Ikulumba Akaambo Kacipego Cipati Kwiinda Zyoonse Ncaakatupa Leza
1. Ino nkaambo nzi ncotumulumba kapati Jehova?
1 Cinunuzyo Jehova ncaakatupa kwiinda mu Mwanaakwe ncecipego cipati kwiinda ‘zipego zibotu’ zyoonse nzyatupa. (Jak. 1:17) Cinunuzyo cipa kuti tube azileleko zinji, kubikkilizya akulekelelwa zibi zyesu. (Ef. 1:7) Tulamulumba Jehova lyoonse akaambo kacipego eeci. Ikapati ciindi ca Ciibalusyo, tulazinzibala kuyeeya cipego eeci citaliboteli.
2. Ino ncinzi ncotweelede kucita kutegwa tutondezye kuti tulalumba kapati akaambo kacinunuzyo akugwasya bamumukwasyi wesu kucita boobo?
2 Amubagwasye Banamukwasyi Kuba Bantu Balumba Kapati: Munsondo zisyoonto kacitanacitwa Ciibalusyo mu March 30, mulakonzya kugwasya banamukwasyi boonse ikuba bantu balumba kapati kwiinda mukubelesya ciindi ca Kukomba Mumukwasyi ikulanga-langa makani aajatikizya cinunuzyo. Alimwi mukwasyi wenu ulakonzya kutobela bubambe bwakubala Bbaibbele kwa Ciibalusyo abuzuba. Aumwi weelede kuyeeya mbocamugwasya cinunuzyo kujatikizya mbwamubona Jehova, mbwalibona mwini, mbwabona bamwi akujatikizya bulangizi bwakumbele. Alimwi mulakonzya kwiiya kwiimba nyimbo zipya zyobilo iziya kubelesyegwa lya Ciibalusyo, nkokuti lwiimbo namba 8 anamba 109.—Int. 77:12.
3. Ino mbuti mbotukonzya kutondezya kuti tuli bantu balumba?
3 Majwi Aakulumba: Ikulumba akaambo kacinunuzyo kupa kuti twaambile bamwi makani aajatikizya Jehova alimwi aluyando lwakwe lupati lwakutuma Mwanaakwe. (Int. 145:2-7) Akaambo kakulumba, mikwasyi iimwi ilacita bubambe bwakuti omwe naa bainda waawo bamumukwasyi bacite bupainiya bwakugwasyilizya mu March, April amu May. Ikuti kamutakonzyi kucita boobo, sena mulakonzya ‘kujatisya ciindi’ kwiinda mukutola ciindi cinji mumulimo wakukambauka? (Ef. 5:16) Ikulumba kuya kupa kuti tutambe bamwi kuti bazikujanike ku Ciibalusyo. (Ciy. 22:17) Amutalike kulemba mulongo wamazyina aabantu mbomuswaya munyendo zyakupilukila, basikwiiya Bbaibbele, basazinyoko, babelesinyoko alimwi abasimukobonyoko mbomuya kutamba alimwi amutole lubazu cabusungu mumulimo waalubazu wakutamba bantu ku Ciibalusyo.
4. Ino mbuti mbotukonzya kucibelesya kabotu ciindi ca Ciibalusyo?
4 Ciindi ca Ciibalusyo citupa coolwe cakutondezya kuti tulamulumba kapati Jehova akaambo kacipego ncaakatupa. Atucibelesye ciindi eeci ikuyungizya kulumba kwesu akaambo kacinunuzyo alimwi “[a]buvubi butaambiki bwa-Kristo.”—Ef. 3:8.