Imakani Aagwasya Buleya

Ibanakristo beni-beni balatola lubazu mukumwaya makani mabotu mumulimo wakubuleya. (Flp. 2:17) Ikutegwa bazuzikizye mulimo ooyo, mabroshuwa aapandulula zintu zyantalisyo, matulakiti alimwi azibalo mumilaka iili 20 zyabikkwa a Internet akkeyala ya www.watchtower.org. Kkeyala eeyi taili yakumwaila mabbuku mapya kuli Bakamboni ba Jehova pe. Imulimo mupati wakkeyala eeyi ngwakuzyibya buleya makani aakasimpe aajatikizya nzyobayiisya kuzwa mu Bbaibbele Bakamboni ba Jehova.

Caino-ino aawa, kwakabikkwa mabbuku aambi kukkeyala yesu. Nkubikkwa kwabroshuwa ya Ncinzi Leza Ncayanda Kulindiswe? mumilaka yiinda ku 220. Alimwi kutalikila ku Ngazi Yamulindizi ya January 1 alimwi a Galamukani! ya January 8, 2004, mumilaka yoonse kunootondezyegwa Kkeyala yesu yaakkompyuta ya Internet apeeji lyamamanino.

Ino mbuti mbomukonzya kucibelesya cibelesyo eeci? Mulakonzya kuyaanya muntu uujisi luyandisisyo, pele uumvwa buyo mulaka uumbi. Ikuti kajisi muncini wakkompyuta wa Internet, inga mwamutondezya kkeyala kumamanino kwapeeji ya Ngazi Yamulindizi naa Galamukani! Munzila eeyo, ulakonzya kulingaula broshuwa ya Ncayanda mumulaka wakwe kusikila leelyo nomuya kupiluka kumutolela mabbuku mumulaka wakwe. Ambweni mulakonzya kwaambila bamu mbungano naa inkamu iilanganya bantu bamu mulaka wakwe.