotama ansi, meso aakwe kaajalukide:
17 Ndiyoomubona, pele kutali lino;
Ndiyoomubona, pele kutali ino-ino.
18 Edomu uyooba lukono lwakwe,+
Inzya, Seiri+ uyooba lukono lwabasinkondonyina,+
Eelyo Israyeli nanootondezya busicamba bwakwe.
19 Muli Jakobo muyoozwa yooyo uyakuunka kayaabuzunda,+
Alimwi uyoonyonyoona kufwumbwa uyoosyaala mumunzi.”
20 Naakabona bana Amaleki, wakazumanana kwaamba kasimpi kakwe kati:
21 Naakabona bana Keni,+ wakazumanana kwaamba kasimpi kakwe kati:
“Cikkalilo cako cilikwabilidwe, alimwi ciyakidwe atala aandomba.
22 Nokuba boobo, umwi uyakuumpa Kaini.
Ino kusyeede ciindi cilamfwu buti kuti Asuri akutole mubuzike?”
23 Alimwi wakazumanana kwaamba kasimpi kakwe kati:
“Maawe! Nguni uyoofwutuka eelyo Leza aakucita boobo?
Pele awalo uyoonyonyoonwa cakumaninina.”
25 Mpoonya Balamu+ wakanyamuka akupiluka kwabo. Eelyo awalo Balaki wakaunka kwakwe.
25 Lino bana Israyeli nobakali kukkala mu Sitimu,+ bantu bakatalika kuvwuula abana basimbi baku Moabu.+ 2 Bamakaintu aabo bakatalika kutamba bantu kuzipaizyo zyabaleza babo,+ eelyo bantu bakatalika kulya akukotamina baleza aabo.+ 3 Aboobo bana Israyeli bakatalika kukomba* Baala waku Peori,+ mpoonya bukali bwa Jehova bwakababukila bana Israyeli. 4 Eelyo Jehova wakaambila Musa kuti: “Jata basololi boonse babantu aaba akubajaya akubaanzika kalitwa mwaaba* kubusyu bwa Jehova, kutegwa bukali bupati bwa Jehova kubana Israyeli bumane.” 5 Mpoonya Musa wakaambila babetesi bamu Israyeli kuti:+ “Umwi aumwi wanu ajaye baalumi bakwe aabo ibakasangana mukukomba* Baala waku Peori.”+
6 Pele ndilyonya eelyo, mwaalumi umwi muna Israyeli wakaboola akuleta mukaintu muna Midiyani+ kubanabokwabo, Musa ambungano yoonse yabana Israyeli kabalangilila, nobakali kulila kumulyango watente lyakuswaanganina. 7 Finehasi+ mwana wa Eleazara imwana wa Aroni mupaizi naakabona boobo, mpoonya aawo wakanyamuka kuzwa akati kambungano akubweza sumo mujanza lyakwe. 8 Mpoonya wakamutobela mwaalumi muna Israyeli mutente lyakwe akubayasilaamwi boonse bobilo, mwaalumi muna Israyeli amukaintu wakamuyasilizya kubukaintu. Eelyo lunyonyooko lwakalesyegwa akati kabana Israyeli.+ 9 Aabo bakafwa alunyonyooko oolo bakali 24,000.+
10 Kumane Jehova wakaambila Musa kuti: 11 “Finehasi+ mwana wa Eleazara imwana wa Aroni mupaizi walesya bukali bwangu kubana Israyeli, nkaambo tanaalekela basikundizangila akati kabo.+ Aboobo tiindabanyonyoona bana Israyeli kutegwa kabakomba buyo ndime ndelikke.+ 12 Aboobo umwaambile kuti, ‘Ndilapanga cizuminano caluumuno anguwe. 13 Alimwi ciyooba cizuminano cabupaizi bwalyoonse kulinguwe abana bakwe,+ nkaambo tanaalekela bantu kuzangila Leza+ wakwe alimwi wamanya milandu yabana Israyeli.’”
14 Izina lyamwaalumi muna Israyeli iwakajaigwa antoomwe amukaintu muna Midiyani wakali Zimuri mwana wa Salu, silutwe waciinga cabamausyi cabana Simeoni. 15 Izina lyamukaintu muna Midiyani iwakajaigwa wakali Kozibi mwana wa Zuri;+ iwakali musololi wamikowa yabamausyi ku Midiyani.+
16 Kumane Jehova wakaambila Musa kuti: 17 “Amubalwane bana Midiyani alimwi mweelede kubajaya,+ 18 nkaambo bali kumoongelezya amicito yabo yabucenjezu mumakani aa Peori+ alimwi amakani aa Kozibi mwana wasilutwe waku Midiyani, imucizyi wabo iwakajaigwa+ mubuzuba bwalunyonyooko lujatikizya makani aa Peori.”+
26 Nolwakainda lunyonyooko oolo,+ Jehova wakaambila Musa a Eleazara imwana wa Aroni mupaizi kuti: 2 “Amubale mweelwe wambungano yoonse yabana Israyeli, kufwumbwa uulaamyaka iili 20 kuya kumbele kweelana aziinga zyabamausyi, boonse aabo bakonzya kunjila mulimo wabusikalumamba mu Israyeli.”+ 3 Aboobo Musa a Eleazara+ mupaizi bakaambila bantu muzibanda zya Moabu+ mumbali aamulonga wa Jordano kufwaafwi a Jeriko+ kuti: 4 “Amubabale boonse bali amyaka iili 20 kuya kumbele, mbubonya Jehova mbwaakalailila Musa.”+
Lino bana Israyeli ibakazwa mucisi ca Egepita mbaaba: 5 Rubeni,+ imwana mutaanzi wa Israyeli; bana ba Rubeni+ mbaaba: Hanoki, usyi wamukwasyi wabana Hanoki; Palu, usyi wamukwasyi wabana Palu; 6 Hezironi, usyi wamukwasyi wabana Hezironi; Karimi, usyi wamukwasyi wabana Karimi. 7 Eeyi njiyakali mikwasyi yabana Rubeni, eelyo ibakalembwa bakali 43,730.+
8 Imwana wa Palu wakali Eliabu. 9 Eelyo bana ba Eliabu mbaaba: Nemueli, Datani a Abiramu. Datani a Abiramu bakali akati kabaabo bakasalidwe mumbungano ibakakazya Musa+ a Aroni mumbunga ya Kora+ ciindi nobakakazya Jehova.+
10 Mpoonya nyika yakaasama akubamena. Pele Kora wakafwa antoomwe abasikumutobela ciindi mulilo nowakabaumpa cakumaninina baalumi bali 250.+ Aboobo bakaba citondezyo cakucenjezya.+ 11 Nokuba boobo, bana ba Kora tiibakafwa pe.+
12 Bana ba Simeoni+ mumikwasyi yabo mbaaba: Nemueli, usyi wamukwasyi wabana Nemueli; Jamini, usyi wamukwasyi wabana Jamini; Jakini, usyi wamukwasyi wabana Jakini; 13 Zera, usyi wamukwasyi wabana Zera; Saulu, usyi wamukwasyi wabana Saulu. 14 Eeyi njiyakali mikwasyi yabana Simeoni: antoomwe bakali 22,200.+
15 Bana ba Gadi+ mumikwasyi yabo mbaaba: Zefoni, usyi wamukwasyi wabana Zefoni; Hagi, usyi wamukwasyi wabana Hagi; Suni, usyi wamukwasyi wabana Suni; 16 Ozini, usyi wamukwasyi wabana Ozini; Eri, usyi wamukwasyi wabana Eri; 17 Arodi, usyi wamukwasyi wabana Arodi; Areli, usyi wamukwasyi wabana Areli. 18 Eeyi njiyakali mikwasyi yabana Gadi, eelyo ibakalembwa bakali 40,500.+
19 Bana ba Juda+ bakali ba Ere a Onani. Pele Ere a Onani+ bakafwa munyika ya Kanana.+ 20 Bana ba Juda mumikwasyi yabo mbaaba: Sela,+ usyi wamukwasyi wabana Sela; Perezi,+ usyi wamukwasyi wabana Perezi; Zera,+ usyi wamukwasyi wabana Zera. 21 Bana ba Perezi mbaaba: Hezironi,+ usyi wamukwasyi wabana Hezironi; Hamuli,+ usyi wamukwasyi wabana Hamuli. 22 Eeyi njiyakali mikwasyi ya Juda, eelyo ibakalembwa bakali 76,500.+
23 Bana ba Isakara+ mumikwasyi yabo mbaaba: Tola,+ usyi wamukwasyi wabana Tola; Puva, usyi wamukwasyi wabana Puva; 24 Jasubu, usyi wamukwasyi wabana Jasubu; Simironi, usyi wamukwasyi wabana Simironi. 25 Eeyi njiyakali mikwasyi ya Isakara, eelyo ibakalembwa bakali 64,300.+
26 Bana ba Zebuloni+ mumikwasyi yabo mbaaba: Seredi, usyi wamukwasyi wabana Seredi; Eloni, usyi wamukwasyi wabana Eloni; Jaleeli, usyi wamukwasyi wabana Jaleeli. 27 Eeyi njiyakali mikwasyi yabana Zebuloni, eelyo ibakalembwa bakali 60,500.+
28 Bana ba Josefa+ mumikwasyi yabo mbaaba: Manase a Efraimu.+ 29 Bana ba Manase+ mbaaba: Makiri,+ usyi wamukwasyi wabana Makiri; Makiri wakazyala Gileadi; Gileadi,+ usyi wamukwasyi wabana Gileadi. 30 Bana ba Gileadi mbaaba: Jeezeri, usyi wamukwasyi wabana Jeezeri; Heleki, usyi wamukwasyi wabana Heleki; 31 Asirieli, usyi wamukwasyi wabana Asirieli; Sekemu, usyi wamukwasyi wabana Sekemu; 32 Semida, usyi wamukwasyi wabana Semida; Heferi, usyi wamukwasyi wabana Heferi. 33 Lino Zelofehadi imwana wa Heferi tanaakazyala bana basankwa, pele wakazyala buyo basimbi+ alimwi mazina aabana basimbi ba Zelofehadi+ mbaaba: Mala, Nowa, Hogila, Milika a Tiriza. 34 Eeyi njiyakali mikwasyi ya Manase, eelyo ibakalembwa bakali 52,700.+
35 Aaba mbabakali bana ba Efraimu+ kweelana amikwasyi yabo: Sutela,+ usyi wamukwasyi wabana Sutela; Bekeri, usyi wamukwasyi wabana Bekeri; Tahani, usyi wamukwasyi wabana Tahani. 36 Eelyo bana ba Sutela mbaaba: Erani, usyi wamukwasyi wabana Erani. 37 Eeyi njiyakali mikwasyi yabana ba Efraimu, eelyo ibakalembwa bakali 32,500.+ Oolu ndolunyungu lwa Josefa kweelana amikwasyi yabo.
38 Bana ba Benjamini+ kweelana amikwasyi yabo mbaaba: Bela,+ usyi wamukwasyi wabana Bela; Asibeli, usyi wamukwasyi wabana Asibeli; Ahiramu, usyi wamukwasyi wabana Ahiramu; 39 Sefufamu, usyi wamukwasyi wabana Sufamu; Hufamu, usyi wamukwasyi wabana Hufamu. 40 Eelyo bana ba Bela bakali ba Aridi a Naamani:+ Aridi, usyi wamukwasyi wabana Aridi; Naamani, usyi wamukwasyi wabana Naamani. 41 Aaba mbabakali bana ba Benjamini kweelana amikwasyi yabo, eelyo ibakalembwa bakali 45,600.+
42 Aaba mbabakali bana ba Dani+ kweelana amikwasyi yabo: Suhamu, usyi wamukwasyi wabana Suhamu. Aaba mbabakali bana ba Dani mumikwasyi yabo. 43 Boonse ibakalembwa mumikwasyi yabana Suhamu yoonse bakali 64,400.+
44 Bana ba Aseri+ kweelana amikwasyi yabo mbaaba: Yimuna, usyi wamukwasyi wabana Yimuna; Jisivi, usyi wamukwasyi wabana Jisivi; Beriya, usyi wamukwasyi wabana Beriya; 45 ibana ba Beriya mbaaba: Heberi, usyi wamukwasyi wabana Heberi; Malikieli, usyi wamukwasyi wabana Malikieli. 46 Mwana musimbi wa Aseri wakali Sera. 47 Eeyi njiyakali mikwasyi yabana ba Aseri, eelyo ibakalembwa bakali 53,400.+
48 Bana ba Nafutali+ kweelana amikwasyi yabo mbaaba: Jazieli, usyi wamukwasyi wabana Jazieli; Guni, usyi wamukwasyi wabana Guni; 49 Jezeri, usyi wamukwasyi wabana Jezeri; Silemu, usyi wamukwasyi wabana Silemu. 50 Eeyi njiyakali mikwasyi ya Nafutali, eelyo ibakalembwa bakali 45,400.+
51 Ooyu ngomweelwe woonse wabana Israyeli ibakalembwa: 601,730.+
52 Kuzwa waawo Jehova wakaambila Musa kuti: 53 “Aaba beelede kwaabanizyigwa nyika kuti ibe lukono lwabo kweelana amulongo wamazina.+ 54 Kunkamu zijisi bantu banji weelede kuyungizya lukono, eelyo kunkamu zijisi bantu bace weelede kucesya lukono.+ Nkamu imwi aimwi yeelede kupegwa lukono kweelana amweelwe wabantu balembedwe. 55 Nokuba boobo, nyika yeelede kwaabilwa kwiinda mukuuma cisolo.+ Beelede kupegwa lukono lwabo kweelana amazina aamisyobo yabamausyi. 56 Lukono lumwi alumwi luyoopegwa kwiinda mukuuma cisolo, akwaabanizyigwa akati kankamu zipati ankamu zisyoonto.”
57 Lino aaba mbaba Levi+ ibakalembwa kweelana amikwasyi yabo: Gerisoni, usyi wamukwasyi wabana Gerisoni; Kohati,+ usyi wamukwasyi wabana Kohati; Merari, usyi wamukwasyi wabana Merari. 58 Eeyi njiyakali mikwasyi yaba Levi: Mukwasyi wabana Libini,+ mukwasyi wabana Hebroni,+ mukwasyi wabana Mali,+ mukwasyi wabana Musi,+ mukwasyi wabana Kora.+
Eelyo Kohati wakazyala Amuramu.+ 59 Mukaintu wa Amuramu wakali Jokebedi,+ imwana wa Levi ngwaakazyalila mu Egepita. Eelyo kuli Amuramu wakazyala Aroni, Musa amucizyi wabo Miriamu.+ 60 Mpoonya Aroni wakazyala Nadabu, Abihu, Eleazara a Itamara.+ 61 Pele Nadabu a Abihu bakafwa akaambo kakuleta mulilo uutazumizyidwe kumbele lya Jehova.+
62 Mweelwe woonse wabaabo ibakalembwa wakali 23,000, basankwa boonse ibali amwezi omwe kuya kumbele.+ Aaba tiibakalembwa antoomwe abana Israyeli+ nkaambo tiibakeelede kupegwa lukono akati kabana Israyeli.+
63 Aaba mbambabo ibakalembwa a Musa a Eleazara mupaizi eelyo nobakabala bana Israyeli muzibanda zya Moabu mumbali aamulonga wa Jordano, afwaafwi a Jeriko. 64 Pele kunyina naba omwe akati kabaaba iwakalembedwe a Musa a Aroni mupaizi eliya nobakabala bana Israyeli munkanda ya Sinai.+ 65 Nkaambo Jehova wakaamba boobu kujatikizya mbabo: “Masimpe bayoofwida munkanda.”+ Aboobo kunyina naba omwe wakasyaala akati kabo pele buyo Kalebe imwana wa Jefune a Joshua imwana wa Nuni.+
27 Mpoonya bana basimbi ba Zelofehadi+ mwana wa Heferi imwana wa Gileadi imwana wa Makiri imwana wa Manase, iwamikwasyi ya Manase imwana wa Josefa, bakaboola afwaafwi. Mazina aabana bakwe basimbi ngaaya: Mala, Nowa, Hogila, Milika a Tiriza. 2 Basimbi aaba bakaimikila kumbele lya Musa a Eleazara mupaizi akumbele lyabasilutwe+ ambungano yoonse kumulyango watente lyakuswaanganina kabati: 3 “Taateesu wakafwa munkanda, nokuba boobo tanaakali akati kambunga yabasikutobela Kora+ iyakazangila Jehova, pele wakafwa akaambo kacibi cakwe mwini, alimwi tanaakazyala bana basankwa. 4 Sena izina lyataata lyeelede kufwidilila muciinga cakwe akaambo buyo kakuti tanaakazyala mwana musankwa? Amutupe lukono akati kabanabokwabo ataata.” 5 Aboobo Musa wakaatola makani aabo kuli Jehova.+
6 Mpoonya Jehova wakaambila Musa kuti: 7 “Bana ba Zelofehadi baamba kabotu. Ncobeni weelede kubapa lukono akati kabanabokwabo ausyi, alimwi weelede kubapa lukono lwausyi.+ 8 Alimwi weelede kwaambila bana Israyeli kuti, ‘Ikuti naa mwaalumi wafwa katajisi mwana musankwa, mweelede kupa lukono lwakwe kumwanaakwe musimbi. 9 Ikuti katajisi mwana musimbi, mweelede kupa lukono lwakwe kubanabokwabo. 10 Pele ikuti katajisi banabokwabo, mweelede kupa lukono lwakwe kubanabokwabo ausyi. 11 Ikuti usyi katajisi banabokwabo, mweelede kupa lukono lwakwe kuluumwi wamukowa wakwe waafwaafwi kuti lube lwakwe. Ooyu weelede kuba mulawo kubana Israyeli, mbubonya Jehova mbwaalailila Musa.’”
12 Mpoonya Jehova wakaambila Musa kuti: “Kotanta mucilundu eeci ca Abarimu,+ wiibone nyika njondiyoopa bana Israyeli.+ 13 Wamana kwiibona, ulafwa akuzikkwa mbubonya mbuli bantu bako,+ inzya, mbubonya mbuli Aroni mwanookwanu mbwaakafwa akuzikkwa,+ 14 nkaambo ciindi mbungano noyakanditongookela munkanda ya Zini, tiimwakatobela malailile aangu kuti mundilemeke kubusyu bwabo kujatikizya maanzi.+ Aaya maanzi aaku Meriba+ ku Kadesi,+ munkanda ya Zini.”+
15 Kumane Musa wakaambila Jehova kuti: 16 “Jehova, Leza uupa buumi kubantu boonse asale muntu uutisololele mbungano, 17 ooyo uukonzya kubasololela muzintu zyoonse alimwi bantu ngobakonzya kutobela muzintu zyoonse, kutegwa mbungano ya Jehova itabi mbuli mbelele zitakwe mweembezi.” 18 Aboobo Jehova wakaambila Musa kuti: “Kobweza Joshua mwana wa Nuni, mwaalumi uujisi muuya, wamana ubikke janza lyako alinguwe.+ 19 Mpoonya umwiimike kumbele lya Eleazara mupaizi akumbele lyambungano yoonse, wamana umubikke kuba musololi kubusyu bwabo.+ 20 Weelede kumupa bulemu bwako+ bumwi kutegwa mbungano yoonse yabana Israyeli kaimuswiilila.+ 21 Uyakwiima kumbele lya Eleazara mupaizi, eelyo walo uyoomubuzizya makani kuli Jehova kwiinda mukubelesya Urimu.+ Bayoocita zintu zyoonse kweelana amalailile aakwe, walo abana Israyeli boonse, nkokuti mbungano yoonse.”
22 Aboobo Musa wakacita mbubonya Jehova mbwaakamulailila. Wakamubweza Joshua akumwiimika kumbele lya Eleazara mupaizi akumbele lyambungano yoonse 23 mpoonya wakabikka maanza aakwe aalinguwe akumubikka kuba musololi+ mbubonya Jehova mbwaakaamba kwiinda muli Musa.+
28 Lino Jehova wakaambila Musa kuti: 2 “Kobalailila bana Israyeli kuti, ‘Mweelede kuba masimpe kuti mwandiletela cituuzyo cangu, nkokuti cakulya cangu. Zituuzyo zyangu zyuumpwa zijisi bweema bununkilila zyeelede kutuulwa aziindi zyazyo zibikkidwe.’+
3 “Alimwi ubaambile kuti, ‘Nceeci cituuzyo cuumpwa ncomweelede kutuulila Jehova: bagutu bobilo bamwaka omwe bacituuzyo cuumpwa abuzuba.+ 4 Mafwumofwumo mugutu omwe, eelyo umbi kumangolezya,+ 5 antoomwe acipaanzi cakkumi caefa* yafulaulu cisanganizyidwe acipaanzi cane cansazi* yamafwuta aamaolifa aatwidwe kacili cituuzyo camaila.+ 6 Ncituuzyo cuumpwa+ calyoonse kuli Jehova icakatalisyigwa a Cilundu ca Sinai kacili bweema bununkilila, 7 icituulwa antoomwe acituuzyo caco cinyugwa, cipaanzi cane cansazi kumugutu umwi aumwi.+ Amutile cakunywa cikola mubusena busalala kacili cituuzyo cinyugwa kuli Jehova. 8 Alimwi muyootuula mugutu uumbi kumangolezya. Muyoomutuula antoomwe acituuzyo camaila alimwi acituuzyo cinyugwa izyeelene azyamafwumofwumo, kacili cituuzyo cuumpwa cili abweema bununkilila kuli Jehova.+
9 “‘Nokuba boobo, mubuzuba bwa Sabata,+ mweelede kutuula bagutu bali amwaka omwe bobilo ibatajisi kampenda antoomwe acituuzyo camaila, zipaanzi zyobilo zyakkumi zyaefa yafulaulu uuvwelene amafwuta alimwi acituuzyo caco cinyugwa. 10 Eeci ncituuzyo cuumpwa camu Sabata, antoomwe acituuzyo cuumpwa calyoonse acituuzyo caco cinyugwa.+
11 “‘Kumatalikilo aamwezi umwi aumwi, muyootuulila Jehova cituuzyo cuumpwa, nkokuti bapoho bobilo bacili bana, mugutu omwe alimwi abagutu bali amwaka omwe+ ibali ciloba, 12 azipaanzi zyotatwe zyakkumi zyaefa yafulaulu wacituuzyo camaila+ uuvwelene amafwuta kumupoho umwi aumwi alimwi azipaanzi zyobilo zyakkumi zyaefa yafulaulu wacituuzyo camaila uuvwelene amafwuta kumugutu omwe,+ 13 acipaanzi cakkumi cafulaulu uuvwelene amafwuta iwacituuzyo camaila kumugutu umwi aumwi wamwaka omwe kacili cituuzyo cuumpwa icili abweema bununkilila+ kuli Jehova. 14 Alimwi zituuzyo zinyugwa zyeelede kuba cisela cansazi yawaini kumupoho,+ cipaanzi catatu cansazi yawaini kumugutu+ acipaanzi cane cansazi yawaini kumugutu+ wamwaka omwe. Eeci ncituuzyo cuumpwa cituulwa mwezi amwezi mumwaka woonse. 15 Kana kampongo keelede kutuulwa kakali cituuzyo cazibi kuli Jehova atala aacituuzyo calyoonse antoomwe acituuzyo caco cinyugwa.
16 “‘Mubuzuba bwa 14 bwamwezi wakusaanguna, kuyooba Pobwe Lyakwiindilila lya Jehova.+ 17 Mubuzuba bwa 15 bwamwezi ooyo kuyooba pobwe. Mazuba aali ciloba+ kuyooligwa zinkwa zitajisi bumena. 18 Mubuzuba bwakusaanguna kuyooba muswaangano uusalala. Tamweelede kubeleka mulimo uuli woonse uuminya. 19 Alimwi muyootuulila Jehova cituuzyo cuumpwa, nkokuti bapoho bobilo bacili bana, mugutu omwe alimwi abagutu bamwaka omwe ibali ciloba. Mweelede kutuula banyama batajisi kampenda.+ 20 Mweelede kubatuula antoomwe azituuzyo zyabo zyamaila zyafulaulu uukandidwe amafwuta,+ nkokuti zipaanzi zyotatwe zyakkumi zyaefa kumupoho umwi aumwi alimwi azipaanzi zyobilo zyakkumi zyaefa kumugutu omwe. 21 Muyootuula cipaanzi cakkumi caefa kumugutu umwi aumwi wamwaka omwe kubagutu boonse ibali ciloba, 22 ampongo yomwe kaili yacituuzyo cazibi cakumanya milandu yanu. 23 Kunze lyacituuzyo cuumpwa mafwumofwumo lyoonse, mweelede kutuula azituuzyo eezyi. 24 Muyoozituula eezyi mbubonya oobo, buzuba abuzuba kwamazuba aali ciloba kacili cakulya,* icituuzyo cuumpwa cabweema bununkilila kuli Jehova. Ceelede kutuulwa antoomwe acituuzyo cuumpwa lyoonse alimwi acituuzyo caco cinyugwa. 25 Mubuzuba bwaciloba mweelede kuba amuswaangano uusalala.+ Tamweelede kubeleka mulimo uuli woonse uuminya.+
26 “‘Mubuzuba bwabutebuzi bwamicelo yakusaanguna kubizwa,+ nomuleta cituuzyo camaila mapya kuli Jehova,+ mweelede kuba amuswaangano uusalala ciindi capobwe lyanu lyamvwiki.+ Tamweelede kubeleka mulimo uuli woonse uuminya.+ 27 Muyootuula bapoho bobilo, mugutu omwe abagutu bamwaka omwe ibali ciloba, kabali cituuzyo cuumpwa icili abweema bununkilila kuli Jehova,+ 28 acituuzyo caco camaila, zipaanzi zyotatwe zyakkumi zyaefa yafulaulu uukandidwe amafwuta kumupoho umwi aumwi, zipaanzi zyobilo zyakkumi zyaefa kumugutu, 29 acipaanzi cakkumi caefa kumugutu umwi aumwi wamwaka omwe kubagutu boonse ibali ciloba, 30 akana kampongo komwe kakumanya milandu yanu.+ 31 Muyootuula banyama aaba kuyungizya aacituuzyo cuumpwa lyoonse alimwi acituuzyo caco camaila, mweelede kubatuula antoomwe azituuzyo zyabo zinyugwa. Tabeelede kuba akampenda pe.+
29 “‘Mubuzuba bwakusaanguna bwamwezi waciloba mweelede kuba amuswaangano uusalala. Tamweelede kubeleka mulimo uuli woonse uuminya.+ Mbuzuba bwakulizya myeembo.+ 2 Muyootuula cituuzyo cuumpwa kacili bweema bununkilila kuli Jehova, nkokuti mupoho omwe uucili mwana, mugutu omwe alimwi abagutu bamwaka omwe ibali ciloba, banyama aaba tabeelede kuba akampenda pe, 3 azituuzyo zyamaila zyafulaulu uukandidwe amafwuta izituulwa antoomwe abanyama aaba zyeelede kuba zipaanzi zyotatwe zyakkumi zyaefa kumupoho omwe, zipaanzi zyobilo zyakkumi zyaefa kumugutu omwe, 4 acipaanzi cakkumi caefa kumugutu umwi aumwi uulaamwaka omwe, 5 amwana wampongo omwe mujembwe wacituuzyo cazibi cakumanya milandu yanu. 6 Eezyi zilatuulwa kuyungizya acituuzyo cuumpwa cituulwa mwezi amwezi antoomwe acituuzyo caco camaila+ alimwi acituuzyo cuumpwa calyoonse antoomwe acituuzyo caco camaila+ alimwi azituuzyo zyazyo zinyugwa,+ kweelana ambozicitwa lyoonse, kacili cituuzyo cuumpwa icili abweema bununkilila kuli Jehova.
7 “‘Mubuzuba bwa 10 bwamwezi ooyu waciloba, mweelede kuba amuswaangano uusalala+ alimwi mweelede kutondezya kuusa akaambo kazibi zyanu. Tamweelede kubeleka mulimo uuli woonse pe.+ 8 Mubuzuba oobu muyootuula cituuzyo cuumpwa kacili bweema bununkilila kuli Jehova, nkokuti mupoho omwe uucili mwana, mugutu omwe alimwi abagutu bamwaka omwe ibali ciloba, banyama aaba tabeelede kuba akampenda pe.+ 9 Alimwi zituuzyo zyamaila zyafulaulu uukandidwe amafwuta izituulwa antoomwe abanyama aaba zyeelede kuba zipaanzi zyotatwe zyakkumi zyaefa kumupoho, zipaanzi zyobilo zyakkumi zyaefa kumugutu omwe, 10 acipaanzi cakkumi caefa kumugutu umwi aumwi wamwaka omwe, 11 amwana wampongo omwe wacituuzyo cazibi, kunze lyacituuzyo cazibi cakumanya milandu+ acituuzyo cuumpwa lyoonse antoomwe acituuzyo caco camaila alimwi azituuzyo zyazyo zinyugwa.
12 “‘Mubuzuba bwa 15 bwamwezi waciloba, mweelede kuba amuswaangano uusalala. Tamweelede kubeleka mulimo uuli woonse uuminya, alimwi mweelede kusekelela pobwe kuli Jehova mazuba aali ciloba.+ 13 Mubuzuba oobu muyootuula cituuzyo cuumpwa+ kacili bweema bununkilila kuli Jehova, nkokuti bapoho bali 13 bacili bana, bagutu bobilo alimwi abagutu bamwaka omwe ibali 14, banyama aaba boonse tabeelede kuba akampenda pe.+ 14 Alimwi zituuzyo zyamaila zyafulaulu uukandidwe amafwuta izituulwa antoomwe abanyama aaba zyeelede kuba zipaanzi zyotatwe zyakkumi zyaefa kumupoho umwi aumwi wabapoho bali 13, zipaanzi zyobilo zyakkumi zyaefa kumugutu umwi aumwi wabagutu bobilo, 15 acipaanzi cakkumi caefa kumugutu umwi aumwi wabagutu bamwaka omwe bali 14, 16 amwana wampongo omwe wacituuzyo cazibi, kunze lyacituuzyo cuumpwa calyoonse acituuzyo caco camaila alimwi acituuzyo caco cinyugwa.+
17 “‘Mubuzuba bwabili mweelede kutuula bapoho bali 12 bacili bana, bagutu bobilo alimwi abagutu bamwaka omwe ibali 14, banyama aaba boonse tabeelede kuba akampenda pe,+ 18 azituuzyo zyamaila azituuzyo zinyugwa izituulwa antoomwe abapoho, abagutu alimwi abagutu bamwaka omwe kweelana amweelwe wabo alimwi ambuli cilengwa calyoonse, 19 amwana wampongo omwe wacituuzyo cazibi, kunze lyacituuzyo cuumpwa calyoonse antoomwe acituuzyo caco camaila alimwi azituuzyo zyazyo zinyugwa.+
20 “‘Mubuzuba bwatatu mweelede kutuula bapoho bali 11 bacili bana, bagutu bobilo alimwi abagutu bamwaka omwe ibali 14, banyama aaba boonse tabeelede kuba akampenda pe,+ 21 azituuzyo zyamaila azituuzyo zinyugwa izituulwa antoomwe abapoho, abagutu alimwi abagutu bamwaka omwe kweelana amweelwe wabo alimwi ambuli cilengwa calyoonse, 22 ampongo yomwe yacituuzyo cazibi, kunze lyacituuzyo cuumpwa calyoonse antoomwe acituuzyo caco camaila alimwi acituuzyo caco cinyugwa.+
23 “‘Mubuzuba bwane mweelede kutuula bapoho bali 10 bacili bana, bagutu bobilo alimwi abagutu bamwaka omwe ibali 14, banyama aaba boonse tabeelede kuba akampenda pe,+ 24 azituuzyo zyamaila azituuzyo zinyugwa izituulwa antoomwe abapoho, abagutu alimwi abagutu bamwaka omwe kweelana amweelwe wabo alimwi ambuli cilengwa calyoonse, 25 akana kampongo komwe kacituuzyo cazibi, kunze lyacituuzyo cuumpwa calyoonse antoomwe acituuzyo caco camaila alimwi acituuzyo caco cinyugwa.+
26 “‘Mubuzuba bwasanu mweelede kutuula bapoho bali fwuka bacili bana, bagutu bobilo alimwi abagutu bamwaka omwe ibali 14, banyama aaba boonse tabeelede kuba akampenda pe,+ 27 azituuzyo zyamaila azituuzyo zinyugwa izituulwa antoomwe abapoho, abagutu alimwi abagutu bamwaka omwe kweelana amweelwe wabo alimwi ambuli cilengwa calyoonse, 28 ampongo yomwe yacituuzyo cazibi, kunze lyacituuzyo cuumpwa calyoonse antoomwe acituuzyo caco camaila alimwi acituuzyo caco cinyugwa.+
29 “‘Mubuzuba bwacisambomwe mweelede kutuula bapoho bali lusele bacili bana, bagutu bobilo alimwi abagutu bamwaka omwe ibali 14, banyama aaba boonse tabeelede kuba akampenda pe,+ 30 azituuzyo zyamaila azituuzyo zinyugwa izituulwa antoomwe abapoho, abagutu alimwi abagutu bamwaka omwe kweelana amweelwe wabo alimwi ambuli cilengwa calyoonse, 31 ampongo yomwe yacituuzyo cazibi, kunze lyacituuzyo cuumpwa calyoonse antoomwe acituuzyo caco camaila alimwi acituuzyo caco cinyugwa.+
32 “‘Mubuzuba bwaciloba mweelede kutuula bapoho bali ciloba bacili bana, bagutu bobilo alimwi abagutu bamwaka omwe ibali 14, banyama aaba boonse tabeelede kuba akampenda pe,+ 33 azituuzyo zyamaila azituuzyo zinyugwa izituulwa antoomwe abapoho, abagutu alimwi abagutu bamwaka omwe kweelana amweelwe wabo alimwi ambuli cilengwa calyoonse, 34 ampongo yomwe yacituuzyo cazibi, kunze lyacituuzyo cuumpwa calyoonse antoomwe acituuzyo caco camaila alimwi acituuzyo caco cinyugwa.+
35 “‘Mubuzuba bwalusele mweelede kuba amuswaangano uusetekene. Tamweelede kubeleka mulimo uuli woonse uuminya.+ 36 Mubuzuba oobu muyootuula cituuzyo cuumpwa kacili bweema bununkilila kuli Jehova, nkokuti mupoho omwe, mugutu omwe alimwi abagutu bamwaka omwe ibali ciloba, banyama aaba boonse tabeelede kuba akampenda pe,+ 37 azituuzyo zyamaila azituuzyo zinyugwa izituulwa antoomwe amupoho, amugutu alimwi abagutu bamwaka omwe kweelana amweelwe wabo alimwi ambuli cilengwa calyoonse, 38 ampongo yomwe yacituuzyo cazibi, kunze lyacituuzyo cuumpwa calyoonse antoomwe acituuzyo caco camaila alimwi acituuzyo caco cinyugwa.+
39 “‘Eezyi muyoozituula kuli Jehova ciindi camapobwe aanu,+ kuyungizya azituuzyo zyanu zyazikonke+ azituuzyo zyanu zyakuliyandila,+ mbubonya mbuli zituuzyo zyanu zyuumpwa,+ zituuzyo zyanu zyamaila,+ zituuzyo zyanu zinyugwa+ alimwi azipaizyo zyanu zyalumvwano.’”+ 40 Mpoonya Musa wakabaambila bana Israyeli zyoonse Jehova nzyaakamulailila.
30 Kumane Musa wakaambila basilutwe+ bamisyobo yabana Israyeli kuti: “Mboobu Jehova mbwaalailila: 2 Ikuti muntu wakonka cikonke+ cakuliimya kuli Jehova, tayelede kucinca majwi aakwe pe.+ Weelede kucita zyoonse nzyaakakonka kuti ulazicita.+
3 “Ikuti musimbi uucikkala muŋanda yabausyi wakonka cikonke cakuliimya kuli Jehova, 4 alimwi bausyi bacimvwa cikonke ncaakonka eelyo tiibamukasya, nkokuti zikonke zyakwe zyoonse zyeelede kuzuzikizyigwa. 5 Pele ikuti bausyi bamukasya ciindi nobazimvwa zikonke nzyaakonka, nkokuti zikonke eezyo tazyeelede kuzuzikizyigwa. Nokuba boobo Jehova ulamulekelela nkaambo bausyi bamukasya.+
6 “Pele ikuti naa wakwatwa kali wakakonka kale naa wakasyomezya cakubinda, 7 alimwi mulumaakwe wazimvwa zikonke nzyaakakonka eelyo tanaamukasya mubuzuba mbwaazimvwa, nkokuti zikonke zyakwe zyeelede kuzuzikizyigwa. 8 Pele ikuti mulumaakwe wamukasya mubuzuba mbwaazimvwa zikonke nzyaakakonka,+ nkokuti wazilobya zikonke eezyo alimwi Jehova ulamulekelela.
9 “Pele ikuti mukamufwu naa mukaintu iwakalekwa wakonka, zyoonse nzyaamba weelede kuzizuzikizya.
10 “Nokuba boobo, ikuti mukaintu wakonka kali muŋanda yamulumaakwe, 11 alimwi mulumaakwe wazimvwa zikonke nzyaakonka eelyo tanaamukasya, nkokuti zikonke zyakwe zyoonse zyeelede kuzuzikizyigwa. 12 Pele ikuti mulumaakwe wamukasya mubuzuba mbwaazimvwa, kufwumbwa zikonke nzyaakakonka, nkokuti zilaloba.+ Mulumaakwe wazilobya aboobo Jehova ulamulekelela. 13 Kufwumbwa zikonke nzyaakonka, noziba zyeezyo zijatikizya kuliimya, mulumaakwe ulakonzya kuzizuminizya naa kuzilobya. 14 Pele ikuti mulumaakwe waumuna buyo kwamazuba aali mbwaabede kuzwa buzuba mbwaakazimvwa zikonke zyakwe, nkokuti wazizuminizya. Wazizuminizya mukuti wakaumuna buyo buzuba mbwaakazimvwa. 15 Pele ikuti wazilobya kakwiindide ciindi cili mbocibede kuzwa naakazimvwa, nkokuti walo nguutiibe amulandu mubusena bwamukaintu wakwe.+
16 “Eeyi njemilawo Jehova njaakalailila Musa kujatikizya mulumi amukaintu wakwe alimwi ausyi amwanaakwe musimbi uucikkala muŋanda yakwe.”
31 Mpoonya Jehova wakaambila Musa kuti: 2 “Kobapilusizya+ cibi bana Midiyani+ akaambo kazintu nzyobakacitila bana Israyeli. Kumane ulafwa akuzikkwa mbubonya mbuli bantu bako.”+
3 Aboobo Musa wakaambila bantu kuti: “Amusale baalumi akati kanu kuti balibambile nkondo kutegwa balwane bana Midiyani, balete cisubulo ca Jehova kubana Midiyani. 4 Mweelede kutuma baalumi bali 1,000 kunkondo kuzwa kumusyobo umwi aumwi wamisyobo yoonse yabana Israyeli.” 5 Aboobo kuzwa kuzyuulu zyabana Israyeli+ kwakasalwa ibali 1,000 kumusyobo umwi aumwi, ibaalumi bali 12,000 balibambilide kuunka kunkondo.
6 Mpoonya Musa wakabatuma kunkondo ibali 1,000 kuzwa kumusyobo umwi aumwi, antoomwe a Finehasi+ imwana wa Eleazara mupaizi iwakajisi zibelesyo zisalala amyeembo+ yakuzyibya bantu. 7 Bakabalwana bana Midiyani mbubonya Jehova mbwaakalailila Musa alimwi bakajaya baalumi boonse. 8 Akati kabantu mbobakajaya kwakali bami bosanwe bana Midiyani, nkokuti Evi, Rekemu, Zuri, Huri a Reba. Alimwi bakajaya a Balamu+ imwana wa Beori apanga. 9 Pele bana Israyeli bakatola bamakaintu bana Midiyani abana babo mubuzike. Alimwi bakasaala banyama babo boonse bavwubwa alimwi ambono zyabo zyoonse. 10 Alimwi bakaumpa minzi yabo yoonse mobakali kukkala alimwi ankambi zyabo zyoonse izyakayakilidwe bwaanda. 11 Eelyo bakabweza zisaalo zyoonse, nkokuti bantu alimwi abanyama bavwubwa. 12 Mpoonya bakaleta baange azisaalo kunkambi, kuli Musa a Eleazara mupaizi akumbungano yoonse yabana Israyeli, kuzibanda zya Moabu,+ izili mumbali aa Jordano kufwaafwi a Jeriko.
13 Mpoonya Musa a Eleazara alimwi abasilutwe bambungano bakaunka kuyoobacinga anze aankambi. 14 Pele Musa wakakalalila basilutwe babasikalumamba, basilutwe bazyuulu abasilutwe bamyaanda ibakali kupiluka kuzwa kunkondo. 15 Aboobo Musa wakati kulimbabo: “Sena mwabalekela kupona bamakaintu boonse? 16 Aaba mbambabo bakabelesyegwa a Balamu ikoongelezya bana Israyeli kuti babisizye+ Jehova mumakani aaku Peori,+ cakuti lunyonyooko lwakasikila mbungano ya Jehova.+ 17 Lino amubajaye bana basankwa boonse alimwi amukaintu uuli woonse iwakoonana kale amusankwa. 18 Pele musiye buyo bana basimbi boonse ibatanoonede amusankwa.+ 19 Lino mweelede kukkala anze aankambi mazuba aali ciloba. Kufwumbwa wajaya muntu alimwi awaguma muntu uufwide+ weelede kulisalazya+ mubuzuba bwatatu abwaciloba, nywebo antoomwe abaange banu. 20 Alimwi mweelede kuzisalazya zisani zyanu zyoonse azibelesyo zyanu zyoonse zyacikutu, zyaboya bwampongo alimwi azyacisamu.”
21 Mpoonya Eleazara mupaizi wakaambila baalumi bakaunkide kunkondo kuti: “Ngooyu mulawo Jehova ngwaakapa Musa, 22 ‘Zintu zyangolida, nsiliva, mukuba, butale, mundalila amutofwe, 23 nkokuti zyoonse zikonzya kwiinzyigwa mumulilo, amuziinzye mumulilo, eelyo ziyoosalala. Pele alimwi zileelede kusalazyigwa amaanzi aakusalazya.+ Zintu zyoonse zitakonzyi kusalazyigwa amulilo zyeelede kusalazyigwa amaanzi. 24 Mweelede kuwasya zisani zyanu mubuzuba bwaciloba eelyo muyoosalala, mpoonya muyookonzya kunjila munkambi.’”+
25 Kumane Jehova wakaambila Musa kuti: 26 “Kobala zisaalo zyoonse, ibantu abanyama bavwubwa; uzibale a Eleazara mupaizi abasilutwe baziinga zyabamausyi mumbungano. 27 Mpoonya waapaule zisaalo muzibeela zyobilo akati kabaabo bakatola lubazu munkondo abantu boonse bali mumbungano.+ 28 Alimwi ugwisye mutelo wa Jehova kuzwa kubaalumi bakaunkide kunkondo, ubweze muntu omwe akati kabantu bali 500, ŋombe yomwe akati kaŋombe zili 500, mbongolo yomwe akati kambongolo zili 500 ambelele yomwe akati kambelele zili 500. 29 Weelede kubweza mutelo ooyu kuzwa kucibeela cabo akuupa kuli Eleazara mupaizi, cibe cakusanga ca Jehova.+ 30 Eelyo kucibeela cabana Israyeli ubweze muntu omwe akati kabantu bali 50, ŋombe yomwe akati kaŋombe zili 50, mbongolo yomwe akati kambongolo zili 50, mbelele yomwe akati kambelele zili 50 akumisyobo yoonse yabanyama bavwubwa, eelyo uzipe kuba Levi+ ibabeleka milimo yamutente lyakukombela lya Jehova.”+
31 Aboobo Musa a Eleazara mupaizi bakacita mbubonya Jehova mbwaakalailila Musa. 32 Zisaalo zyoonse nzyobakaleta bantu ibakaunkide kunkondo zyakali mbelele zili 675,000, 33 ŋombe zili 72,000 34 ambongolo zili 61,000. 35 Eelyo basimbi batakalinoonede amusankwa+ bakali 32,000. 36 Mucibeela cabaabo bakaunkide kunkondo kwakali mbelele zili 337,500. 37 Mutelo wa Jehova kuzwa kumbelele wakali mbelele zili 675. 38 Ŋombe zyakali 36,000, eelyo izyakapegwa kuli Jehova kazili mutelo zyakali 72. 39 Imbongolo zyakali 30,500, eelyo izyakapegwa kuli Jehova kazili mutelo zyakali 61. 40 Bantu bakali 16,000, eelyo ibakapegwa kuli Jehova kabali mutelo bakali 32. 41 Mpoonya Musa wakapa mutelo kauli cakusanga ca Jehova kuli Eleazara mupaizi,+ mbubonya Jehova mbwaakalailila Musa.
42 Kucibeela cabana Israyeli, eeco Musa ncaakaandaanya kuzwa kubaalumi ibakaunkide kunkondo, 43 kwakali mbelele zili 337,500, 44 ŋombe zili 36,000, 45 mbongolo zili 30,500, 46 alimwi abantu bali 16,000. 47 Mpoonya mucibeela cabana Israyeli Musa wakabweza muntu omwe akati kabantu bali 50, amunyama omwe akati kabanyama bavwubwa bali 50 akupa ba Levi,+ ibakali kubeleka milimo yamutente lyakukombela lya Jehova,+ mbubonya Jehova mbwaakalailila Musa.
48 Mpoonya basilutwe bazyuulu zyampi yabasikalumamba,+ nkokuti basilutwe bazyuulu abasilutwe bamyaanda, bakaboola kuli Musa, 49 akwaambila Musa kuti: “Tobabelesi bako twababala baalumi basikalumamba ibali mumaanza eesu alimwi kunyina naba omwe uutako akati kesu.+ 50 Aboobo twaleta zintu umwi aumwi nzyaajana kuti zibe cakusanga ca Jehova, zibelesyo zyangolida, ninga zyakumaulu, ninga zyakumaboko, nweenwe zyakusimbya, masikkiyo azyakulisakatizya zyabamakaintu, kuti tumanye milandu yesu kubusyu bwa Jehova.”
51 Aboobo Musa a Eleazara mupaizi bakazitambula zibelesyo zyangolida kuzwa kulimbabo, nkokuti zyakulisakatizya zyoonse. 52 Ingolida yoonse basilutwe bazyuulu abasilutwe bamyaanda njobakasanga kuli Jehova yakali masyekeli* aali 16,750. 53 Mwaalumi umwi aumwi iwakaunkide kunkondo wakabweza caabilo kuzwa kuzisaalo. 54 Aboobo Musa a Eleazara mupaizi bakaitambula ngolida yakazwa kuli basilutwe bazyuulu abasilutwe bamyaanda akwiileta mutente lyakuswaanganina kuti ibe ciibalusyo* kubana Israyeli kubusyu bwa Jehova.
32 Lino bana ba Rubeni+ abana ba Gadi+ bakaba abanyama bavwubwa banji kapati, eelyo bakabona kuti nyika ya Jazeri+ anyika ya Gileadi bwakali busena bubotu bwamacelelo. 2 Aboobo bana ba Gadi abana ba Rubeni bakaboola akwaambila Musa, Eleazara mupaizi alimwi abasilutwe bambungano kuti: 3 “Twabona kuti nyika ya Atarotu, Diboni, Jazeri, Nimira, Hesiboni,+ Eleale, Sebamu, Nebo+ alimwi a Benoni,+ 4 eeyo Jehova njaakazunda kubusyu bwambungano yabana Israyeli,+ ninyika mbotu kweembelela banyama bavwubwa, alimwi swebo tobabelesi bako tujisi banyama bavwubwa banji.”+ 5 Aboobo bakati: “Ikuti naa mwatufwida luzyalo, amutupe nyika eeyi tobabelesi banu kuti ibe lukono lwesu. Mutatupi kuti tuzabuke Jordano pe.”
6 Kumane Musa wakati kubana ba Gadi akubana ba Rubeni: “Sena ncibotu kuti banabokwanu baunke kunkondo nywebo kamukkede buyo okuno? 7 Nkaambo nzi ncomuyanda kutyompya bana Israyeli kuti batazabuki akunjila munyika eeyo Jehova njayakubapa? 8 Oobu mbombubo abalo bamauso mbobakacita nindakabatuma kuzwa ku Kadesi-barinea kuti bakabone nyika.+ 9 Nobakaunka ku Kkuti* lya Esikoli+ akwiibona nyika, bakatyompya bana Israyeli kuti batanjili munyika eeyo Jehova njaakali kuyoobapa.+ 10 Mpoonya buzuba oobo ibukali bwa Jehova bwakabuka, mane wakakonka kuti:+ 11 ‘Bantu ibakazwa mucisi ca Egepita ibali amyaka iili 20 kuya kumbele tabakaiboni nyika+ eeyo njindakakonkezya kuli Abrahamu, Izaka a Jakobo,+ nkaambo tiibanditobela amoyo woonse– 12 pele buyo Kalebe+ imwana wa Jefune muna Kenizi a Joshua+ imwana wa Nuni, nkaambo batobela Jehova amoyo woonse.’+ 13 Aboobo bukali bwa Jehova bwakabukila bana Israyeli, eelyo wakabapa kuti baingaile munkanda myaka iili 40,+ mane kusikila zyalani eelyo ilyakali kucita bubi kubusyu bwa Jehova nilyakamaninina.+ 14 Lino nywebo nobasizibi mwatalika kucita mbubonya mbobakacita bamauso, kuti mwiindizye bukali bupati bwa Jehova kubana Israyeli. 15 Ikuti muleke kumutobela, masimpe ulabaleka kuti kabacikkede munkanda, eelyo mulapa kuti bantu aaba boonse banyonyooke.”
16 Nokwakainda ciindi bakaunka kulinguwe akumwaambila kuti: “Amutuleke tuyake zimpati zyamabwe zyabanyama besu bavwubwa alimwi aminzi yabana besu. 17 Pele swebo tulazumanana katulibambilide kuunka kunkondo+ alimwi tulaunka kumbele lyabana Israyeli kusikila tukabanjizye mubusena bwabo, lino bana besu balasyaala muminzi iikwabilidwe, kabakwabilidwe kubantu bamunyika eeyi. 18 Tatukapiluki kumaanda eesu kusikila umwi aumwi wabana Israyeli akajane nyika yalukono lwakwe.+ 19 Swebo tatukapegwi lukono antoomwe ambabo kutala lya Jordano, nkaambo twapegwa lukono lwesu kujwe aa Jordano.”+
20 Musa wakabaingula kuti: “Ikuti naa mwazumina kucita oobo: Amulibambile kuunka kunkondo+ kubusyu bwa Jehova; 21 alimwi ikuti naa umwi aumwi wanu alibambile kuunka kunkondo akuzabuka Jordano kubusyu bwa Jehova natanda basinkondonyina kuzwa kubusyu bwakwe+ 22 kusikila nyika ikazundwe kubusyu bwa Jehova,+ kumane muyoopiluka+ kamutajisi mulandu kuli Jehova akubana Israyeli. Mpoonya nyika eeyi iyooba lukono lwanu kubusyu bwa Jehova.+ 23 Pele ikuti mutaciti oobo, mulabisizya Jehova. Ikuti caba boobo, amuzyibe kuti cibi canu ciyoomutobela. 24 Aboobo mulakonzya kuyakila bana banu minzi akuyakila banyama banu zimpati,+ pele mweelede kucita mbubonya mbomwasyomezya.”
25 Bana ba Gadi abana ba Rubeni bakaambila Musa kuti: “Tobabelesi bako tulacita mbubonya mwami wesu mbwaalailila. 26 Bana besu, bamakaintu besu abanyama besu boonse balasyaala kuno muminzi ya Gileadi,+ 27 pele swebo tobabelesi bako tulazabuka kubusyu bwa Jehova+ akuunka kunkondo, umwi aumwi kalibambilide, mbubonya mwami mbwaamba.”
28 Aboobo Musa wakapa malailile aajatikizya mbabo kuli Eleazara mupaizi, kuli Joshua imwana wa Nuni alimwi akuli basilutwe baziinga zyabamausyi zyamisyobo ya Israyeli. 29 Aboobo Musa wakati kulimbabo: “Ikuti bana ba Gadi abana ba Rubeni bakazabuke Jordano antoomwe andinywe, umwi aumwi kalibambilide kuunka kunkondo kubusyu bwa Jehova, akuti nyika mukaizunde, nkokuti muyoobapa nyika ya Gileadi kuti ikabe lukono lwabo.+ 30 Pele ikuti bakake kulibambila kuunka kunkondo akuzabuka antoomwe andinywe, nkokuti beelede kuyookkala akati kanu munyika ya Kanana.”
31 Bamvwe boobo ibana ba Gadi abana ba Rubeni bakaingula kuti: “Tulacita ncaatwaambila Jehova tobabelesi banu. 32 Tulalibambila kuunka kunkondo akuzabuka kubusyu bwa Jehova kunyika ya Kanana,+ pele lukono lwesu luyooba kutala lino lya Jordano.” 33 Aboobo Musa wakabapa–bana ba Gadi, bana ba Rubeni+ acisela camusyobo wa Manase+ mwana wa Josefa–bwami bwa Sihoni+ mwami wabana Amori abwami bwa Ogi+ mwami wa Basani, inyika aminzi yoonse iili muzilawo eezyo aminzi iili munyika yeengelede.
34 Kumane bana ba Gadi bakayaka* minzi ya Diboni,+ Atarotu,+ Aroeri,+ 35 Atarotu-sofani, Jazeri,+ Jogibeha,+ 36 Beti-nimira+ alimwi a Beti-harani,+ iminzi iikwabilidwe, alimwi bakayaka zimpati zyamabwe zyabanyama bavwubwa. 37 Eelyo bana ba Rubeni bakaiyakulula minzi ya Hesiboni,+ Eleale,+ Kiriyataimu,+ 38 Nebo,+ Baala-meoni,+ mazina aayo akacincwa–alimwi a Sibima; alimwi minzi eeyi njobakayakulula bakayuulika mazina aambi.
39 Bana ba Makiri+ mwana wa Manase bakeenda kuya ku Gileadi akuuzunda munzi ooyu alimwi akubatanda bana Amori ibakali kukkala mumo. 40 Aboobo Musa wakapa munzi wa Gileadi kubana Makiri bana ba Manase, eelyo wakakkala mulinguwo.+ 41 Jairi mwana wa Manase wakeenda akuunka kuyoozunda tunzi twabo akutuulika kuti Havoti-jairi.*+ 42 Alimwi Noba wakaunka kuyoozunda Kenati aminzi misyoonto* yanguwo, eelyo wakawuulika kuti Noba, izina lyakwe.
33 Mboobu mbobakeenda bana Israyeli munyendo zyabo nobakazwa mucisi ca Egepita+ munkamu zyabo+ kabasololelwa a Musa a Aroni.+ 2 Musa wakali kwaalemba masena oonse mobakali kukkala-kkala mulweendo lwabo kwiinda mukulaililwa a Jehova, nzyeezyi nyendo zyabo nzyobakeenda kuzwa kubusena bumwi abumwi:+ 3 Bakazwa ku Ramese+ mubuzuba bwa 15 mumwezi wakusaanguna.+ Mubuzuba bwakatobela Pobwe Lyakwiindilila,+ bana Israyeli bakazwa mu Egepita cabusicamba mumeso aabana Egepita boonse. 4 Aciindi eeco bana Egepita bakali kuzikka bana bataanzi boonse aabo Jehova mbaakajaya akati kabo,+ alimwi Jehova wakababeteka baleza babo.+
5 Aboobo bana Israyeli bakazwa ku Ramese akuyookkala ku Sukoti.+ 6 Mpoonya bakazwa ku Sukoti akuyookkala ku Etamu,+ imunzi uuli kumunyinza wankanda. 7 Kumane bakazwa ku Etamu akupiluka kutozya ku Pihahiroti, kumbele lya Baala-zefoni,+ alimwi bakakkala afwaafwi a Migidoli.+ 8 Kuzwa waawo bakazwa ku Pihahiroti akwiinda akati kalwizi+ kuya kunkanda+ alimwi bakazumanana kweenda musinzo wamazuba otatwe munkanda ya Etamu+ akuyookkala ku Mara.+
9 Kumane bakazwa ku Mara akuboola ku Elimu. Lino ku Elimu kwakali tusensa twamaanzi tuli 12 azisamu zyamakunka zili 70, aboobo bakakkala ooko.+ 10 Mpoonya bakazwa ku Elimu akuyookkala kumbali aa Lwizi Lusalala. 11 Kuzwa waawo bakazwa ku Lwizi Lusalala akuyookkala munkanda ya Sini.+ 12 Alimwi bakazwa munkanda ya Sini akuyookkala ku Dofeka. 13 Kumane bakazwa ku Dofeka akuyookkala ku Alusi. 14 Mpoonya bakazwa ku Alusi akuyookkala ku Refidimu,+ ooko kwakanyina maanzi aakuti bantu banywe. 15 Kuzwa waawo bakazwa ku Refidimu akuyookkala munkanda ya Sinai.+
16 Bamane bakazwa munkanda ya Sinai akuyookkala ku Kibiroti-hatava.+ 17 Mpoonya bakazwa ku Kibiroti-hatava akuyookkala ku Hazeroti.+ 18 Kuzwa waawo bakazwa ku Hazeroti akuyookkala ku Ritima. 19 Kumane bakazwa ku Ritima akuyookkala ku Rimoni-perezi. 20 Mpoonya bakazwa ku Rimoni-perezi akuyookkala ku Libina. 21 Kumane bakazwa ku Libina akuyookkala ku Risa. 22 Kuzwa waawo bakazwa ku Risa akuyookkala ku Kehelata. 23 Mpoonya bakazwa ku Kehelata akuyookkala ku Cilundu ca Seferi.
24 Kuzwa waawo bakazwa ku Cilundu ca Seferi akuyookkala ku Harada. 25 Mpoonya bakazwa ku Harada akuyookkala ku Makeloti. 26 Kumane bakazwa+ ku Makeloti akuyookkala ku Tahati. 27 Kuzwa waawo bakazwa ku Tahati akuyookkala ku Tera. 28 Mpoonya bakazwa ku Tera akuyookkala ku Mitika. 29 Kumane bakazwa ku Mitika akuyookkala ku Hasimona. 30 Kuzwa waawo bakazwa ku Hasimona akuyookkala ku Maseroti. 31 Mpoonya bakazwa ku Maseroti akuyookkala ku Bene-jakani.+ 32 Kumane bakazwa ku Bene-jakani akuyookkala ku Hori-hagidigadi. 33 Kuzwa waawo bakazwa ku Hori-hagidigadi akuyookkala ku Jotibata.+ 34 Mpoonya bakazwa ku Jotibata akuyookkala ku Ebirona. 35 Kumane bakazwa ku Ebirona akuyookkala ku Ezioni-geberi.+ 36 Kuzwa waawo bakazwa ku Ezioni-geberi akuyookkala munkanda ya Zini,+ nkokuti ku Kadesi.
37 Mpoonya bakazwa ku Kadesi akuyookkala ku Cilundu ca Hori,+ kumunyinza wacisi ca Edomu. 38 Kumane Aroni mupaizi wakatanta mu Cilundu ca Hori kwiinda mukulaililwa a Jehova, eelyo wakafwa mumonya oomo, mubuzuba bwakusaanguna bwamwezi+ wasanu mumwaka wa 40 kuzwa ciindi bana Israyeli nobakazwa kucisi ca Egepita. 39 Aroni wakalaamyaka iili 123 ciindi naakafwa mu Cilundu ca Hori.
40 Lino mwami wa Aradi+ imuna Kanana iwakali kukkala mu Negebi munyika ya Kanana, wakaamvwa makani aakuboola kwabana Israyeli.
41 Mukuya kwaciindi bakazwa ku Cilundu ca Hori+ akuyookkala ku Zalimona. 42 Kuzwa waawo bakazwa ku Zalimona akuyookkala ku Punoni. 43 Kumane bakazwa ku Punoni akuyookkala ku Oboti.+ 44 Mpoonya bakazwa ku Oboti akuyookkala ku Iye-barimu* kumunyinza wa Moabu.+ 45 Kuzwa waawo bakazwa ku Iyimu akuyookkala ku Diboni-gadi.+ 46 Kumane bakazwa ku Diboni-gadi akuyookkala ku Alimoni-dibilataimu. 47 Mpoonya bakazwa ku Alimoni-dibilataimu akuyookkala mumalundu aa Abarimu+ kumbele lya Nebo.+ 48 Kumane bakazwa kumalundu aa Abarimu akuyookkala muzibanda zya Moabu mumbali lya Jordano kufwaafwi a Jeriko.+ 49 Eelyo bakazumanana kukkala mumbali lya Jordano kuzwa ku Beti-jesimoti kusikila ku Abeli-sitimu,+ muzibanda zya Moabu.
50 Mpoonya Jehova wakaambila Musa muzibanda zya Moabu, mumbali lya Jordano kufwaafwi a Jeriko kuti: 51 “Kobaambila bana Israyeli kuti, ‘Mulazabuka Jordano akunjila munyika ya Kanana.+ 52 Mweelede kubatanda bantu boonse bakkala munyika eeyi kuzwa kubusyu bwanu akunyonyoona zikozyanyo zyabo zyamabwe+ azyalubulo+ alimwi akunyonyoona masena aabo aakukombela aamumalundu.+ 53 Mweelede kwiibweza nyika eeyo akukkala mulinjiyo, nkaambo ncobeni ndiyakwiipa kulindinywe kuti ibe lukono lwanu.+ 54 Mweelede kwaabana nyika mumikwasyi yanu kuti ibe lukono lwanu kwiinda mukuuma cisolo.+ Kunkamu iijisi bantu banji mweelede kuyungizya lukono, eelyo kunkamu iijisi bantu basyoonto mweelede kucesya lukono.+ Busena bwaumwi aumwi oobo ikwawida cisolo, buyooba lukono lwakwe. Muyootambula nyika kuti ibe lukono lwanu kweelana amisyobo alimwi amikwasyi yabamauso.+
55 “‘Pele ikuti naa mutabatandi bantu bakkala munyika eeyo kuzwa kubusyu bwanu,+ nkokuti aabo mbomutisiye bayoomubeda mbuli zintu zitowa mumeso ambuli mamvwa mumabazu aanu, alimwi bayoomupenzya munyika eeyo momuyookkala.+ 56 Mpoonya ncondakali kuyanda kucita kulimbabo, ndiyoocicita kulindinywe.’”+
34 Jehova wakaambila Musa kuti: 2 “Kobalailila bana Israyeli kuti: ‘Mwaakunjila munyika ya Kanana,+ eeyi njenyika iiyoba lukono lwanu, nkokuti nyika ya Kanana kweelana aminyinza yayo.+
3 “Munyinza wanu wakumusanza uuyootalikila kunkanda ya Zini kumbali aa Edomu, eelyo munyinza wanu wakumusanza kulubazu lwakujwe uyootalikila kumagolelo aa Lwizi lwa Munyo.*+ 4 Munyinza wanu uyoonyona akwiinda kumusanza, kumatantilo aa Akrabimu+ akuzumanana kuyoosika ku Zini, eelyo magolelo anooli kumusanza wa Kadesi-barinea.+ Mpoonya uyoosika ku Hazara-adari+ akuzumanana kuya ku Azimoni. 5 Munyinza ooyo uyoonyona ku Azimoni kutozya ku Kalonga* ka Egepita, alimwi magolelo aamunyinza ayoobeda ku Lwizi.*+
6 “‘Munyinza wanu wakumbo uyooba Lwizi Lupati* alimwi ankomwe yanguwo. Ooyu nguuyooba munyinza wanu wakumbo.+
7 “‘Lino ooyu nguuyooba munyinza wanu wakunyika: Muyoobikka munyinza wanu kutalikila ku Lwizi Lupati kusikila ku Cilundu ca Hori.+ 8 Kuzwa ku Cilundu ca Hori muyoobikka munyinza kusikila mu Lebo-hamati,*+ eelyo uyoogolela ku Zedadi.+ 9 Alimwi munyinza uyoosika ku Zifroni, eelyo uyoogolela ku Hazari-enani.+ Ooyu nguuyooba munyinza wanu wakunyika.
10 “‘Mpoonya mweelede kubikka munyinza kujwe kuzwa ku Hazari-enani kusikila ku Sefamu. 11 Munyinza uyoozwa ku Sefamu kuya ku Ribila kujwe lya Ayini, alimwi munyinza ooyu uyooselemuka akukosola mungenyu wa Lwizi lwa Kinereti*+ uuli kujwe. 12 Munyinza ooyu uyoosika ku Jordano, eelyo uyoogolela ku Lwizi lwa Munyo.+ Eeyi iyooba nyika yanu+ aminyinza iizingulukide.’”
13 Aboobo Musa wakalailila bana Israyeli kuti: “Eeyi njenyika njomweelede kwaabana kwiinda mukuuma cisolo+ kuti ibe lukono lwanu, mbubonya Jehova mbwaalailila kuti ipegwe kumisyobo iili fwuka acisela.* 14 Nkaambo musyobo wabana Rubeni muziinga zyabamausyi amusyobo wabana Gadi muziinga zyabamausyi alimwi acisela camusyobo wa Manase bakabweza kale lukono lwabo.+ 15 Misyobo yobilo acisela yabweza kale lukono lwabo kutala lya Jordano afwaafwi a Jeriko kulubazu lwakujwe, nkolipaswida zuba.”+
16 Mpoonya Jehova wakaambila Musa kuti: 17 “Aaya ngamazina aabaalumi ibayakwaapaula nyika kuti ibe lukono lwanu: Eleazara+ mupaizi a Joshua+ mwana wa Nuni. 18 Muyoobweza silutwe omwe kumusyobo umwi aumwi kutegwa agwasyilizye mukwaapaula nyika.+ 19 Aaya ngamazina aabaalumi beelede kugwasyilizya: Kalebe+ mwana wa Jefune kuzwa kumusyobo wa Juda;+ 20 Semuele mwana wa Amihudi kuzwa kumusyobo wa Simeoni;+ 21 Elidadi mwana wa Kisiloni kuzwa kumusyobo wa Benjamini;+ 22 silutwe Buki mwana wa Jogili kuzwa kumusyobo wa Dani;+ 23 silutwe Hanieli mwana wa Efodi kuzwa kumusyobo wa Manase+ imwana wa Josefa;+ 24 silutwe Kemueli mwana wa Sifitani kuzwa kumusyobo wa Efraimu;+ 25 silutwe Elizafana mwana wa Parinaki kuzwa kumusyobo wa Zebuloni;+ 26 silutwe Palitieli mwana wa Azani kuzwa kumusyobo wa Isakara;+ 27 silutwe Ahihudi mwana wa Selomi kuzwa kumusyobo wa Aseri;+ 28 alimwi asilutwe Pedaheli mwana wa Amihudi kuzwa kumusyobo wa Nafutali.”+ 29 Aaba mbambabo Jehova mbaakalailila kwaapawida bana Israyeli nyika ya Kanana.+
35 Lino Jehova wakaambila Musa muzibanda zya Moabu izili kufwaafwi a Jordano+ ku Jeriko kuti: 2 “Kobalailila bana Israyeli kuti beelede kupa ba Levi minzi yakukkala kuzwa kulukono lwabo+ alimwi beelede kubapa macelelo ayengelede minzi eeyo.+ 3 Minzi eeyi yeelede kuba yabo kuti kabakkala alimwi macelelo ayooba aabanyama babo bavwubwa azintu zyabo alimwi abanyama bamwi boonse. 4 Macelelo aaminzi ngomuyoopa ba Levi, ayooba tukokola* tuli 1,000 kuzwa kubwaanda bwamunzi kuzinguluka munzi woonse. 5 Mweelede kupima kunze aamunzi tukokola tuli 2,000 kulubazu lwakujwe, tuli 2,000 kulubazu lwakumusanza, tuli 2,000 kulubazu lwakumbo atuli 2,000 kulubazu lwakunyika, pele munzi kauli akati. Aaya ngaayooba macelelo aaminzi yabo.
6 “Minzi njomuyoopa bana Levi iyooba minzi yamayubilo iili cisambomwe,+ ooko sikujaya muntu nkwakonzya kutijila,+ alimwi aminzi imwi iili 42. 7 Mweelede kupa ba Levi minzi iili 48 antoomwe amacelelo aayo.+ 8 Minzi njomuyoobapa iyoozwa akati kalukono lwabana Israyeli.+ Kunkamu mpati muyoobweza minji, eelyo kunkamu nsyoonto muyoobweza misyoonto.+ Nkamu imwi aimwi iyoopa ba Levi minzi iimwi kweelana alukono ndobayoopegwa.”
9 Eelyo Jehova wakaambila Musa kuti: 10 “Kobaambila bana Israyeli kuti, ‘Mulazabuka Jordano akunjila munyika ya Kanana.+ 11 Mweelede kusala minzi yeelela kuti ibe minzi yamayubilo, ooko sikujaya nkwakonzya kutijila ikuti wajaya muntu cakutazyiba.+ 12 Minzi eeyi iyooba minzi yanu yamayubilo kuzwa kuli sikupilusizya mulandu wabulowa,+ kutegwa sikujaya muntu atajaigwi kusikila akabetekwe kumbele lyambungano.+ 13 Minzi yamayubilo eeyo njomuyoopa iili cisambomwe, njeminzi nkomunootijila. 14 Muyoobikka minzi yotatwe mutala eeli lya Jordano,+ aminzi iimbi yotatwe munyika ya Kanana+ kuti ikabe minzi yamayubilo. 15 Minzi eeyi iili cisambomwe iyooba yamayubilo kubana Israyeli, kumweenzu+ akumuntu uukkala akati kabo, kutegwa muntu wajaya muntu cakutazyiba kakonzya kutijila nkuko.+
16 “Pele ikuti naa wakamujaya kwiinda mukubelesya cibulo, nkokuti mujayi. Mujayi ooyo awalo weelede kujaigwa.+ 17 Ikuti naa wakamupwaya bbwe ilikonzya kumujaya, eelyo wafwa, nkokuti mujayi. Mujayi ooyo awalo weelede kujaigwa. 18 Ikuti naa wakamupwaya cibelesyo cacisamu icikonzya kumujaya, eelyo wafwa, nkokuti mujayi. Mujayi ooyo awalo weelede kujaigwa.
19 “‘Sikupilusya mulandu wabulowa* nguweelede kujaya mujayi ooyo. Ikuti naa wamujana, ngonguwe weelede kumujaya. 20 Ikuti naa wakamujaya kwiinda mukumutonka akaambo kakumusulaika naa kwiinda mukumufwusa cintu cimwi cakumuyubilila,+ 21 naa akaambo kakuba sinkondonyina wakamuuma ajanza lyakwe akumujaya, ooyo sikumuuma uyoojaigwa. Muntu ooyo mujayi. Sikupilusya mulandu wabulowa uyoomujaya aakumujana.
22 “‘Pele kuti naa wakacita oobo cakutazyiba alimwi kakutali kuti wakamutonka buya naa kumufwusa cintu cili coonse akaambo kakumusulaika,+ 23 naa tanaakamubwene alimwi tanaakamufwusa bbwe acaali alimwi tanaakali sinkondonyina naa tanaakamukanzide, pele wamujaya, 24 imbungano yeelede kubeteka akati kamuntu ooyo alimwi asikupilusya mulandu wabulowa kwiinda mukutobela malailile aaya.+ 25 Mpoonya mbungano yeelede kumuvwuna sikujaya muntu ooyo kuzwa mumaanza aasikupilusya mulandu wabulowa akumupilusya kumunzi wamayubilo nkwaakatijila, eelyo weelede kukkala ooko kusikila mupaizi mupati iwakananikwa amafwuta aasalala akafwe.+
26 “‘Pele ikuti naa sikujaya muntu ooyo wazwa anze aamunyinza wamunzi wakwe wamayubilo ooko nkwaakatijila, 27 eelyo sikupilusya mulandu wabulowa wamujana anze aamunyinza wamunzi wakwe wamayubilo akumujaya, sikupilusya mulandu wabulowa ooyo tajisi mulandu wabulowa pe. 28 Nkaambo weelede kukkala mumunzi wakwe wamayubilo kusikila akafwe mupaizi mupati. Pele afwa mupaizi mupati, sikujaya muntu ooyo ulakonzya kupiluka kunyika yalukono lwakwe.+ 29 Eeyi njemilawo njomweelede kutobela mukubeteka kwanu mumazyalani aanu oonse mumasena oonse momukkala.
30 “‘Kufwumbwa muntu uujaya mweenzinyina weelede kujaigwa+ ikuti kakuli bakamboni;+ pele kunyina weelede kujaigwa kuti kakuli kamboni omwe buyo. 31 Tamweelede kubweza cinunuzyo cakununuzya mujayi iweelela lufwu, nkaambo weelede kujaigwa.+ 32 Alimwi tamweelede kubweza cinunuzyo cakununuzya muntu wakatijila kumunzi wakwe wamayubilo, kuti apiluke kunyika yakwe mupaizi mupati katanafwa.
33 “‘Tamweelede kusofwaazya nyika momukkede, nkaambo bulowa mbobusofwaazya nyika,+ alimwi kunyina cikonzya kumana mulandu wabulowa bwakatilwa anyika, ccita buyo bulowa bwayooyo wakatila bulowa alinjiyo.+ 34 Tamweelede kusofwaazya nyika momukkala, oomo andime mondikkede; nkaambo mebo nde Jehova ndikkede akati kabana Israyeli.’”+
36 Lino basilutwe bamikwasyi yabana ba Gileadi imwana wa Makiri+ mwana wa Manase iwamikwasyi yabana ba Josefa bakaboola akwaambila Musa abasilutwe bana Israyeli, nkokuti basilutwe bamikwasyi yabana Israyeli. 2 Bakati: “Jehova wakakulailila simaleleesu kuti waabanye nyika kubana Israyeli kuti ibe lukono lwabo kwiinda mukuuma cisolo;+ alimwi yebo simaleleesu wakalaililwa a Jehova kuti upe lukono lwamwanookwesu Zelofehadi kubana bakwe basimbi.+ 3 Ikuti naa bakwatwa kubaalumi ibazwa kumisyobo iimbi yabana Israyeli, lukono lwabamakaintu aaba luyoogwisyigwa kulukono lwabamatata akuyungizyigwa kulukono lwamisyobo yakooko nkobakwatwa, aboobo luyoogwisyigwa kulukono lwesu ndotwakapegwa kwiinda mukuuma cisolo. 4 Lino wasika Mwaka Walwaanguluko+ kubana Israyeli, lukono lwabamakaintu aaba luyooyungizyigwa kulukono lwamisyobo ooko nkobakwetwe, aboobo lukono lwabo luyoogwisyigwa kulukono lwamusyobo wabamatata.”
5 Mpoonya kwiinda mukulaililwa a Jehova, Musa wakaambila bana Israyeli kuti: “Musyobo wabana ba Josefa waamba kabotu. 6 Mboobu Jehova mbwaalailila kujatikizya bana basimbi ba Zelofehadi: ‘Balakonzya kukwatwa kumuntu kufwumbwa ngobayanda. Pele beelede kukwatwa buyo kumuntu uuzwa kumukwasyi wamusyobo wabausyi. 7 Taakwe lukono lwabana Israyeli ilweelede kuzwa kumusyobo umwi akuya kuluumbi, nkaambo bana Israyeli beelede kukakatila umwi aumwi kulukono lwamusyobo wabamausyi. 8 Alimwi mwana musimbi uuli woonse uujisi lukono akati kamisyobo yabana Israyeli weelede kukwatwa kumuntu uuzwa kumusyobo wabausyi,+ kutegwa bana Israyeli bakakatile kulukono lwabamausyi. 9 Kunyina lukono lweelede kuzwa kumusyobo umwi akuya kuluumbi, nkaambo misyobo yabana Israyeli yeelede kukakatila umwi aumwi kulukono lwabo.’”
10 Bana basimbi ba Zelofehadi bakacita mbubonya Jehova mbwaakalailila Musa.+ 11 Aboobo bana basimbi ba Zelofehadi+ nkokuti, Mala, Tiriza, Hogila, Milika a Nowa bakakwatwa kubana babanabokwabo abausyi. 12 Bakakwatwa kubaalumi bazwa kumikwasyi ya Manase imwana wa Josefa kutegwa lukono lwabo luzumanane kumusyobo wamukwasyi wabausyi.
13 Eeyi njemilawo ambeta Jehova njaakapa bana Israyeli kwiinda muli Musa muzibanda zya Moabu izili kufwaafwi a Jordano ku Jeriko.+
Mu Chihebrayo, “kufwumbwa mweenzu,” nkokuti, muntu uutali mu Levi.
Naa “milimo yabulindizi; wakubeleka milimo yabo.”
Naa “acitondezyo icitondezya.”
Mu Chihebrayo, “ngaaya mazyalani.”
Mu Chihebrayo, “kufwumbwa mweenzu,” nkokuti, muntu uutali wamumukwasyi wa Aroni.
Mu Chihebrayo, “Kufwumbwa mweenzu,” nkokuti, muntu uutali mu Levi.
Syekeli lyomwe lyakali kulema magilamu aali 11.4. Amubone Makani Aayungizyidwe B14.
Gera lyomwe lyakali kulema magilamu aali 0.57. Amubone Makani Aayungizyidwe B14.
Naa “mulota wamafwuta,” nkokuti, mulota uusangene amafwuta aazipaizyo.
Mu Chihebrayo, “Ooyu ngomukuli.”
Cipaanzi cakkumi caefa cakaleelene amalita aali 2.2. Amubone Makani Aayungizyidwe B14.
Kuboneka kuti eeci caamba cinswe.
Naa “cibole.” Ambweni eeci caamba kuleka kuzyala.
Kuboneka kuti eeci caamba cinswe.
Naa “cibole.” Ambweni eeci caamba kuleka kuzyala.
Naa “Akube boobo! Akube boobo!”
Kuboneka kuti eeci caamba cinswe.
Naa “ciyoobola.” Ambweni eeci caamba kuleka kuzyala.
Mu Chihebrayo, na·zirʹ, nkokwaamba kuti “Uusalidwe; Waabidwe; Waandanizyidwe.”
Naa “wasofwaazya mutwe wabu Naziri bwakwe.”
Bamwi baamba kuti “cinzuma.”
Naa “mutwe wabu Naziri bwakwe.”
Syekeli lyomwe lyakali kulema magilamu aali 11.4. Amubone Makani Aayungizyidwe B14.
Mu Chihebrayo, “kuyumba,” nkokuti, kumbele amusyule.
Mu Chihebrayo, “akubayumba,” nkokuti, kumbele amusyule.
Mu Chihebrayo, “akubayumba,” nkokuti, kumbele amusyule.
Mu Chihebrayo, “wakabayumba,” nkokuti, kumbele amusyule.
Nkokuti, Jetero.
Naa “meso eesu.”
Nkokwaamba kuti “Kuyaka,” nkokuti, kuvwilima.
Kuboneka kuti aaba mbantu ibatakali bana Israyeli.
Naa “sikulela musankwa.”
Kakokola komwe kakaleelene amasentimita aali 44.5. Amubone Makani Aayungizyidwe B14.
Homeri lyakaleelene amalita aali 220. Amubone Makani Aayungizyidwe B14.
Nkokwaamba kuti “Masena Aakuzikkila Basikulombozya Kubyaabi.”
Naa “Jehoshua,” nkokwaamba kuti “Jehova Ndufwutuko.”
Mu Chihebrayo, “ilaamafwuta.”
Mu Chihebrayo, “tiikwe mafwuta.”
Naa “kumanjililo aa Hamati.”
Naa “Kalonga.”
Naa “Kalonga.”
Nkokwaamba kuti “Cikama Camisaansa.”
Mu Chihebrayo, “bali mbuli cinkwa kulindiswe.”
Mu Chihebrayo, “mbuli muntu omwe.”
Naa “mucibanda.”
Mu Chihebrayo, “njindakatambikila janza lyangu.”
Mu Chihebrayo, “kakuvwuula.”
Naa “kuba basinkondoma.”
Cipaanzi cakkumi caefa cakaleelene amalita aali 2.2. Amubone Makani Aayungizyidwe B14.
Nsazi yomwe yakaleelene amalita aali 3.67. Amubone Makani Aayungizyidwe B14.
Ambweni caamba kuti Musa wakali kuyanda kubaunina kutegwa bamutobele.
Naa “tiindaliyandila pe.”
Naa “Cikkalilo Cabafwu.” Amubone Bupanduluzi Bwamabala.
Naa “Cikkalilo Cabafwu.” Amubone Bupanduluzi Bwamabala.
Mu Chihebrayo, “mweenzu.”
Mu Chihebrayo, “mweenzu,” nkokuti, muntu uutali wamumukwasyi wa Aroni.
Mu Chihebrayo, “mweenzu,” nkokuti, muntu uutali wamumukwasyi wa Aroni.
Syekeli lyomwe lyakali kulema magilamu aali 11.4. Amubone Makani Aayungizyidwe B14.
Gera lyomwe lyakali kulema magilamu aali 0.57. Amubone Makani Aayungizyidwe B14.
Nkokuti, cizuminano citamani alimwi citacinci.
Nkokwaamba kuti “Kubwesyanya.”
Mu Chihebrayo, “mazuba manji.”
Mu Chihebrayo, “ajanza.”
Nkokwaamba kuti “Kunyonyoonwa.”
Naa “Kalonga.”
Mu Chihebrayo, “akumulomo.”
Naa ambweni, “cimpayuma; nkanda.”
Naa “yeengelede.”
Naa “yeengelede.”
Kuboneka kuti, Mulonga wa Firate.
Mu Chihebrayo, “ambongolo nzyazi.”
Naa “iwuusa.”
Naa ambweni, “cimpayuma; nkanda.”
Naa “lunyungu lwakwe.”
Mu Chihebrayo, “kuzwa mumoyo wangu tandikonzyi.”
Naa “mpobe zyamutwe wa Moabu.”
Naa “kuliswaanganya kuli.”
Mu Chihebrayo, “kalibala.”
Naa “ibakaliswaanganya kuli.”
Cipaanzi cakkumi caefa cakaleelene amalita aali 2.2. Amubone Makani Aayungizyidwe B14.
Nsazi yomwe yakaleelene amalita aali 3.67. Amubone Makani Aayungizyidwe B14.
Mu Chihebrayo, “cinkwa.”
Syekeli lyomwe lyakali kulema magilamu aali 11.4. Amubone Makani Aayungizyidwe B14.
Naa “ciyeekezyo.”
Naa “Kalonga.”
Naa “bakayakulula.”
Nkokwaamba kuti “Minzi ya Matente Yaku Jairi.”
Naa “yeengelede.”
Izina lyakuti “Iye-barimu” lilembedwe kuti “Iyimu” mubufwaafwi mukapango 45.
Nkokuti, Lwizi Lutajisi Buumi.
Naa “Kkuti.”
Nkokuti, Lwizi Lupati, Lwizi lwa Mediterranean.
Nkokuti, Lwizi lwa Mediterranean.
Naa “kumanjililo aa Hamati.”
Nkokuti, lwizi lwa Genesarete, naa Lwizi lwa Galilaya.
Eeci ncisela camusyobo wa Manase.
Kakokola komwe kakaleelene amasentimita aali 44.5. Amubone Makani Aayungizyidwe B14.
Mu Chihebrayo, “Simukowa wayooyo wajaigwa.”