Ibalangizi Basololela—Imulangizi Wamulimo
1 Imulangizi wamulimo ubikkila maanu kapati kuzintu zyoonse zijatikizya kuyaambele kwamulimo wakukambauka mucilawo cipedwe mbungano imwi aimwi. Aboobo ulaalubazu lupati mukutugwasilizya kuzuzikizya mukuli wesu wakukambauka makani mabotu. Mbwaanga mmukambausi munkutwe, ulasololela mukweendelezya makani oonse aajatikizya mulimo. Alimwi mbwaanga mmwiiyi weelede, ulagwasilizya sikumwaya umwi aumwi kuti azwidilile mumulimo.—Ef. 4:11, 12.
2 Imwaalu oyu nguuyendelezya mulimo wabakutausi ibapedwe mikuli yakulanga mabbuku, mamagazini alimwi azilawo zibelekelwa. Nguubona kwaamba kuti mweezi amweezi imabbuku, mamagazini alimwi amafoomu aamumulimo aayandika kubelesyegwa nkwaali.
3 Imulangizi wamulimo ulaa mukuli wakulanganya zibeela zyakukambauka ziindene-indene, kubikkilizyaa bukambausi bwamumasena aamakwebo, mumigwagwa alimwi abwaaluwaile. Ubona kwaamba kuti wayendelezya bubambe ibugwasya bwamiswaangano yamumulimo mumvwiki yoonse mbwiizulwa, kubikkilizyaa mazuba aakulyookezya. Ulayandisisya kuzyiba mboweenda mulimo waziiyo zya Bbaibbele. Ulajana inzila zyakuti ape lugwasyo munzila yakumuuya kuli baabo ibasotauka-sotauka naa ibanga bacilekela limwi kutola lubazu mumulimo. Ulabikkila maanu kapati kumulimo wabapainiya, alimwi ngomulangizi wapulogilamu ya Ibapainiya Bagwasilizya Bamwi.
4 Mbwali umwi wa Kkomitii Yambungano Yamulimo, imulangizi wamulimo ulapa mizeezo kufwumbwa iiyandika yakucinca tukamu twa Ciiyo Cabbuku Cambungano. Iciindi naswaya kabunga kanu, amubone kwaamba kuti mwajanika alimwi mwatola lubazu anguwe mumulimo wamumuunda.
5 Boonse mumbungano beelede kubelekelaamwi cakulisungula abusolozi ibupegwaa mulangizi wamulimo. Eci ciyootugwasya kuyungizya luzibo lwesu akuzwidilila mumulimo wakugwasya bamwi kuba basikwiiya alimwi akujana lukkomano lunji mumulimo wesu.