Mbomukonzya Kulibambila Mbomunga Mwaabila Magazini
1. Ino nkaambo nzi ncocili kabotu kulibambila nzila yanu nobeni yakwaabila magazini muciindi cakutobelezya buyo yeeyo iibikkidwe mu Mulimo Wesu wa Bwami?
1 Mulakonzya kubuzya kuti, ‘Ino nkaambo nzi ncotweelede kulibambila mbotunga twaabila magazini mbokunga nzila eezi zilabikkwa mu Mulimo Wesu wa Bwami aumwi?’ Nokuba kuti nzila eezi banji bazibona kuti zilagwasya kapati, kulibambila lwesu tobeni kulayandika. Nzila iigwasya mucilawo cimwi inga tiiyagwasya mucilawo cimbi. Aboobo, tatweelede kuzumanana kwaamba majwi mbubwenya mbwaalembedwe aatondezya mbotukonzya kwaabila mamagazini. Nokuba kuti twasala kubelesya nzila yacitondezyo, cili kabotu kwiiamba mumajwi eesu tobeni.
2. Ino ncinzi cijatikizidwe mukusala cibalo ncomuyoobandika?
2 Amusale Cibalo: Mwamana kwiibala magazini, amusale cibalo cikonzya kweelela mucilawo momubelekela alimwi cakamukkomanisya kapati. Kusinizya kwanu alimwi abusungu nomubandika cibalo kulakonzya kupa uuli aŋanda kuyanda kucibala awalo. Nokuba kuti inga mwayanda kubandika cibalo ciyookkomanisya bantu banji mucilawo momubelekela, amuzizibe kabotu azyalo zibalo zimwi zili mumagazini. Eeci ciyoomupa kucinca mubandi wanu ikuti naa mwajana muntu umwi uunga waba aluyandisyo kukaambo kamwi.
3. Ino majwi aantalisyo aali buti ngomubelesya alo aagwasya kapati?
3 Amubuzye Mubuzyo: Mpoonya, amulibambile kabotu-kabotu majwi aantalisyo. Majwi aanu aantalisyo alayandika kapati. Inga cagwasya kubuzya uuli aŋanda mubuzyo uupa kukkala ansi kuyeeya kutegwa abe aluyandisisyo mucibalo ncomwasala kubandika. Mibuzyo iijatikizya nzyayeeya muntu ilagwasya kapati. Mutabuzyi mubuzyo uukonzya kupa uuli aŋanda kutalikwaya naa kutalika kukazya.
4. Ino mbubotu nzi buliko mukubalila uuli aŋanda lugwalo ciindi bukkale nobuzumizya?
4 Amubale Lugwalo: Camamanino, amusale lugwalo lwakubala ikuti bukkale bwayooyo uuli aŋanda kabumuzumizya, ambweni oolo lujanwa mucibalo ncomuyoobandika. Kubala lugwalo kuyoomugwasya uuli aŋanda kubona kuti mulumbe wesu uzwa mu Jwi lya Leza. (1 Tes. 2:13) Lugwalo alwalo lulakonzya kumupa bukamboni ikuti naa wakaka kutambula mamagazini. Bamwi bapa kuti uuli aŋanda abe aluyandisisyo kwiinda mukubala lugwalo kabatana kubuzya mubuzyo uugaminina. Mulakonzya kwaamba lugwalo kwiinda mukwaamba kuti, “Inga ndayanda kumvwa ncomuyeeya kuli ceeci caambidwe mukapango kamu Bbaibbele aaka.” Mpoonya amumugamike kukaambo keendelana akaambo aako kali mumagazini, alimwi amwaambe kaambo mubufwaafwi kutegwa abe aluyandisisyo kamutana mwaabila magazini.
5. Ino malailile nzi ngomweelede kunooyeeya nomulibambila nzila yakwaabila magazini?
5 Kunyina milawo iibikkidwe kujatikizya nzyomweelede kwaamba nomwaabila mamagazini. Kanji-kanji, cilagwasya kuti mubandi wanu kauli muuba-uba alimwi mufwaafwi. Amubelesya ntalisyo iimupa kulikwaya alimwi iigwasya. Amubikkile maanu kububotu bwamamagazini alimwi amube bantu bakulwaizya. Ikuti naa mwalibambila kabotu, muyoozwidilila kapati mukwaabila Ngazi Yamulindizi a Awake! kuli baabo “basalidwe buumi butamani.”—Inc. 13:48.