Sena Mulaabikkila Maanu Mabbuku Eesu?
1 Mabwe mayandisi aa Diamond alimwi amabwe mayandisi aambi alayandika kapati ikutali buyo akaambo kakuti mmabotu pele akaambo kakuti alakatazya kujana alimwi akwaasya. Luzibo lwa Jehova a Jesu Kristo lulainda loko kumpindu alimwi mabbuku eesu ngamabbuku alikke munyika yoonse mboizulwa aapandulula buvwubi oobu bwakumuuya mubulondo buteeli amubusongo bwabunaleza. (Rom. 11:33; Flp. 3:8) Mbuti mbotunga twatondezya kuti tulaabikkila maanu ncobeni mabbuku eesu?
2 Lyoonse bunji bwabantu alimwi amikwasyi babikkaambali mali aakusanga ku Ŋanda ya Bwami kuti bakabikke mukabbokesi kalembedwe kuti “Kusanga Kugwasilizya Mulimo wa Sosaiti Wanyika Yoonse—Matayo 24:14.” Alimwi muntu amuntu ulasanga mali kumulimo wanyika yoonse eelyo nabweza mabbuku naa mamagazini alimwi aleelyo nabikka mali aakasangwa naakali mumulimo wamumuunda mukabbokesi ako.
3 Nzila imwi njotunga twatondezya kuti tulaabikkila maanu mabbuku nkwiinda mukubelesya bupampu eelyo notwaabila bantu mabbuku mumulimo wamumuunda. Taku notupa mabwe mayandisi aadula kumwana muniini walo uutakonzyi akuziba bubotu bwawo. Ncimwi buyo, tatweelede kupa mabbuku kubantu batajisi aluyando kuzintu zyakumuuya. (Amweezyanisye Ba-Hebrayo 12:16.) Muuya ngotujisi wakulyaaba tobeni alimwi amukwaabila mabbuku weelede kweendelezyegwaa bupampu. Sena mwiniŋanda uliyandide kubandika andiswe? Sena ulaswiilila notwaambaula, sena ulavwiila mibuzyo njotubuzya akutobelezya kabotu eelyo notubala mu Bbaibbele? Ikuti kakuli luyandisisyo luli boobu, tulakonzya kumusiila bbuku lilimukumwaigwa aciindi eeco. Eelyo notucitya ziiyo zya Bbaibbele mumabbuku eesu, bantu balagwasigwa kuziba ncoliyiisya Bbaibbele, aboobo mulyango ulajuka wakuti babe acilongwe a Jehova. Lugwasyo lwini luyoojanwa kweelana ambolibelesegwa bbuku ndyotusiya.
4 Mabbuku aasiigwa buyo aashelufwu ku Ŋanda ya Bwami naa kumaandeesu, taabeleki mulimo ngwaakapangilwa alimwi impindu yawo taili mukubelesyegwa pe. Naaba mamagazini aamusyule, mabroshuwa, mabbuku amisyobo-misyobo alimwi amatulakiti ayelede kubelesyegwa kabotu.
5 Lyoonse mweelede kuciyeeyela kujatikizya mabbuku eeni ngomuyandika aakumwaya kamutanaabweza. Kubelesya maanu kulayandika. Inzya, kulayandika kuti kamujisi mabbuku aakkwene ikapati kuti kamucita bupainiya, pele tamweelede kubaa mulwi wamabbuku nkaambo mulakonzya kubweza mwayanda aambi ku Ŋanda ya Bwami kamutanatalika anomwamanizya miswaangano. Amulibambile mabbuku kutegwa mutalike kabotu mulimo wanu mumwezi ooyu alimwi mulakonzya kunoobweza mabbuku ambi ikuti naa kaayaabuceya.
6 Amuzibe kuti, ikuti naa bubambe bupya oobu bwambokumwaigwa mabbuku mumulimo wamumuunda tiibwapandululwa kabotu kubantu abamwi bandiswe, ciyoobayumina bamwi ikululamika twaambo naa nzila njobajana kuti ili kabotu kwaambila bantu. Ibamwi bacicita kuti bantu babone mbuli kuti lino tuli mukwaavwozya buyo mabbuku eesu alimwi cakatazya ikululamika muzeezo uli boobu. Kuyandika mali kutegwa kuulwe mapepa, akusimba mabbuku amamagazini alimwi akwaatuma mumbazu zisiyene-siyene munyika yoonse mbwiizulwa kubikkilizyaa mulimo wakusandulula mabbuku amamagazini mumyaambo iitandila ku 350. Aboobo basikumwaya beelede kumuzibya mwiniŋanda kuti mabbuku alamwaigwa kakunyina kubbadelesya akuti inga twalumba ikutambula kusanga kuli koonse.
7 Mabbuku eesu alagwasya kapati ikuti naa apegwa kubantu ibayanda Jwi lya Leza lyakasimpe. Aboobo toonse atubelesye maanu alimwi akucenjela mbotubelesya cipego ncotwakapegwa, twacita boobo tuyootondezya kuti tulaabikkila maanu mabbuku eesu.