Ibapainiya Bagwasilizya Bamwi
1 Jesu wakati: “Kutebula nceo, pele basimilimo mbace, nkaako amukombelelele Mwami wakutebula, kuti atume basimilimo mukutebula kwakwe.” Mbwaanga basikutebula bamumwaanda wamyaka wakusaanguna tiibakali banji alimwi bakajisi cilawo cipati cakubeleka, naakali kuyanda Jesu naakabalailila kusikila bantu banji mbobakonzya amakani mabotu kwiinda mukubatuma omwe-omwe. Pele muciindi caboobo, “wakabatuma bobile bobile.” (Lk. 10:1, 2) Ino nkaambo nzi ncaakabatuma bobile-bobile?
2 Basikwiiya aabo bakali bapya alimwi tiibakaninga kuuzyibila mulimo pe. Kwiinda mukubelekela antoomwe bakali kukonzya kugwasyanya, kwiiyana alimwi akukulwaizyanya. Solomoni wakacaamba kuti, “bobilo bali kabotu kwiinda omwe.” (Mukambausi 4:9, 10, BT) Neciba ciindi muuya uusalala kautilidwe kale lya Pentekoste 33 C.E., Paulo, Barnaba alimwi abamwi bakaendela antoomwe abasyominyina mumulimo. (Inc. 15:35) Elo cakali coolwe cini-cini kuli bamwi ikuyiisigwa cacigaminina abaalumi abo bakali kweelela!
3 Ipulogilamu Mbotu Yakwiiya: Mbubwena mbuli yeeyo yamumwaanda wamyaka wakusaanguna, imbungano ya Bunakristo yasunu nimbunga yabukambausi. Alimwi ilatupa lwiiyo. Umwi aumwi wandiswe, weelede kuyandisisya makani mabotu kapati. Ikutegwa basikumwaya banji bayaambele mukucizyiba kucita boobo, ilugwasyo nkoluli.
4 Ku Cikolo Camulimo Wabwami icakacitwa onoono, iba Sosaiti bakaambilizya ipulogilamu iijatikizya bapainiya kuti bagwasilizye bamwi mumulimo wamumuunda. Sena eci cilayandika? Inzya cilayandika. Basikumwaya ibainda kukaulunzuma bakabbapatizyigwa mumyaka yotatwe yainda alimwi ibanji akati kabaabo bayandika kuyiisigwa kuti bazwidilile mumulimo wakukambauka. Ino nguni uunga wabelesyegwa kutegwa mulimo oyu uuyandika ucitwe?
5 Ibapainiya baciindi coonse balakonzya kugwasya. Imbunga ya Jehova ilabalailila kapati alimwi akubayiisya. Bapainiya balatambula malailile aabandika zyiyandika kulimbabo mu Cikolo Camulimo Wabupainiya icicitwa kwamvwiki zyobile. Alimwi balagwasigwa mumiswaangano njobabaanjiyo abalangizi bamabbazu alimwi abazyooko, kubikkilizyaa busolozi bwabaalu. Nokuba kuti tabali bapainiya boonse ibazyibide mbuli Paulo a Barnaba mbobakabede, pele batambula lwiiyo ilugwasya kapati, lwalo ndobakkomanina kwaambila bamwi.
6 Mbaani Ibayoogwasigwa? Sena ikutola lubazu mupulogilamu eyi kuyandika buyo kuli basikumwaya ibapya naa aabo ibakazwaa kubbapatizyigwa onoono? Peepe! Nkobali ibakubusi abana-bana alimwi abapati ibali mukasimpe kwamyaka minji pele ibanga balakkomana kugwasigwa muzibeela zimwi zyamulimo. Bamwi balacita kabotu mukusiya mabbuku pele cilabayumina ikucita nyendo zyakupilukila naa ikutalisya ziiyo zya Bbaibbele. Bamwi balakonzya ikutalisya ziiyo zya Bbaibbele kakunyina penzi pele babona kuti basikwiiya babo kwiina nobayaambele pe. Ino ncinzi icibacitya kuti kabatayi ambele? Ibapainiya ibazyibide balakonzya kulombwa kuti bagwasilizye mumbazu ezi. Bapainiya bamwi balazwidilila mukuvwuzya luyandisisyo, ikutalisya ziiyo zya Bbaibbele alimwi akugamika basikwiiya bapya kumbunga. Iluzibo lwabo luyoogwasya mupulogilamu eyi impya.
7 Sena mujana kuti ibubambe bwaciindi canu tabumuzumizyi ikujanika mumiswaangano yambungano iicitwa lyoonse yamumulimo wamumuunda mbuli mbomuyanda? Painiya umwi ulakonzya kubeleka andinywe zimwi ziindi basikumwaya bamwi nobatako.
8 Ikubelekelaamwi Lyoonse Kulayandika: Iziindi zyobile amwaka, ibaalu bayoocita bubambe bwakuti basikumwaya ibayandisisya kugwasigwa cacigaminina batole lubazu mupulogilamu ya Ibapainiya Bwagwasilizya Bamwi. Ikuti kamuyanda kutambula lugwasyo olu, amubelekele antoomwe amupainiya waambilidwe kumugwasya, amucite bubambe bwaciindi camumulimo bukonzyeka alimwi amubutobelesye. Ikupangana koonse ikucitwa amukuzuzikizye. Mbomubelekela antoomwe, amubone inzila izinga zyagwasya kukambauka makani mabotu cakuzwidilila. Amulingaule mizeezo imwi ncoizwidilila. Amwiibikkile maanu kapati mizeezo iiyoopegwaa sikumwaya mupainiya iyakuti mucite kabotu muntalisyo zyamakani zyanu. Mbomubelesya zintu nzyomwiiya, ikuyaambele kwanu mumuunda kuyoolibonya, kulindinywe alimwi akuli bamwi. (Amubone 1 Timoteo 4:15.) Amubelekelaamwi lyoonse kufwumbwa nokukonzyeka, mutole lubazu mumbazu zyamulimo zyoonse, kubikkilizyaa bukambausi bwamukwiizya pele kamubikkila maanu aalubazu mpomuyandika lugwasyo.
9 Mulangizi wamulimo ulayandisisya kuzyiba zintu mbozinooya buyaambele. Ciindi aciindi, unoolingula kuli yooyo uucitya Ciiyo Cabbuku Cambungano kuti abone mbomuli mukugwasigwa mupulogilamu eyi. Awalo mulangizi wabbazu uyoomugwasya naswayide mbungano yanu.
10 Jehova uyanda kuti bantu bakwe bayiisigwe alimwi ‘bazulile kukumana milimo mibotu yoonse.’ (2 Tim. 3:17) Ibubambe bwa Ibapainiya Bagwasilizya Bamwi amububone kuba coolwe cibotu cakugwasya baabo ibayandisisya kuyaambele mukucizyiba kukambauka jwi. Ikuti naa mwapegwa coolwe eci cakutola lubazu mububambe obu, amucite boobo cakulumba, cakulicesya alimwi acakukondwa.