Ikulibambilila Limwi Kuletela Lukkomano
1 Ikutola lubazu mumulimo wamumuunda cilatukkomanisya kapati. (Int. 89:15, 16) Ikulibambila cilayandika kutegwa tube aalukkomano olu. Ikuti naa twalibambila kabotu, tulacita kabotu, elyo twacita kabotu, tulakkomana kapati.
2 Amubelesye Zibelesyo Nzyomupedwe: Amutalike kulibambila kwiinda mukubala akwaayeeyesya makani aali mu Mulimo Wesu Wabwami. Ikanjikanji muli ntalisyo zyamakani izyakacitwa kabotu izibambilidwe kumugwasya kukanana mulumbe wa Bwami munzila nguba-uba iibeleka kabotu. Mulajana zikozyanyo zyambokwiingulwa majwi aazizilwe aatyompya mibandi. Kulapegwa malailile aambokucitwa nyendo zyakupilukila zigwasya kamujisi makanze aakutalisya ciiyo ca Bbaibbele. Mulaangulukide kwaabikka munzila nguba-uba malailile aaya kutegwa abe mbuli mbomwaayanda. Kunze lyaceeci, kuli bbuku lya Kukambitsirana za M’malemba ilijisi ntalisyo zinji ziindene-indene alimwi atwaambo tutondezya mbobavwiilwa basikutyompya mibandi. Ezi inga zyamugwasya kuziba ncomunga mwacita muziimo zyaandeene-andeene momunga mwalijana.
3 Amulange-lange bbuku ndyomunoomwaya, mubweze kaambo komwe naa tobile itukondelezya ntomunga mwatondezya siŋanda. Ikaambo kapa kuzinzibala kuyeeya nkomwakamvwa naa nkomwakabala inga kamujulila mulyango wakutalisya mubandi. Amulangile twaambo tutyompya mibandi ituzizilwe ntomunga mwajana, mpoonya amuyeeye twaambo tusyoonto twambomunga mwayingula. Kuzwawaawo amulibambile kwamaminiti masyoonto nzyomutiikaambe mwaakusika amulyango.
4 Kamujanika Kumiswaangano Yamulimo Yoonse: Amuswiililisye ciindi ca Muswaangano Wamulimo malailile aali mu Mulimo Wesu Wabwami naabandikwa, akwiindululwa alimwi anokucitwa zitondezyo. Amulembe twaambo ntomuyeeya kuti inga mwabikkilizya muntalisyo yanu yamakani. Amuyeeye ziimo zimwi nzyomwaaswaanganya mumulimo wamumuunda, akuyeeya nzila zimwi nzyomunga mwakambauka kabotu. Amuzibandike zintu ezi abasikumwaya bambi kautanatalika muswaangano alimwi anowamana.
5 Ikuti “kamulibambilide mumilimo mibotu yoonse,” muyookkomana kapati alimwi akuzwidilila kugwasya bamwi kujana nzila iipa buumi.—2 Tim. 2:21.