Amubagwasye Bambi Kujana Luumbulizyo
1 Ibantu banji bakatala buya kumvwa makani aajatikizya ntenda, nkondo, milandu alimwi akupenga. Iluumbulizyo lwalo lutalimvwisyi mumalipooti aamakani sunu, ncintu ncobayandika ncobeni bantu. Ikuumbulizya caamba “ikuyumya-yumya akupa bulangizi” alimwi “akuubya-ubya buumba naa penzi” lyaumwi. Mbotuli Bakamboni ba Jehova tulilibambilide ikugwasya bantu munzila eyi. (2 Kor. 1:3, 4) Imabroshuwa aajisi makani aa Bbaibbele ngotunoomwaya mumwezi wa July a August ajisi milumbe yakasimpe yuumbulizya. (Rom. 15:4) Nzyeezi nzila zimwi zyakwaamwaya mubukkale bwaandeene-andeene:
2 Makani aantenda aakankamanisya alakonzya kupa coolwe cakupa bumboni akuleta luumbulizyo kulibamwi antela kwiinda mukwaambaula kwanu munzila eyi:
◼ “Iciindi zintu zili boobu nozicitika, bamwi balakankamana kuti naa Leza nkwali ncobeni, naa kaliko, ikuti naa ulatulanganya. Muyeeya buti? [Amulindile kwiingula.] Inzila imwi yakubonena kuti naa Leza nkwali nkwiinda mukubelesya njiisyo imwi iizibidwe kabotu.” Amubale bbuku lya Ba-Hebrayo 3:4. Amwaambe azintu zimwi zituzingulukide zyalo zyakali kuyandika ncobeni mulengi. Mpoonya amuzumanane akuti: “Ndilijisi broshuwa njendizi kuti ilamuumbulizya. Ilaa mutwe wakuti, Sena Ncobeni Leza Ulatulanganya? [Amubale mibuzyo iili atala lyabroshuwa.] Lijisi lusinizyo ikutali buyo lwakuti Leza nkwali pele akuti lino-lino uyooleta mamanino kubukkale boonse butaluleme mbotuli ambubo sunu. Sena mulayanda kwiibala?” Amumvwane kuti mukapilukile.
3 Mwapilukila mulakonzya kwaamba kuti:
◼ “Twakali kubandika kujatikizya zintu zitondezya kuti Leza nkwali ciindi nondakamusiila broshuwa yakuti Sena Ncobeni Leza Ulatulanganya? Antela mwaakabona kaambo aka kali kupeeji 7. [Amutondezye cifwanikiso akukosaula-kosaula kwaamba muncali wa 15.] Eci ncitondezyo cimwi icitondezya kuti Leza uulanganya uleelede kuti kaliko. [Amubale muncali wa 27 apeeji 9.] Iciiyo cangu cakwiiya Bbaibbele candigwasya kukonzya mapenzi aabuzubaa buzuba nkaambo cindipa kulanga zintu mbuli mbwazilanga Leza.” Amulombe kutondezya mbotwiiya.
4 Bukambausi bwaaluwaile bulakonzya kucitwa kubelesya broshuwa ya “Ino Buumi Bujisi Mulimo Nzi—Mbubuti Mbomunga Mwabujana?” Mulakonzya kutalika akwaamba kuti:
◼ “Ndamutumina kuti ndimwaambile makani aayandika kapati nkaambo tandikonzyi kuboola buya kuzyoomubona.” Amubale muncali wakusaanguna apeeji 4 mubroshuwa kamucita obo mbuli kuti mwaambaula buya amuntu oyo kamulangene. Amumubuzye mbuli mbwayeeya akulindila kwiingula. “Ibbaibbele lyangu lilijulidwe kubbuku lya Isaya 45:18. Aka kapango katondezya kuti inyika yakalengelwa ndiswe. Sena inga ndamubalila?” Mwamana amupandulule mulimo wabroshuwa akubuzya mbomukonzya kwiitola kkopi.
5 Mwatuma lwabili mulakonzya kusoleka nzila eyi kutalisya ciiyo:
◼ “Ndiyanda kutobelanya mubandi wesu waciindi cakamana kwiinda mukutondezya uunga watwaambila mulimo wabuumi. [Amwaambe mumajwi aanu makani aali mumincali 1 a 2 apeeji 6 mubroshuwa ya Mulimo Wabuumi.] Ibbuku lya Ciyubunuzyo 4:11 lilapandulula kuti Jehova Leza ngo Mulengi wesu. [Amubale.] Masimpe weelede kuti wakalijisi kaambo ncaakatulengela. Ibantu balikuyanda kuuziba baiya Jwi lya Leza lyakalembwa, Ibbaibbele. Ndiyanda kumupa coolwe eco.” Amupandulule ciiyo ca Bbaibbele caaŋanda citabbadelwi mbocicitwa alimwi amumvwane kutalika ciiyo.
6 Eyi nzila iikulwaizya ilakonzya kuumbulizya baabo bakafwidwa kale muyandwa wabo:
◼ “Ndiyaabucita mulimo wabuleya kuli boonse bakasweekelwa bayandwa babo mulufwu. Akaambo kakuti eci cilakonzya kacili cimwi cazintu ziyumu umwi aumwi ncakonzya kuzibila, eyi broshuwa ncoyakabambilwa yakuti, Ciindi Muntu Ngomuyanda Nafwa. Yagwasya mamiliyoni aabantu. Ndiyanda kumutondezya ncoyaamba kujatikizya cisyomezyo cikkomanisya ncaakaamba Jesu Kristo. [Amubale muncali wasanu apeeji 26 kubikkilizya abbuku lya Johane 5:21, 28, 29.] Amulange cifwanikiso apeeji 29 citondezya Makani Mabotu aa Jesu mpaakabusya Lazaro kuzwa kubafwu. Ikuti kamuyanda kwiibala broshuwa eyi yuumbulizya inga ndakkomana kumusiila.”
7 Mwapilukila mulakonzya kutondezya cifwanikiso cilaa peeji 29 alimwi mubroshuwa ya “Ciindi Muntu Ngomuyanda Nafwa” akwaamba kuti:
◼ “Amuyeeye mubandi wesu uujatikizya Kristo mpaakabusya Lazaro. [Amubale majwi aasindikizya cifwanikiso apeeji 28 akulanga-langa makani aali amutwe wakuti “Sena Cakacitika Ncobeni?”] Ikuti naa moyo wanu ulombozya kusyoma kuti muyoomubona alimwi muyandwa wanu uufwide, andimugwasye kubaa lusyomo mubulangizi bwabubuke.” Amulombe kutalisya ciiyo ca Bbaibbele.
8 Atusolekesye mumyezi eyi iiboola kumbele kumwiiya Jesu kwiinda ‘mukuumbulizya boonse balila.’—Is. 61:2.