Kabbokesi Kamubuzyo

◼ Nkaambo nzi ncokukulwaizigwa kuti basikumwaya kabaunka kumbungano iibelekela kubusena nkobakkala?

Ncintu ciyandika ikucita zintu munzila yeelede alimwi ya teokrasi. Imwaapostolo Paulo wakalemba ategwa: “Ikuti Leza tali Leza walupilingano pe, ngwaluumuno. . . . Zintu zyoonse buyo zicitwe kabotu akucililana.”—1 Kor. 14:33, 40.

Nokuba kuti kulakonzya kakuli twaambo tumwi twaalubazu akaambo kapenzi lyazeenzya, mulimo wakumubili antela kakuti kumwi kuyandika mulangizi wakugwasya, kanjikanji ncibotu kuunka kumbungano iibelekela mubusena nkotukkala. Eeci cipa kuti mulimo wamumuunda uubaube alimwi tatuyandiki kweenda musinzo kuya kubeleka ankamu iitali mubusena motukkala. Cilatugwasya kapati ikubeleka abamwi bali mumbungano yesu akutola bapya ibayanda kwiiya kumiswaangano nkobakonzya kusika kakutakwe penzi. Alimwi citupa kuti katuswaangana-swaangana abakwesu abacizi mubusena bwesu banga batugwasya ciindi notwapenga.

Ibamwi basikumwaya bali kumbungano zibelesya mulaka wa Cingisi bakkala mumasena aabelekela mbungano zya milaka imbi minyenzi. Ikuti kakunyina kwaandaana mumaanda aaliboobu cakuti mulumi uunka ku Cingisi mukaintu uunka kumbungano yamumulaka munyenzi, tabeelede kulonga pe. Aboobo basikumwaya bali boobu beelede kuunka ku Ŋanda ya Bwami iilaafwaafwi kumiswaangano yamulaka ngobayanda. Kufumbwa kwaandana kunga kwaba muŋanda ya Banakristo kulaindana acaambwa ku 1 Ba-Korinto 14:33 yaambwa atala.

Imbungano iilaa mwaalu omwe buyo ilakonzya kulomba lugwasyo kuzwa kumbungano iilaafwaafwi. Imwaalu uuyanda kuunka kuyakugwasya weelede kuyeeya mbocinga camujatikizya kulubazu lwakumuuya antoomwe alwakumubili alimwi ambocinga cajatikizya ziyanda banamukwasyi. Ikulonga kwamusyobo oyu kulangwa-langwa aa mulangizi wabbazu antoomwe abaalu balo bayoosala mukwesu akutuma zina ku Sosaiti kulomba kuti asalwe akubelekela mumbungano yabo kali mwaalu kabapandulula acapa kucita boobo akwaamba kuti baalu bamumbungano nkwaakabede bazumina kuti inga walonga. Nokwazuminwa kusala oku, imwaalu ulakonzya kubelekela kumbungano mpya elyo zina lyakwe liyoomwaigwa kumulongo wabaalu bamumbungano nkwaakabede.

Kwiinda mukubeleka cakulibombya mububambe bwabikkwa, tutondezya kuti tubikka Bwami ambele. (Lk. 16:10) Iciindi mbungano zipya nozitalikwa naa Ziiyo Zyabbuku Zyambungano nozibambululwa tulakonzya kulombozya kuba abalongwe besu bamwi. Pele notuzumina kubambululwa kupya, tulakonzya kubamba balongwe bapya akukkomana mubulongwe bwateokrasi. Alimwi cilabaubila baalu kweembela mbelele akutola ambele ciimo cakumuuya cambungano ciindi basikumwaya nobakkala mubusena mubelekela mbungano nkobaswaangana.