Kwabikkilwa Maanu Kapati aa Bbaibbele!
1. Ino magazini ya Ngazi Yamulindizi alimwi aya The Golden Age akabambilidwe bani kumatalikilo?
1 Mu October 1, 1919, imagazini yakusaanguna iyakali kutegwa The Golden Age yakamwaigwa. Yakagwasya kapati mumulimo wakukambauka. Nkaambo nzi? Nkaambo kwaambisya yakabambilidwe buleya. Pele Ngazi Yamulindizi yalo tiiyakabambilidwe buyo buleya pe, mbwaanga kwamyaka minji yakali kubonwa kuti nimagazini ikapati yakamwailidwe iba “katanga kaniini.” (Lk. 12:32) Basikumwaya Bwami bakaimwaya kapati magazini impya cakuti kwamyaka minji imweelwe wamagazini ya The Golden Age iwakali kumwaigwa wakali mupati kapati kwiinda wa Ngazi Yamulindizi.
2. Ino sunu magazini ya The Golden Age yiitwa buti, alimwi ino yajisi mulimo nzi kuzwa kumatalikilo?
2 Imagazini ya The Golden Age yakatalika kumwaigwa kutegwa itondezye bantu kuti icini ciyoomanizya mapenzi aabanamaleya Mbulelo bwa Kristo bwa Myaka Iili Cuulu, bwalo ibuyooletela bantu ciindi calukkomano lupati, buvwubi alimwi akuzwidilila. Mumyaka yakatobela, kwakacitwa kucinca kuli mbokubede kumagazini ya The Golden Age kutegwa kulanganizyigwe zyakali kuyandika kweelana akusanduka kwamazuba. Mu 1937 izina lyamagazini eeyi lyakacincwa kuba Consolation. Mu 1946 lyakaba Awake!, naa lino ndyotuzyi kuti ngu Galamukani! mu Chichewa.
3. Ino magazini ya Awake! cali cibelesyo cigwasya kapati mukuzuzikizyigwa kwabusinsimi buli?
3 Kuzwa noyakatalika, imagazini eeyi yagwasya kapati mukupa bumboni buzwidilila kapati bwali kucitwa kuzwa mu 1919. (Mt. 24:14) Nokuba boobo, akaambo kakubija kwamazuba ngotupona, kwayandika kucita kucinca kumbi kumagazini ya Awake!
4. (a) Ncinzi muntu nceelede kucita kutegwa akasiswe “mubuzuba bwabukali bwa-Jehova”? (b) Ikweelana abbuku lya Ciyubunuzyo 14:6, 7, ncinzi “angelo . . . uuluka mujulu” ncaambila bantu boonse kuti bacite?
4 Ibantu banji balakukkomanina kubala magazini ya Awake! akaambo kakuti ijisi zibalo zinji alimwi ziindene-indene zitajatikizyi makani aabukombi pele izibandikwa munzila iikkomanisya kapati. Tacidoonekwi pe kuti ibunji bwabaabo ibajanika ku Ciibalusyo amwaka mbaabo ibaibala lyoonse magazini ya Awake! Nokuba boobo, ikuti muntu kalombozya kuyoosiswa “mubuzuba bwabukali bwa-Jehova,” uyandika lugwasyo lwakuti acite ziyungizyidwe kunze buyo lyakubala mabbuku eesu lyoonse.—Zef. 2:3; Ciy. 14:6, 7.
5. (a) Ikutalikila amagazini ya Awake! yamu January 2006, mmakani nzi aanoobikkilwa maanu kapati? (b) Ino banji balangilwa kukulwaizyigwa kucita nzi, alimwi ino ooku nkuzuzikizya businsimi buli?
5 Aboobo kuzwa mu January 2006, imagazini ya Awake! iyoobikkila maanu kapati kukubandika Bwami bwa Leza. Iyookulwaizya babali cacigaminina ikubelesya zili mu Bbaibbele kutegwa bamanizye mapenzi ngobajisi, alimwi iyoobikkila maanu kapati kubupanduluzi bwamu Bbaibbele bujatikizya zintu zicitika lino. Munzila eeyi, babali bayoozimvwisya zintu zicitika lino alimwi ambweni imakani ngobayoobala ayoobakulwaizya kuyandisya kwiiya zinji kujatikizya Jehova.—Zek. 8:23.
6, 7. (a) Mbuti magazini ya Awake! mboiyoobikkila maanu kukugwasya banji kutobela lugwalo lwa 1 Ba-Tesalonika 2:13? (b) Ino magazini ya Awake! inoomwaigwa ziindi zyongaye, alimwi ino mmyaambo yongaye iiyoojatikizyigwa akucinca ooku?
6 Imagazini ya Awake! ilazumanana kubandika makani ngobayandisya kuzyiba bantu. Nokuba boobo, kuyoobikkilwa maanu kapati makani aajatikizya Bbaibbele. (1 Tes. 2:13) Mbwaanga magazini ya Ngazi Yamulindizi ibandika makani aamu Bbaibbele mapati alimwi ayalo magazini ya Awake! inoobandika makani aambi aayeeme aa Bbaibbele, kwaboneka kuti inga tiikwayandika kuzumanana kumwaya magazini ya Awake! ziindi zyobile amwezi. Aboobo kutalikila amagazini ya January 2006, imagazini ya Awake! inoomwaigwa buyo ciindi comwe amwezi. Eeci ciyoopa kuti kuube-ube kulemba, kusandulula alimwi akutumina mabbuku eesu.
7 Ikucinca ooku kuyoojatikizya myaambo iitandila ku 40 pasenti yamyaambo imagazini ya Awake! moimwaigwa. Mumyaambo inabunji, imagazini ya Awake! imwaigwa kale ciindi comwe amwezi naa ziindi zyone amwaka. Kunyina kucinca kuyoocitwa pe mukumwaigwa kwa Ngazi Yamulindizi.
8. Mbuti basikumwaya mbobanga babelesya magazini ya Awake! antoomwe aya Ngazi Yamulindizi?
8 Basikumwaya balakonzya kwaabila magazini ya Awake! antoomwe amagazini ya Ngazi Yamulindizi yamwezi ooyo. Aabo baabila magazini ya Awake! banoobelesya magazini njimunya mumwezi woonse kakunyina kucinca makani aantalisyo akati kamwezi kweelana ambocibede lino.
9. Mmulimo nzi magazini ya Awake! ngoitizumanane kubeleka?
9 Kuzwa ciindi camagazini yakusaanguna mu 1919, imagazini mukuya kwaciindi yazyikwiitwa kuti The Golden Age, Consolation, alimwi lino kuti Awake! yabeleka mulimo mupati mumulimo wakukambauka. Mupailo wesu ngwakuti Jehova azumanane kulongezya kumwaigwa kwamagazini eeyi munzila eeyi iicincidwe akuti ilazumanana kugwasya bantu bambi banji bazwa “kuzisi zyoonse akumisyobo yoonse akumikowa yoonse akumyaambo yoonse” kusyoma Bwami bwa Leza kuti mbobulangizi bulikke mbobajisi.—Ciy. 7:9.