Ikulibambila Twaambo Tupati-Pati

NOBAPEGWA makani aakukanana, ibanji balapenga ikulemba twaambo toonse ntobayookanana kuzwa kumatalikilo mane do kumamanino aamakani. Kabatanamanizya kulibambila, inga kabalembede kale mapepa manji kapati. Ikulibambila ooko kulakonzya kutola mawoola aali mbwaabede.

Sena oobo mbomulibambila makani aanu? Sena mulayanda ikwiiya nzila nguba-uba mbokulibambilwa makani? Ikuti mwazyiba mbokulibambilwa makani kwiinda mukubelesya twaambo tupati-pati, tamunoopengi ikwaalemba buya makani oonse. Eeci ciyoomugwasya kuba aciindi cinji cakwiinduluka-induluka kwaakanana makani. Ciyoomuubila-ubila ikukanana munzila iikondelezya kuswiilila alimwi anooli makani aakulwaizya kapati kubantu bamuswiilila.

Inzya, kumakani aabuleya aakananwa mumbungano, kulapegwa pepa lyatwaambo tupati-pati libambilidwe limwi. Nokuba boobo, tabusyi mbwaabede oobo makani ambi. Mulakonzya kupegwa buyo kaambo kayandika naa mutwe wamakani. Ambweni mulakonzya kwaambilwa kuyookanana makani aali mucibalo cigaminide cisimbidwe. Zimwi ziindi mulakonzya kupegwa buyo malailile amwi masyoonto kumakani aanu. Lyoonse nomwapegwa makani aali mbuli bwayaaya, muyandika kulibambila nobeni.

Makani aacitondezyo aali apeeji 41 alakonzya kumugwasya ikumvwisya mbomunga mwalibambila makani. Amubone kuti akati katwaambo tupati-pati ootu, akamwi katalikila kumoombe wakulumwensyi alimwi kalembedwe mumabala mapati. Munsi akaambo kapati akamwi kulembedwe mulongo watwaambo tweendelana akaambo aako. Twaambo tuyungizyidwe tuyoobelesyegwa mukupandulula twaambo ooto twalembwa ansi antuto alimwi tulembedwe mukati aniini kuzwa kumoombe wakulumwensyi. Amwaalangisisye makani aaya. Amubone kuti twaambo tupati-pati tobilo tuleendelana kapati amutwe wamakani. Alimwi amubone kuti twaambo tumbi tutobela tatuli buyo tooto tukondelezya pe. Muciindi caboobo, kaambo akamwi kagwasyilizya twaambo tupati-pati aawo mpokalembedwe.

Eelyo nomwalibambila makani, cimwi ciindi taakalibonyi bulibonya makani aacitondezyo. Pele ikuti mwaamvwisya malailile aambokulibambilwa makani, ayoomugwasya kapati ikubikka twaambo antoomwe akulibambila makani aali kabotu muciindi buyo cisyoonto. Ino mbuti mbomunga mwacita oobo?

Amwaalange-Lange, Musale Akwaabikka Antoomwe

Muyandika kuba amutwe wamakani. Mutwe wamakani aanu taweelede kuba wooyo uujatikizya twaambo tunji, uukonzya kulembwa mubbala lyomwe buyo pe. Ngomuzeezo mupati ngomuyanda kubandika alimwi uzibya kaambo naa muzeezo ngomulombozya kubelesya mukubandika makani aanu. Ikuti mutwe wamakani kauliko kale, amulilangisye bbala alimwi lyabelesyegwa. Ikuti kamuyandika kuupandulula mutwe wamakani ooyo ngomupedwe kwiinda mukubala makani aasimbidwe kale, amwaalange-lange makani aayo kumwi kamuuyeeya mutwe wamakani aanu. Ikuti mwapegwa buyo kaambo kakuyoobandika, ciyooba kulindinywe ikulisalila mutwe wamakani aayo. Pele kamutanacita oobo, ambweni cilakonzya kumugwasya ikuti mwaavwuntauzya makani aayo. Kwiinda mukuzumanana kuyandaula makani ambi, muyoojana twaambo atumbi.

Nomutobela nzila eezyi, amulibuzye kuti: ‘Nkaambo nzi makani aaya ncaayandika kapati kubantu bandiswiilila? Ino ndijisi makanze nzi?’ Atabi makanze aakuyanda kubandika twaambo toonse tupedwe mumakani ngomwali kubala naa ikwaamba makani aamba twaambo tusiyene-siyene tukondelezya. Pele ayelede kubagwasya bamuswiilila munzila imwi. Mwaabona makanze aanu, amwaalembe apepa. Amwaabikke mumizeezo lyoonse nomulibambila.

Mwaabona makanze aanu akusala mutwe wamakani weendelana amakanze aayo (naa mwamana kubona mutwe wamakani ngomupedwe mbouswaangene amakanze aayo), mulakonzya kutalika kuvwuntauzya kugaminide. Amuyandaule makani aayoobagwasya bamuswiilila munzila iigaminide. Mutakkomani amakani aajatikizya twaambo tunji, pele amuyandaule twaambo tugaminide ooto ituyiisya alimwi itugwasya ncobeni. Amubikkile maano, mutaciindilizyi ikuvwuntauzya. Kanji-kanji muyoojana kuti mujisi twaambo tunji ntomutakonzyi akubelesya, aboobo muyooyandika ikusalaula twaambo tweelede.

Amubikkile maano kutwaambo tupati-pati ntomuyandika kubandika ituyoomugwasya kupandulula mutwe wamakani akuzuzikizya makanze aanu. Ootu twaambo ntotuyooba nentalisyo ayeeme makani aanu. Ino tweelede kuba tunji buti twaambo tupati-pati ntomweelede kubikkilizya? Ambweni tobilo tuli buyo kabotu ikuti kauli mubandi mufwaafwi alimwi ituli musanu ntunji kuti kaali makani aanga atola woola lyomwe. Ciyoobaubila-ubila bamuswiilila ikutwiibaluka ikuti twaambo tupati-pati katuli buyo tusyoonto.

Mbomwaubikkila buyo mumizeezo mutwe wamakani aanu kubikkilizya atwaambo tupati-pati, amujane zibelesyo zyeelede iziyoomugwasya kuvwuntauzya. Amusale buyo zyeezyo zyeendelana kapati atwaambo tupati-pati ntomujisi. Amusale twaambo tuyoopa kuti makani aanu amvwike kuti mapya. Ciindi nomusala magwalo aapa bumboni kutwaambo tupati-pati, amubikkile maano kumakani ayoomugwasya kupandulula magwalo aayo munzila iigwasya kapati. Amubikke kaambo akamwi munsi akaambo kapati mpokeelede kuba. Ikuti makani amwi kateendelani atwaambo tupati-pati ntomujisi, amwaasiye—nokuba kuti alakondelezya—naa amwaayobole mufailo kutegwa mukaabelesye aciindi cimbi. Amubweze buyo makani aayandika kapati. Ikuti mwabikkilizya makani manji, muyooyandika kwaakanana cakubindaana, aboobo imakani aanu taakabagwasyi pe bantu. Ncibotu ikukanana twaambo tusyoonto buyo ooto ituyoobagwasya ncobeni baswiilizi alimwi akutukanana kabotu. Mutaindilizyi aciindi ncomupedwe.

Aciindi aawa ikuti naa tiimwacitide kale oobo, amubikke twaambo twamakani aanu mumulongo katutobelene. Mbwaakacita oobu mulembi wa Makani Mabotu Luka. Naakamana kuyobolola twaambo tunji itwakali kweendelena amakani aakwe, wakatulemba katutobelene “kabotu-kabotu.” (Luka 1:3) Makani aanu mulakonzya kwaabikka kweelana aciindi naakali kucitika naa kweelana amitwe naa cakatalisya zintu alimwi azyakatobela kuzwa waawo antela penzi alimwi ambolikonzya kumanizyigwa, kweelana anzyomuyeeya kuti inga zyamugwasya kuzuzikizya mbaakani yanu. Tamweelede kwiide kucinca cakutayeeyelwa akutalika kaambo kambi. Mweelede kubasololela kabotu-kabotu bamuswiilila kuzwa kukaambo kamwi kuya kuli kambi, kakunyina akwiima kwalo ikukonzya kubakatazya baswiilizi ikweendelanya twaambo. Bumboni mbomupa bweelede kubagwasya baswiilizi ikukosola makani munzila iiluzi. Nomulibambila twaambo twakubandika, amuyeeye makani aanu mbwaayoomvwugwa kubaswiilizi. Sena ciyoobaubila-ubila ikubutobela bupanduluzi bwanu? Sena bayookulwaizyigwa ikucita eezyo nzyobaya kumvwa kweelana amakanze ngomujisi?

Lino amulibambile mbomuyootalika makani aanu kutegwa akabakulyaizye baswiilizi ikuswiilila, alimwi akubatondezya kuti nzyomuyanda kubandika zilabagwasya. Inga cagwasya kapati ikutulemba buya twaambo twanu twakusaanguna. Camamanino, amulibambile mbomuyoomanizya makani munzila iikulwaizya kweelana amakanze aanu.

Ikuti mwalibambila kakucili ciindi, muyooba aciindi cakucinculula ikuti kakuyandika kubotezya munzila imwi kacitanasika ciindi cakukanana makani. Ambweni muyanda kubikkilizya amyeelwe imwi, icikozyanyo naa cakuluula. Kwiinda mukubelesya makani aajatikizya cintu cazwa akucitika naa makani amwi ngobazyi bantu boonse ooko nkomukkala, muyoopa kuti cibaubile-ubile bamuswiilila ikumvwisya mbwaayandika makani aayo. Ciindi nomwiinduluka mumakani aanu, mulakonzya kubona mbazu zimwi ziyandika kucinca kutegwa mwaagamike kubantu bamuswiilila. Inzila eeyi yakwaandaanya alimwi akubotezya twaambo ilayandika kapati mukulibambila makani kutegwa abe yaayo aagwasya ncobeni.

Baambi bamwi inga bayandika kulemba twaambo tunji kapati kwiinda bamwi. Pele ikuti mwalibambila makani aanu kwiinda mukulemba buyo twaambo tupati-pati tusyoonto, ikusiya ooto tuteendelani amakani aanu akubikka twaambo twanu mumulongo uutobelene kabotu-kabotu, muyoojana kuti mukuya kwaciindi, tamukayandiki kutulemba buya twaambo toonse. Elo eeco inga camugwasya kaka ikutasowa ciindi! Alimwi ciyoopa kuti makani aanu kaagwasya kapati. Kuyoobonwa kuti muli mukugwasyigwa ncobeni alwiiyo lujanwa mu Cikolo Camulimo Weendelezyegwa a Leza.