Ikwaambilizya Makani Mabotu Munzila Yakubindaana
1 Tulatondezya kulumba kupati kujatikizya zisyomezyo zya Bwami bwa Leza kwiinda mukutola lubazu camoyo woonse mumulimo wa Bunakristo. Tweelede kutola lubazu mumulimo oyu cakubindaana. Nkaambo nzi? Nkaambo babelesi mbasyoonto, imamanino aabweende obu bwazintu ayaabuswena afwaafwi, alimwi maumi aabaabo ibali mulubazu ndotubelekela alaa ntenda. (Ezk. 3:19; Mt. 9:37, 38) Imukuli mulemu boobu uyandika kuti swebo tusolekesye mumulimo. Mbuti mbotunga twatondezya kubindaana kumakani aamulimo wesu wamumuunda? Nkwiinda mukulibambila nzila zyakuucita kakucili ciindi, kwiinda mukusungwaala ikuyandaula bantu kufwumbwa nkobanga bajanwa, kwiinda mukubamba malembe aaluzi aajatikizya baabo ibalitondezya kuyanda kwiinda mukufwambaana kupilukila ikuyoolingula kuyanda oko, alimwi kwiinda mukuyeeya kuti maumi aabantu alijatikizidwe, tweelede kuulanga cakusinizya imulimo wesu. Mizeezo eeyi iitobela ilakonzya kugwasya mbotulibambila kwaambilizya makani mabotu munzila yakubindaana mu February. Ibbuku lyakumwaya linooli lya Revelation—Its Grand Climax At Hand!
2 Inga mwakonzya kutalisya mubandi kwiinda mukubandauka mubufwaafwi buyumuyumu bumwi ibukatazya buleya, mpoona inga mwaamba kuti:
◼ “Ibantu banji balasyoma kuti Leza nkwali, pele baleezeezya kuti: ‘Ino ncinzi ncayanda kuti tukabe ancico kumbele oku?’ Ino nywebo inga mwaingula buti? [Amulindile kwiingula.] Sena mulizi kuti Bbaibbele lilacisalazya kupandulula ncayanda Leza kujatikizya muntu alimwi antaamu zyali mukutola ikuti cikonzeke?” Amujule kupeeji 301 yabbuku lya Revelation Climax. Amubale Ciyubunuzyo 21:1 mumuncali 1, mpoona mubale abupanduluzi ibupedwe kujatikizya nguwo mucisela cabili camuncali 2. Amulange cifwanikiso cili kupeeji 302 ikutondezya ncociiminina eci kumbele. Amubale Ciyubunuzyo 21:4 muncali 6. Amusoleke kusiya bbuku. Amumvwane ciindi cibotu cakuti mukapiluke akuzumanana mubandi oyo.
3 Mulakonzya kuuzumanana mubandi waciindi cakamana uujatikizya Ciyubunuzyo 21:1, 4 munzila eyi mfwaafwi:
◼ “Ciindi cakamana, twakabandika zisyomezyo zya Leza zyakubambila muntu bukkale bupya anyika. [Amutondezye alimwi cifwanikiso cili apeeji 302 mubbuku lya Revelation Climax.] Sena inga mwayanda kubona mukwasyi wenu kuulaa lubazu mubukkale buli boobu? [Amulindile kwiingula.] Imubuzyo ngwakuti, Ino zisyomezyo zya Leza zisyomeka kapati buti? Amubone walo mwini ncaamba.” Amubale Ciyubunuzyo 21:5, 6a mumuncali 8 apeeji 303. Amubuzye mubuzyo uusimbidwe iwamuncali 9 apeeji 304, elyo mpoona mubale kwiingula, kubikkilizya akaambo kamamanino mumuncali. Amwaambe kuti kuli ciiyo ca Bbaibbele icipegwa buyo. Amumvwane kuti mukatondezye mbocicitwa kuciindi cakumbele.
4 Mbokunga banji balalibilika amapenzi manji aakatazya muntu, mulakonzya kwaamba boobu aciindi cakusaanguna:
◼ “Bunji bwabaabo mbendiswaana balalibilika akaambo kamapenzi aatukatazya mubuleya. [Amubandauke masyoonto.] Kwamakumi aamyaka lino basimapolitikisi basyomezya kwaamanizizya limwi, alimwi bamwi basoleka kucita obo. Ino mwayeeya nywebo ncinzi cipa kuti bukkale kabuzumanana kuyaabubija? [Amulindile kwiingula.] Ibbaibbele lilapa bupanduluzi bwalo bantu banji mbobatanayeeyede. Ibbuku lya Ciyubunuzyo lilapandulula nkondo yakacitika kujulu. Amumvwe cakacitika, mbuli mbokuluulwa ku Ciyubunuzyo 12:9.” Amukabale kapango mwamana mujule kupeeji 182 mubbuku lya Revelation Climax. Amubelesye cifwanikiso ikutondezya mbuli mbwalaa lubazu Saatani mutwaambo twanyika. Amusole kusiya bbuku. Amumvwane kuti mukapiluke akubandika mbuli mbwayoomana mapenzi aamuntu Leza.
5 Kuti kamuli mwakasyomezya kupiluka kuyoopandulula mbwayoomana mapenzi aamuntu aali sunu Leza, mulakonzya kubelesya nzila eeyi:
◼ “Ndasola ndati nociba buti mane ndipiluke okuno tuzoozumanane amubandi wesu wambuli mbwaayoomanizigwa mapenzi aakatazya muntu. Ciindi cakamana twakabona kuti Bbaibbele lilamwaamba Saatani Diabolosi kuti ngonguwe uuena nyika yoonse mbwiizulwa. Mbwali muntu wamuuya, mwayeeya nywebo sena kuli nzila yakuti kuyunga kwakwe kugwisigwe? [Amulindile kwiingula.] Nkooko amubone ncolyaamba Bbaibbele.” Amubale akupandulula Ciyubunuzyo 20:1-3. Kwiinda mukubelesya cifwanikiso cili amapeeji 4-5 mubbuku lya Luzibo, amutondezye mbobunoobede bukkale kwanoonyina kuyunga kwa Saatani. Amukulwaizye ciiyo ca Bbaibbele akusola kutalika mpoona-mpoona.
6 Mbobali banji boobu bantu ibayandide makani aajatikizya bukkale butuzingulukide, mulakonzya kwaamba boobu ikujula mubandi:
◼ “Twajana kuti kutandila kumuntu uuli woonse ulayeeya busofwaazi bwamuuwo, maanzi, alimwi azilyo. Mumasi amwi buumi buli kale muntenda. Mbokunga Leza ngo Mulengi wanyika, mwayeeya nywebo uyoocita nzi kumakani aya? [Amulindile kwiingula.] Ibbaibbele lyaamba kuti Leza uyootubeteka mbuli mbotwiibelesya nyika eyi. [Amubale Ciyubunuzyo 11:18b.] Amuyeeye buyo, ikukkala anyika iitakwe busofwaazi!” Amwaambe cisyomezyo ca Leza caparadaiso, mbuli mbocitondezedwe ku Ciyubunuzyo 21:3, 4. Amutondezye cifwanikiso cili apeeji 302 mubbuku lya Revelation Climax. Amusole kusiya bbuku akumvwana kuti mukapiluke.
7 Ciindi nomupilukila kumuntu wakatondezya kuti uliyandide kuziba zyanyika ya Paradaiso, mulakonzya kwaamba kuti:
◼ “Iciindi cakamana, twakazuminana kuti Leza uyooyandika kunjilila mubukkale bwamuntu kutegwa amanizye penzi lyabusofwaazi bwanyika. Pele mubuzyo ngwakuti, Ino swebo ncinzi ncotweelede kucita kutegwa tukafwutuke kunjila munyika mpya njayoobamba Leza?” Amubale Johane 17:3. Amumulombe siŋanda kuti ajane lugwasyo kwiinda muciiyo cesu ca Bbaibbele icipegwa buyo kutegwa ajane luzibo oolu lulibedelede.
8 Ma! Tacitegwa ncecoolwe kaka ikubelesegwa kukutebula kwamazubaano alimwi akucita mulimo wabukambausi uufwutula maumi. Toonse katuujisi mulimo kwiinda mukwaambilizya makani mabotu munzila yakubindaana, kumwi ‘katuzi kuti milimo yesu tiikonzyi kuba yabuyo pe.’—1 Kor. 15:58.