Miswaangano Ibusya Luyando Lwakucita Milimo Mibotu
1 Izintu zyobile ziyandika kapati mubukombi bwesu nkuswaangana mumiswaangano yambungano alimwi akutola lubazu mumulimo wakukambauka. Izintu eezi zyobile zyeendela antoomwe. Zilagwasyanya. Miswaangano ya Bunakristo ibusya luyando lwakucita milimo mibotu, mulimo mubotu kwiinda yoonse ngwakukambauka makani aa Bwami akugwasya bantu kuba basiciiya. (Heb. 10:24) Ikuti naa twaleka kuswaangana, talikoolampa inga twaleka kukambauka nkaambo luyando lwesu lwakukambauka talukoobusigwa pe.
2 Kumiswaangano yansondo ansondo, tutambula malailile aazintu zyakumuuya aakuti atubusye tukambauke. Kumiswaangano tulayeezegwa kuti mazuba ngotukkede mmazuba aakatazya, eci citupa kuti tukambauke mulumbe wa Bbaibbele wabuumi kubantu. Tulakulwaizigwa akuyumizigwa kuliyumya mumulimo wakukambauka. (Mt. 24:13, 14) Kwiinda mukwiingula notwapegwa ciindi cakucita boobo kumiswaangano, tulazibila kulungulula zyalusyomo lwesu kubantu. (Heb. 10:23) Ikulilembya mu Cikolo Camulimo Wateokrasi kulatugwasya kutambula lwiiyo ilutitupe kuba balanda babotu alimwi abamayi babotu.—2 Tim. 4:2.
3 Miswaangano Yamulimo Mboibusya Luyando Lwesu Lwakukambauka: Toonse tukulwaizigwa kulangila-langila limwi makani aamu Mulimo Wesu Wabwami ciindi camuswaangano nocitanasika. Eeci cipa kuti makani akkalikile mumizeezo notuli ku Muswaangano Wamulimo akubona zitondezyo nozicitika aacibumbili. Ciindi notuli mumulimo wamumuunda, tulakonzya kuyeeya ncotwakaiya mu Mulimo Wesu Wabwami, tulayeeya zitondezyo zyakacitwa, elyo eci cilatugwasya kubupa kabotu bukamboni bwesu. Eeci ncecagwasya basikumwaya banji.
4 Bamwi mukusola kubelesya nzyobakaiya ku Muswaangano Wamulimo, bapangana abambi kuti bakabelekele antoomwe mumuunda. Basikumwaya baciyeeya twaambo tujatikizya malaililile aamumuunda ngobakatambula, elyo bayanda kusola kwaabelesya malailile ayo nkaambo miswaangano eyi yabakulwaizya kutola lubazu mumulimo wakukambauka nsondo ansondo.
5 Kunyina ceelede kutola busena bwamiswaangano ya Bunakristo, njotuswaangana antoomwe abakombima, nkotubusigwa kubaa luyandisisyo lwakucita milimo mibotu. Ikuti katuyanda kuti mulimo wesu uzwidilile, tweelede lyoonse katuswaangana. Atutondezye kuti tulacikkomanina cipego eci ncaakatupa Jehova camiswaangano kwiinda ‘mukutaleka kulibunga-bunga antoomwe.’—Heb. 10:25.