Makani aa Bwami No. 35 Amwaamwaye Kapati
1 Mumyezi ya October alimwi a November tunoojisi bubi toonse. Kwamazuba aali kkumi abumwi aakusaanguna mu October, tunookulwaizya kulembya kwa Ngazi Yamulindizi naa Awake! naa mamagazini oonse obile. Mpoonya kuzwa mu Nsondo, mu October 12, kusikila mu Nsondo, mu November 16, tuyootola lubazu mukumwaya kuli mukucitwa munyika yoonse mboizulwa kwa Makani aa Bwami No. 35. Tuyooba acoolwe cakumwaya makani mapati kubantu boonse bamucilawo ncotukkala. Aaya makani anooingula mubuzyo wakuti, “Mwati Kuli Nobayooyandana Buya Bantu Boonse?” Ciindi eci cilibedelede nokunooambilizigwa makani aaya, tuyakumwaya Makani aa Bwami No. 35 mukati kansondo. Kumamanino aansondo, tuyakwaambilizya kulembya kwamamagazini, kunze lyakumwaya Makani aa Bwami. Amubone kwaamba kuti mulijisi tupepa twakulembya tunji.
2 Mbaani Bayakutola Lubazu? Mbuli mazuba oonse, ibaalu mbobanooli kumbele mumulimo oyu. Boonse balayanda kumwaya Makani aa Bwami, alimwi cakutadooneka basikumwaya banji bayakulilembya mumulimo wabupainiya bwakugwasilizya bwamwezi omwe naa yoonse yobile yakwaambilizya oku. Bamwi basikumwaya inga bayanda kuyungizya ciindi camumulimo wamumuunda ciindi eco.
3 Sena kuli muntu ngomuyiisya Bbaibbele uuyandoomanizya ciiyo cakwe mubbuku lya Luzibo alimwi uuyooelela ino-ino kutola lubazu mumulimo wamumuunda? Ambweni ulakonzya kuba sikumwaya uutabbapatizidwe kacitanasika ciindi eco kutegwa akatole lubazu mukwaambilizya Makani aa Bwami. Iciyandika kusiya kapepa aka nintalisyo yamakani nguba-uba. Mucikozyanyo, umwi ulakonzya kwaamba kuti: “Ooyu mmulumbe mupati cakuti uli mukumwaigwa nyika yoonse mboizulwa mwezi uno mumilaka iili 169. Ndilomba kuti ndimusiile kapepa kanu.” Nobaba bana baniini balakonzya kutola lubazu mumulimo oyu uukkomanisya.
4 Basikweendelezya ziiyo zyabbuku zyambungano beelede kukulwaizya muntu omwe-omwe mukabunga kabo kubaa lubazu luzwide mukumwaya Makani aa Bwami No. 35. Alimwi kulakonzya kakuli basikumwaya ibaya ansi munzila yakumuuya pele ibanga babukuluka akutola lubazu mumulimo kufwumbwa kuti bakulwaizigwa munzila yeelede. Ooku kwaambilizya kakutanacitika, ibaalu beelede kuswaya umwi aumwi wabaaba kubona naa kuli cinga cacitwa kubagwasya kuunkaa basikumwaya basimide mumulimo ooyu.
5 Ino Muswaangano Wamulimo Oyu Unoocitwa Lili? Ikutegwa mulimo woonse oyu ucitwe, kuyooyandika kucita bubambe bwabukamboni bwamunkamu ibukonzeka alimwi ibuuba-uba kutobela. Ikuti kakukonzeka, kweelede kakuli bubambe bwamiswaangano yakuya mumuunda mukati kansondo yomwe-yomwe, alimwi akumamanino aansondo, alimwi akumangolezya. Eeyi miswaangano yeelede kucitwa aciindi cinga capa kuti basikumwaya abapainiya bakonzye kubeleka bweelede muciindi eci cakupa bukamboni. Alimwi kweelede kakuli bubambe bwakuswaangana kumazuba ikucita kuti bana bacikolo, basimilimo abamwi bakotoka ciindi eco abalo bakonzye kutola lubazu. Mulangizi wamulimo weelede kubona kwaamba kuti kuli maanda manji aayelede kubelekwa mumulimo waŋanda aŋanda alimwi amasena aamakwebo aayelede kukambaukwa kutegwa oonse muntu akatole lubazu mumulimo munzila iizwide. Aabo babeleka mumasena aapedwe basikumwaya banji beelede kucenjela kutegwa batanooindi mwainda kale beenzinyina.
6 Mbuti Mumaanda Oomo Mwatajanika Bantu? Tuyanda kubandika kuti kacikonzeka kuli basimaanda banji kubapandulwida kaambo ncobeelede kubalila Makani aa Bwami No. 35. Aboobo kuti twatajana muntu naba omwe aaŋanda ciindi ncotwaswaya, atulembe namba yaŋanda twamana tujokele aciindi cimbi mubuzuba mbweena. Ikuti naa kwajanika kuti twasika munsondo yamamanino katutabajani bantu aaba mumaanda aabo, tulakonzya twasiya kapepa ka Makani aa Bwami amulyango abusena aanga takakonzyi kubonwa abasikwiinda. Mumasena mukkala bantu, lyoonse kamusola kumwaya Makani aa Bwami kubantu beenda mumigwagwa. Ikuti naa tubelekela muminzi alimwi amumasena mapati aatakonzyi kumanwa ciindi eeci cakwaambilizya, tulakonzya kusiya kapepa ka Makani aa Bwami mumaanda motwatajana bantu ciindi cakusaanguna ncotwaswaya.
7 Ino Tujisi Mbaakani Nzi? Imbungano zyeelede kusola canguzu kubelesya tupepa twa Makani aa Bwami toonse ntobajisi kubeleka zilawo zyoonse nzyobapedwe ciindi eci cakwaambilizya kacitanamana mu November 16. Ikuti eeco cilawo ncomupedwe ambungano ncipati alimwi kuti kamukonzya kubeleka kabotu amulikke kakutakwe angomubeleka limwi, inga cagwasya kuti mwacita obo. Eeci inga camugwasya kusikila bantu banji bayandika kugwasya amakani mabotu. (Mt. 10:11) Ambweni inga camugwasya kubweza tupepa buyo tusyoonto mumaanza anu alimwi a Bbaibbele munkomo naa mucikwama, muciindi cakubelesya cibbeeke cipati. Amubone kwaamba kuti mwalemba makkeyala aabantu batondezya luyandisisyo.
8 Sena Mulilibambilide Kutalika? Takuyandiki buya akooda Makani aa Bwami No. 35, mbwaanga mbungano yomwe-yomwe iyootuminwa. Ibapainiya baalubazu, baciindi coonse, alimwi abakugwasilizya bayoopegwa tupepa tuli 100 umwi aumwi twakumwaya, kakuli basikumwaya bamumbungano bayoozumizigwa kubweza tupepa tuli 30 umwi aumwi. Mulimo ngotweelede kucita wakacitilwa limwi. Sena muliyandide kutola lubazu mumulimo oyu uukkomanisya? Masimpe muliyandide. Aaya makani aa Bbaibbele mapati aategwa Makani aa Bwami No. 35 atwaamwaye kapati mbuli mbokukonzeka!