“Yaka Iŋanda Yako”
1 Cakutadooneka, mumisyobo iili yoonse munyika yoonse mbwiizulwa, buumi bwamukwasyi buli mukunyongana. Munyika ya Saatani muzwide bwaamu alucengo. (1 Joh. 5:19) Eci citwaambila kuti tweelede kufwambaana ‘kuyaka iŋanda yesu’ alimwi akuyiisya bantu mbobanga bacita mbubo kumikwasyi yabo.—Tus. 24:3, 27.
2 Injiisyo Zya Bbaibbele Zilakwabilila: Inzila yakujana lukkomano lwini-lwini lwamukwasyi ijanwa mukutobela njiisyo zya Bbaibbele. Eezi njiisyo zipati cini-cini zilagwasya boonse banamukwasyi munzila zyoonse zyabukkale. Mukwasyi uuzitobela uyookkomana alimwi uyoojana luumuno lwabunaleza.—Amukozyanisye Isaya 32:17, 18.
3 Injiisyo zinga zyatugwasya kuyaka ŋanda zyesu zilisindaidwe mukabbuku kapya kategwa, Inzila Yakujana Lukkomano Mumukwasyi. Kumamanino aacibalo comwe-comwe kuli kabbokesi kakwiiya kagwasya ikasindamizya njiisyo banamikwasyi nzyobeelede kuyeeya. Ibunji bwatubbokesi ootu tutalika aamubuzyo wakuti, “Ino njiisyo ezi zya Bbaibbele inga zyagwasya . . . ?” Eeci citupa kuti tumvwe mizeezo ya Leza akubona mbwayeeya kukaambo kabandikwa.—Is. 48:17.
4 Amulizibe bbuku eeli. Amuzibe mbozijanwa njiisyo zinga zyagwasya ciindi nokwabuka mapenzi aasiyene-siyene. Ibbuku eeli libandika twaambo mbuli tootu: muntu ncayelede kulanga kumuntu ngwayanda kukwatana limwi (cibalo 2), izintu zyobile iziyandika kapati kujalula mulyango usololela kulukwatano lwalukkomano lutamani (cibalo 3), ibazyali mbobanga bakomezya bakubusi babo kuba bantu bapati balaamaanu, alimwi ibayoowa Leza (cibalo 6), kukwabilila mukwasyi kuzintu zinga zyaunyonyoona (cibalo 8), injiisyo zinga zyagwasya mikwasyi yabazyali balibalikke kuzwidilila (cibalo 9), lugwasyo munzila yakumuuya ilupegwa kumikwasyi iipenzegwaa budakwi alimwi abulwani (cibalo 12), icinga cacitwa naa lukwatano luyanda kumana (cibalo 13), icikonzya kucitwa kulemeka bazyali bacembeede (cibalo 15), alimwi ambokubelekelwa kuti mukwasyi ukabe abuumi butamani (cibalo 16).
5 Amulibelesye Kapati Bbuku Eeli Lipya: Ikuti kamutana cita oobo, sena inga tamukonzyi kuliiya antoomwe amukwasyi bbuku lya Lukkomano Mumukwasyi? Alimwi kufwumbwa ciindi mukwasyi wanu nowaba mumapenzi aambi naa mubuyumuyumu bumwi, amuzibale alimwi zibalo zijatikizya mapenzi aayo, alimwi amuyeeye akupaila kutegwa mubone mbomunga mwatobela lulayo olo. Kunze lyaboobo, mu March, amujane ciindi cinji cakuunka mumulimo wamumuunda kutegwa musole kumwaya bbuku lya Inzila Yakujana Lukkomano Mumukwasyi kubantu banji mbuli mbomukonzya.
6 Mikwasyi iitobela nzila yabunaleza iyooyumizigwa munzila yakumuuya akukamantanizigwa alimwi inoolibambilide kabotu kulwana Saatani. (1 Tim. 4:7, 8; 1 Pet. 5:8, 9) Ino tatulilumbili kuyiisigwaa Leza Iwakatalisya mukwasyi!