“Amube Amyoyo Yakulumba”
1 Ibunji bwesu twakayiisigwa katucili bana kwaamba kuti “ndalumba” ciindi muntu umwi naatucitila cintu cibotu naa luse. Paulo utulailila kuti tweelede lyoonse ‘kuba amyoyo yakulumba,’ ikapati tweelede kulumba Jehova. (Kol 3:15, 16) Pele ino inga twamulumba buti Mulengi wesu Mupati? Alimwi nkaambo nzi ncotweelede kumulumba?
2 Mwaapostolo Paulo wakalemba kuti: “Pele tulalumba Leza ikuti ulatupa luzundo kunguzu zya-Mwami wesu Jesu Kristo.” (1 Kor. 15:57) Mwaka amwaka ciindi ca Ciibalusyo, tulayeezegwa luyando lutamani Leza a Kristo ndobakatutondezya mukuleta cinunuzyo icitupa bulangizi bwabuumi butamani. (Joh. 3:16) Mbwaanga bunji bwandiswe twakafwidwa bayandwa besu, tulamulumba kaka Jesu kucisyomezyo cakwe cabubuke! Mumyoyo yesu tulalumba kapati kuti naa twayeeya bulangizi bwakufwutuka mamanino aabweende obu bwazintu kakunyina anotuyoofwa pe. (Joh. 11:25, 26) Nciyumu kujana majwi aakutondezya kulumba kuzintu zyoonse nzyotutikajane kwiinda muli Jehova munyika ya Paradaiso iiboola. (Ciy. 21:4) Sena kuli kaambo kambi kabotu kwiinda kaaka nkotweelede kumulumbila Leza?
3 Mbotweelede Kumulumba Leza: Lyoonse tuleelede kumulumba Jehova mumupailo akaambo kabubotu bwakwe. (Int. 136:1-3) Alimwi lyoonse moyo utukulwaizya kumulumba munzila zimbi zibotu. Mucikozyanyo, tuyoojanika ku Ciibalusyo calufwu lwa Kristo mu Nsondo, mu March 23. Kutegwa tugwasye mbungano zyesu kuzintu ziyandika zyakumubili alimwi akugwasilizya mumulimo wanyika yoonse mbwiizulwa, tulakkomana ‘kulemeka Jehova ambono zyesu.’ (Tus. 3:9) Tulabagwasilizya baalu munzila zyoonse zyeelede alimwi akubelekela antoomwe ambabo, munzila eyi tulamulumba Jehova kulugwasyo ndwapa kwiinda muli mbabo. (1 Tes. 5:12, 13) Buzuba abuzuba tulasoleka kuzumanana kulilemeka kabotu munzila iileta bulemu kuzina lya Leza. (1 Pet. 2:12) Jehova ulakkomana azitondezyo zyesu zyoonse ezi zyakulumba.—1 Tes. 5:18.
4 Inzila Mbotu Kwiinda Njotunga Twatondezya Kulumba: Kwiinda mukutola lubazu amoyo woonse mumulimo wa Bwami wakukambauka, kulemeka izina lya Jehova, kumulumba mumupailo, alimwi akuzumanana cakusyomeka kutabilila kasimpe, zyoonse ezi zili akati kanzila zibotu kwiinda nzyotunga twatondezya amoyo wesu kuti tulamulumba Mulengi wesu kuzintu zyoonse nzyaatucitila. Jehova ulakkomana kubona kuti twamucitila milimo iisetekene iigwasilizya kucita luyando lwakwe “[lwa]kuti bantu boonse bafutulwe akuboola kuluzibo lwakuziba lusinizyo.” (1 Tim. 2:3, 4) Nkakaambo kaako boonse basikumwaya ibakonzya kulibambila kucita boobo bali mukubweza ntaamu kweelana amalailile aakali mu Mulimo Wesu Wabwami wamu February aakuti balembye bupainiya bwakugwasilizya mumwezi omwe naa myezi yoonse ya March, April, alimwi a May. Ikusola kubeleka canguzu mumulimo wakukambauka ninzila mbotu njotunga ‘twatondezya myoyo yakulumba’ kuli Leza. Sena muyooba akati kabaabo bayoocita bupainiya mu April? ino mu May?
5 Twapegwa bulangizi bwini-bwini bwakupona kukabe kutamani. Twaakuti twabubona bwazuzikizigwa, tuyakubaa tumbi twaambo tunji twakumulumba cakukkomana Jehova mazuba oonse.—Int. 79:13.