Kutamba Bantu ku Ciibalusyo Kutalika mu March 1
1. Ino tuyootalika lili kutamba bantu ku Ciibalusyo, alimwi nkaambo nzi ciindi cakutamba bantu ncocayungizyigwa mwaka uno?
1 Muli Bwasanu, March 1, tuyootalika mulimo ngotucita mwaka amwaka wakutamba bantu kuti bakajanike ku Ciibalusyo. Ciibalusyo ciyoocitwa mu March 26, icaamba kuti kutamba bantu kuyootola ciindi cilamfwu kwiinda mbocakabede myaka yainda. Eeci ciyoopa coolwe kubantu banji kuti bakatambwe, kwaambisya kuti kabakkala kubusena kuli mbungano iijisi cilawo cipati.
2. Ino mbubambe nzi buliko bwakubweza tupepa twakutamba bantu alimwi abwakubeleka cilawo?
2 Kulibambila: Baalu bayoopa malailile aajatikizya mbociyoobelekwa cilawo, kubikkilizya akwaamba naa tupepa tweelede kusiigwa aŋanda nokuba kuti kunyina wajanika. Ikuti tupepa twasyaala mwamanizya kumwaya kuŋanda aŋanda, tulakonzya kwaabilwa mubukambausi bwakubuleya. Mulangizi wamulimo uyoobona kuti tupepa tulembedwe kale twabikkwa akkaunta yamabbuku naa yamamagazini kutegwa basikumwaya kababweza, pele takatubikki toonse aciindi comwe. Kufwumbwa notubweza tupepa twakutamba bantu, tweelede kubweza buyo ntotukonzya kwaabila munsondo yomwe.
3. Ncinzi ncotweelede kuyeeya notwaabila tupepa?
3 Ino Tuyooamba Nzi? Cilayandika kwaamba mubufwaafwi kutegwa tukacikonzye kubandika abantu banji. Apeeji 4 kuli citondezyo cacikozyanyo ncotukonzya kucinca kutegwa ceendelane acilawo cesu. Nokuba boobo, tatweelede kubindaana kuti mukamwini ŋanda kalaaluyandisisyo naa kuti kajisi mibuzyo. Notwaabila tupepa kumamanino aansondo, tweelede kwaabila amamagazini kuti kaceelela. Mu March 2, tuyoobikkila maano kwaabila tupepa twakutamba bantu muciindi cakutalisya ziiyo zya Bbaibbele.
4. Nkaambo nzi ncotweelede kubeleka cabusungu mukutamba bantu?
4 Tusyoma kuti bantu banji bayootusangana ku Ciibalusyo. Makani ayoomupandulula Jesu. (1 Ko. 11:26) Ayootondezya mbolutugwasya lufwu lwakwe. (Lom. 6: 23) Alimwi ayooamba ncociyandika kumuyeeya. (Joh. 17:3) Atubeleke cabusungu mukutamba bantu!