Mulumbe Mubotu Uujatikizya Internet

Muciindi cino calusumpuko mumilimo yasayaansi, bamwi bantu balatambula makani kwiinda mumakkompyuta, ikubikkilizya a Internet (inzila yakutambikizyanya makani kwiinda mumakkompyuta aaswaanganizidwe nyika yoonse mbwiizulwa). Iba Sosaiti aboobo babikka makani mu Internet aapandulula kabotu milimo ya Bakamboni ba Jehova alimwi alusyomo lwabo.

Ikkeyala yakkompyuta naa njobati Web site njotumwaila makani eesu aa Internet ngu http://www.watchtower.org, aawa kujanika zibalo zyamutupepa twamakani naa tumatulakiti tusiyene-siyene, imabroshuwa, zibalo zya Ngazi Yamulindizi alimwi a Awake! zyamu Cingisi, ci Chainizi (Cuuba-uba), ci Jelemani, ci Russia, alimwi aci Spanish kubikkilizya amumisyobo imbi. Mabbuku aajanika aakkeyala eyi nkwaali kale mumbungano alimwi alabelesegwa mumulimo wakukambauka. Ikaambo ncotubelesya nzila eyi nkuyanda kugwasya banamaleya kubala makani kwiinda mumakkompyuta ikutali kumwaya mabbuku mapya. Taakwe muntu uuyandika kulemba makani aajatikizya ndiswe to Bakamboni ba Jehova, milimo yesu, naa lusyomo lwesu, aakuti abikkwe mu Internet. Kufwumbwa muntu uuyanda, ulakonzya kujana makani aaluzi aawa akkeyala yakkompyuta njotumwaila makani.

Nokuba kuti tacikonzeki kutambikizya makani kwiinda mukkompyuta (E-mail) kubelesya kkeyala eyi, kubikkidwe mulongo wamakkeyala aamitabi munyika yoonse mbwiizulwa. Kwiinda mukubelesya makkeyala aya, bantu balakonzya kulemba magwalo aakulomba kumvwa makani aambi naa lugwasyo kuli Bakamboni ibamucisi. Mutayoowi kupa kkeyala eyi ya Internet kumuntu uli woonse uulangilwa kuti inga wayanda kutalika kwiiya kasimpe kamu Bbaibbele kwiinda munzila eyi.