Sena Kuli Ciindi Cini Ncomulaakwiiya Bbaibbele?
MWAKALI, ba Kabunga Keendelezya bakacinca bubambe bwamiswaangano yambungano kutegwa kube ciindi cinji cakucita ciiyo ca Bbaibbele mumukwasyi. Ikuti kamuli mutwe wamukwasyi, mweelede kubona kuti iciiyo camukwasyi cigwasya, cilacitwa lyoonse abakaintu banu abana. Banabukwetene batajisi bana banakubelesya ciindi eeci kwiiya Bbaibbele antoomwe. Bakwesu batakwete abacizi batakwetwe banakucibelesya ciindi eeci kwiiya Bbaibbele.
Bantu banji babukkomanina bubambe oobu bwakuba abuzuba bwa Kukomba Mumukwasyi. Mucikozyanyo, Kelvin imwaalu, wakalemba kuti: “Tulalumba kapati mumbungano yesu. Tobaalu twakabandika mbotuya kububelesya buzuba oobu kweelana amalailile ngobakatupa ba Kabunga Keendelezya—aakwiiya antoomwe amikwasyi yesu.”
Ba Jodi, ibakwetwe kumwaalu, bakalemba kuti: “Tuli abana basimbi botatwe, umwi uuli amyaka yakuzyalwa iili 15, umwi 11 uumwi 2. Ino-ino, twakalongela mumbungano iibelesya mwaambo wakutambaika. Cilatutolela ciindi cilamfwu kulibambila miswaangano yoonse. Lino akaambo kakucinca ooku, twaba abuzuba bwakukomba mumukwasyi.”
Ba John aba JoAnn, banabukwetene ibapainiya baciindi coonse, bakalemba kuti: “Ciiyo cesu ca Bbaibbele camukwasyi tiicakali kucitwa kabotu akaambo kakuti twakalijisi zinji zyakulibambila zyambungano. Ibubambe bupya oobu bulatugwasya alimwi ncipego kuzwa kuli Jehova—ikuti naa twacibelesya kabotu ciindi eeci.”
Tony, imukwesu uutakwete uuli amyaka yakuzyalwa iili kuma 25, ucita ciiyo cakwe ca Bbaibbele muli Bwabili mangolezya. Ulalibambila miswaangano yambungano mumazuba aambi. Nokuba boobo, Tony waamba kuti: “Lyoonse ndilabulangila ibuzuba oobu.” Ino nkaambo nzi? Tony waamba kuti: “Oobu mbuzuba bwaalubazu mbondibandika a Jehova. Kwamawoola obilo, ndilaakulanga ciiyo ciyumya cilongwe cangu a Jehova. Ikuba aciindi cinji kundigwasya kuzinzibala kuyeeya magwalo aamu Bbaibbele ngondibala.” Ino ncinzi cacitika akaambo kakucita boobu? Waamba kuti: “Malailile aa Jehova alandinjila mumoyo kwiinda mbwaakali kucita kaindi.” Sena kuli cikozyanyo ncakonzya kwaamba? Waamba kuti: “Mubbuku lya Insight, ndakabala cilongwe cakali akati ka Davida a Jonatani. Ndakaiya zinji kuzwa kukulyaaba nkwaakacita Jonatani. Cikozyanyo cakwe cakandiyiisya mbondikonzya kuba mulongwe wini-wini. Lyoonse ndilabulangila buzuba oobu kutegwa ndiiye zyintu zinji zibotu.”
Cakutadooneka, babelesi boonse ba Jehova ciyakubagwasya kapati ikuti kabacibelesye kabotu ciindi eeci ncotwapegwa cakwiiya Bbaibbele akukomba mumukwasyi.