Amulibambile Lino Kuyungizya Mulimo Wanu
1. Ncoolwe nzi ncotujisi ciindi ca Ciibalusyo, alimwi mbuti mbotukonzya kulibambila?
1 Ciindi ca Ciibalusyo citupa coolwe ‘cakulumbisya Jehova.’ (Int. 109:30) Sena muyakuyungizya mulimo wanu mu March kutondezya kulumba kuli Leza, Sikupa cinunuzyo? Eecino nceciindi cakutalika kulibambila.—Tus. 21:5.
2. Mbuti mbomwakalimvwa nywebo alimwi abamwi nomwakamvwa kuti wacesyegwa mweelwe wamawoola aayandika kucita bupainiya bakugwasyilizya mu April?
2 Bupainiya Bwakugwasyilizya: Mwaka wamana, basikumwaya mumbungano bakakkomana kapati nibakamvwa kuti wacesyegwa mweelwe wamawoola aayandika kucita bupainiya bwakugwasyilizya mu April. Umwi mukwesu wakalemba kuti: “Ndicili kucikolo, alimwi ndibona kuti inga tiindacikonzya kucita bupainiya bwaciindi coonse. Nokuba boobo, mu April ndiyoolilembya kubeleka mawoola aali 30 pele ndiyoobeleka canguzu kutegwa ndikakkwanye aali 50.” Mucizyi uubeleka mulimo wakumubili waciindi coonse wakalemba kuti: “Mawoola aali 30—masyoonto kapati!” Ciindi nobwakaambilizyigwa bubambe oobu, umwi wakali mupainiya kaindi, lino uujisi myaka yakuzyalwa iili kuma 80, wakaamba kuti: “Eeci nceciindi ncindakali kulindila! Jehova wakalizyi kuti kucita bupainiya cakali nceciindi cibotu kapati mubuumi bwangu!” Bamwi batakali kukonzya kucita bupainiya bwakugwasyilizya bakalibikkila mbaakani yakuyungizya mulimo wabo.
3. Ino ntwaambo nzi tweelede kutupa kuyanda kucita bupainiya bwakugwasyilizya mu March, April, alimwi amu May?
3 Mwezi wa March unooli mwezi mubotu kucita bupainiya bwakugwasyilizya nkaambo alimwi tuyoopegwa coolwe cakulisalila kubeleka mawoola aali 30 naa 50. Kuyungizya waawo, kutalikila mu Mujibelo, March 17, tuyootola lubazu mumulimo waalubazu wakutamba bantu ku Ciibalusyo ciyoocitwa mu April 5. Ibanji bayookkomana kubeleka mumulimo cakuti bayakuyanda kucita alimwi bupainiya bwakugwasyilizya mu April amu May, ambaakani yamawoola aali 50.
4. Mbuti mbotukonzya kuyungizya mulimo wesu, alimwi kuli mpindu nzi?
4 Aciindi ca Kukomba Mumukwasyi citobela, amukabandike umwi aumwi mumukwasyi mbwakonzya kuyungizya mulimo wakwe ciindi ca Ciibalusyo. (Tus. 15:22) Amumulombe Jehova kuti alongezye kusoleka kwanu. (1 Joh. 3:22) Mbomuyaabuyungizya ciindi ncomubeleka mumulimo, tamukatembauli buyo Jehova pele alimwi muyakuyungizya lukkomano lwanu.—2 Kor. 9:6.