Ikusyomeka Kulalumbulwa
1 Kubbuku lya Ba-Hebrayo 11:6 twaambilwa kuti Leza “nguupa cilumbo kulibaabo bamuyandaula.” Inzila imwi njalumbula babelesi bakwe balyaabide abo bali ‘kusyomeka kuzintu zice’ nkwiinda ‘mukubakazika kuti babe azintu zinji.’ (Mt. 25:23) Munzila imwi, Jehova kanjikanji ulalumbula mulimo mubotu kwiinda mukupa bakamboni bakwe basyomeka mikuli iiyungizidwe yamulimo.
2 Ikusyomeka kwa mwaapostolo Paulo kwakalumbulwa kwiinda mukupegwa mulimo wakamutola mumadolopo alimwi amuminzi yaku Europe alimwi a Asiya Maina. (1 Tim. 1:12) Nokuba kuti kusolekesya kwakali kuyandika kumanizya mulimo oyo, Paulo wakaulemeka kapati mukuli ngwaakatambula. (Rom. 11:13; Kol. 1:25) Wakatondezya kulumba kwini-kwini kwiinda mukulangaula zyoolwe zyakukambauka. Kwiinda mukusungwaala kwakwe wakatondezya lusyomo lwakwe kwiinda mumilimo. Cikonzyanyo cakwe citupa kuti katwiiyanda kapati mikuli yamulimo wesu.
3 Jehova Watupa Mulimo: Ino tucitondezya buti ciimo cakulanga mukuli oyu uulongezyedwe mbuli mbwaakatondezya Paulo? Tulalangaula nzila zyakuyungizya lubazu ndotutola mumulimo. Tulacibelesya ciindi coonse ikucita bumboni bwamukwiizya antoomwe abwakumulyango amulyango. Tulapilukila kuli baabo boonse mbotutajani aŋanda alimwi akuli baabo bayanda kwiiya. Alimwi tulasyomeka twamvwana kuti tuyooendelezya ziiyo zya Bbaibbele zyaaŋanda.
4 Kujatikizya mulimo wesu Paulo wakalailila kuti: “[M]ukambauke Makani lyoonse.” (2 Tim. 4:2) Icintu ciyandika kufwambaana ciyandika kubikkila maanu ndilyona. Sena tulaubeleka mulimo wesu munzila yakubinda, ikuubikka mubusena bwakusaanguna mubuumi bwesu? Mucikonzyanyo, tatukonzyi kulekela kulikondelezya alimwi azyakuyandaula zyesu buyo zyakumamanino aansondo kuti zinyonganye ciindi ncotweelede kubeleka mulimo wamumuunda. Mbwaanga twasinizya buya kuti mamanino aabweende obu alafwambaana kusika, twasinizya akuti ikukambauka makani mabotu aa Bwami ngomulimo uuyandika kapati ngotukonzya kucita.
5 Ikusyomeka kwesu kuli Leza kulatondezyegwa kwiinda mukusyomeka kulinguwe akubeleka mulimo ngwatupede lyoonse. Atumanizye mulimo wesu kutegwa Jehova akalumbule lusyomo lwesu munzila iinda.