Amuyiisye Bamwi Nzyayanda Leza
1 Ibantu banji bacijanwa balo baimidwe munzila ya kumuuya “kuswiilila majwi aa-Jehova.” (Amosi 8:11) Kakuli bamwi balasyoma kuti Leza nkwali, tabaazi makanze aakwe alimwi anzyayanda. Aboobo kulayandika kuti swebo tubayiisye kasimpe ka Bwami kapa buumi. Kwiinda mukulibambila kabotu kuti tukambauke kufumbwa kwaboneka ciindi, tulakonzya kusikila baabo bayanda kwiiya nzyayanda Jehova.
2 Mu April amu May tunoojisi mamagazini aaelede aakumwaya aa Ngazi Yamulindizi a Awake! Kunze lyaboobo, kwaciindi cakusaanguna tuyoomwaya broshuwa ya Ncinzi Leza Ncayanda Kulindiswe? Izifwanikiso zyanjiyo zibotu alimwi amibuzyo iipa kuyeeya zipa kuti eyi broshuwa ikondelezye kapati. Inzila zitobela zyapegwa kuti zitugwasye kubelesya mabbuku eesu mabotu munzila mbotu kapati.
3 Ikuyandaula Bantu: Mumasena bantu banji mobatajaniki amunzi notuunka kuŋanda aŋanda, kwajanika kuti cilagwasya kuyandaula akwaambaula abantu kufwumbwa nkobakonzya kujanwa. Ipepa lyamukati lya Mulimo Wesu Wabwami wa September 1996 lyakatukulwaizya kuti tukambauke makani mabotu koonse-koonse—mumigwagwa, muzyeenzya zyabuleya alimwi amumapaaki, musiigwa myootokala alimwi amasena aamakwebo. Alimwi lyakapa kuti katubikkila maanu kukujana ciindi cakukambauka mukwiizya. Mucikozyanyo, umwi mucizi painiya wakaunka kubusena kuvwubwa zinyama wakatolelezya amamagazini aa Awake! aa August 8, 1996, aamutwe wakuti, “Endangered Species—Why Be Concerned?” Mukumana buyo kwaola lyomwe wakasiya makkopi aali 40 kubantu baziyandisya ncobeni zinyama! Nkuzwidilila kuli buti nkomwajana akaambo kakukambauka makani mabotu koonse-koonse? Ngazi Yamulindizi alimwi a Awake! antoomwe a broshuwa ya Ncayanda aleelela kapati kumisyobo yoonse yakukambauka nkaambo ajisi makani aajatikizya maumi aabantu alimwi alapa kuyeeya.
4 Ikutalika Mibandi: Ipeeji lyakunze lya Mulimo Wesu Wabwami wa October 1996 lilapa nzila mbotukonzya kulibambila tobeni kumwaya mamagazini aa Ngazi Yamulindizi a Awake! Inzila nzizyonya ziyoobeleka kabotu nomulibambila kumwaya broshuwa ya Ncayanda. Ncotwaamba cilakonzya kacili buyo mumajwi masyoonto naa malamfwu cakuti mulakonzya kubikkilizya muzeezo wamu Magwalo. Kulayandika kapati kusala kabotu-kabotu majwi aamatalikilo nkaambo ngaakonzya kusinizya kuti naa muntu ngotwabandika limwi uyoozumanana kuswiilila. Bamwi bazwidilila kwiinda mukubelesya majwi aaya aamatalikilo: “Ndakabala makani aakandikulwaizya elyo ndiyanda kuti ndimwaambile andinywe.” Naa imubuzyo ulakonzya kubuzigwa walo uunga wapa kuti muntu umwi avwiilizye mumubandi.
5 Ikuti kaceelela kubusena bwanu, mulakonzya kusoleka kubuzya mibuzyo mbuli yeeyi iitobela mukukambauka kwanu uno mwezi:
◼ “Sunu tulabona kulemba-lemba kunji, tombe alimwi abusofwaazi. Ncinzi ciyooyandika ikusalazya nyika akwiibamba kuti bube busena bubotu bwakukkala?” Amulindile kwiingula mpoona amupandulule kuti mulijisi makani aatusyomezya mbuli nyika yoonse mboiyooba muunda alimwi aciindi noiyoocita boobo. Amubandike kaambo kagaminide, lugwalo lufwaafwi alimwi acifwanikiso cilibonya kabotu kuzwa mumagazini mpya alimwi amumupe yomwe muntu oyo kuti kayanda kutegwa abale. Amupandulule bubambe bwakulembya. Kamutana manizya mubandi wanu amumvwane kuyakuzumanana ciindi cimbi.
◼ “Sena muyeeya kuti Leza wakali kuyanda kuti katupona katuzingulukidwe mapenzi mbuli yaayo ngotuli angao sunu?” Aingula muntu oyo, mulakonzya kwaamba kuti: “Mulalangilwa kuti muluuzi mupailo Jesu ngwaakayiisya basikumutobela kuti kabapaila mbubo ikulomba kuti Bwami bwa Leza buboole. Sena kuli nomwakayeeyede kuti naa Bwami bwa Leza ninzi ncobeni?” Amujule kuciiyo 6 mu broshuwa ya Ncayanda mubale mibuzyo iibuzidwe kumatalikilo aaciiyo. Mpoona mwabala muncali wakusaanguna amumutondezye kwiingula kwa mubuzyo wakusaanguna. Amupandulule kuti eyi mibuzyo yoonse yacaala ilaingulwa munzila iigaminina njiyona eyi. Amusoleke kusiya broshuwa alimwi amumvwane kuyooswaangana alimwi kutegwa mukabandike makani aambi aajatikizya Bwami.
◼ “Ibantu banji bayeeya batalika kulanga bukombi mbuli cintu cileta mapenzi aalwana muntu kwiinda kuti nenzila yakwaamana. Ino muyeeya buti kumakani aaya?” Mwamana kumvwa mbuli mbwayeeya, amumutondezye makani aakonzya kumukkomanisya aajatikizya kwaalilwa kwabukombi bwakubeja naa mamanino ambubo aasika afwaafwi kuzwa mumagazini mpya. Amubuzye naa inga wayanda kwiibala. Amwaambilane mazina alimwi amulombe kumuswaya alimwi kutegwa mukapandulule mbuli mbocibede kuti bukombi bwakasimpe teebwaalilwa pe kugwasya bantu. Amusoleke kumukulwaizya kuti alembye Ngazi Yamulindizi.
◼ “Mbuli mbokuli mapenzi manji sunu mubuumi bwamikwasyi, sena kuli nomwaalibuzide kuti naa ninzila nzi yakujana lukkomano mumukwasyi?” Amulindile kwiingula, amupandulule kuti mu Bbaibbele, Leza ulayubulula nzila ini-ini yakujana lukkomano mumukwasyi. Antela mulakonzya kubala bbuku lya Isaya 48:17. Mpoona amulange ciiyo 8 ca broshuwa ya Ncayanda elyo amutondezye zyaandaano zimwi zyamu Bbaibbele izipa busolozi buli kabotu kuli omwe-omwe wamumukwasyi. Amubale mulongo wamibuzyo uuli kumatalikilo aaciiyo. Amubuzye naa muntu oyo inga wayanda kubala kwiingula. Amulombe naa inga mwapiluka ciindi cimbi kutegwa mukabandike busolozi abumbi bubeleka ibuli mu Bbaibbele kujatikizya buumi bwamukwasyi uukkomana.
6 Imuntu ncayanda kapati nkwiiya nzyayanda Leza akuzicita. (Kol. 1:9, 10) Tuyoobagwasya kapati bambi mu April amu May kuti twatalika kubayiisya nzyotuzi kujatikizya nzyayanda Jehova kutegwa tube aabuumi.—1 Kor. 9:23.