Sena Mwakali Bapainiya Baciindi Coonse?
1. Ino ncoolwe nzi ncobajisi bamwi, pele ncinzi cakacitika?
1 Kwamyaka minji, bantu banji bakajisi coolwe “[ca]kuyiisya akwaambilizya makani mabotu” kabali babelesi baciindi coonse. (Mil. 5:42) Pele bamwi bakalilekede bupainiya akaambo katwaambo twiindene-indene. Ikuti naa mwakali bapainiya baciindi coonse, amulange-lange bukkale bwanu mubone naa inga mwatalika alimwi bupainiya.
2. Nkaambo nzi aabo bakacita bupainiya kaindi ncobeelede kulanga-langa bukkale bwabo?
2 Bukkale Bulacinca: Ambweni cintu cakapa kuti muleke bupainiya tacikonzyi kumulesya lino. Mucikozyanyo, ikuti naa mwakacileka kucita bupainiya akaambo kakuti tiimwakali kucikonzya kukkwanya mawoola aali 90 aakali kuyandika amwezi, sena inga tiimwatalika alimwi mbwaanga lino mawoola aayandika ali buyo 70? Sena mulimo naa mikuli ya mumukwasyi yaceya-ceya kwiinda ciindi nomwakacileka bupainiya? Umwi mucizyi iwakaleka bupainiya akaambo kakuciswa-ciswa wakatalika alimwi naakakkwanya myaka yakuzyalwa iili 89. Kwamwaka omwe akwiinda kazwide mucibbadela wakalimvwa kuti lino inga watalika bupainiya alimwi akaambo kakuti taciswi-ciswi.
3. Mbuti banamukwasyi mbobakonzya kubelekelaamwi kutegwa bagwasye umwi wamumukwasyi kucita bupainiya?
3 Ambweni tiimwakali bapainiya, pele umwi wamumukwasyi wacileka bupainiya kutegwa alanganye umwi wamumukwasyi, ambweni muzyali ucembeede. (1 Ti. 5:4, 8) Ikuti naa mbombubo, sena nywebo naa umwi wamumukwasyi tamukonzyi kumugwasya? Amwaabandike makani aaya antoomwe. (Tus. 15:22) Ikuti banamukwasyi babelekela antoomwe kutegwa umwi acite bupainiya, boonse balakonzya kulimvwa kuti balatola lubazu.
4. Ino kuti tamukonzyi kutalika alimwi bupainiya aciindi eecino?
4 Mutatyompwi ikuti naa bukkale bwanu tabuzumizyi kuti mucite bupainiya alimwi. Ikulibambila kwanu kuti mucite oobo kulamukkomanisya Jehova. (2 Ko. 8:12) Amubelesye luzyibo ndomwakajana nomwakali bapainiya mubukambausi bwanu. Amwaapailile makanze aanu, alimwi amuyandaule nzila zikonzya kupa kuti mutalike alimwi. (1 Jo. 5:14) Ambweni mukuya kwaciindi, Jehova ‘uyoomujalwida mulyango mupati uutola kumulimo’ kutegwa mukabe acoolwe cakutalika bupainiya bwaciindi coonse alimwi!—1 Ko. 16:9.